මෙරට ඉතිහාසයේ බන්ධනාගාර නිලධාරියෙක් පාතාලයේ ඉලක්කයක් බවට පළමු වරට ලක්වන්නේ නම් ඒ 90 දශකයේ මුල් භාගයේදීය. ඔහු තෙන්නකෝන් නැමැති ජේලර්වයෙකි. මෙම ජේලර්වරයා වෙඩි තබා මරා දමන්නේ දෙමටගොඩදී බස් රථයකින් ගමන් කරමින් සිටියදීය. එදා ඔහු ඉතිහාස ගත වෙමින් සිය ජීවිතය පාතාලයේ වෙඩි උණ්ඩයකට පුද දෙන්නේ රාජකාරිය අකුරට කරන්නට ගොසිනි.
එදා සිට මේ දක්වා පාතාලයේ සහ ත්රස්තවාදීන්ගේ වෙඩි උණ්ඩවලට ලක්ව බන්ධනාගාරයේ නිලධාරීන් 13 දෙනෙක් මියගොස් ඇතත් ඒ අයගෙන් දෙතුන් දෙනෙක් හැරෙන්නට සෙසු නිලධාරීන් මරණයට පත්වන්නේ පාතාලයේ අපරාධකරුවන් අතර ගැටුම්වලට මැදිවෙමිනි. කළුතර එතනමඩලේදී නිලධාරීන් දෙදෙනෙක් මිය යන්නේද ඔවුන්ව ඉලක්කරගෙන තැබූ වෙඩි ප්රහාරයකින් නොව, පාතාල කල්ලි නායක සමයංව ඉලක්ක කරගෙන බන්ධනාගාර බස් රථයට තැබූ වෙඩි ප්රහාරයකට මැදිවෙමිනි. ඊට පසුව ගම්පහ අස්ගිරියේදී බන්ධනාගාර නිලධාරීන් තිදෙනකුට වෙඩි වැදී මිය යන්නට සිදුවන්නේ හීනටියන අසිත නැමැති පාතාල කල්ලි නායකයාව ඉලක්ක කර ගනිමින් ප්රතිවිරුද්ධ පාතාල කල්ලියක් විසින් බන්ධනාගාර බස් රථයකට එල්ල කළ ප්රහාරයකිනි. සූරිය වැව කේන්ද්රකරගෙන දකුණේ මහා භිෂණයක් පැතිරවූ අයියා මලෝ කල්ලියේ නායකයාවූ සුනිල් රත්නවීර නැමැත්තාව තංගල්ල බන්ධනාගාරයේ සිට සිට ඇඹිල්පිටිය අධිකරණයට රැගෙන යමින් සිටියදී සන්නද්ධ පිරිසක් විසින් පැහැරගෙනගොස් වෙඩි තබා ඝාතනය කරන්නේද බන්ධනාගාර බස් රථයකට ප්රහාරයක් එල්ල කරමිනි. එම ප්රහාරයෙන්ද බන්ධනාගාර නිලධාරීයෙක් මිය ගියේය. එහෙත් අම්බලන්ගොඩදී ඉකුත් 03 වෙනිදා සවස බන්ධනාගාර පුහුණු පාසලේ ප්රධාන ජේලර් ජයරත්න එල්ල වුණු වෙඩිල්ල එවැනි අහඹු වෙඩිල්ලක් නොවේ.
