කර්තෘට ලියන්න | මුද්‍රණය සඳහා

 
නුතන චීනය මෙතැනින් කොතනට ද?

පසුගිය සතිය හා බැඳේ

වැඩවසම්වාදයෙන් සමාජවාදයට; සමාජවාදයෙන් ලිබරල්වාදයට;

නුතන චීනය මෙතැනින් කොතනට ද?

කෙමෙන් ආහාර ගැනීම ඇරඹීමත් සමගම ෂින් මින් මහතා ඉල්ලා සිටියේ සියලු දෙනාම තමන් හා මධුවිතක් ගැනීමට එක්වෙමින් චාරිත්‍රානුකූලව සතුට හා සුහදතාව පළ කළ යුතු බවය. මෙහිදී මෙතෙක් වේලා සියලු පරිවර්තන කටයුතුවලින් අප දෙපාර්ශ්වයේ සබඳතාවන් ගොඩනැඟූ ආචාර්ය හව් වේ මින් මහතා ඉදිරිපත්වෙමින් ව්‍යාපාරිකයාට පවසා සිටියේ කාන්තාවන් එවැනි සුරාපානය කිරීමේ කටයුතුවලට සහභාගි වීම ශ්‍රී ලංකාවේ සිරිතක් නොවන බවයි. ව්‍යාපාරිකයා සිනාමුසුව එම සිරිතට ඉඩ හරිමින් ඇය පමණක් නොව අප සමඟ එහි ගිය කාන්තා පක්ෂයට සිසිල් බීම පානයෙන් සුබ පැතීමේ කාර්යයේ යෙදීමට අවකාශ ලබා දුන්නේය.

චිනයේ ආහාර ගැනීමේ සංස්කෘතිය වෙනමම කතා කළ යුතු දෙයක් වන්නේය. පැය දෙක තුනක් තිස්සේ සිදුවන ඒ ආහාර ගැනීම පුදුමාකාරය. එසේම ආහාරවල අන්තර්ගතය හා ස්වරූපයද පුදුමාකාරය. පිසිණු ලැබ තිබූ මස් වර්ග සියල්ල මොනයම් වූ ආකාරයකින් හෝ ශාක ආහාරයකට සම්බන්ධය. කුකුළාගේ සම හිස මෙන්ම දෙපාද ආහාර සඳහා එලෙසින්ම පිස සකස්කොට ආහාර බඳුන්වල තිබෙනු දක්නා ලැබේ. සෑම එළවළු වර්ගයක්ම මස් මාංශ සමඟ සම්බන්ධතා දක්වයි. එක්කෝ මස්වලින් එළවළුව අලංකාර කොට තිබේ.

ජයසූරිය මහතා කිසියම් භාණ්ඩයක අවශ්‍යතාව ගැන ගෙනහැර දැක්වූ විස්තරය තමා හොඳින් අසා සිටිය බවත් ඒ කරුණු තම ව්‍යාපාරයේ ඉදිරිකටයුතු වෙනුවෙන් ප්‍රයෝජනය පිණිස තරව සටහන් කරගන්නා බවත් පැවසූ ව්‍යාපාරිකයා ඒ මොහොතෙහිම තම විදුලි සෝපන ශ්‍රි ලංකාවේ අලෙවි කිරීම පිණිස ගම්පහ සංවර්ධන සමාගමට බලය ලබා දෙන ද්වි පාක්ෂික වෙළෙඳ ගිවිසුමකට මහත් ප්‍රබෝධයකින් යුතුව අත්සන් තැබුවේය. එසේම ගම්පහ සංවර්ධන සමාගමේ අධ්‍යාපන අංශය මගින් විදුලි සෝපාන තැනීමේ තාක්ෂණ පාඨමාලාවක් ආරම්භ කිරීමට අවශ්‍ය සහෘය ලබා දෙන බව ප්‍රකාශ කර සිටියේය.

