චිත්‍රකතා පුවත්පත මෙරට ස්ථාන ගත වෙන්නේ නවසීය හැත්තෑව දශකයේ මුල් භාගයේදී ය. ඒ ලේක්හවුස් ආයතනයෙන් ‘සතුට’ පත්‍රය නිකුත් කිරීමත් සමඟය.ඉතාමත් කෙටි කාලයක් තුළ ජනප්‍රියත්වයේ ඉහළම තලයට පැමිණි චිත්‍රකතා පත්‍රය අද ස්ථාන ගත වී ඇත්තේ කොතනදැයි වෙනම විමසා බැලිය යුත්තකි. එනමුත් එදා -මෙදා තුර චිත්‍රකතාවේ ජනප්‍රියතම පෙම් යුවළ විමසුවොත් ඒ නිරායාශයෙන් එන පිළිතුර කැලුම් -දේදුනු ය. මෙවන් සදාදරණීය මතකයන් රැසක් ශ්‍රී ලංකේය ජනමනසේ තැම්පත් කළ ඒ සොඳුරු සිත්තරාට අපි ‘පැහැසර හමුව’ට ආරාධනය කලෙමු. ඔව්හු නම් බලංගොඩ සරත් මධුවෝය.
උපන් දිනය ?
1949 මැයි 18
උපන් ගම ?
බලන්ගොඩ!
උප්පැන්නයේ නම ?
දොරවෙල බද්දලා‍ය සරත් බැද්දගේ
දෙමව්පියන් ?
අර්. බැද්දගේ පියා, මව දිලිනෝනා.
මුලින්ම අකුරු කළේ ?
බලන්ගොඩ බුද්ධජයන්ති මහ විදුහල
පසුව ?
බලන්ගොඩ මහ විදුහල
පාසල් අධ්‍යාපනය එතනින් නිමා කරනවා ?
නෑ! ඒ කාලේ අටවැනි ශ්‍රේණියෙන් ශිෂ්‍යත්ව විභාගයක් තිබුණා. එය සමත් වෙලා දෙහිවල මධ්‍ය මහ විද්‍යාලයට ඇතුළු වුණා.
ඔබ පාසල් යන අවධියේ කුමන චරිතයක්ද ?
දඩබ්බර ගතිත් තිබුණා.
පාසල් අවධියේ පටන් චිත්‍ර ඇදීමට හපනෙක් ?
හපනෙක්ද කියන්න දන්නේ නෑ: නමුත් මා පාසල් කාලයේ පටන් ඇදිම් කළා.
ඒ කියන්නේ ?
කොටින්ම කියනවා නම් මගේ පළමු චිත්‍ර කතාව ජාතික පුවත්පතක පළ වෙන්නෙත් මා උසස් පෙළ සිසුවකු සිටියදී
ඒ කොහොමද ?
බෙනට් කියන මිත්‍රයකු මාර්ගයෙන් ටෛයිම්ස් ආයතනයේ ධර්ම ශ්‍රී කල්දේරා මහතා හඳුනාගන්න ලැබෙනවා කල්දේරා මහතා ලිව්ව කතාවට මා ඇන්දා
මොකක්ද නම ?
‘රාජ උදහස’
ලංකාදීප පත්‍රයේ පළවුණේ ?
ඔව් ! ඒ සඳහා මට රුපියල් තිහක මුදලක් ලැබුණා !
පසුව ?
ලේක්හවුස් ආයතනයෙන් පටන් ගත් ලංකාවේ පළමු චිත්‍රකතා පත්‍රය වු ‘සතුට’ ට සම්බන්ධ වෙනවා.
එහි ඇදපු චිත්‍ර කතාව ?
‘නිව්රෝ’ කියලා වීර කතාවක්
මා කලින් ඇසිය යුතු ප්‍රශ්නයක් දැනුයි අසන්න මතක් වු‍ණේ කවුද ඔබේ චිත්‍ර ගුරුතුමා ?
මට චිත්‍ර ගුරුතුමෙකු සිටියේ නෑ !
උපතින් ගෙනා කුසලතාවක් ?
ඔබ හරියටම හරි !ඔබ දන්නේ මා චිත්‍ර ශිල්පියෙක් විදියට පමණයි
ඔව් !
නෑ ! මා මුර්ති ශිල්පයත් කරනවා !
ඒ සඳහාත් මට කිසිම ගුරුවරයකු සිටියේ නෑ !
ඔබ සතුට පත්‍රයෙන් ඉවත් වෙන්නේ ?
