අන්තවාදය කුමන ආගමකින්, ජාතියකින් හිස එසවීමට වෙර දැරුවද එය රටකට පමණක් නොව ලෝකයටම පිළිලයකි. අන්තවාදී ත්‍රස්තවාදීන් විසින් ම්ලේච්ඡ ප්‍රහාර එල්ලකොට සති තුනක් යන්නටත් මත්තෙන් නැවතත් රටෙහි ජනතාව වෙතට භීතිය හා ත්‍රාසය මුසුවූයේ තවත් අන්තවාදී සුළු පිරිසකගේ නොමනා හැසිරීම හේතුවෙනි. පාස්කු දින ප්‍රහාරය හේතුවෙන් ශෝකයෙන් ඇළලී සිටි සමස්ත රටවැසියන්ගේ සිත් සන්ත්‍රාසයෙන් අලළවමින් ඇවිළෙන ගින්නට පිදුරු දමන්නාක් සේ හැසිරුණු මේ අන්තවාදීන්ගේ මුල්ම සිදුවීම වාර්තා වූයේ පසුගිය පස්වැනිදා මීගමුව පෝරුතොට ප්‍රදේශයෙනි. එහෙත් එම සිද්ධි දුරදිග යෑම වැළකුණේ කාදිනල් හිමිපාණන්ගේද ඍජු මැදිහත් වීමෙන් හා රජයේ සහ ආරක්ෂක අංශයන්හි ක්ෂණික ක්‍රියාත්මකවීමෙනි.
පෝරුතොට සිදුවීමවී සතියක් ඉක්ම යද්දී නැවතත් හලාවත ප්‍රදේශයෙන් මුස්ලිම් ජනයා සහ සිංහල ජනයා අතර ගැටුමක් හටගත්තේ සමාජජාලා මාධ්‍යයන්හි සැරිසැරූ වදන් පෙළක් මුල් කරගෙනය. එහිදී හලාවත නගරයේ කඩ සාප්පුවලටද හානි සිදු කරමින් ඇවිළෙන්නට ගිය ගින්න නිවා දැමුණේ ඇඳිරි නීතියද පනවමිනි. එහෙත් එදිනම කුලියාපිටිය, බිංගිගිරිය, රස්නායකපුර, හෙට්ටිපොළ සහ කොබෙයිගනේ පොලිස් වසම්වල කලබලකාරි වාතාවරණයක් ඇතිවිය.
මුස්ලිම් ජනතාව සතු ව්‍යාපාරික ස්ථාන විනාශ කරමින් කිනියම ප්‍රදේශයේ මුස්ලිම් පල්ලියකටද හානි කරමින් වයඹ පළාත පුරා පැතිරීමට ගිය ප්‍රචණ්ඩත්වය පාලනය කිරීමට දහතුන් වැනිදා නැවත දැනුම් දෙන තුරු එම පළාතටම ඇඳිරිනීතියද පැනවීමට පොලිසියට සිදුවිණි.
අදිසි හස්තයක උසිගැන්වීම මත සිංහල අන්තවාදීන් සුළුපිරිසක් විසින් සිදුකරන ලද එම ප්‍රහාරයේ රස්නය නිවීයෑමටත් මත්තෙන් බස්නාහිර පළාතේ මිනුවන්ගොඩ නගරයද ගිනිගත්තේ පසුගිය 13 වැනිදා සවස් සාමයේය.
මිනුවන්ගොඩ නගරයේ පැරැණිම කඩේත් විනාශයි
සුළු ආරවුලකින් ඇරැඹුණු එම විනාශයට මූලික වූයේ මිනුවන්ගොඩ නගරයට ක්ෂණිකව කඩා වැදුණු දහසකට අධික පිටස්තර ජනයාගෙන්ද සැදුම්ලත් කණ්ඩායමක් බවට මුස්ලිම් මෙන්ම සිංහල ජනයාද චෝදනා නඟති. මේ පිළිබඳ තොරතුරු සෙවීමට මිනුවන්ගොඩ ප්‍රදේශයේ සංචාරයක නිරතවූ අප නෙතට ලක්වූ දසුන් ඉතාම ශෝකජනකය.