චීනය මෑත භාගයේ ඉතා ක්ෂණික සංවර්ධනයක් කරා යොමු වෙමින් ලොව ප්‍රධාන පෙළේ බලවතකු බවට පත්ව හමාරය. සමහරවිට චීන බලවතාගේ කාර්මික හා තාක්ෂණ ඥානය අන් රටවලින් ලබාගන්නා කාර්මික හා තාක්ෂණික ඥානයට වඩා මෙරටට උචිත ප්‍රායෝගික එකක් (Appropriate Technology) විය හැකි යැයි ජයසූරිය මහතා සිතුවා විය හැකිය. ඇත්ත වශයෙන්ම ඔහු එම චීන නිරීක්ෂණ චාරිකාව ආරම්භ කළේ පළමුවෙන්ම යුනාන් දිස්ත්‍රික්කයේ පිහිටා ඇති සිප්සුන්පන්නා වෘත්තීය හා කාර්මික විද්‍යාලය වෙත යාමෙනි. එය යුනාන් ප්‍රදේශයේ පිහිටි ප්‍රකට සිප්හලකි. විදේශ භාෂාවන් ඉගැන්වීම, කෘෂිකර්ම විද්‍යාව, වෛද්‍ය විද්‍යාව, ආර්ථික විද්‍යාව හා සංචාරක කර්මාන්තය මෙන්ම කලාව හා සෞන්දර්ය විද්‍යාවන් පිළිබඳ ද මෙහි ඉගැනිවීම් කරනු ලැබේ.

පසුදින අප පැමිණියේ හොන්හේ විශ්ව විද්‍යාලයටය. විශ්ව විද්‍යාල ප්‍රධානීහු අප සාදරයෙන් පිළිගත්හ. . ආසියානු කෘෂි තාක්ෂණය පිළිබඳ අවබෝධයක් ලබාගැනීම සඳහා චීන හා සිංහල භාෂා දැනුම හුවමාරුව ඔස්සේ විශේෂ මෙහෙවරක් ඉටු කළ හැකි බව එහිදී සාකච්ඡාවට ලක්විණ.

චීනයේ යුන්නාන් පළාත වූ කලි කි.මී 4060 සහිත චීනයේ දිගම වෙරළ තීරය සහිත ප්‍රදේශය වෙයි. ආචාර්ය හවුවේ මින් මහතාගේ පර්යේෂණවලට අනුව චීනයේ වැඩිම ථෙරවාද බෞද්ධ ජනගහනය වාසය කරන්නේද මේ පළාතේ පිහිටි සිප්සුන්පන්නා ප්‍රදේශයේය. මෙය චීන තායි ජාතිකයන්ගේ ස්වයංපාලන දිස්ති‍්‍රික්කයකි. මෙහි ජාතික අනන්‍යතාවයේ සංකේතයක් ලෙසින් සැලකෙන්නේ භික්ෂුන් වහන්සේය.

සිප්සුන්පන්නාහි බෞද්ධ ආරාම නැරඹීම සඳහා යාමේදි එහි වැඩ වසන එක් තරුණ උප විහාරාධිපති වහන්සේ නමක් අපට මුණ ගැසිණ. උන්වහන්සේ මුහුණ නිතර ප්‍රසන්න සිනාවකින් යුක්තය. කැලණිය විශ්ව විද්‍යාලයේ ටික කලක් ථේරවාදී බුදු දහම හදාරමින් සිටි උන්වහන්සේට තවමත් සිංහල වචන කිහිපයක් මතක බව පැහැදිලිය.

"හරි .හරි උඩට යනවා. මහන්සි ඉවරවෙනව. උඩ නඟින්ඩ ඕනැ." ආදි වචන පවසමින් භික්ෂූන් වහන්සේ ආරාමයට අප රැගෙන යාම සඳහා ආරාමය සතු,විදුලිබලයෙන් දුවන විශාල විවෘත වාහනයක් ගෙන්වා අප ඉදිරියේ නැවැත්වූහ. අපි සියලු දෙනා එම වාහනයට නැඟ ගතිමු. සිංහල ටිකක් දන්නා බව හැඟවීම උන්වහන්සේ ආඩම්බරයට කරුණක් ලෙසින් සිතන බව පෙනිණි. වාහනය කන්ද උඩ පිහිටි විසල් ආරාමයක් වෙත පැමිණිවිට උන්වහන්සේ රිය නතර කළහ. ඒ සමගම අපට දකින්නට ලැබුණේ මහල් ආරාමයේ කුටි තුළට වී පිරිත් සජ්ජායනයට හා බණ පොත් හඬනඟා කීමට පුරුදු වන සාමණේර වහන්සේලාය. මිදුලේ පනවා ඇති සමූහ ආසන මත හිඳිමින් සමහරු චීන බසින් ලියැවුණ දහම් පොත් පාඩම් කරති.