සතුට අතිශයින්ම ජනප්‍රිය වුණා පි‍ටපත් ලක්ෂයක් පමණ අලෙවි වුණා.එයි කර්තෘ බන්දුල සමරසිංහ ඉවත්වීමෙන් පසු අපත් ඔහු සමඟ ඉවත් වුණා.
එතකොට ඔබට රැකියාවක් ?
ඒ වෙනවිට මා රජයේ පාසල් ගුරුවරයෙක්
ඒ කොහෙද පාසල ?
ඉඹුල්පේ ර/ශ.රිපුත්‍ර මහ විදුහලට මගේ මුල්ම පත්වීම ලැබුණා. ඒ 1973 සැප්තැම්බර් 03
ඔබ චිත්‍ර ගුරුවරයෙක් ?
නෑ ! මා විද්‍යාගුරුවරයෙක් එතකොට ගුරු වැටුප රුපියල් තුන්සීයයි !
සතුට පත්‍රයෙන් පසුව ?
බන්දුල මුල් වෙලා සිනෙත්‍ර කියන ආයතනයක් පිහිටුවලා අපි චිත්‍රකතා පොත් ගැහුවා.
ඔබ ‘සිත්තර’ට එන්නේ !
කැමිලස් පෙරේරා මගින් ආ ආරධනයක් අනුවයි මා එයට සම්බන්ධ වෙන්නේ. සිත්තරේ කර්තෘ වු‍ණේ චිත්තන ජයසේනයි.
එහිදි ඔබ ජනප්‍රියත්වයේ ඉහළම තලයට පැමිණියා ?
ඔව් ! ඉතිං ඊට පස්සේ ආදර කතාව හා යුනිකො වීර කතාව නිසා.
ඔබ ඉතිං ඊට පස්සේ කතාවේ කැලුම් දේදුනු රූප නිර්මාණය කරන්නේ ජීවමාන චරිත ඇසුරෙන්ද ?
කැලුම්ගේ රූපය නම් මා සිතේ ඇදුණු එකක්. නමුත් දේදුනුගේ රූපය ජනප්‍රිය නිළියක් වු කාන්ති ගුණතුංග ඇසුරෙන් සිතුවම් කළා.
මේ වෙන විට ඔබ පාසල් ගුරුවරයෙක් ?
ඔව් ! මා රත්නපුරේ ශාරිපුත්‍ර විද්‍යාලයේ සේවය කරමින් සිටියදී යි කැලුම් දේදුනු නිර්මාණය කරන්නේ ! මේ නිසා මට ප්‍රශ්නයක් ආවා.
ඒ මොනවද ඒ ?
එකට සිටි පිරිස් අධ්‍යපන අමාත්‍යාංශයට පෙත්සම් ගැහැව.
ඉතිං ඊට පස්සේ ?
මා අධ්‍යාපන අමාත්‍යාංශයෙන් ලිඛිත අවසරයක් අරගෙන ඇන්දා
ශාරිපුත්‍ර විදුහලෙන් පසුව ?
බෙලිහුල්ඔය ගලගම විද්‍යාලයට මාරුවීමක් ලැබුණා.
එහි ඔබේ අනාගත සහකාරියත් සිටියා ?
ඇය එතකොට එම පාසලේ උසස් පෙළ සිසුවියක්ව සිටියා නමුත් මා ඇයට කවදාවත් උගන්වලා නෑ.
ඒ කතාව දැනගන්න කැමතියි ?
අප මේ කතාව කිසිම දිනයක පුවත්පතකට කියලා නෑ !
කරුණාකර සිළුමිණ පාඨකයින්ගේ පැහැසර හමුවට කියන්න ?
ඇය දුටු මුල් දිනයේ මා සිත් ගත්තත් මා කිසිම දිනක පාසලේ දී ඒ බව කිව්වේ නෑ. කතා කරලවත් උගන්නලා වත් නෑ !
එහෙනම් ?
දෛවය හරිම පුදුමයි !
ඒ කියන්නේ ?
මා ගලගම විදුහලෙන් ගුරු වෘත්තියට සමු දී කොළඹ ඇවිත් දර්ශන ප්‍රකාශන ආයතනයේ ‘සිතුවම්’ කියන පත්‍රයට සම්බන්ධ වෙනවා රුපියල් පන්දහසක වැටුපකට !
පාසලේ සිටි සිතගත් යුවතිය හමුවන්නේ ?
මා මරදානේ පිහිටි ප්‍රකාශන අයතනයට දිනක් මෝටර් රථය පදව‍ගෙන එන විට ඇය පදික වේදික‍ාව දිගේ තවත් යෙහෙළියක් සමඟ බොරැල්ලෙ ඇවිද යනවා දුටුවා.
