* මධුමාධව මිනුවන්ගොඩ සැරිසැරුවේ ඇයි?
* දයාසිරිටත් චෝදනාවක්
* නාමල් කුමාරට කුරුණෑගලින් ඩිෆෙන්ඩරයක්
* ගැටුම් ඇති වුණේ දින 22කට පසු
පාස්කු ඉරිදා ප්රහාරය මුල් කරගනිමින් වයඹ පළාතේ ගම්මාන කිහිපයකත් මිනුවන්ගොඩත් ඇවුළුණු ගිනි පිටුපස දේශපාලන හස්තයක් ක්රියාත්මක වූ බව බුද්ධි අංශ තහවුරු කරගෙන හමාරය. පටු දේශපාලන අරමුණු වෙනුවෙන් රට ගිනි තබන්නට හැදූ එකී දේශපාල හස්තය කුමක්දැයි මේ වන විටත් පැහැදිලිය.
හෙළි වී ඇති ආකාරයට අනුව වයඹත් මිනුවන්ගොඩත් ගිනි ඇවුළුවේ ඔවුහුය. ඒ සංවිධානාත්මකවය. මුළු රටම ගිනි ජාලාවක් බවට පත් කරන්නට ඒ අය සූදානම් වූවත් ආරක්ෂක අංශ ක්ෂණිකව ගත් පියවර නිසා වයඹින් සහ මිනුවන්ගොඩින් පමණක් එය සීමා කරන්නට හැකි වන්නේ ජාතියේ වාසනාවකටය.
පොලිස් පරීක්ෂණවලින් හෙළි වී ඇති ආකාරයට මිනුවන්ගොඩ නගරයේ කඩ සාප්පු 60කට පමණ හානි වී ඇත. එම විනාශය පිටුපස සිටින්නේ දේශපාලන පක්ෂයකට සම්බන්ධ පිරිසකි. යතුරුපැදි සහ වෑන් රථවල නැඟී පැමිණි ඔවුන් 13 වෙනිදා රාත්රියේ මිනුවන්ගොඩ නගරයේ කඩ සාප්පුවලට පහරදෙමින් ගිනි තබන්නේ සිංහල, සහ මුස්ලිම් බේදයකින් තොරවය. ඒ සිංහල සහ මුස්ලිම් වැසියන් අතර ගැටුමක් නිර්මාණය කරවන්නටය.
එහෙත් ඊට මිනුවන්ගොඩ නගරයේ වැසියන් හසුවූයේ නැත. ඒ අය තම වෙළද සැල්වලට පහරදුන් අය කවුරුන්දැයි හඳුනා ගත්හ. ආරක්ෂක අංශ මෙන්ම නගරවැසියන් සඳහන් කරන ආකාරයට ඔවුහු දේශපාලන ආධාරකරුවෝ පිරිසකි. කඩසාප්පුවලට පහරදෙන්නේ පොලිසිය සහ හමුදාව බලා සිටියදීය. ඒ පොලිසියත් හමුදාවත් අසරණ කරමිනි.
බුද්ධි අංශ සඳහන් කරන්නේ ප්රහාරය එල්ල වන විට මිනුවන්ගොඩ නගරයට නිසි ආරක්ෂාවක් තිබී නැති බවය. නිවාස පරීක්ෂා කිරීම් ආදී විශේෂ රාජකාරි ගොන්නකටම පොලිසියේ වැඩි පිරිසක් යොදවා තිබීම ඊට හේතුවයි. කලහකාරීන් නගරයේ කඩ සාප්පුවලට පහරදෙන විට ඒ අය සමඟ හැප්පෙන්නට තරම් ශක්තියක් ඇති පොලිස් හෝ හමුදා සාමාජිකයන් පිරිසක් නගරයේ සිට ඇති බවක් ද පෙනෙන්නට නැත.
