ෆ්‍රාන්ස් කෆ්කා උපත ලැබූ නි‍ෙවස කෞතු­කා­ගා­ර­යක් වෙයි | සිළුමිණ

ෆ්‍රාන්ස් කෆ්කා උපත ලැබූ නි‍ෙවස කෞතු­කා­ගා­ර­යක් වෙයි

ජර්මන් බසින් ලේඛනයේ යෙදුනු බොහීමියානු යුදෙව් ලේඛක ෆ්‍රාන්ස් කෆ්කා (Franz Kafka) උපත ලැබූ ප්‍රාග් නුවර පිහිටි නි‍ෙවස කෞතුකාගාරයක් බවට පත්කිරීම සඳහා අවශ්‍ය ප්‍රතිසංස්කරණ කටයුතු මේ වන විට සිදු වෙමින් පවතින බව වාර්තා වේ. මේ වසර අවසන් වන විට අදාළ ප්‍රතිසංස්කරණ කටයුතු සියල්ල සම්පූර්ණ කිරීමට අපේක්ෂිතයි. මේ ප්‍රතිසංස්කරණ කටයුතු සඳහා ක්‍රව්න් මිලියන 165 ක ඇස්තමේන්තුගත මුදලක් වැය වන බවයි කියැවෙන්නේ. කෆ්කාගේ ලේඛන දිවියට සුවිසල් බලපෑමක් ඇති කළ මේ නිවස ප්‍රාග් නුවර පිහිටි පැරණි වඩාත්ම ඓතිහාසික නිවාස අතරින් එකක් ලෙස සැලකේ. ඒ නිවස පිහිටා ඇත්තේ ප්‍රාග් නුවර පැරණි නගර චතුරශ්‍රයට යාබදව වන අතර 2000 වසරේදී ෆ්‍රීන්ස් කෆ්කා චතුරශ්‍රය ලෙස නම් කරනු ලැබූ නමුදු මේ වන විට එය හැඳින්වෙන්නේ කෆ්කා නිවස ලෙසයි. කෆ්කා නි‍ෙවස ආශි‍්‍රතව සිදු කෙරෙන ප්‍රතිසංස්කරණ සමඟම කෆ්කා වෙනුවෙන් උපහාර පිදීම සඳහා ප්‍රාග් නුවර ස්ථාන කිහිපයක ස්ථාපන කලා නිර්මාණ ඉදිකිරීමට ද සැලසුම් කර තිබේ. මෙයට පෙර ද ප්‍රාග් නුවර වීදි කිහිපයක එවැනි ස්ථාපන කලා නිර්මාණ ඉදිකරනු ලැබීය.


රොබර්ට් ඒ. හෙයින්ලෙන්ගේ අප්‍රකට නවකතාවක් පළ වෙයි

විසි වැනි සියවසේ වඩාත් කැපී පෙනුණු අමෙරිකානු විද්‍යා ප්‍රබන්ධ රචකයකු වූ රොබර්ට්. ඒ හෙයින්ලෙන් රචනා කළ අප්‍රකට නවකතාවක් මේ වසර තුළදී ප්‍රථම වරට ප්‍රකාශයට පත්වීමට නියමිතයි. විද්‍යා ප්‍රබන්ධ කෘති සඳහා වාර්ෂිකව පිරිනැමෙන හියුගෝ සම්මානයෙන් පිදුම් ලද ලේඛකයකු වන ඔහු 1980 ගණන්වලදී රචනා කළ ‘ද නම්බර් ඔෆ් ද බීස්ට්’ (The Number of the Beast book) නමැති ආන්දෝලනාත්මක විද්‍යා ප්‍රබන්ධ නවකතාවට කිසියම් අයුරකින් සමාන වන නමුදු අවසානය හාත්පසින්ම වෙනස් අයුරින් රචනා කර ඇත. මේ අප්‍රකට නවකතාවේ අත්පිටපත සකසා ඇත්තේ ලේඛකයාගේ සටහන් සහ යතුරු ලියනය කරන ලද අත්පිටපතක පිටු ඇසුරෙන් බවයි සඳහන් වන්නේ. වචන 185,000කින් පමණ සමන්විත වන මේ නවකතාව ‘සික්ස් – සික්ස් – සික්ස්’ (Six-Six-Six) යන නමින් මේ වසර අගදී ප්‍රකාශයට පත්කිරීමට අපේක්ෂා කරන බව වාර්තා වේ. ඒ සමගම එහි ඩිජිටල් පිටපත් සීමිත සංඛ්‍යාවක් සහ ‘ද නම්බර් ඔෆ්’ ද බීස්ට්’ නවකතාවේ නැවත මුද්‍රණයක්ද පළ කිරීමට අපේක්ෂිතයි. මේ කෘති පළ කරන්නේ ෆීනික්ස් පික් නමැති ප්‍රකාශන ආයතනයයි. කලක් තිස්සේ අප්‍රකටව පැවති අත්පිටපත නැවත සැකසීමේ කටයුත්තට මුල පුරමින් ඒ සඳහා හෙයින්ලෙන් ත්‍යාග භාරකාර අරමුදල සමඟ එක්ව කටයුතු කර ඇත්තේත් මේ ප්‍රකාශන ආයතනයයි.


