* ඉදිරිපත්වූ පළමු වතාවේම ජාත්යන්තර තරගයෙන් ජය
* තරගයට සහභාගි වීමට සිංගප්පූරුවට ගියේ මවගේ රන් බඩු උගස් තියලා
* ඉවතලන ප්ලාස්ටික් බෝතලවලින් තැනූ අපේ ජල රොකට්ටුව ලෝකෙන්ම පළමු තැනට
ගමේ උපන්නද, ගමේ පාසලට පියමං කළද සියලු අඩු පහසුකම් මධ්යයේ ඔහුට ලොවක් දිනන්නට හැකිවිය. ගමට පමණක් නොව රටටත් තරමක් නුහුරු නුපුරුදු ක්ෂේත්රයක් ඔත්සේ පියමං කරමින් තාරකා විද්යා ඉතිහාසයේ රන් සලකුණක් තැබු මේ දිරිය පුතණුවන් අපට හමුවූයේ ගමේ දුෂ්කර පාසලක් වූ කැකිරාව මහා විදුහලෙනි.
කැකිරාව මහා විදුහලේ අයෝධ්ය කරවිට චන්ද්රසේකර සිසුවා අධ්යාපනය ලබන්නේ 10 වැනි ශ්රේණියේය. එහෙත් කුඩා කල සිටම තාරකා විද්යාව සම්බන්ධයෙන් ඔහු සතුවූ ඇල්ම අධ්යාපන කටයුතුවලට කිසිදු බාධාවක් නොවීය. ජල රොකට් සෑදීම වැනි දෑ ලංකාව වැනි රටකට නුහුරු නුපුරුදු කටයුත්තක් වුවද ගමේ පාසලේ අධ්යාපනය ලැබූ අයෝධ්ය ජල රොකට් සෑදීමට ඉදිරිපත් වූයේ කිසිම පැකිළීමක් නැතිවය.
මෙරට නවීන තාක්ෂණය ප්රචලිත කිරීමේ පුරෝගාමි ආයතනයක් වන ආතර් සී ක්ලාක් ආයතනයෙන් ජල රොකට් සෑදීමේ තරගාවලියක් වාර්ෂිකව පවත්වන්නේ දැයේ දරුවන්ට නව තාක්ෂණික දැනුම ලබා දෙන්නටය. ගමේ දුෂ්කර පාසල් කිහිපයක් සමඟ කැකිරාව මහා විදුහලේ අයෝධ්ය සිසුවාද ආතර් සී ක්ලාක් ආයතනයෙන් පැවැත්වූ මේ ජාතික තරගයට ඉදිරිපත්වු අතර ඉන් ඔහුට ජයග්රහණය හිමිවිය. ජාත්යන්තර තරගයට යවන සිසුන් තෝරාගැනීමේ මේ ජාතික තරගාවලියේ ජයග්රහණයෙන් අනතුරුව අයෝධ්ය ඇතුළු ශ්රි ලාංකික සිසුන් හය දෙනෙකු පසුගියදා සිංගප්පූරුවේ පැවැති 14 වැනි ආසියා ශාන්තිකර කලාපීය ජාත්යන්තර ජල රොකට් තරගාවලියට ඉදිරිපත් වූයේ රටවල් 13 ක් සමඟ තරග වදින්නටය. අවසානයේ මේ සියලු රටවල තරගකරුවන් පරදවමින් පළමු ස්ථානය දිනා ගන්නට අයෝධ්යට හැකිවිය.