බස්නාහිර පළාත් පොලිස් ප්රධානියා වන ජ්යෙෂ්ඨ නියෝජ්ය පොලිස්පති නන්දන මුණසිංහ සඳහන් කරන්නේ මිනුවන්ගොඩ නගරයට පහර දෙන්නට පැමිණි පිරිසට අවශ්ය වූයේ නගරය තුළ සිංහල මුස්ලිම් ගැටුමක් නිර්මාණය කිරීම බවය. ඒ අය නගරයට කිට්ටුව යම් ස්ථානයක රැස් වී යතුරුපැදි ඇතුළු වාහනවලින් පැමිණ ඒ ප්රහාර එල්ල කර ඇති බවට තොරතුරු ඇතැයි ද ඔහු පැවැසුවේය. මිනුවන්ගොඩට කිසිදු සම්බන්ධයක් නැති දේශපාලනඥයකු බවට සැක කරන පුද්ගලයෙකු කළු ජැකට්ටුවකින් සැරසී මුහුණ මුළුමනින්ම ආවරණය වන යතුරුපැදි හිස් වැසුමක් පැලඳ කඩ සාප්පු වලට පහරදෙන ආකාරයේ වීඩියෝවක් හමු වී ඇතැයිද ඔහු කියයි. එම වීඩියෝව මේ වන විට ඇත්තේ විශ්ලේෂණයට ලක් වෙමිනි. ඒ අදාළ දේශපාලනඥයා බවට පැහැදිලිවම හඳුනා ගනු ලැබුවහොත් අත්අඩංගුවට ගැනීමට දෙවරක් නොසිතන බවද ජ්යෙෂ්ඨ නියෝජ්ය පොලිස්පති නන්දන මුණසිංහ අවධාරණය කරයි.
එකී දේශපාලනඥයා කවුරුන්දැයි ජ්යෙෂ්ඨ නියෝජ්ය පොලිස්පති මුණසිංහ සඳහන් කරන්නේ නැත. එසේම මේ ගැටුම නිර්මාණය කළ සැබෑ ජාතිවාදීන් අත්අඩංගුවට ගෙනද නැත. මෙතෙක් අත්අඩංගුවට ගෙන ඇත්තේ අවශේෂ කොටස් පමණි. නන්දන මුණසිංහ මහතා පවසන්නේ වැඩි කල් නොගොස් මිනුවන්ගොඩ ගිනි ජාලාවක් බවට පත් කළ අය නීතිය හමුවට ඉදිරිපත් කරන බවය.
කොළඹ මහා නගර සභාවේ හිටපු මන්ත්රීවරයෙකු වන පිවිතුරු හෙළ උරුමයේ නියෝජ්ය නායක මධුමාධව අරවින්ද මිනුවන්ගොඩ පොලිසියට කැඳවන්නේද එවැනි පසුබිමකය. පොලිසිය පවසන්නේ 13 වැනිදා රාත්රි මිනුවන්ගොඩ ගිනි ඇවිෙළන විට ඔහු නගරයේ සැරිසරමින් ජනතාව ප්රකෝප කළ බවට විවිධ පාර්ශ්වවලින් චෝදනා එල්ලවන බවය. මධුමාධව අරවින්ද ජාතික ඇඳුමින් සැරසී මිනුවන්ගොඩ නගරයේ පාලමක් මතින් ගමන් කරන වීඩියෝවක්ද ජනමාධ්යවල විකාශය විය. යතුරුපැදියකින් ගමන් කරන කාන්තාවක විසින් එය වීඩියෝ ගත කර තිබිණි.
මධුමාධව නම් ඒ ගැන පැවැසුවේ තමන් ගැටුම්වලට කිසිදු සම්බන්ධයක් නැති බවය. වීඩියෝවේ දැක්වෙන්නේ වාහන තදබදයක් ඇතිව තිබුණු බැවින් ඒ සම්බන්ධයෙන් විපරම් කිරීමට වාහනයෙන් බැස ඉදිරියට යමින් සිටින අවස්ථාවේදී බවද ඔහු පවසා ඇත.