ඉක්බිතිව තරුණ භික්ෂූන් වහන්සේ සිය නායක හිමියන්ද කැටිව අප සමග විහාරස්ථාන වෙත යමින් පවසන නොයෙකුත් තොරතුරු හවුවේ මින් මහතා අපට පැහැදිලි සිංහලෙන් කියාදෙයි. සවස් යාමයේ කෙරුණු මේ ධර්ම සාකච්ඡාවේ ප්‍රතිඵලය වූයේ ලලිත ජයසූරිය මහතාගෙන් කෙරුණ එක්තරා යෝජනාවකට නායක භික්ෂූන් වහන්සේ ඇතුළු පිරිසගෙන් අනුමැතිය ලැබීමය. යෝජනාව වූයේ සිංහලෙන් ලියැවුණ ථූප වංශය හා දළදා සිිරිත චීන බසට පරිවර්තනය කිරීමට අවශ්‍ය කටයුතු යෙදීම ගැනය.

මාඕ සේතුං තුමාගෙන් තොරව චීනයක් ගැන කතා කළ නොහැකිය. චීනය යනු එතුමාය. එය චීන විද්වතුන් මෙන්ම සාමාන්‍ය ජනායා ඇසුරින් මනාව ප්‍රත්‍යක්ෂ වූවකි. චීනය මේ වන විට බටහිර දෙසට වඩාත් විවෘතව තිබෙන බව සමහර විචාරකයෝ පවසති. නව චීනයේ නිදහස් ආර්ථික ප්‍රතිපත්ති හා චීන ජනතාවගේ වේගවත් බටහිර කරණය මෙයට උදාහරණ ලෙසින් සමහරු පෙන්වා දෙති. ඇත්ත වශයෙන්ම චීන නාගරික ජන ජීවිතය සුඛෝපභෝගිත්වය අතින් ඇමෙරිකානු හෝ බටහිර රටක ජන ජීවිතයට වඩා වෙනස් බවක් නම් නොපෙනෙයි. ඇමෙරිකානු හා බටහිර අවන්හල් නගරයේ සමහර තැනක දක්නට ඇත. එහෙත් බටහිරදී මෙන් සමාජශාලා හෝ සුරාසැල් තැන තැන දකින්නට නැත. චීන තරුණියෝ ඇමෙරිකානු පන්නයේ ඩෙනිම් කලිසම්වලින් හා ජැකට්ටුවලින් සැරසී සිටිති.

ඒවා බොහෝ විට චීන නිෂ්පාදනයන්ය. සමහරු බටහිර චිත්‍රපට නැරඹීමට ආසා කරති. එහෙත් මේ තත්ත්වය නගරයෙන් ඈතට යන විට වෙනස් වන බව මෙරටින් චීනයට ගොස් සිටින දෙතුන් දෙනෙක් අප හා පැවසූහ. ඔවුන්ට අනුව ගම්බද ජනතාව බටහිර චිත්‍රපට නැරඹීමට අකමැතිය. ඊට හේතු වන්නේ එම චිත්‍රපටවල දක්නට ලැබෙන ක්ෂණික ඡේදනයන් අන්තර් ඡේදනයන් හා වේගවත් ගලායාම් ඔවුන්ගේ ඔවුන්ගේ සිතට අල්ලන්නේ නැතිකමය. එහෙයින් බොහෝ දෙනා සරල කතා පුවත් සහිත මන්දගාමී චිත්‍රපට නරඹා විනෝද වෙති.

