පැල්මඬුල්ල, කෙළින්වීදියේ මහල් තුනකින් යුත් 'දේදුනු ටෙක්ස්' ඒ අවට ජනයා අතර ජනප්රිය රෙදිපිළි වෙළෙඳසලකි. බිම් මහලේ සහ පළමු මහලේ ඉඩ වෙළෙඳසලට වෙන් වෙද්දී දෙවන මහලේ වෙළෙඳසල හිමි 63 හැවිරිදි සිරිපාල සහ බිරිය වාසය කළහ. ඔවුන්ගේ දූ දරුවෝ විවාහ වී වෙනත් පළාත්වල වාසය කරති.
සිරිපාල රෙදිපිළි ව්යාපාරයට අමතරව කලෙක සිටම මැණික් ගල් එකතු කරමින් පසු ගෙවීමේ ක්රමයට මැණික් ගල් විකුණන ව්යාපාරයකද නිරතව සිටියේය. පසුගිය 27 වැනි දා රාත්රියේ යුවළ නිවෙසේ නොසිටියේ හිතවතකුගේ මළගෙදරකට සහභාගි වීමට ගිය හෙයිනි.
සුපුරුදු පරිදි වෙළෙඳසල 28 වැනිදා විවෘත කිරීමට සූදානම් වූ සිරිපාල පළමු මහලේ සේප්පුව අසලට ගියේ දෛනික ගනුදෙනු සඳහා අවැසි මුදල් ලබාගැනීමටය. එහෙත් දුටු දසුනෙන් උන්හිටි තැන් අමතකව ගිය සිරිපාල විලාප දුන්නේය.
රත්නපුර පොලිස් අධිකාරි සුදත් මාසිංහ |
“සේප්පුව හොරු කඩලා“ යනුවෙනි.
ලක්ෂ ගණනක මුදල්, එකතු කරන ලද මැණික් ගල් සහ දූදරුවන්ගේ රත්රන් බඩුද තිබුණේ සේප්පුවේය. සොරෙකු පැමිණි ආකාරය පිළිබඳ කිසිදු හෝඩුවාවක් සිරිපාලට දක්නට නොවිණි. ඒ වන විට වෙලාව පෙරවරු 10.30 පමණ විය. ඔහු සැණින් දිව ගියේ පැල්මඬුල්ල පොලිසියටය. සිදු වී තිබූ අකරතැබ්බය ගැන සියලු තතු හෙතෙම පොලිස් ස්ථානාධිපති පොලිස් පරීක්ෂක සෙනරත් බණ්ඩාරට කීවේය.
ඒ අනුව කෝටි තුනක පමණ මුදල්, මැණික් ගල් සහ ස්වර්ණාභරණ තොගයක් සොරාගෙන ඇති බවට පැමිණිල්ලේ සටහන් විණි.
ලැබුණු පැමිණිල්ල ගැන පොලිස් ස්ථානාධිපතිවරයා විසින් රත්නපුර කොට්ඨාස බාර පොලිස් අධිකාරි සුදත් මාසිංහව දැනුවත් කළේය. පොලිස් අධිකාරිවරයාගේ ඍජු අධීක්ෂණය මත පැල්මඬුල්ල පොලිසිය පරීක්ෂණ ආරම්භ කළේය.
සේප්පුව පිහිටා තිබුණේ පළමු මහලේ පිටුපසට වන්නට තිබෙන කාමරයකය. එම සේප්පුව යතුරෙන් පමණක් නොව ඉලක්කම්ද නිසි පරිදි ගළපා කරකැවීමෙන් පමණක් විවෘත වන මනා ආරක්ෂිත සේප්පුවකි. එහෙත් සේප්පුව තිබූ කාමරයට දොරගුළු දමා ඇත්තේ සාමාන්ය සොයිබයකින් පමණක් බව පොලිසියට දිස්විණි.
එසේ නිලධාරින්ට දක්නට ලැබුණේ ඉලක්කම්ද නිසි පරිදි ගළපා සේප්පුව විවර කොට සිරිපාල කියූ කෝටි ගණනක මැණික් හා ස්වර්ණාභරණ සමඟ මුදල් රැගෙන සේප්පුවේ යතුරු දෙකද අසල කුඩා මේස ලාච්චුවකට දමා ගොස් ඇති බවයි.