එය දෙමටගොඩදී ජේලර් තෙන්නකෝන්ට එල්ල වුණු ආකාරයේ පාතාල වෙඩිල්ලකි. ඒ පිටුපස සිටින්නේ පොඩි ලැසී නැමැති දකුණේ පාතාලයේ ප්රබලයෙකි. ලැසියාට ජේලර් ජයරත්න සමග ආරවුලක් තිබුණේ නැත. ජයරත්න ගැටුණේ ගාල්ල බන්ධනාගාරයේ ලොක්කෙක් සමගිනි. එම ලොක්කාගේ දූෂණ වංචා සහ අක්රමිකතාවලට එරෙහිව ඔහු දිගින් දිගටම කටයුතු කළ අයෙකි. මේ නිසාම ලොක්කා ජේලර් රත්නායක කෙරෙහි දැඩි වෛරයකින් පසු වූ බව සැලවෙයි. ලැසියා සිටියේ එම ලොක්කාගේ ඔඩොක්කුවේය. ඒ අනුව ලැසියා ලවා ජයරත්නට කොකා ගස්සවා ඇත්තේ එම ලොක්කා බවට පොලිසියට දැඩි සැකයක් ඇත.
ඝාතනයට ලක්වූ ප්රධාන ජෙලර් ජයරත්න |
ජේලර් ජයරත්නගේ ඝාතන විමර්ශන මෙහෙයවන්නේ ගාල්ල නියෝජ්ය පොලිස්පති නුවන් වෙදසිංහගේ මෙහෙයැවීමෙනි. ඒ විශේෂ පොලිස් කණ්ඩායමක් යොදවාය. නුවන් වෙදසිංහ යනු පාතාලය සමග දීර්ඝ කාලයක් තිස්සේ ඔට්ටු වූ පොලිස් නිලධාරියෙකි. ඔහු නමගිය දක්ෂ අපරාධ විමර්ශකයෙකි. වැඩ බලන පොලිස්පති සී.ඩී. වික්රමරත්න විසින් ජයරත්නගේ ඝාතකයන් ඇල්ලීමේ විමර්ශන අපරාධ පරීක්ෂණ දෙපාර්තමේන්තුවට පවා ලබා නොදෙන්නේ නුවන් වෙදසිංහ ගැන විශ්වාසයක් තබාය. දැනගන්නට ඇති ආකාරයට අනුව ජේලර් ජයරත්නගේ ඝාතනය පිටුපස ඇති කථාව නුවන් වෙදසිංහ ඇතුළු විමර්ශකයන්ට නම් දැන් රහසක් නොවේ. පොඩි ලැසී ගැන මෙන්ම බන්ධනාගාර ලොක්කා ගැනද බොහෝ තොරතුරු ඔවුන් දැනටමත් සොයාගෙන හමාරය. මේ වන විට රැස්කරමින් සිටින්නේ ඒ අයට එරෙහිව ප්රබල සාක්ෂිය. ඒ විද්යාත්මක විමර්ශන ඔස්සේය.
තිදරු පියකු වන ජේලර් ජයරත්න එදා වේලපහින්ම රාජකාරි නිමකොට කොළඹ සිට අම්බලන්ගොඩට දුම්රියෙන් එන්නේ පසුදින සිය දරුවා ශිෂ්යත්ව විභාගයට මුහුණ දෙන්නට සූදානමින් සිටින බැවින් ගමේ විහාරස්ථානයට ඇයව රැගෙන යාමේ අරමුණ ඇතිවය. දුම්රියෙන් බැස අසල ආරක්ෂිත ස්ථානයක නතර කර තිබුණු යතුරු පැදියේ නැගුණු ජේලර් ජයරත්නට සුපුරුදු ලෙස එදා වැඩි දුරක් යන්නට ඉඩක් නොවීය. මාරයා ඔහුව හඹා ආවේය. ඒ යතුරු පැදියක නැගීය. ජේලර් ජයරත්නට එදා ටී 56 අවියකින් වෙඩි පිට වෙඩි තබා මහා පාරේම මරාදමමින් ඔවුන් පලා යන්නේ අම්බලන්ගොඩ නැවතත් පාතාල භීතියෙන් මුසපත් කරමිනි.
