අද රටේ දේශපාලන ස්ථාවරයක් නැහැ. මේ අවස්ථාවේ සමාජයට නායකත්වය දිය හැකි අය නායකත්වය ගත යුතුයි. එහෙත් තවමත් නායකත්වය දිය යුතු ඇතැම් අය තුෂ්ණීම්භූතව බලා සිටිනවා. ඔවුන් අවදි විය යුතු කාලයකුයි දැන් උදා වී තිබෙන්නේ.
රටේ ආරක්ෂක තත්ත්වය ගැන මේ වන විට සෑහීමකට පත් වන්න පුළුවන්ද?
රජය අසමත්ව තිබෙනවා ජනතාවගේ ආරක්ෂාව සලසන්න. ඒ වගේම අන්තවාදය පරදන්න. ඒ විතරක් නෙමෙයි මේ අන්තවාදයට උඩගෙඩි දෙන දේශපාලනඥයන් සුළු පිරිසක් ඉන්නවා. ඒ අය පාලනය කරගන්නත් රජය අසමත් වෙලා තියෙන්නෙ. ඒ අසමත්කමේ ප්‍රතිඵලයක් ලෙස තමයි අද ජනතාව භීතියෙන් ඇලළී සිටින්නේ.
ඔබ හිතනවාද මෙවන් අන්තවාදි තර්ජනයක් හා සම්බන්ධ ක්‍රියාදාමයන් රජයකට තනිව මැඬ පවත්වන්න පුළුවන් කියලා?
රජයකට එය තනිවම කිරීමට අපහසු බව අප පිළිගන්නවා. ආගමික නායකයන්, සියලු දේශපාලන පක්ෂ, ස්වේච්ඡා සංවිධාන ඊට එක් විය යුතුයි. ඒ සඳහා රජය මුල් තැනක් ගත යුතුයි. ඒත් අපට එවැන්නක් පෙනෙන්න නැහැ.
ඔබ පක්ෂය මේ අවස්ථාවේ රජයට දෙන සහයෝගය කුමක්ද?
ජාතිවාදය අන්තවාදය පරාජය කරන්න අපේ පක්ෂයට කොන්දේසි නැහැ. පහුගිය දිනවල අප දිවයින පුරා ගම් මට්ටමේ සිට අපට පුළුවන් ක්‍රියාමාර්ගවලින් ජනතාව දැනුවත් කළා. රටේ යළි ජාතිවාදී ගිනිදැල් ඇති නොවෙන්න අප පුළුවන් තරම් ජනතාව දැනුවත් කරනවා.
පසුගිය දිනවල ඇති වූ නොසන්සුන්කාරි ක්‍රියා පසුපස දේශපාලකයන් සිටින බව කියවෙනවා...
සමහර දේශපාලකයන් ඉන්නවා අන්තවාදයෙන් හරි බලය ලබාගන්න උත්සාහ කරන. ඒ යටි අරමුණු තේරුම් ගෙන කටයුතු නොකිරීමයි මේ සිදුව ඇත්තේ.
පසුගිය 21 දා පිපිරීම්වලට ඇතැම් දේශපාලකයන් සම්බන්ධ බවත්, ඔවුන් අත්අඩංගුවට නොගැනීම නිසා මේ පශ්චාත්කාලීන ප්‍රචණ්ඩ ක්‍රියා ඇති වූ බවත් පැවසෙනවා...
දේශපාලකයන් කිහිප දෙනකුගේ නම් මේ ප්‍රහාරයත් සමඟම එළියට ආවා. ඒ සම්බන්ධව ජනතතාවට සෑහීමකට පත් විය හැකි සාධාරණ පරීක්ෂණ සිදු විය යුතුයි. සාධාරණ පරීක්ෂණයක් සිදු නොවන විට එය දඩමීමා කරගෙන විවිධ අකටයුතුකම් වන්න පුළුවන්.
මේ වන විට දිවයිනේ ස්ථාන කිහිපයක රඳවා සිටින සරණාගතයන් පිළිබඳ ප්‍රශ්නය ඉදිරියේදී රටේ ආරක්ෂාවට තර්ජනයක් විය හැකි බවට විවිධ සංවිධානවලින් චෝදනා එල්ල වනවා...