මිනුවන්ගොඩ නගර මධ්‍යයේ පිහිටි මුස්ලිම් පල්ලිය ඇතුළු වෙළෙඳසල් තිහකට පමණ මේ අන්තවාදීන්ගේ ක්‍රියා නිසා දැඩි හානි සිදුවී තිබිණි. අප යනමොහොතේත් ඇතැම් වෙළෙඳසල් ගිනිගෙන දැවෙමින් තිබෙන අන්දම අප නෙතට ලක්විය.
එම කෝලාහලය පටන් ගෙන ඇත්තේ මිනුවන්ගොඩ නගර මධ්‍යයෙන් ඔබ්බට වන්නට පිහිටි ෆවුස් හෝටලට පැමිණි කලහකාරීන් පිරිසක් විසින් ආරම්භ කළ ගැටුමකිනි. ඉන් අනතුරුව රෑ හතට පමණ පැමිණි පිරිසක් එම හෝටලය මුළුමනින්ම විනාශකර ඇත. ඒසමඟම නගරයට කඩාවැදුණු දහසකට අධික පිරිසක් විසින් මිනුවන්ගොඩ නගර මධ්‍යයේ පිහිටි මුස්ලිම් පල්ලිය ඇතුළු වෙළෙඳසල් රැසකටම පහර දී ගිනි තබා තිබිණි. අප යද්දීත් ඇතැම් වෙළෙඳ සල් දැවෙමින් තිබූ අතර වෙළෙඳසල් හතළිහකට ආසන්න ප්‍රමාණයක් ගිනි තබා කඩා බිඳ දමා තිබිණි.
මිනුවන්ගොඩ නගරයේ වැඩිම වෙළෙඳසල් ප්‍රමාණයක් හිමි හුසේන් රිම්සාන් නමැත්තා එහිදී අපට හමුවිය. ඔහුගේ වෙළෙඳසල් බොහොමයක්ම විනාශවී ඇතැයි ඔහු පැවසීය.
“අපට මිනුවන්ගොඩ නගරයේ මොහිදින් නමින් කඩ හතරක් තියෙනවා. මිනුවන්ගොඩ නගරයේ පැරැණිම කඩේත් මගේ. අපේ සියලුම කඩ සාප්පු විනාශ කළා. අපි සිංහල ජනතාව සමඟ ඉතාම සුහදව අවුරුදු තිහකට වැඩි කාලයක් මිනුවන්ගොඩ නගරයේ වෙළෙඳාම් කළා. එදා සවස හයට විතර මුලින්ම ගැහුවේ ෆවුස් හෝටලයට. අපි එදා නෝම්බි නිසා කඩ වහලා ගෙවල්වල හිටියේ. පස්සෙ රෑ හත විතර වෙනකොට ආරංචි වුණා අපේ කඩවලටත් ගහනවා කියලා. මේ අය පැය තුනකට වැඩිය මේ නගරයේ ඉඳලා තියෙනවා. මේ මිනිස්සු සිංහල කඩවලටත් ගහලා. මොනතරම් අපරාධකාරයෝ පිරිසක්ද මේ ඇවිල්ලා තියෙන්නෙ... හැබැයි මට හොඳටම විශ්වාසයක් තියෙනවා පිටින් ආපු විශාල පිරිසක් මේ අය අතර හිටියා. බොහෝ සිංහල මිනිස්සු අප සමඟ හරිම සුහදයි. මේ විනාශය ගැන අහලා තොරතුරු විමසලා වැඩිපුරම කෝල් එන්නෙත් සිංහල මිනිස්සුන්ගෙන්මයි. ඒ අය තමයි අපේ කඩවලට බොහෝවිට එන්නෙ. සිංහල මිනිස්සු කියන්නෙ අපිත් සමඟ බොහෝ ළෙන්ගතුව සිටින පිරිසක්. මගේ කඩයක් මීට පෙරත් ගිනිගත්තා. ඒ වෙලාවේ සිංහල මිනිස්සු තමයි ඒ ගින්න නිවන්න වැඩිපුරම සහාය වුණේ.”
සිංහල කඩත් ගිනි තියලා
මිනුවන්ගොඩ නගර මධ්‍යයේ පිහිටි ජුම්මා මස්ජිඩ් පල්ලියටද හානි සිදුවී තිබිණි. අප යන විටත් එම පල්ලියට අන්‍ය ආගමිකයෝ බොහෝ දෙනෙක් පැමිණ සිටියහ. පල්ලියේ මවුලවිතුමා වනුයේ තුවාන් මුරාඩ්ය.
