පාඨකයන් තුළ ක්‍රීඩාව ගැන උනන්දුවක් ඇති කළ යුතුයි | සිළුමිණ

පාඨකයන් තුළ ක්‍රීඩාව ගැන උනන්දුවක් ඇති කළ යුතුයි

මෙරට සාහිත්‍ය ලොව දිනෙන් දින වර්ධනය වෙමින් පවතියි. එසේ වුවත් එහිදී සිංහල ක්‍රීඩා සාහිත්‍යයට හිමි වන්නේ ඉතා සුළු අවධානයක් පමණකි. එහිදී ලේඛකයෝ මෙන්ම පාඨකයෝ තුළත් ක්‍රීඩා සාහිත්‍යය ගැන තිබෙන්නේ ඇල් මැරුණු උනන්දුවකි. මේ ගැන එක්තරා ආකාරයකින් පුදුමයට පත් විය යුතුය. එමෙන්ම කණගාටුවටත් පත් විය යුතුය.

අන්තර්ජාතිකව ගත් විට ක්‍රීඩා ලොව සාර්ථක වූ බොහෝ රටවල ක්‍රීඩා සාහිත්‍යයට සුවිශේෂි වැදගත්කමක් හිමි වී තිබේ. මේ වන විට කිසියම් ආකාරයකින් ශ්‍රී ලංකාවේ ක්‍රීඩා මට්ටම පසුබැසීමකට ලක් වී ඇත. එසේ වුවත් ක්‍රීඩා කිහිපයකින් හෝ සාර්ථකව සිටි කාලයේදී වුවත් මෙරට ක්‍රීඩා සාහිත්‍යය ඉහළ මට්ටමකට ළඟා වූයේ නැත.

මෙවැනි වාතාවරණයක් තුළ වුවත් මෙරටේ ක්‍රීඩා සාහිත්‍යයේ පෝෂණයට වරින් වර සිය දායකත්වය සපයන ලේඛකයෙක් සිටියි. ඒ ජ්‍යෙෂ්ඨ මාධ්‍යවේදී අසෝක ගුණතිලක‍යන්ය. ඔහුගේ සේවය අගයමින් ක්‍රීඩා මාධ්‍ය සහ ග්‍රන්ථකරණය සඳහා ජාතික මෙන්ම අන්තර්ජාතික සම්මානවලින් ද හෙතෙම පිදුම් ලැබීය.

නොබෝදා ගුණතිලකයන් නැවත වතාවක් මෙරට ක්‍රීඩා සාහිත්‍යයට අපූරු ග්‍රන්ථ ද්විත්වයක් දායාද කළේය. ඇතැන්ස් සිට රියෝ දක්වා (1896 සිට) ඔලිම්පික් පිටියේ අපූරු කතන්දර සහ කෙළි පද සරණිය (ඉංග්‍රීසි - සිංහල ක්‍රීඩා ශබ්ද කෝෂය) මෙම නවතම ක්‍රීඩා ග්‍රන්ථ වේ.

ගුණතිලකයන් මීට පෙර ක්‍රීඩාව තේමා කරගත් ග්‍රන්ථ 08ක්ම ක්‍රීඩා ලොවට දායාද කර තිබේ. ඊට ඔලිම්පික් සැරිසර (2001), ජගත් පාපන්දු ශුරතාව (2002), ඒෂියන් ඇත්ලෙටික්ස් ග්‍රෝන්ප්‍රී (2003), හිස්ටරිකල් ඇන්ඩ් මොඩර්න් කල්චර් ඔෆ් ස්පෝර්ට්ස් ඉන් ශ්‍රී ලංකා (2005), ඔල්වරසන් (2006), ටෙන්ට් සවුත් ඒෂියන් ගේම්ස් - කලම්බු (2006), පළමුවැනියා (2015) සහ ලෙජන්ඩ්ස් ඕල් (2016) ඊට අයත්ය.