සරණාගත ප්‍රශ්නය ලංකාවට පමණක් බලපාන දෙයක් නොවෙයි; ලෝකයේම ප්‍රශ්නයක්. අපේ රටේත් යුද සමයේ පවුල් පිටින් සරණාගතයන් විදෙස් රටවලට ගොස් ජීවිත රැකගත්තා. මේ වන විට පාකිස්තාන ජාතිකයන් අපේ රටේ පිළිසරණ පතා පැමිණ සිටිනවා. අප අන්තර්ජාතිකව විවිධ සම්මුතීන්ට අස්සන් කරලායි තිබෙන්නේ. අප ඒ අනුව කටයුතු කළ යුතුයි. අප සලකා බැලිය යුත්තේ මේ සරණාගතයන්ගේ මුවාවෙන් අන්තවාදීන් පැමිණ සිටිනවාද කියන කරුණයි.
පල්ලිවලින් කඩු-කිණිසි ඇතුළු අවි-ආයුධ හමු වීම ගැන ඔබ පක්ෂයේ අදහස කුමක්ද?
කිසිම ආගමික ස්ථානයකට අවි-ආයුධ අවශ්‍ය වන්නේ නැහැ. ආගමික ස්ථානයන්හි තිබිය යුත්තේ කරුණාව, මෛත්‍රිය, සංහිඳියාවයි. රටේ නීතියට පටහැණි ඕනෑම පුද්ගලයකු සම්බන්ධව ජාති-ආගම් භේදයකින් තොරව කටයුතු කළ යුතුයි. එසේ නොවන අවස්ථාවලදී තමයි ජනතාව නීතිය අතට ගන්න උත්සාහ කරන්නේ. නීතිය නිසි ලෙස ක්‍රියාත්මක වන බවට ජනතාවගේ විශ්වාසය තහවුරු විය යුතුයි. ආගමික නායකයෙන්ම පවසනවා නම් මේ ක්‍රියාදාමය විශ්වාස නැහැ, නිසි පරිදි නීතිමය කටයුතු සිදු වන්නේ නැහැ කියා, එහි වරද රජය සතුයි. මේ වන විට අත්අඩංගුවට ගත් සියලු අවි-ආයුධ සම්බන්ධයෙන් නීතිය ක්‍රියාත්මක කළ යුතුයි.
රටේ ආර්ථික තත්ත්වය ඉදිරියේදී කුමන තත්ත්වයකට සිදු වේයැයි ඔබ සිතනවාද?
රටේ ආර්ථික තත්ත්වය කොහොමත් අඩපණ වෙලා තිබුණේ. මේ ආණ්ඩුව කෙළේ දඩයි බදුයි වැඩි කරපු එක විතරයි නේ? ආර්ථිකයේ ඒ අර්බුදය මේ ප්‍රහාරයත් සමඟ දෙගුණ තෙගුණ නොවෙයි, සිය ගුණයකින් වැඩි වුණා. ඒ වගේම මේ වන විට තවත් පසු-ප්‍රහාර රැසකට අපට මුහුණ දෙන්න වී තිබෙනවා. ඒ ප්‍රහාරයැයි මා හැඳින්වූයේ අන්තවාදි ප්‍රහාර නොවෙයි, අධ්‍යාපනයට එල්ල වී ඇති ප්‍රහාරය, ආර්ථිකයට එල්ල වී ඇති ප්‍රහාරය වැනි ප්‍රහාරයි. ඒ ප්‍රහාර යථා තත්ත්වයට පත් කරන්න තවත් සෑහෙන කාලයක් යයි.
මේ අවස්ථාවේ රටේ දේශපාලන ස්ථාවරය කෙසේ සකස් විය යුතුද?
රටේ දේශපාලන ස්ථාවරයක් නැහැ නෙ? ජනතාව අවස්ථාව ලැබුණු විටදී ඒ තීරණය ගත යුතු වනවා. නැත් නම් රට අරාජික වනවා. මේ අවස්ථාවේ සමාජයට නායකත්වය දිය හැකි අය නායකත්වය ගත යුතු වෙනවා. එහෙත් තවමත් ඇතැම් නායකත්වය ලබා දිය යුතු, දිය හැකි අය තුෂ්ණීම්භූතව බලා සිටිනවා. ඔවුන් අවදි විය යුතු කාලයක් දැන් තිබෙන්නේ.
