විලේ ජලයෙන් මතු වූ අමුතු සත්තු! | සිළුමිණ

විලේ ජලයෙන් මතු වූ අමුතු සත්තු!

'විල් තෙරේදී' - බල්ගේරියානු ලේඛක ලුඩ්බොමීර් පීවෙස්කි (Lyubomir Peevaski)

1943 දී උපත ලැබූ මේ ලේඛකයා සොෆියා ලෙනින් විදුලි කාර්මික ආයතනයේ අධ්‍යාපනය ලැබුවේය. ඔහු සොෆියා ගුවන්විදුලියේ විනෝදාත්මක වැඩසටහන්වල නිෂ්පාදකවරයකු ලෙසද කටයුතු කළේය. ඔහුගේ නිර්මාණ රුසියන්, පෝලන්ත, චෙක්, රුමේනියානු, එස්තෝනියානු සහ ඉංග්‍රීසි භාෂාවලට පරිවර්තනය වී ඇත. අද සිට කොටස් වශයෙන් පළ වන්නේ ඔහු විසින් රචිත ‘විල් තෙරේදී‘ විද්‍යා ප්‍රබන්ධයයි.

මේ අතර මම ගිනිගොඩක් ගැසීම සඳහා දරකෝටු ටිකක් කඩාගැනීමට උත්සාහ කළෙමි. හදිසියේම විල කළු පාටට හැරුණු බව මට පෙනී ගියේය. විල තිබුණු ස්ථානයේ විශාල කළු පැල්ලමක් ඇත. මෙය දෘෂ්ටිමායාවකැයි මම මුලදී සිතුවෙමි; එසේත් නැති නම් වලාකුළක සෙවණැල්ලක් විය හැකිය. එහෙත් අහස ඉතා පැහැදිලිය. මම දූරේක්ෂය අතට ගතිමි. එවිට මගේ ඇස ගැසුණේ අතිවිශේෂ දර්ශනයකි. විලෙහි ජලය සෙලවිය නොහැකි පරිද්දෙන් මිදී ඇත. එහෙත් එහි මතුපිට යටින් රත් වන බව පෙනේ. මන්ද යත්: වරින් වර කුඩා බුබුළු මතුපිටට පැමිණ පිපිරී යන අයුරු පෙනෙන බැවිනි. තුනී මීදුමක් අහස පුරා පැතිර යයි.

කඳුකර විලෙහි විනිවිද පෙනෙන පැහැදිලි ජලයට සිදු වූයේ කුමක්ද? දියව ගිය අයිස් කුට්ටිය එය හඳුනාගත නොහැකි පරිදි වෙනස් කළේද? නො එසේ නම් එය අමුතු උපකරණයක්ද?

එහෙත් මට අනුමාන කරමින් සිටීමට කාලයක් නොවීය. මා ඇස් ඉදිරියේ වූ දර්ශනය ශීඝ්‍රයෙන් වෙනස් විය. මිනිත්තු කිහිපයකට පසු මා මවිතයට පත් කරවමින් විලේ ජලය මතුපිටින් කුඩා කෘමි විශේෂයක් වැහිවලාවක් මෙන් පැතිරෙන්නට වූහ. ජලයෙන් මතු වී එන බව පෙනුණු ඒ කෘමීහු විශාල කළු වලාවක් මෙන් කැලය උඩින් ගමන් කළහ.

ඉන් එකකු අල්ලාගැනීමටත්, ඌ සමීපයට ගෙන බැලීමටත් මම සමත් වීමි. මේ කෘමීන්ට පියාපත් නොවූ අතර, උන්ගේ කුඩා ශරීරවල පිටතට නෙරා ඇති අඬු විශාල සංඛ්‍යාවකින් එහෙමෙහ සැරිසැරූහ. උන් කිසියම් දෙයක් මත වැසූ විට උන්ගේ කුඩා අඬුවලින් තමන් ඉදිරියේ ඇති සෑම දෙයකටම විද, උරාගත්හ. උන්ගෙන් සමහරකු මාගේ සිරුරේ වැසූ අතර, හැකි වැර යොදා උන්ට එරෙහිව සටන් කිරීමට මට සිදු විය. උන්ගේ කුතූහලය මගේ මුහුණ රතු කිරීමටත්, සෑම තැනක්ම ඉදිමීමටත් හේතු විය. වාසනාවකට මෙන් සුළඟක් හමා උන් ඉවතට ගසාගෙන ගියේය.