අසල ටයිල් පොළොවේ යම් මඩ පැල්ලමක්ද දක්නට ලැබිණි. එහෙත් සොරෙකු මඩ සමඟ පැමිණියේ නම් අවට බිත්තිවල හෝ අනිවාර්යයෙන්ම මඩ ගෑවි තිබිය යුතු බව පොලිසියේ මතය විය. එසේම සීසීටීවී කැමරා තිබුණද කිසිදු කැමරාවකට සොරෙකු පැමිණි දසුනක් හසු වී නොතිබිණි. ඇඟිලි සලකුණු පරීක්ෂා කළද කිසිම සලකුණක් නොවිණි.
පරීක්ෂණවලින් අනතුරුව සිදු වී ඇති සොරකම ගැන දිගින් දිගටම හිමිකරු වූ සිරිපාලගෙන් ප්රශ්න කරන්නට විය. ඒ අතරේ රත්නපුර දිසාවේ අතිදක්ෂ පොලිස් නිල සුනඛයෙකු වන 'බැටී'ද පරීක්ෂණවලට එක් වූයේය. බැටීට සේප්පු යතුර ඉව කරන්නට දුන් විට සුනඛයා ගොස් නැවතුණේ සිරිපාල මුදලාලි අසලය. ඒ අනුව සිදු වන්නෙ කුමක්ද යන්න පොලිස් නිලධාරින්ට උභතෝකෝටිකයක් විය.
මේ අතර සිරිපාලද අතමාරුවට මැණික් ගල් ගෙන විකුණන බවටත් තොරතුරු හෙළි විණි. සේප්පුවේ ඉලක්කම්ද 'තිත'ටම ගළපා විවෘත කර තිබීමත්, එතරම් විශාල ධනස්කන්ධයක් තිබූ කාමරයේ දොරට සාමාන්ය සොයිබ ලොක් එකක් සවි කර තිබීමත් යන කාරණා මත සොරකම සිරිපාල විසින්ම රචනා කළ 'පිටපත'ක් ද යන්න පොලිසිය සැක කළේය.
එසේ සැකය තමා වෙත යොමු වෙද්දී සිරිපාල මෙවැනි කතාවක් කීවේය.
“ සර්... ඉස්සෙල්ලා දවසේ මම සේප්පුවේ ඉලක්කම් ගළපලා අරින්න හැදුවා... පස්සෙ යතුර දැම්මා... ඒත් ඇරගන්න බැරි වුණා. අන්තිමට යතුර මේස ලාච්චුවේ දාලා මම වෙන වැඩකට ගියා... පස්සෙ ඒක මට අමතක වුණා.“
පොලිසියේ සැකය කෙතරම් සිරිපාල දෙසට එල්ල වූවත් පොලිස් අධිකාරි සුදත් මාසිංහ පැල්මඬුල්ල පොලිස් නිලධාරින්ට උපදෙස් දුන්නෙ තවත් පැති ඔස්සෙ විමර්ශන සිදු කරන ලෙසය. ඒ අතරේ පොලිස් අධිකාරිවරයා රත්නපුර අවට සියලුම මැණික් වෙන්දේසිකරුවන් දැනුවත් කළේ සිරිපාල කියූ පරිදි හයසීයකට වැඩි මැණික් ගල් ප්රමාණයක සොරකමක් සිදු වී ඇති බවත්, නැති වූ මැණික්වල හැඩරුව ගැනත් පවසමිනි.
සොරකම වී සතියක් යන්නටත් මත්තෙන් පොලිස් අධිකාරිවරයාට රත්නපුර නගරයේ මැණික් වෙන්දේසිකරුවකුගෙන් කිසියම් තොරතුරක් ලැබිණි. ඒ සොරකම් කෙරුණු හැඩරුව ඇති මැණික් ගලක් පිළිබඳ ය. සිරිපාල මුදලාලිගේ වාසනාවට මෙන්ම එම මැණික් ගල සිරිපාල මුදලාලි මීට කලෙකට පෙර ලබාගෙන තිබුණේද එම වෙන්දේසිකරුගෙන්මය.