“අපි කිසි කෙනෙක් පල්ලියේවත් නගරයේවත් හිටියේ නෑ. නෝම්බි අරින්න ගෙවල්වලට ගිහින් හිටියේ. ඒ වෙලාවේ තමයි මේ දේ වුණේ. ඇත්තටම අපිට දුක මේ වගේ විනාශයක් සිංහල මිනිස්සුන්ගෙන්ම සිදුවීම ගැන. අපි වෙසක්වලට, පොසොන්වලට මිනුවන්ගොඩ නගරයේ තිබෙන උත්සවවලට මොනතරම් උදවු කරනවාද? ඇත්ත. අපේ අයගෙනුත් රටට ලොකු විනාශයක් වුණා.
ඔවුන් ත්‍රස්තවාදීන්. මේ නොමඟ ගිය මිනිස්සු කරන වැඩ. අපේ සාමාන්‍ය මිනිස්සු ඒවාට සම්බන්ධ නෑ. ඒ නිසා මං කියන්නෙ මේ දේවල් මෙතැනින් නතර විය යුතුයි කියායි. මේවායින් වෙන්නෙ රටේ සාමය, සංහිඳියාව නැතිවීමයි. මෙවැනි දේවල්වලින් අපේ මිනිස්සුත්, සිංහල මිනිස්සුත් අතර තියෙන සම්බන්ධය තවත් ඈතට යනවා. ඒක රටක් ලෙස සෑම කෙනෙකුටම අවාසියි.”
විනාශය සඳහා මිනුවන්ගොඩ නගරය ගැන හොඳින් දන්නා පිරිසක්ද පැමිණ සිටි බවට ඇතැම් මුස්ලිම් ජාතිකයෝ චෝදනා නඟති. ඔවුන් සිංහල හා මුස්ලිම් කඩ තෝරා බේරාගෙන විනාශ කර තිබෙන බව පවසති. විනාශ වූ වෙළෙඳසල් අතර සිංහල වෙළෙඳසල් පහකට අධික ප්‍රමාණයක් ද තිබේ.
මිනුවන්ගොඩ ඔරලෝසු කණුව ඉදිරිපිට තිබෙන සිවු මහල් ගොඩනැඟිල්ලක පිහිටි සිංහල වෙළෙඳසලක් වූ ‘එකෝ’ වෙළෙඳසලට බරපතළ හානි සිදුව තිබෙනු අපි දුටුවෙමු. එහි ඉහළ මහලේ රෙදිපිළි ගබඩාව අප යන විටත් දැවි අළුවී දුම් දමමින් තිබිණි. එහි හිමිකාරිණී චන්දිමා මහත්මිය අප හා සිද්ධිය විස්තර කළාය.
“පේනවා නේද අපිට වෙලා තියෙන විනාශය... ඇයි මේ මිනිස්සු මේ විදිහට හැසිරෙන්නෙ. මොනතරම් විනාශයක්ද මේ කරලා තියෙන්නෙ. අපිට කෝටි ගාණක පාඩුවක් වෙලා. මොන ජාතියක මිනිස්සු වුණත් මේ විදිහට හැසිරෙනවානම් ඒක මුළු රටටම හානියක්... අද අපිට මේ විදිහට හරි දෙයක් ඉතුරු වුණේ ආරක්ෂක අංශවල කැපවීම නිසායි. මේ කරපු දෙයින් සිංහල මිනිස්සු වන අපට තමයි වැඩිම අලාභය වෙලා තියෙන්නෙ. මේ නගරේ මුස්ලිම්, සිංහල අපි හැමෝම හරිම සාමයෙන් ජීවත්වුණේ. මුස්ලිම් මිනිස්සු අනන්තවත් අපේ කඩේට බඩු ගන්න එනවා. හැබැයි මේ වෙලාවෙ කියන්න තියෙන කනගාටුදායකම දේ තමයි, මුස්ලිම් මිනිස්සු සියලු දෙනා එකට එකතු වෙලා ඉන්නවා. ඒත් අපි ගැන සොයා බලන්න එක සිංහල මනුස්සයෙක් ආවේ නෑ. ජාතියක් ලෙස සිංහල මිනිස්සු ගැන පුදුමාකාර කලකිරීමක් අපට තියෙන්නෙ.”