කෙසේ වෙතත් ඒ ගැන ප්රශ්න කිරීමට මධුමාධව අරවින්ද පසුගිය 15 වැනිදා මිනුවන්ගොඩ පොලීසිය හමුවට කැඳවා තිබුණත් ඔහුගෙන් ප්රශ්න කිරීමට වගකිව යුතු පොලිස් නිලධාරියෙකු එදා පොලිස් ස්ථානය තුළ නොවීය. පැය තුනක් පොලිස් ස්ථානයේ රැදී සිටි ඔහු පිටව යන්නේ නැවතත් කැදවීමක් ලැබුණහොත් පැමිණෙන බව පවසමිනි. පොලිසිය නම් පවසන්නේ අනිවාර්යෙන්ම නැවතත් ඔහු කැඳවන බවය. 13 වැනිදා ගිනි ඇවිළුණු තවත් ප්රදේශයක් වන්නේ හලාවතය. මිනිස් ඝාතනයක් පවා වාර්තවෙන්නේ හලාවතිනි. හලාවත පැත්ත භාර නියෝජ්ය පොලිස්පති චම්පික සිරිවර්ධන පවසන්නේ යම් අදෘෂ්යමාන හස්තයක් ක්රියාත්මක වූ බවය. මෙතෙක් කර ඇති විමර්ශනවලින් පෙනී ගොස් ඇති ආකාරයට අනුව 13 වෙනිදා ගැටුමක් ඇති කරන්නට යම් කණ්ඩායමකට තිබී ඇත්තේ දැඩි වුවමනාවකි. 13 වෙනිදා ප්රහාරයක් එල්ල වීමට නියමිත බවට වූ තහවුරු නොවූ බුද්ධි තොරතුර ඊට සපයා තිබුණේ උත්තේජනයකි. එකී බිය තීව්ර කිරීමට සංවිධානාත්මක පිරිසක් ක්රියාත්මක වන්නේ කඩු කිණිසි ගත් සන්නද්ධ පිරිසක් ගම්මානවලට කඩා වැදී සිංහලයන් කපා කොටා ඝාතනය කරන්නට සූදානම් වන බවට කටකතාවක් පතුරුවමිනි. එකී කටකතාවලට රැවටී එදා නිවෙස් අතහැර කැලෑ වැදී රැය පහන්කළ පිරිස්ද සිටියහ.
නියෝජ්ය පොලිස්පති චම්පික සිරිවර්ධන පවසන්නේ 13 වැනිදා මුලින්ම ගිනි ඇවිළෙන්නේ නාත්තණ්ඩියෙන් බවය. ඒ පිටුපස ප්රාදේශිය දේශපාලනඥයෝ පිරිසක් සිටිති. ඒ අය නාත්තණ්ඩියේ ගිනි අවුළුවා ඇත්තේ කණ්ඩායම් තුනක් ලෙස සංවිධානගතවය. ඒ එක් කණ්ඩායමක් යතුරුපැදිවල නැඟී දහවල් කාලයේ නගරයට කඩා වැදී කඩසාප්පු හිමියන්ට තර්ජනය කරන්නේ ඒවා වසා දමන ලෙසය. ඒ අතර චීවරධාරයෙකුද සිට ඇත. එම චීවරධාරියා යතුරුදියක පැදිකරුත් පසුපැදිකරුත් අතර ගමන් කරන අයුරු දැක්වෙන වීඩියෝ පටයක්ද පොලිසියට හමුවී තිබේ.