ඒ අනුව ක්රියාත්මක වූ පොලිසිය එම මැණික් ගල එදින වෙන්දේසියට රැගෙන ආ පුද්ගලයා සොයාගෙන ඔහුගෙන් ප්රශ්න කළේය. ඔහු එම ගල කෙනෙකුගෙන් මිලදීගෙන තිබිණි. පොලිස් නිලධාරින් එම පුද්ගලයාද සොයාගියේය. ඔහුටද කෙනෙකු එම මැණික් ගල දුන් එකකි. එම පුද්ගලයා 48 හැවිරිදි මොහොමඩ් හනිෆා අබ්දුල් සත්කාර් නමැති ගුරුවරයෙකි. ඔහු පිළිබඳ තොරතුරු හෙළි විය. සත්කාර් බළන්ගොඩ පදිංචි අයකු බවත් දෙමළ සහ ඉංග්රීසි ගුරුවරයකු ලෙස බළන්ගොඩ අවට රජයේ පාසලක සේවය කරන බවත් අනාවරණය විය.
ඒ අනුව බළන්ගොඩට ගිය පැල්මඬුල්ල පොලිස් නිලධාරින් සැකකාර ගුරුවරයාගෙන් ප්රශ්න කළේය. පුද්ගලයා සම්බන්ධව සොයා බලද්දී සිරිපාල මුදලාලිගෙන් සොරකම් කරන ලද මැණික් ගල් 98ක් ඔහු සන්තකයේ තිබී හමු විය. පුද්ගලයා අත්අඩංගුවට ගනු ලැබීය. අනතුරුව හෙතෙම සිද්ධිය පිළිබඳ පාපොච්චාරණයක් කළේය.
ඔහුගේ පාපොච්චාරණ මත ඔහුත් සමඟ සොරකමට සම්බන්ධ වූ ඔහුගේම පාසලේ ගණිත ගුරුවරයා වූ 48 හැවිරිදි කොටවෙහෙරමංකඩ, වේලිඔය අජිත් විජයවීරද අත්අඩංගුවට පත් විය. සිරිපාලගෙන් සොරකම් කරන ලද මුදල්, ස්වර්ණාභරණ සහ මැණික් ප්රමාණයක්ද ඔහු සන්තකයේ තිබී හමු විය. කොල්ලයට එක් වූ අනෙක් කණ්ඩායම ගැන තොරතුරු අනාවරණය විණි.
ඒ අය අතර හමුදාවෙන් පලාගිය දෙදෙනෙක්ද වූහ. එක් අයෙක් කිරිඳිවැල විසූ 25 හැවිරිදි සඳුන් චාමර නැමැත්තෙකි. අනෙක් තැනැත්තා ලුණුගම්වෙහෙරේ පදිංචි 24 හැවිරිදි ඩිලංග දිල්ෂාන් නැමැත්තෙකි. ඩිලංග දිල්ෂාන් මේ වන විට ත්රීරෝද රථ රියදුරෙකු සේ රැකියාව කළේය.
අපරාධයට සම්බන්ධ සියලු පුද්ගලයෝ අත්අඩංගුවට ගනු ලැබූහ. එසේම පස් වැනි සැකකරුවා ලෙස ජංගම දුරකතන අලෙවිසලක සේවය කළ හොරණ ප්රදේශයේ අයෙකු වන 28 හැවිරිදි ධනුෂ්ක කුමාර අත්අඩංගුවට පත් විය. පැල්මඬුල්ල පොලිස් නිලධාරීහු දැඩි කැප වීමකින් රාජකාරි කළහ. කොල්ලයට දායක කරගත් යතුරුපැදියක් සහ කොළ පැහැති ත්රිරෝද රථයක්ද පොලිස් බාරයට ගැනිණි.
සිරිපාලගෙන් සොරාගත් එක්කෝටි විසිලක්ෂයක් වටිනා මැණික් ගල් 604ක්, හතළිස්නව ලක්ෂයක් වටිනා රත්රන් පවුම් 62ක් සමඟ මුදලින් ලක්ෂ හතරකට වැඩි ප්රමාණයක්ද පස්දෙනා සන්තකයේ තිබී සොයාගැනීමට හැකි විණි.
අත්අඩංගුවට පත් පස්දෙනාගේ පාපොච්චාරණයෙන් සිදු වී තිබුණේ කුමක්ද යන්න හෙළි විණි. ඔවුන් සැලසුම් කරන්නේ දේදුනු ටෙක්ස් ආයතනය කොල්ලකන්නටය. සැකකරුවන් අතර සිටින හමුදාවෙන් පලා ගිය අයෙකු සතියකට පමණ පෙරදී සිය පවුලේ සැවොම සමඟ දේදුනු ටෙක්ස් වෙත පැමිණ තිබිණි. පැමිණි අය ඇඳුම් ගන්නා අතරේ සැකකරු නාන කාමර ඇතුළු සෑම තැනෙකම ඇවිද වෙළෙඳසල් සේවිකාවන් සමඟද අල්ලාප-සල්ලාපයේ යෙදී බොහෝ වේලාවක් වෙළෙඳසලේ ගතකොට ඇඳුම් කීපයක්ද මිලටගෙන නික්ම ගොස් තිබිණි.