මෙහෙමහරි රැකුණේ ආරක්ෂක අංශ නිසායි
මෙවන් විනාශවලින් සෑම දෙනාටම සිදුවන්නේ විපතකි. විනාශයට ඉස්ලාම්ද, බෞද්ධද, හින්දුද, කතෝලිකද ලෙසින් භේදයක් නැත. එම නිසා මේ මොහොතේ රටෙහි සෑම ජනකොටසක්ම සෑම විටෙකම රට ගැන සිතා සිහිබුද්ධියෙන් ක්‍රියා කළ යුතුයැයි මිනුවන්ගොඩ රජමහා විහාරයේ හැවන්තැන්නෙගෙදර සීලරතන නාහිමියෝ පවසති.
“මිනුවන්ගොඩ කියන්නෙ සියලු ජනකොටස් බොහෝම සාමදානයෙන් සිටින නගරයක්. මීට පෙර රටේ ඇතැම් ස්ථානවල කලහකාරි සිදුවීම් සිදුවූ විටත් අපේ ජනතාව සාමයෙන් සිටියා. ආගමික නායකයන් ලෙස අපි සියලු දෙනාත් සෑම මොහොතකම ජනතාවගේ සාමය, සමඟිය ගැන සාකච්ඡා පවත්වමින් හිටියේ. මුස්ලිම් ජනයාත්, බෞද්ධ ජනයාත් බොහෝ විශ්වාසයෙන් ජීවත්වුණේ. ඒත් එක්වරම මෙවැනි දෙයක් වීම අපිටත් හිතාගන්න බැහැ. එය මුළු මිනුවන්ගොඩ නගරයටම විශාල කැළැලක්. මං හිතන්නෙ මේවා යම්කිසි සංවිධාන කණ්ඩායම් විසින් සිදුකරන දේවල්. අපි ආගමික නායකයන් ලෙස මේවා දැඩි පිළිකුළෙන් හෙළා දකිනවා.
මේ වෙලාව දේශපාලනඥයන් හැමෝම කට පරිස්සම් කරගෙන සිටිය යුතු වෙලාවක්. කියන දේවල්, කරන දේවල් ගැන හොඳට සිතා බලා කටයුතු කළ යුතුයි. මොකද මිනිස්සු කුපිත වෙන කිසි දෙයක් දේශපාලනඥයන්, ආගමික නායකයන් ඇතුළු කිසිම කෙනෙක්ගෙන් සිදු නොවිය යුතුයි. එහෙම නොවුණොත් මේ වෙන දේවලින් රටට ලොකු විනාශයක් විය හැකියි.”
මේ වනවිට සිද්ධිය සම්බන්ධයෙන් සැක පිට පුද්ගලයන් දහහතර දෙනෙකු අත්අඩංගුවට ගෙන රක්ෂිත බන්ධනාගාර ගතකර තිබේ. තවත් තිහකට වැඩි පිරිසක්ද අප මිනුවන්ගොඩ නගරයේ සැරිසැරූ දින අත්අඩංගුවට ගෙන තිබිණි. එදින මිනුවන්ගොඩ නගරයට වූ හානිය දැකබලා ගැනීමට ජනමාධ්‍ය හා රාජ්‍ය ආරක්ෂක අමාත්‍ය රුවන් විජයවර්ධනද පැමිණ සිටියේය.
“මෙවැනි අපරාධ කුමන ජාතියක් විසින් සිදුකළද ඉතාම නිර්ලජ්ජිතයි. මින් අන්තවාදීන්ට, ත්‍රස්තවාදීන්ට බලාපොරොත්තු සඵල වීමක් වගේම උදවු දීමක් කරන්නෙ. විශේෂයෙන් අපේ ආරක්ෂක අංශ මේ මොහොතේ දිවා රෑ වෙහෙසෙන්නෙ එදා පාස්කු ඉරිදා ප්‍රහාරය එල්ල කළ ත්‍රස්තවාදීන් සොයා ගැනීමටයි. ඒත් මෙවැනි දේ වනවිට ආරක්ෂක අංශ සාමාජිකයන්ට ත්‍රස්තවාදීන් කොටුකර ගැනීමට වඩා රටේ සාමය වෙනුවෙන් කැපවීමට සිදු වෙනවා. ඒක නිසා මම සෑම දෙනාගෙන්ම ඉල්ලීමක් කරන්නෙ මෙවැනි අපරාධවලට යොමු වන්න එපා රට ගැන සිතන්න කියායි. සහාරන්ගේ අන්තවාදී ත්‍රස්තවාදීන් බොහෝ දෙනකු මේ වෙද්දී ආරක්ෂක අංශවලට කොටුව ඇතැයි”ද ඇමැතිවරයා පැවසීය.