යතුරුපැදිකරුවන්ගේ එකී නියෝගයත් සමඟ වෙළඳසල් වසා දමන වෙළඳුන් සිය නිවෙස්වලට යන්නේ එන පොට හොඳ නැති බව හඳුනාගනිමිනි. එය ඒ ආකාරයෙන්ම සිදු විය. යතුරුපැදිකරුවන් වෙළඳසල්වලට පහරදෙන්නට ගත්තේ එතෙක් නිහඬව සිටි සෙසු ගම්වැසියන්ද ප්රචණ්ඩත්වයට ඈඳා ගනිමිනි. ඒත් එක්කම කොස්වත්ත, තුම්මෝදර,කොට්ටාරම්මුල්ල සහ දංකොටුව යන ගම්මාන ප්රචණ්ඩත්වයේ ගිනි ඇවිළෙන්නට වූයේ ජාතිවාදී මුහුණුවරකිනි. කඩ සාප්පු නිවාස සහ දේවස්ථානවලටද ඔවුන් පහරදී තිබුණේ ඉවක් බවක් නැතිවය. එහිදී කොට්ටාරම්මුල්ලේ වැසියෙකු වන දෙදරු පියෙකු ඝාතනයට ලක් වන්නේ පහරකෑම්වලින් සහ කැපුම් තුවාලවලිනි. ඒ අතර මොරකැලේ ගම්මානයේදී ආබාධිත හමුදා සෙබළෙක් කපුම් තුවාල ලබා රෝහල්ගත කරන්නේ බරපතළ තත්ත්වයෙනි. ඔහු මේ වන විට ප්රතිකාර ලබන්නේ ජාතික රෝහලේ දැඩි සත්කාර ඒකකයේය. එම සෙබළාගේ පුතා මේ වන විට සක්රීය සේවයේ නිරතව සිටින දෙවැනි ලුතිනන්වරයෙකි.
ගැටුම් නිම වන විට වෙළඳසල් සහ නිවාස 500කට ආසන්න ප්රමාණයකටත් දේවස්ථානයක් ඇතුළු දේපොළ රැසකටම හානි වී තිබිණි. ගැටුම් මැඬලීමට පැමිණි හමුදාවේ පස් දෙනෙකුටද තුවාල සිදු වන්නේ ගල්මුල් ප්රහාරයන්ට ලක්වය.
මේ තරමින් හෝ යම් පාලනයක් ඇති වන්නේ හමුදාව සහ පොලිසිය නිසාය. එසේ නොවන්නට හානිය මෙයට වඩා දෙතුන් ගුණයක් වන්නට තිබුණු ඉඩකඩ බොහෝය. එය එසේ වූවත් තුම්මෝදර දේවස්ථානයකට පහරදෙන්නට පැමිණි පිරිසකට හමුදාවේ යම් සෙබළෙකුගේ සහායක් ලැබුණු බවට චෝදනාවක්ද එල්ල වී තිබේ.
හමුදාවට තවත් චෝදනාවක් ඒ අය එල්ල කරන්නේ එම දේවස්ථානයේ ආරක්ෂාවට සිටි පිරිසක් දේවස්ථානය ඉදිරිපිට දණගැස්සවූ බවටය. හමුදාව පාර්ශ්වයෙන් සඳහන් කරන්නේ එවන් දණගැස්සවීමක් කිසිසේත්ම සිදුව නැති බවකි. නියෝජ්ය පොලිස්පති චම්පික සිරිවර්ධන පවසන්නේ දේවස්ථානයේ ඉහළ මහලේ රැඳී සිටි පිරිසක් පහළට ගෙන්වාගෙන ඔවුන්ගේ අන්යතාව පරීක්ෂා කර ඇති බව නම් තමන්ට දැනගන්නට ඇති බවය.
එදා දේවස්ථානයට පහරදීමට පැමිණි පිරිස් පාලනය කිරීමට හමුදාව දැඩි වෙහෙසක් ගත් බවත් කලහාකාරීන් විසුරුවා හරින්නට අහසට පවා වෙඩි තබා තිබුණු බවත් චම්පික සිරිවර්ධන පවසන්නේ හමුදාව එසේ ක්රියාත්මක නොවිණි නම් හානියේ තරම පවතින තත්වයට වඩා විශාල වන්නට ඉඩ තිබුණු බව පෙන්වා දෙමිනි.