නැවතත් මට හුරුපුරුදු ශබ්දය ඇසුණු අතර, අයිස් කුට්ටියෙන් හරිත වර්ණය දිලිසෙන අයුරු නැවතත් දක්නට හැකි විය.

මෙවර සංගීත රිද්මය අප්‍රසන්න විය. එය මැකී යන්නට පෙර අමුතු උපකරණයෙන් දීප්තිමත් රශ්මි ධාරාවක් නිකුත් විය. එය කෙළින්ම ඉහළ ආකාශයට එල්ල වූ අතර, තත්පර කිහිපයකට පසු එය නිවී ගියේය.

මේ මුළු කාලය තුළම විලේ ජලයෙන් විවිධ වර්ගයේ සත්තු නිකුත් වූහ. එබැවින් මට ඇත්තටම එයට තවදුරටත් විලයැයි කිව නොහැකිය.

සිහින් කෝටු කකුල් සහිත කටුස්සකුගේ වැනි පෙනීමක් ඇති සත්තු විල් ඉවුරේ ඇදී යන්නට වූහ. එහෙත් උහු බඩගා යනු වෙනුවට විදුලි වේගයෙන් පොළොවේ ඇදී යන්නට වූහ. මේ අමුතු සත්තු පස්, ගස්වැල්, සහ ගල් අතරින් අතුරුදන් වූහ. උහු උන්ගේ ශරීරවල උඩ කොටස පමණක් පහළට හරවා නිමේෂයකින් නොපෙනී ගියහ.

ඒ කටුස්සන් වැනි සතුන් පසුපස පුංචි අලි පැටවු වැනි සත්තු විලෙන් මතු වූහ. ඔව් ඔව්. මට එක්වරම එසේ කිව නොහැකිය. උහු සම්පූර්ණයෙන්ම අලින්ගේ හැඩරුව ගත්හ. එහෙත් හැමර්ස්ටන් සතුන් (මීයකුගේ හැඩරුවෙන් යුත් කෙටි වලිගයක් සහිත සතුන් විශේෂයක්) මෙන් ප්‍රමාණයෙන් කුඩා වූහ. මේ කුඩා අලි තම කුඩා හොඬවැලින් කොළ අතු, තණකොළ ආදිය දක්ෂ ලෙස උරාගත්හ.

අනතුරුව විලෙන් විශාල වැහිලිහිණි පැටවු බිහි වන්නට වූහ. කොළ පැහැති ඒ කුරුල්ලෝ හැම පැත්තකටම පියාඹා ගියහ. මේ භයානක කුරුල්ලන්ට හොට වෙනුවට වූයේ විෂකුරු දළ දෙකකි. උන් මගේ ගමන් මල්ල කෙරෙහි විශේෂ උනන්දුවක් දක්වන බව මට පෙනී ගියේය. එතැනට පියාඹා ගිය ඒ සත්තු තම විෂ දළෙන් ගමන් මල්ලේ රෙදි ආවරණයට කොටන්නට වූහ. උන්ගේ පහරදීම විනාඩි දහයක් පමණ සිදු විය. වැහිලිහිණියන් ඉවතට පියාඹා ගිය පසු මගේ ගමන් මල්ල වැරහැල්ලක් බවට පත්ව තිබිණි. භයානක සත්තු මා කඳුකරයෙන් ලබාගත් සාම්පල කඩාබිඳදමා එයින් කොටසක්ද රැගෙන ගොස් ඇති බව දූරේක්ෂයෙන් බැලූ මට පෙනී ගියේය.

මේ අතර විලෙන් මතු වූවෝ රාක්ෂයන් බඳු අද්භූත සත්ත්වයෝ තිදෙනෙකි. උන්ගේ සිරුරු මාළුවකුගේ මෙන් වූ අතර, යටත් පිරිසෙයින් මීටර් තුනක් පමණ දිගු අත්තටුද දක්නට ලැබිණි. ඒ සත්තු තණබිම වටා වට කීපයක් කැරකී එක්වරම හිරු දෙසට පියාසර කළ බැවින් මට උන් හරිහැටි බලාගත නොහැකි විය.