එදින වෙළෙඳසලේ සිදුකළ සෝදිසියෙන් දුටු දසුන් අනුව බිම් මහලේ යකඩ දොරවල් තිබූ හෙයින් කොල්ලයට එක්වූ පිරිස තීන්දුකර තිබුණේ පළමු මහලෙන් වෙළෙඳසලට ඇතුළු වීමටය. ඉහළ මහලේ වෙසෙන සිරිපාල සහ බිරිය නිවෙසෙන් පිට වී යන දිනයක් එන තුරු ඔවුන් රැකවල්ලා සිටියේය. පසුගිය 27 වැනි දා දෙදෙනා රාත්රියේ නිවෙසෙන් බැහැරව ගොස් තිබුණේ හිතවතකුගේ මළගෙදරකටය. එය කොල්ලකරුවන්ට නියම පොටක් විණි.
කිසිවෙකු නැති දේදුනු ටෙක්ස් වෙළෙඳසල් ගොඩනැගිල්ලට කිට්ටු වූ හමුදාවෙන් පලාගිය දෙදෙනා ජෙනරේටර් කාමරයේ වහලයට නැඟ එකෙක් අනෙකාගේ කරට නැඟ පළමු මහලට ගියහ.
සොරුන් පැමිණ තිබුණේ සේප්පුව කොල්ලකෑමේ ඉලක්කයෙන් නොවේ. එහෙත් එදින සිරිපාලගේ අතපසු වීමකින් රුපියල් කෝටි ගණනක් තැන්පත් කර තිබූ සේප්පුවේ ඉලක්කම්ද ගළපා සේප්පුව බාගෙට ඇර යතුරද අසල මේස ලාච්චුවකට දමා තිබිණි. කොල්ලයට පැමිණි පිරිසට එය බන්දේසියක දමා දුන් තෑග්ගක් බඳු විය.
දෙදෙනෙක් වෙළෙඳසලට ඇතුළු වූහ. අනෙක් තිදෙනා මඟ රැකවල්ලා ඔත්තු බැලූහ. කොල්ලකරුවෝ කලබලයකින් තොරව සේප්පුව හැර එහි තිබූ සියලුම වත්කම් රැගෙන යතුර තිබූ තැනම තිබෙන්නට හැර යන්නට ගියහ. පසුගිය හය වැනිදා වන විට කොල්ලකරුවන්ගේ, දේදුනු ටෙක්ස් කොල්ලයේ සියලු තතු හෙළි කරගැනීමට පොලීසිය සමත් වී හමාරය.
සිරිපාල පවසන්නෙ පොලිසිය ඉක්මනින්ම කොල්ලකරුවන් අත්අඩංගුවට නොගත්තේ නම් මිලමුදල් දේපළ කෝටි ගණනින් නැති වූවාටත් වඩා අවමානයක් සමාජයෙන් සහ ඥාති හිතවතුන්ගෙන් තමාට විඳින්නට සිදු වන බවය. ඒ සොරකම සිරිපාලගේම උගුලක් බවට මුලින් තිබූ සැකය නිසාය.
දකුණ,සබරගමුව පළාත් බාර ජ්යෙෂ්ඨ නියෝජ්ය පොලිස්පති රොෂාන් ප්රනාන්දු, රත්නපුර දිසා බාර නියෝජ්ය පොලිස්පති පත්මසිරි මුණසිංහ, රත්නපුර කොට්ඨාස බාර පොලිස් අධිකාරි සුදත් මාසිංහ, සහකාර පොලිස් අධිකාරි ටී.ඒ.එච්. නිශ්ශංක මහත්වරුන්ගේ උපදෙස් මත පැල්මඩුල්ල පොලිස් ස්ථානාධිපති සෙනරත් බණ්ඩාර ඇතුළු පිරිසක් පරීක්ෂණ මෙහෙයවූහ.
ඡායාරූප - තුෂාර හෙට්ටිආරච්චි