මේ අතරින් වසරේ විශිෂ්ටතම ක්‍රීඩා ප්‍රකාශනය - ජනපති ක්‍රීඩා සම්මානය 2016 වසරේදී හිමි වූයේ පළමුවැනියා ග්‍රන්ථයටයි. එමෙන්ම ලෙජන්ඩ්ස් ඕල් ග්‍රන්ථයට 2017 වසරේ ජනපති ක්‍රීඩා සම්මාන දෙවැනි ස්ථානයත් හිමි වූයේය. හෙතෙම මේ වන විට ක්‍රීඩා නොවන ඉංග්‍රීසි පරිවර්තන ද්විත්වයකුත් රචනා කර තිබේ. වසරේ ක්‍රීඩා මාධ්‍යවේදී 2000 සහ ක්‍රීඩා මාධ්‍යකරණයට ඔලිම්පික් සම්මානයත් 2004 වසරේදී ඔහුට හිමි විය.

ගුණතිලකයන් සිය මාධ්‍ය දිවිය ඇරඹුවේ ලේක්හවුස් ආයතනයෙනි. ඒ 1976-82 අතර කාලයේදී මධ්‍යම ප්‍රවෘත්ති කාර්යංශයේ සහ ජනතා පුවත්පත ඇසුරෙනි. පසුව දිවයින පුවත්පතේ සම කර්තෘ සහ එහි සමාරම්භක ක්‍රීඩා සංස්කාරක වශයෙනුත් කටයුතු ක‍ෙළ්ය. සිය නවතම ක්‍රීඩා ග්‍රන්ථ ද්විත්වය ගැන අසෝක ගුණතිලකයන් මෙසේ අදහස් දැක්වූහ.

ඔබ මීට පෙරත් ඔලිම්පික් ක්‍රීඩා උලෙළ ගැන ග්‍රන්ථයක් එළිදැක්වුවා නේද?

ඔව්. ඒ 2001වසරේදීයි. එය නම් කළේ ඔලිම්පික් සැරිසර නමින්. ඊට 1896 ඇතැන්ස් සිට 2000 සිඩ්නි ඔලිම්පික් උලෙළ දක්වා තොරතුරු ඇතුළත් කළා.

මෙම නවතම ඇතැන්ස් සිට රියෝ දක්වා ග්‍රන්ථය ඉහත ඔලිම්පික් සැරිසරෙන් වෙනස් වෙන්නේ කෙසේ ද?

මෙහි 1896 මෙන්ම 2004 සිට 2016 රියෝ ඔලිම්පික් තොරතුරුත් අයත් වෙනවා. තවත් විදිහකින් කියනවා නම් ඔලිම්පික් සැරිසර යාවත්කාලීන කිරීමත් ලෙසට ඇතැන්ස් සිට රියෝ දක්වා හඳුන්වන්නත් පුළුවන්.

ඇතැන්ස් සිට රියෝ දක්වා ග්‍රන්ථය ගැන වැඩිදුරටත් විස්තර කළහොත් ?

මෙය කොටස් දෙකකින් සමන්විතයි. ඔලිම්පික් උලෙළවල් 31ක් ආශ්‍රිතව තරග ඉතිහාසයට එක් වූ ‘ඔලිම්පික් නොවන ඔලිම්පික් කතා’ සහ එම උලෙළවල නිල සිදුවීම් එක් කොටසකට අයත් වෙනවා. ඔලිම්පික් පිටියේදී මෙතෙක් වාර්තා වී ඇති ආදරය, වෛරය, හද ගැස්ම, විවාහ, වර්ජන, දේශපාලනය, ඝාතන, දේශ ද්‍රෝහි ක්‍රියා මෙන්ම පිටියේ මහත්මා ගුණ ආදී සිද්ධීන් මීට ඇතුළත් වෙනවා.

මෙහි දෙවන කොටසට අදාළ දත්ත අයත් කර තිබෙනවා. ඊට උලෙළ, එහි සංවිධානය කරන ලද රට, ස්ථානය, දින වකවානු, ප්‍රධාන අමුත්තා, සහභාගිත්වය, පදක්කම් සටහන වගේ තොරතුරු අයත් වෙනවා. එමෙන්ම කලු සුදු ඡායාරූප, රේඛා, චිත්‍ර සහ වගුත් ඇතුළත් කළා. ඒ පාඨකයන්ගේ පහසුව පිණිසයි.

ඔබේ අනෙක් නවතම ග්‍රන්ථය තමයි කෙළි පද සරණිය. ඒ ගැන පැවසුවහොත්?