රජයේ නිලධාරීන්ගේ සේවාව ජනතාවගේ යහපත කෙරෙහි වැඩි වැඩියෙන් යොමුකරවීම රජයේ අරමුණය. වර්තමාන චීන ජනාධිපති ෂි් ජින් ජින් මහතාගේ තදබල ප්‍රතිසංස්කරණ ඔස්සේ දුෂිත නිලධාරීන් එම තනතුරු වලින් ඉවත් කිරීමේ වැඩපිළිවෙළක් අරඹා තිබේ. එසේම පාලකයන්ගේ හා ජනතාවගේ අවධානය පෙරටත් වඩා මාඕ සේතුං චින්තනය කෙරෙහි යොමුව ඇති බව අපට දැක ගන්ට ලැබුණ විශේෂ ලක්ෂණයකි. දකුණු චීන මායිමේ ෂාඕ ෂාන් පළාතේ පිහිටි මාඕ සේතුං උපන් ගම පෙදෙස ඒ ආකාරයෙන්ම සංරක්ෂණය කොට දැවැන්ත කෞතුකාගාරයක් ලෙසින් ස්ථාපනය කොට තිබේ. එම පෙදෙස නැරඹිමට විශාල පිරිසක් නිතර පැමිණෙති. මිනිසා සිතන්නේ කෙසේද? කලාව හා සාහිත්‍ය පිළිබඳ සිතිවිලි පහළවන්නේ කුමන ආකාරයෙන්ද යන වග එතුමා සිය චින්තනයේ අන්තර්ගත කොට ඇත්තේ ඉතාමත් ප්‍රායෝගික ලෙසින් බව එතුමා ජීවත්වූ එම ගම් ප්‍රදේශය හා වටපිටාව දැකගැනීමෙන් කෙනෙකුට තීරණය කළ හැකිය.

දැඩි ලෙස වැඩවසම් පාලනයකින් හීලෑකරනු ලැබ සිටි ජනතාවකට ස්වශක්තියෙන් නැඟී සිටිමින් තමන්ගේ පාලන ක්‍රමයක් ගොඩනඟා ගැනීමට මගපෙන්වූ මේ වීරෝධාර පුද්ගලයට බුහුමන් දැක්වීම පිණිස එතුමන්ගේ දැවැන්ත පිළිරුව අසලට වැල නොකැඩී ඇදී එන ජන ගඟ දැකීමෙන් අපි විස්මයටත් සතුටටත් පත්විමූ. ඇත්ත වශයෙන්ම කිවහොත් මේ චීන සංචාරයේ මහා පොදු සාධකය වූයේ මාඕ සේතුං තුමාය. මාඕ සේතුං වෙනුවෙන් සිය ජීවිත කාලය කැපකරමින් සිටින අනූ වැනි වියේ පසුවන තවමත් ක්‍රියාශීලි වියපත් කාන්තාව හමුවේදී මෙන්ම හොන්හේ විශ්වවිද්‍යාලය් උපකුලපති හා පීඨාධිපතිවරුන් හමුවේදීද මෙය වඩාත් පැහැදිලි විය.

චෙංගාෂා ප්‍රදේශයේ ෂියෑං ගඟ අසබඩ පිහිටි හුනාන් විශ්වවිද්‍යාලය ක්‍රිස්තු වර්ෂ 976 දී පැවතියේ ප්‍රකට හමුදා ශාස්ත්‍රාලයක් වශයෙනි. 1926 දී විශ්වවිද්‍යාලයක් බවට පත්වූ එය අද වන විට සිසු සිසුවියන් තිස්දාහකින් හා ආචාර්යවරුන් හාරදහස් හයසීයකින් සමන්විතය. අක්කර සිය ගණනක් පුරා විසිරුණු සුන්දර භූමිභාගයක පිහිටා ඇති මෙහි විවිධ විෂය පීඨයන් ප්‍රමාණයෙන් 2000කට ආසන්නය. දහසකට වැඩි විදෙස් සිසු පිරිසක් මෙහි අධ්‍යාපනය හදාරති. ශ්‍රී ලාංකීක සිසුන් දෙදෙනකුද අපට එහිදී හමුවිය.

සණස අධ්‍යයන අංශ බාර ජයසුන්දර මහතාගෙන් එම විශ්වවිද්‍යාල අධිකාරිය වෙත ප්‍රශ්නයක් යොමු විණ. ඔහු විමසා සිටියේ මේ විශ්වවිද්‍යාලය මෙතරම් විශාල සිසු පිරිසක් අසීරුවකින් තොරව හසුරුවාගන්නේ කෙසේද යන්නයි. එහිදී ඔවුන් කියා සිටියේ සිසුන්ට ලබාදී ඇති විනය හා නිදහස ඔස්සේ එය සිදු කෙරෙනා බවය. එසේම මේ සිසුන්ට සිය අධ්‍යයන කාලය තුළ කිසිමාකාර ප්‍රශ්නයක් ඇති නොවන බවය. සිසු සිසුවියන් මෙතරම් විශාල සංඛ්‍යාවක් එකට ගැවසීමේදී කිසියම් ආනාචාරයන් ඇතිවන්ට අවස්ථා ලැබෙන්ට ඉඩ තිබෙනවා නොවෙදැයි කළ ඔහුගේ විමසීමට ලැබුණ ක්ෂණික පිළිතුර වූයේ විශ්වවිද්‍යාල භූමිය තුළ කිසි විටක එවැන්නක් සිදුවී ඇති බවට වාර්තාවී නැති බවය.