ඔබ මොකද කළේ ?
මා වහාම මෝටර් රථය හරවාගෙන ඇවිත් ඇය සමඟ කතා කළා. ඇය ජාතික රෝහලේ භෞතචිකිස්ස පාඨමාලාව හැදැරීමට තේරිලයි කොළඹ ඇවිත් තිබුණෙ.
පසුව ?
වැඩිකල් හිටියේ නෑ අපි කසාද බැන්දා ඒ 1985 ජනවාරි
පාඨමාලාව ?
එය අතහැර දැමුවා !ඇයගේ ගෙදරින් ආ විරෝධය විවාහය ඉක්මන් වීමට බලපෑවා !
එතකොට ඔ‍ෙබ් ආර්ථිකය ?
ඉතාමත් හොඳයි මේ කාලයේදී මා ආදායම් බදු පවා ගෙවනවා !
රැකියා ආයතනය වෙනස් කරනවා !
ඔව් ! මා ඉන්පසුව හිතවත පත්‍රයට සම්බන්ධ වෙනවා පසුව මා මුද්‍රණ යන්ත්‍ර අරගෙන මගේම පත්‍ර ගැහුවා ඒ ‘සදාවාසනා’හා ‘චුටි’ කියා ළමා පත්‍රයක්
ඔබගේම වු එම ව්‍යාපාරය ආර්ථික ජයග්‍රහණ ලබනවා ?
නෑ ! එය අසාර්ථක වෙනවා මුද්‍රණ යන්ත්‍ර විකුණා දමන්න සිදුවුණා
ඉන් පසුව ?
නැවත කැමිලස් සමඟ ‘සත්සිරි’ පුවත්පතට සම්බන්ධ වෙනවා.
ඔබ අවසන් වශයෙන් සිටි චිත්‍රකතා පත්‍රයේ කලාප හැටක් පමණ නිකුත් වී නතර වෙනවා ?
ඔව් ! එය මගේ ක්‍රමයට කරගෙන යාමට අවකාශ තිබුණේ නෑ !
පෞද්ගලික ජීවිතේ තොරතුරු ටිකක් දැන ගන්නට කැමතියි ?
ඓශ්චර්යකින් මුණ ගැසුණු කියා මා ඔබට කිව්ව මගේ බිරිඳ කාන්ති ලතා සේමපාල ඇය බෙලිහුල් ඔය -ගලගම.
දරුවන් ?
දුවයි !පුතයි, පුතා හිමේසාන් සහකාර ඉංජිනේර‍ැවෙක් ලෙස කටයුතු කරනවා. ඔහු මීට මාස දෙකකට කලින් විවාහ වුණා.ඒ දුවත් අපි ළඟ සිටිනවා.
දුව ?
අමාදර්ශි ! ජයවර්ධනපුර විශ්වවිද්‍යාලයේ අධ්‍යාපනය ලබනවා !
අද චිත්‍රකතාව ගැන යමක් කියන්න ?
හැඟිම් දැනවීම අඩුයි කියා. මට සිතෙනවා එදා චිත්‍ර කතා බලලා ජීවිත අත්දැකීම් ලබපු උදවිය අද සමාජයේ උසස් තැන්වල සිටිනවා.
ඇයි හැඟිම් දැනවීම අඩුයි කිව්වේ ?
අපි එදා චිත්‍රපටයෙන් ගීතයෙන් හා සොබාදහම සමඟ ජීවත්වීමෙන් විශාල ආස්වාදයක් ලැබුවා ඒ ආස්වාදය තමයි මගේ සිතුවම් හා භාෂා රටාවට බලපෑවේ.
අද ගීතයේ - චිත්‍රපටයේ සුන්දරත්වයක් නැතය කියාද ඔබ කියන්නේ ?
ඔව් ! කලාවේ සෑම අංගයක්ම පිරිහිලා මානව ගුණධර්ම උද්දීපනය වෙන්නේ නෑ.
හේතුව ?
අද සන්නිවේදන මාධ්‍ය වැඩියි තරඟකාරිත්වය තුළ කොහෙද මානව ගුණධර්ම රකින්නේ.
ඔබ කියන්නේ අපේ රටේ කලාව පිරිහිලා ?
ඔව් ! පිරිහීම පටන්ගෙන තිබෙන්නේ ! ඒ පිරිහිම තුළ මිනිස් හදවත් දරුණු වෙනවා ! එදා මිනිස් හදවත්වලට හා ප්‍රඥාව දියුණු කිරීමට ගීතය බලපෑවා අද ගීතය කකුල් දෙකටයි.