මම හිතන විදිහට මෙවැනි ග්‍රන්ථයක් ශ්‍රී ලංකාවේ පළ වූ ප්‍රථම වතාව තමයි මේ. 1983-84 කාලයේදී ඉංග්‍රීසි - සිංහල ක්‍රීඩා ශබ්ද කෝෂයක් සම්පාදනය සඳහා කතිකාවතක් තිබුණා. එහෙත් එය ක්‍රියාත්මක වූයේ නැහැ. මෙය සම්පාදනය කරන්න මට තෙවසරක පමණ කාලයක් ගත වුණා. විවිධ ක්‍රීඩා වලදී භාවිතා වන වචන සහ තේරුම් මෙන්ම අදාළ ක්‍රීඩාවල ආරම්භය ගැන තමයි මෙහි ඇතුළත් වෙන්නේ.

ලොව ප්‍රායෝගිකව ක්‍රීඩා 8000ක් පමණ තිබෙනවා කියලා වාර්තා වෙනවා. මෙම ක්‍රීඩාවලින් වසර 2020 ජපානයේ ටෝකියෝ ඔලිම්පික් ක්‍රීඩා උලෙළට සභා සම්මත වූ ක්‍රීඩා 39 ක් වෙත මෙම ග්‍රන්ථයෙන් මා අවධානය යොමු කළා. ඊට අමතරව ශ්‍රී ලංකාවේ වඩාත් ප්‍රචලිත ක්‍රීඩා කිහිපයක තොරතුරුත් මෙහි අඩංගු වෙනවා.

මෙය සාහිත්‍ය ලෝකයට එක් කිරීමට අවස්ථාව උදා වුණේ ක්‍රීඩා ඇමැතිවරුන් දෙදෙනෙක් නිසා කියලා විශේෂයෙන්ම සඳහන් කරන්න ඕනෑ. ඒ හිටපු ක්‍රීඩා ඇමැතිවරයකු වූ දයාසිරි ජයසේකර සහ වත්මන් ක්‍රීඩා ඇමැති හරීන් ප්‍රනාන්දු යන මහත්වරුන්ගෙන් ලැබුණු සහාය නිසයි.

මේ වන විට මෙරටේ ක්‍රීඩා සාහිත්‍යයක් තිබෙනවාද?

ඉංග්‍රීසියෙන් තමයි තිබෙන්නේ. දැන් තමයි ඊට යම්කිසි දෙයක් සිදු වෙන්නේ. මෙම ග්‍රන්ථ එහි එක් උත්සාහයක් තමයි. සිංහල ක්‍රීඩා සාහිත්‍යය මීට වඩා ඉදිරියට යෑමට තිබෙන ප්‍රධානතම බාධක කිහිපයක් තිබෙනවා. එකක් තමයි අනුග්‍රාහකයින් සොයා ගැනීමට අසීරු වීම.

මගේ නවතම ග්‍රන්ථ ලියලා ඉවර වෙලා මෙරටේ ප්‍රධානතම සමාගම් 05ක් වෙතට ගියා. නමුත් ඊට කිසිම අනුග්‍රාහයක් දක්වන්න ඉදිරිපත් වුණේ නැහැ. ඒ අතරිනුත් එක සමාගමක් විතරයි උත්තරයක් දුන්නේ මුදල් නැහැ කියලා.

ඒ වගේම ක්‍රීඩා පොත්වලට මෙරටේ වෙ‍ෙළඳ‍ෙපාළක් නැහැ. මෙය ශ්‍රී ලංකාවට අලුත් දෙයක්. පාඨකයන් තුළ ක්‍රීඩාව ගැන කියවීමට උනන්දුවක් ඇති කළ යුතුයි. ඒ සඳහා ක්‍රීඩා මාධ්‍යවේදීන්ටත් යම්කිසි වගකීමක් තිබෙනවා. ඉදිරියේදී තව තවත් සිංහල ක්‍රීඩා පොත් එළි දැක්වුවහොත් මෙරට සාහිත්‍ය ලෝකයේ ඊටත් ඉඩක් ලැබෙන්න පුළුවන්.

 

ඡායාරූප - සමන් ශ්‍රී වෙදගේ

 

Comments