මධුමාධව සුපර් මාකට් එකේ හිටියාද?
මිනුවන්ගොඩ මේ විනාශය සිදුවීමත් සමඟ සමාජ මාධ්‍යයන්හි සැරිසැරූ වීඩියෝවක දැක්වුණේ ගායක මධුමාධව අරවින්ද සුදු ඇඳුමකින් සැරැසී මිනුවන්ගොඩ නගර මධ්‍යයේ තිබෙන පාලම මතින් ඇවිද යන දසුනකි. ඒත් සමඟ ඔහුට බොහෝ චෝදනාද එල්ල විණි. ඒ පිළිබඳ ප්‍රකාශයක් ගැනීමට මධුමාධව අරවින්ද මිනුවන්ගොඩ පොලිසියට කැඳවිණි. එලෙස ප්‍රකාශයක් ලබාදීමට පැමිණ සිටියදී ඔහු අප හා අදහස් පළ කළේය.
“අපි කවදත් මුස්ලිම් අන්තවාදයට විරුද්ධයි. අපට නඟන අභූත චෝදනාවලින් එය නවත්වන්න බැහැ. අපිට මුස්ලිම් සාමාන්‍ය ජනයා සමඟ කවදාවත් කිසිම ගැටලුවක් නැහැ. නමුත් අන්තවාදීන් සමඟ තිබෙන ප්‍රශ්නය මෙතැනින් නතර කරන්නෙත් නැහැ. මං එදා දිවුලපිටියට යමින් හිටියේ. ඒ වෙලාවෙ මාර්ග තදබදය නිසායි මං වාහනෙන් බැහැලා ගියෙ මොකද වෙන්නෙ කියලා බලන්න.”
මධුමාධව අරවින්ද එසේ පැවැසුවද, ගින්නෙන් විනාශ වූ අම්රා ටෙක්ස් වෙළෙඳසලේ හිමිකරු ජේ. ටී. රිස්වාන් ආරක්ෂක රාජ්‍ය අමාත්‍යවරයා පැමිණි මොහොතේ මධුමාධව ගැන යම් හෙළිදරව්වක් කළේ මෙසේය.
“7.15ට විතර මම දැක්කා ඔහු සුපර් මාකට් එක ඇතුළට තව තුන්දෙනෙක් සමඟ යනවා. එයා දිවුලපිටියේ යනවානම් සුපර් මාකට් ඇතුළේ රිංගන්නෙ මොකටද? මං ඒත් මගේ යාළුවට කිව්වා, මෙයා කොහේද මේ රිංගන්නෙ කියා. මට හොඳටම විශ්වාසයි එයා සුපර් මාකට් එකට වෙලා මේ සේරම බලාගෙන හිටියා. සුපර් මාකට් එකේ පෝල් කඩවල සීසීටීවී කැමරා තියෙනවා. ඒවා පරීක්ෂා කළානම් ඇත්ත දැනගන්නපුළුවන්.”
ඒ පිළිබඳ දැඩිව පරීක්ෂා කරන ලෙස ඒ මොහොතේම ඇමැතිවරයා පොලිසියට උපදෙස් දුන්නේය.
අන්තවාදය, ත්‍රස්තවාදය වපුරමින් අහිංසක ජනයාගේ දේපළ විනාශ කිරීම කුමන ජාතියක් කළද එය අහස, පොළොව නුහුලන අපරාධයකි. රටක් ජාතියක් ලෙස සැවොම අගාධයට ඇද දමන එවැනි විනාශකාරී අපරාධ සිදුකරනවුන් තරාතිරම නොබලා අත්අඩංගුවටගෙන උපරීම දඬුවම් පැමිණවීම තවත් මෙවැනි අපරාධ සිදුවීම වළක්වා ගැනීමට තිබෙන එකම මාර්ගයයි. එසේ නොවුණහොත් අපට නැවතත් අසූ තුනේ කළු ජූලියේ මතකය සියැසින් දැකගැනීමට හැකි වනවාට සැක නැත.
සේයාරූ - කැලුම් ලියනගේ