මරා දැමූ ජේලර්වරයාට මඩ
ඒ නිමේෂයෙන් ජන මාධ්යට තොරතුරු ගලා එන්නේ ජේලර් ජයරත්න කළු චරිතයක් බවට පත්කරමිනි. ඒ එවැන්නෙක් මරා දැමුවාට කම් නැතැයි සමාජයට ඒත්තු ගැනෙනන්ටය. එම කටයුත්ත සිදුවන්නේ සංවිධානාත්මකවය. පොඩි ලැසියා මෙන්ම ඔහුගේ ප්රතිවාදියා වන කොස්ගොඩ තාරක සමගින්ද ජේලර් ජයරත්න ඉතා කිට්ටු සම්බන්ධකම් පැවැත්වූ බව ද එකී තොරතුරුවල කියැවෙන්නට විය. ඒ සෑම තොරතුරක් ඔස්සේම සමාජ ගත කරන්නට උත්සහ දැරුවේ ජේලර් ජයරත්නගේ ඝාතනය කොස්ගොඩ තාරකගේ සහ පොඩි ලැසියාගේ ගැටුමක ප්රතිඵලයක් බවටය. ඊට මහත් රුකුලක් වන්නේ ඉකුත් වසරේ ඔක්තෝබර් 19 වෙනිදා මීටියාගොඩ පොලිසිය විසින් කළ වැටලීමකදී ලැසියාගේ ගෝලබාලයින් මත්කුඩු පැකට් කරමින් සිටි නිවසක් ඉදිරිපිට රැඳී සිටියදී ජේලර් ජයරත්න හසුවී තිබීමය.
ලැසීගේ මරණ තර්ජන
එම නිවසේ හිමිකරු වූයේ හිත හොඳ දොස්තර නමින් කරන්දෙණියේ ප්රසිද්ධව සිටි වෛද්ය ප්රියංක ප්රසාද් ජයසිංහව 2011 වසරේ සැත්තැම්බර් 25 වෙනිදා වෙඩි තබා ඝාතනය කළ ජයලත්ද සිල්වා නොහොත් සුද්දා නැමැති පාතාල අපරාධකරුගේ ඥාතියෙකි. බද්දේගම - කරන්දෙණිය ප්රධාන මාර්ගයට යාබදව පිහිටි එම නිවසට එදා මීටියාගොඩ පොලිසිය කඩා වදින්නේ කරන්දෙණිය තැපැල් කාර්යාලය ඉදිරිපිටදී සිදුවුණු කළු මහත්තයාගේ ඝාතනයේ සැකකරුවන් එහි රැඳී සිටින බවට ලද තොරතුරකට අනුවය. ඝාතන සැකකරුවන් කෙසේ වෙතත් එදා එම වැටලීමේදී මත්කුඩු තොගයක් සමග ලැසියාගේ ගෝලයින් දෙදෙනෙක් නම් පොලිසිය අත්අඩංගුවට ගත්තේය. ජේලර් ජයරත්න එහිදී බේරෙන්නේ කුකුළු ගොවිපොලක් ගැන විමසන්නට තමන් එහි පැමිණි බව කියාය. ඒ නිවසේ හෝ ඒ කිට්ටුව පාතක කුකුල් ගොවිපොලක් නොවූවත් පොලිසිය එදා ඔහුව මුදාහරින්නේ ලැසියාගේ ගෝලයින් සමග ඔහුවත් අත්අඩංගුවට ගන්නට තරම් ප්රබල සාක්ෂියක් නොවූ බැවිණි.