අමුතු උපකරණය නිහඬව තිබිණි.

මේ අතර වලසකු වැනි තවත් සතෙක් විලෙහි සිට බඩගාගෙන යන්නට විය. පාද හයක් සහ අත්තටු දෙකක් සහිත ඒ සතා විලේ සිට බඩගාගෙන අශෝභන ලෙස විල් ඉවුරෙහි වැනිවැනී ගමන් කොට, එක් පාදයකින් අමුතු උපකරණය වෙත ළඟා විය. ඒ ක්ෂණයකින් ආලෝක ධාරාවක් විහිදුණු අතර, කුතූහලය දනවන පියාඹන වලසා ඈතට විසි වී, බිම රෝල් වී ගියේය. එහෙත් මොහොතකට පසු පියාපත් විහිදාගත් ඒ සතා හිම තට්ටුවකින් වැසුණු කඳු මුදුනට පියාඹා ගියේය.

රාත්‍රිය නොදැනීම එළඹිණි. මම මහත් ඕනෑකමින් විල දෙස බලා සිටියෙමි. එහෙත් වැදගත් කිසිවක් එහි නොවීය. එබැවින් ගිනිමැලයක් ගැසීම සඳහා මම දිගටම දර කෝටු එකතු කළෙමි. මගේ පාදයේ වේදනාව යාන්තමින් අඩු වී ඇත. එහෙත් තවමත් මට ඇවිදීමට නොහැකිය. මගේ මුළු සිරුරම ගිනියම් වී ඇත. පසුදිනයේ මට සිදු විය හැක්කේ කුමක්ද? ඉදිරි රාත්‍රියේදී කුමක් සිදු වේවිද?

අවසානයේ මට ගිනිමැලයක් ගැසීමට හැකි විය.

සඳ පායා නොතිබුණු බැවින් තණබිම සහ විල අඳුරේ පැවතිණි. එක් අවස්ථාවක හරිත වර්ණ වැහිලිහිණියන් හඬ නොනැඟෙන්නට ගිනිමැලය උඩින් පියාසර කරනු ඇසුණේයැයි මට සිතිණි. එහෙත් අද දක්වාත් ඒ රාත්‍රියේ ඇත්තටම පියාසර කළේ කුමන සතුන්දැයි මට සහතිකව කිව නොහැකිය.

අමු පයින් දර කෝටු දුම් නඟන්නට විය; එහෙත් පිලිස්සෙන්නට විය. මුළු කැලෑවම දුමින් සහ දුම්මල ගඳින් පිරී ගියේය.

මම නිදාගැනීමට උත්සාහ කළෙමි; එහෙත් අසහනයෙන් පසු වීමි. තණබිමේ කිසිවක් සිදු වේයැයි මට එය මඟහැරේවියැයි සිතා මම කුතූහලයෙන් පසු වීමි. එහෙත් අඳුර නිසා මට කිසිවක් දැකගැනීමට නොහැකි වේයැයි සිතා මගේ සිත චංචල විය.

මම සවන් දීගෙන සිටියෙමි. එහෙත් පලක් නොවීය. ගන අඳුර සියල්ල වසාගෙන පැතිර ගොස් ඇත. මා දැල්වූ ගිනිමැලයේ ඇති පයින් අතු පිපිරෙන ශබ්දය පමණක් නිහැඬියාව බිඳදැමුවේය.

මා නිදිකිරමින් සිටින්නට ඇත.

හිරු මා අවදි කළේය. කඳුමුදුනට විරුද්ධ පැත්තෙන් දීප්තියෙන් නැඟෙන හිරු මගේ ඇස් නිලංකාර කළේය.

මම මගේ දූරේක්ෂය තණ බිම දෙසට යොමු කළෙමි. එහි කිසිදු වෙනසක් සිදුව නැත. විල පමණක් එහි වර්ණය ක්‍රමයෙන් යළි අත්පත් කරගනිමින් සිටියි. එහි ජලය ක්‍රමයෙන් වැඩි වෙමින් පවතින අතර, එහි රැළි පවා නැඟෙමින් පවතින බව පෙනී යන්නේයැයි මට සිතිණි. අමුතු උපකරණය තවමත් එතැන නිහඬව සහ අද්භූත ලෙස දක්නට ඇත.

ලබන සතියට... 

Comments