පාස්කු ඉරුදින ප්‍රහාර මාලාව හා ඉන් පසු රටේ ඇති වූ සිදුවීම් සොයා බැලීම සඳහා කථානායකවරයා විසින් පත් කළ තේරීම් කාරක සභාවේ නාම යෝජනාවලිය ඉදිරි සතියේ අනුමැතිය සඳහා පාර්ලිමේන්තුවට ඉදිරිපත් කරන බව කථානායක කරු ජයසූරිය මහතා සිළුමිණට පැවැසීය.
මෙය පූර්ණ බලය ඇති පාර්ලිමේන්තු තේරීම් කාරක සභාවක් වන අතර, මේ තේරීම් කාරක සභාව සඳහා පාර්ලිමේන්තුව විසින් පිළිගත් පක්ෂවල සහභාගිත්වය මත කමිටු නියෝජිතයන් පත් කිරීමට නියමිතය. එයට පත් වූ අයගේ නාම ලේඛනය ඉදිරියේදී පක්ෂ නායක රැස්වීමට ඉදිරිපත් කර අනුමැතිය ගැනීමට අපේක්ෂිත අතර, පාස්කු දින සිදු වූ ප්‍රහාරමාලාවට හා ඉන් පසු සිදුවීම්වලට හේතු, එහි පිටුපස සිටින අය සහ ඉදිරියේදී එබඳු තත්ත්වයන් වළක්වාගැනීමට ගත යුතු පියවර ආදි සියලු කරුණු මෙමඟින් සොයා බැලීමට අපේක්ෂිතය.