“අපි ජීවත් වෙන්නේ කැකිරාව මහඇලගමුව ගමේ. මම කුඩා කාලයේ සිටම ගියේ කැකිරාව මහා විදුහලට. අපේ පළාත් දුෂ්කරයි. පහසුකම් ගොඩාක් අඩුයි. මම කුඩාකල සිටම තාරකා විද්යාවට හරි ආසයි. මේ නිසා හය වසරේ සිටම මම පාසලේ තාරකා විද්යා සංගමයට බැඳුණා. මෙහෙම ඉන්න අතරේ අපේ පාසල්වලටත් ජාත්යන්තර තරගයට සහභාගි වෙන්න අවස්ථාව ලැබුණා. ජල රොකට් තරගාවලිය පැවැත්වුණේ කොළඹ ආතර් සි ක්ලාක් මධ්යස්ථානයේ. මේ ආයතනයෙන් ජාත්යන්තර තරගවලට සිසුන් තෝරා ගන්න ජාතික තරගයක් පවත්වනවා. අපේ පළාතේ පාසල් 3කට පමණයි මේ අවස්ථාව ලැබුණේ. අපි මේ තරගයට ගොඩාක් පුහුණු වුණා. දිවා රෑ නොබලා අවශ්ය දේවල් කළමණාකරණය කර ගත්තා.
මගේ අම්මා මඩාටුගම රේවත විදුහලේ නියෝජ්ය විදුහල්පතිනිය. තාත්තා අසනීපයෙන් ඉන්නේ. මේ නිසා අම්මයි මමයි ගැරේජ් ගානේ රස්තියාදු වෙලා මේ ජල රොකට් හදා ගන්න අවශ්ය දේවල් සොයා ගන්න මහන්සි වුණා. ජල රොකට් හැදීම ලෙහෙසි දෙයක් නොවෙයි. ඒත් මට මේ පිළිබඳ හොඳ දැනුමක් තිබුණා. මොරටුව විශ්වවිද්යාලයේ තමයි මේ තරගය පැවැත්වුණේ. මම ඒකට ඉදිරිපත්වුණා. ජාතික තරගයෙන් මම හතරවැනි ස්ථානයට පත්වුණා. මේ තරගයෙන් දිනපු මුල්ස්ථාන හය දෙනාට සිංගප්පූරුවේ පැවැත්වෙන ජාත්යන්තර තරගයට සහභාගිවෙන්න අවස්ථාව උදාවෙනවා. ජාත්යන්තර තරගයේදි අපිට පිළිපදින්න නිතිරීති ගණනාවක් තිබුණා. අපේ රොකට් එක මීටර් 60 ක්දුර යැවිය යුතුය තිබුණා. ඒ වගේම රොකට් එක ඔවුන් කියන බරින් යුතු විය යුතුයි. මේ තරගයට තරගකරුවන් හැත්තෑවකට ආසන්න සංඛ්යාවක් සහභාගි වුණා. ලංකාවෙන් මාත් සමඟ 6 දෙනෙක් ගියා. නොවැම්බර් 2 වැනිදා සිට 4 වැනිදා දක්වා තරගය පැවැත්වුණා. මම බලාපොරොත්තු නොවූ පරිදි මට මේ තරගාවලියේ පළමු ස්ථානය හිමි වුණා.” අයෝධ්ය පවසන්නේය.
අයෝධ්යට මේ අවස්ථාව ළඟා කර ගැනීමට මෙන්ම සිංගප්පූරුවේ පැවැත්වෙන තරගයට සහභාගිවීමට අවශ්ය වියදම් සපයා ගැනීමට පාසලේ විදුහල්පතිතුමා, ගුරුවරුන් මෙන්ම පාසලේ කොළඹ ශාඛාවේ ආදි සිසුහුද උපකාර කළහ. එසේම කැකිරාව මහා විදුහල මෙසේ ජාත්යන්තර තලයේ ජයග්රහණයක් උරුම කර ගත් පළමු අවස්ථාවද මෙය වන්නේය.