හැවානා අන්තර්ජාතික පොත් ප්‍රදර්ශනය

කියුබාවේදී සංවිධානය කෙරෙන වඩාත් ජනප්‍රියතම වාර්ෂික ප්‍රදර්ශන අංගයක් ලෙස සැලකෙන ‘හැවානා අන්තර්ජාතික පොත් ප්‍රදර්ශනය’ පසුගියදා අති උත්කර්ෂවත් අන්දමින් පැවැත්විණි.

මෙවර ප්‍රදර්ශනය සඳහා රටවල් 44කට අධික ප්‍රමාණයක ප්‍රකාශකයන් 127 දෙනකු පමණ සහභාගි වී තිබුණි. 400 කට අධික ආරාධිත කලාකරුවන්ද සහභාගි වී ඇත. මෙවර ප්‍රදර්ශනයේදී වර්ග 4000 කට අධික ලක්ෂ 40 ක පමණ පොත් ප්‍රමාණයක් ප්‍රදර්ශනයට තබා තිබීම විශේෂත්වයකි.

1982 දී පළමුවරට ඇරඹුණු හැවානා අන්තර්ජාතික පොත් ප්‍රදර්ශනයේ 28 වැනි අදියර මෙය විය. පොත් ප්‍රදර්ශනයට සමගාමීව දේශන, වැඩමුළු, ප්‍රසංග, චිත්‍රපට සහ දෘශ්‍ය කලා ප්‍රදර්ශන රැසක්ද පැවැත්විණි. මෙවැනි අවස්ථාවකදී විවිධ සංස්කෘතීන් රැසක් එකට එකතු වන බවත්, තරුණ අයට තමන්ගේ කැමැත්ත අනුව සාධාරණ පොත් තෝරා ගැනීමේ අවස්ථාව ලැබෙන බවත් බොහෝ දෙනාගේ අදහස විය. වර්තමානය වන විට මෙම පොත් ප්‍රදර්ශනය වෙත පැමිණීම කියුබානු පවුල්වල අනිවාර්ය අංගයක් බවටද පත්ව තිබීම විශේෂයෙන් සඳහන් කළ යුතු ම ය.


දැනුම් දීමයි

පසුගිය ඉරිදා (17) මහාචාර්ය කමල් වලේබොඩ සමඟ පැවති සම්මුඛ සාකච්ඡාවේදී ලෝක කවි දිනය ප්‍රථම වරට පැවැත්වූයේ සංස්කෘතික ආමාත්‍යාංශයේ ලේකම් විජිත කණුගල මහතාගේ සහ අධක්ෂිකා අනුෂා ගෝකුල මහත්මියගේ මූලිකත්වයෙන් යැයි සඳහන් වෙතත් ලෝක කවි දිනය සැමරීම ප්‍රථම වරට ආරම්භ කළේ තමන් සංස්කෘතික අමාත්‍යාංශයේ ලේකම් ම සිටියදී බවත්, එවකට සංස්කෘතික අමාත්‍යාංශයේ අධ්‍යක්ෂ ලෙස කටයුතු කළේ විජිත කණුගල මහතා බවත්, 2009- 2012 කාලයේ සංස්කෘතික අධ්‍යක්ෂ ලේකම් ව සිටි විමල් රූබසිංහ මහතා කියා සිටී.


අදහස්