මේ සාකච්ඡාවල ප්‍රතිඵලයක් ලෙසින් චීන බස ඉගෙන ගැනීමට මෙරට සිසුන් කිහිපදෙනකු වෙනුවෙන් ශිෂ්‍යත්ව පිරිනැමීමටත් සිංහල ඉගෙන ගැනීම පිණිස චීන සිසුන් කිහිප දෙනකුට ශිෂ්‍යත්ව පිරිනැමීමටත් දෙපාර්ශ්වය අතර එකඟතාවක් ඇතිකර ගැනිණි. ඒ හැරුණ විට සණස සංවර්ධන සමාගමේ නිට්ටඹුව පිහිටි චීන භාෂා අධ්‍යයන අංශයෙහි චීන පොතපත හැදෑරීම පිණිස මෙන්ම චීනය ගැන ලියැවුණ සිංහල පොතපත හැදෑරීම පිණිසද වෙනම අංශයක් පිහිටුවීමට තීරණය කෙරිණ.

චීනයේදී අපට පොත් සාප්පු දැක ගන්ට නිසි අවස්ථාවක් නොමැතිවීමත් දුටු සෑම පොත් සාප්පුවක්ම පිරී චීන බසින් ලියවුණ පොත පතින් පමණක් පිරී තිබීම නිසාත් මට නිකමට මෙන් ගුවන් තොටුපොළේ පොත් හලක් කරා ගොස් බලන්නට සිතිණි. එහිද ඇත්තේ චීන බසින් ලියවුණ පොත්පත් හා සඟරා පමණක් බව පෙනිණි. ඕ. හෙන්රි නමැති ඇමෙරිකානු ලේඛකයාගේ කෙටිකතා පොතක චීන පරිවර්තනයක්, ෂේක්ස්පියර්ගේ හැම්ලට් හා තවත් නාටක දෙක තුනක චීන පරිවර්තනත් එහි විය. මේවා හඳුනාගැනීමට හැකිවූයේ ඉංග්‍රිසි බසින් කතුවරුන්ගේ නම් පිටකවරයේසඳහන් කර තිබීම නිසාය.

වෙනත් රටක හෝ වෙනත් සංස්කෘතියක ගති සිරිත් හා චර්යා රටාවන් ගැන දීර්ඝ හැදෑරීමක් සිදු නොකොට එකවරම තීරණයකට එළඹීම සාධරණවන්නේ නැත. එහෙත් චීන ජනතාව තුළ ආගන්තුකයන්ට දක්වන අසීමිත ගෞරව සත්කාරය, සිය වගකීම් නොපිරිහෙළා ඉටුකිරීම, කැපවීම හා නායකත්වයට ගරුකිරීම වැනි ගුණාංග වඩාත් කැපීපෙනෙන ලක්ෂණ බව කිවයුතුය. එසේම චීනයේ සංවර්ධනය කිසියම් දැක්මක් හා නිසි මඟ පෙන්වීමක් ඔස්සේ වේගයෙන් සිදුවන බව අපට පැහැදිලිය.

ගුවන්යානය පැමිණි බව ශබ්ද විකාශන යන්ත්‍රයෙන් නිවේදනය කිරීමත් සමඟම මගේ සිත නැවත ඇදී ගියේ ශ්‍රී ලංකාව වෙතය.


ලංකාවේ සීමාසහිත එක්සත් ප‍්‍රවෘත්ති පත‍්‍ර සමාගම
© 2017 සියලු හිමිකම් ඇවිරිණි.
ඔබගේ අදහස් හා යෝජනා අපි අගයන්නෙමු
webmanager@lakehouse.lk