“අපේ පළාත්වල මේ දේවල් කරන්නට පහසුකම් අඩුයි. මම සේවය කරන්නේ මඩාටුගම රේවත විදුහලේ. මීට කලින් වතාවේ මගේ පුතා මේ තරගයට ඉල්ලුම් කරන්න උත්සහ කළත් අවස්ථාව ලැබුණේ නැහැ. නමුත් දෙවැනි වතාවේ එයා ඒ අවස්ථාව ලබාගෙන තරගයට ඉදිරිපත් වුණා. මුල් වතාවෙන්ම පුතා ජාත්යන්තර තරගයෙන් ජය ගත්තා. මගේ පාසලේ දරුවෙකුත් මගේ දරුවත් සමඟ මේ තරඟයට ඉදිරිපත් වුණා. මම මේ දරුවෝ දෙන්නම කැකිරාවෙන් රෑ බස්වලට නග්ගගෙන තමයි පාන්දර කොළඹට ගෙනාවේ. ඒ වගේම මේ දරුවට අවශ්ය ද්රව්ය හොයා ගන්න අපිට හරියට මහන්සි වෙන්න සිදුවුණා. අපේ ගම් පළාත්වල මේවා හදන්න අවශ්ය උපකරණ ගොඩාක් අඩුයි. ඒත් කොහොම හරි ඒ හැම දේකටම මම පුතාත් එක්ක එකතු වුණා. පුතා සිංගප්පූරු එක්ක යන්න මුදල් හොයා ගත්තේ මගේ රත්රන් බඩු උගස් කරලයි. කැකිරාව මහා විදුහලේ මෙවැනි ජයක් ලබපු මුල්ම අවස්ථාව මෙයයි. කුඩා කාලයේ පටන්ම මම පුතාට තරු බලන්න අවස්ථාව සලසා දුන්නා. එයාට අවශ්ය පොත් පත් ගෙනත් දුන්නා. එයා ඉදිරියේදි බලාපොරොත්තු වෙන්නෙත් මේ ක්ෂේත්රයෙන් ඉහළට යන්නයි.” අයෝධ්ය ගේ මව කුමුදු කරවිට මහත්මිය පවසයි.
ශ්රි ලංකාවේ අභ්යාවකාශ විද්යාව නංවාලීමේ අරමුණින් ආතර් සී ක්ලාක් මධ්යස්ථානය මිට වසර 14කට පෙර මෙම ජල රොකට් හා ඊට සම්බන්ධ ක්රියාකරකම් හඳුන්වා දී ඇත. පසුගිය කාලයේ මේ ආයතනයෙන් ජපානය, ඉන්දුනිසියාව, වියට්නාමය, තායිලන්තය,ඔස්ට්රේලියාව, සිංගප්පූරුව, හා ඉන්දියාව වැනි රටවල පැවැති ජාත්යන්තර තරගවලට අපේ තරගකරුවෝ සහභාගි කරවනු ලැබ ඇත්තාහ. එසේම ඔවුහු ජයග්රහණද හිමි කර ගත්හ.
“දැනට වසර 13ක සිට අපේ දරුවන් අපි මේ තරගවලට යොමු කරනවා. මෙවරත් අපි ළමයි 6 දෙනෙක් තරගයට යොමු කළා. මෙවර රටවල්13 ක ළමයි 60 දෙනෙක් පරදවා අපේ රටේ දරුවෙකු තමයි ජයග්රහණය කළේ. අයෝධ්ය ගේ ජයග්රහණය සුවිශේෂියි. එයා ගමේ පාසලක දරුවෙක්. පසුගිය වසරේත් පළමු තැනට පත්වුණේ බද්දෙගම වගේ දුෂ්කර පළාතක පාසලක දරුවෙක්. 2015 වසරේ දෙවැනි තැනට පත්වුණා කොළඹ රාජකීය විදුහලේ දරුවෙක්.”
එසේ පැවැසූයේ ආතර් සී ක්ලාක් ආයතනයේ ඉන්දික මැදගංගොඩ මහතාය.
ඉවත ලන බීම බෝතල් ජල රොකට් බවට පරිවර්තනය කරන මේ ක්රියාව ඉතා සරල වුවත් ඒ ඇසුරෙන් ජාත්යන්තරය දිනීම පසු කටයුත්තක් නොවේ. ඒ සඳහා මනා පුහුණුව මෙන්ම ක්රමවේදයක් තිබිය යුතුය. දුෂ්කර ගම් පළාතක පාසලකින් මෙවන් ජයග්රහණයක් අපේක්ෂා කිරිම අපහසු කටයුත්තක් වුවත් අයෝධ්ය ඒ අභියෝගය පහසුවෙන් ජය ගෙන ඇත්තේය.