ගම්වැසියන් පවසන ආකාරයට අනුව මේ ගැටුම්වලට මුල තුම්මෝදර දේවස්ථානය පිටුපසින් ගලා බසින හැමිල්ටන් ඇළේ තිබී කඩු කිණිසි තොගයක් සොයාගැනීමක් බවය. කඩසාප්පු වසා දමන ලෙසට දැනුම්දීම් සිදුවන්නේත් පහරදීම් සිදුවන්නේත් එම ආයුධ හමුවීමත් සමඟ ඇති වන නොසන්සුන් තත්වයත් සමඟ බව ගම්මුන්ගේ අදහසය. එසේ වූවත් පොලිසිය පවසන්නේ එම නොසන්සුන් තත්ත්වය සංවිධානාත්මකව නිර්මාණය කළ එකක් බවකි.
ජාතිවාදී ගිනි දැල්වලින් බිංගිරිය ඇවිළෙන්නේ නාත්තන්ඩියේ ඇවිළෙමින් තිබුණු ගින්නට සමගාමීවය. දේශපාලන අතකොළු වූ පිරිසක් ගැටුමට මුල පුරන්නේ බිංගිරියේ පිහිටි දේවස්ථානයකට පහර දෙමිනි. බිංගිරිය පොලිසිය වහාම ක්රියාත්මක වෙමින් එය වර්ධනය වන්නට ඉඩ නොතබා සියල්ල පාලනය කරමින් පස් දෙනෙක් සැකපිට මුලින්ම අත්අඩංගුවට ගත්තේය. වැඩි ආරක්ෂාවට ඔවුන් පස් දෙනා රැගෙන යන්නේ හෙට්ටිපොළ පොලිස් ස්ථානයටය.
ඒත් එක්කම යතුරුපැදිවල නැඟුණු විශාල පිරිසක් පැමිණ හෙට්ටිපොළ පොලිස් ස්ථානය අසල රැස්වන්නේ අත්අඩංගුවේ සිටින පස් දෙනා නිදහස් කරන ලෙස ඉල්ලමිනි. ජනාධිපති ඝාතන කුමන්ත්රණයක් ගැන රටට කී නාමල් කුමාර නැමැත්තා එහිදී මතු වන්නේ ඩිපෙන්ඩරයකිනි. ශ්රී ලංකා නිදහස් පක්ෂයේ මහ ලේකම් පාර්ලිමේන්තු මන්ත්රී දයාසිරි ජයසේකර ඒත් එක්කම එහි ආවේය. දෙදෙනා අතර ඇති වන්නේ බහින්බස් වීමකි. අවසානයේදී නාමල් කුමාර ඩිෆෙන්ඩරයේ නැඟී මාරු වී යන්නේ නාත්තන්ඩියට යන බව පවසමිනි. එම ඩිෆෙන්ඩර් ජීප් රථය කාගේ එකක්දැයි මේ වනවිට අනාවරණය වී ඇත. ඔහු කුරුණෑගල ප්රදේශයේ ව්යාපාරිකයෙකි. ඔහු සංචාරක ක්ෂේත්රයේ නිරත ව්යාපාරිකයකු වන අතර ඔහුගේ ක්රියාකාරිත්වය පිළිබඳ පොලිසිය විමර්ශනය කරමින් සිටී. දයාසිරි ජයසේකර මන්ත්රීවරයා පිටත්ව යන්නේ අත්අඩංගුවේ සිටි පිරිසට පොලිස් ඇප ලබාදී නිදහස් කරන්නට වාතාවරණය සකසමිනි.
කුලියාපිටිය, හෙට්ටිපොළ, වාරියපොළ, නිකවැරටිය ඇතුළු ගම්මාන රැසකට ජාතිවාදයේ ගිනි දැල් පැතිරෙන්නේ ඒත් එක්කමය. නිවාස සහ වෙළෙඳසල් 200කට වැඩි ප්රමාණයක් එහිදී ජාතිවාදීන්ගේ ගොදුරු බවට පත් විය. එම ගින්න ඇළවූ දේශපාලනඥයන් දැන් සිටින්නේ ඇටිකෙහෙල් කෑ රිලවුන් සේය. නීතිය යම් දවසක ඒ අයට එරෙහිවද ක්රියාත්මක වනු ඇති බව ජනතාවගේ එකම පැතුමය.
ගයාන් කුමාර වීරසිංහ