කෙසේ වෙතත් එම නිවසේ සිට මත්ද්රව්ය සමග අත්අඩංගුවට ගත් පොඩි ලැසීගේ ගෝලයින් දෙදෙනා අතර ඔහු හොඳින් දන්නා හඳුනන පාතාල අපරාධකරුවෙක්ද සිටියේය. ඒ දේමුණිගේ විජිත් ආනන්ද සොයිසා නොහොත් රංජිත්ය. යුද හමුදාවෙන් පළාවිත් සිටි කපිතාන්වරයෙක්වූ රංජි හිතහොඳ දොස්තර ඝාතනයේ තවත් එක් ප්රධාන සැකකරුවෙකි. රංජි සහ ජේලර් ජයරත්න අතර හිතවත්කමක් ගොඩ නැගෙන්නේ රත්නායක කළුතර බන්ධනාගාරයේ සේවයේ නිරතව සිටි 2011 වසරේදීය. මිනිස් ඝාතන රැසක සැකකරුවෙක් වූ ඔහු කළුතර අධිකරණයට භාරවීමෙන් පසු රඳවා තැබෙන්නේ කළුතර බන්ධනාගරයේය. එහිදී රෝගී වන ඔහුට සාත්තු සප්පායම් කරන්නේ ජේලර් ජයරත්න. කාලයක් තිස්සේ දළුලා වැඩෙන්නේ එහිදී ඇතිවුණු හිතවත්කමය.
වර්ෂ 2014 දී රත්නායක බූස්ස බන්ධනාගාරයට ස්ථාන මාරුවීමක් ලැබ යන්නේ ප්රධාන ජේලර්වරයා ලෙසිනි. වසර හතරක්ම ඔහු බූස්සේ සේවය කළත් කිසිදු දූෂණ චෝදනාවක් නොවීය. සෙසු බන්ධනාගාරවල මත්කුඩු සහ ජංගම දුරකතන වැසි වසිද්දී බුස්ස බන්ධනාගාරය මත්ද්රව්ය සහ ජංගම දුරකතන වලින් තොර කලාපයක් බවට පත්ව තිබුණේය. ලැසියාගේ මත්කුඩු තිප්පොලක් අසලින් පොලිසියට හසුවන්නේ එවන් නිලධාරියෙකි. සැබෑ ලෙසම ඔහු එහි ගියේ කුකුල් මස්ගන්නටද, එසේත් නැති නම් සිය මිතුරා රංජිව මුණ ගැසෙන්නටදැයි දන්නේ ඔහු පමණි. එහෙත් ඔහු එදා පොලිසියෙන් ගැලවුණේ පොලිස් වැටලීම සිදුවන විට මහ පාරේ රැඳී සිටි බැවිනි.
පොලිසියෙන් ඔහු එසේ ගැලවුණත් බන්ධනාරය පැත්තෙන් ඔහුට ගැලවිල්ලක් නොවීය. ඒ වන විට ඔහු සේවයේ නිරතව සිටියේ ගාල්ල බන්ධනාගාරයේ නියෝජ්ය ජේලර්වරයකු ලෙසිණි. පොලිසිය කළ වැටලීම පදනම් කරගනිමින් ජයරත්න රැකියාව අහිමි වී ගියේය. ඒ ඔහු වැඩ තහනමකට ලක්වන බැවිනි. ඒ පිටුපස සිටියේ ගාල්ල බන්ධනාගාරයේ ලොක්කෙකි. ලැසියාගේ පණ එම ලොක්කාය. දෙන්නාට දෙන්නා ගහට පොත්ත මෙනි. ලැසියා සමග එක්ව ලොක්කා ගහන ගේම් ජයරත්න හොඳාකාරවම දැන සිටියේය. තමාට ගෙදර යන්නට ගේම ගැසූ ලොක්කාටද එරෙහි ව ප්රති ප්රහාර එල්ල කිරීමේ සටන ජයරත්න පටන් ගන්නේ තමන්ට එල්ල වුණු චෝදනා සියල්ලන්ගෙන්ම නිදොස් වී නැවත සේවයට පිවිසෙමිනි. එවර ඔහු එන්නේ අලුත් තැනකටය. ඒ උසස් වීමක්ද ලබමින් බන්ධනාගාර පුහුණු පාසලේ ප්රධාන ජේලර් වරයා ලෙසිණි. ගාල්ල බන්ධනාගාරය තුළ සිදුවන දූෂණ වංචා සහ අක්රමිකතා ගැන සාක්ෂි සහිත පෙත්සම් බලධාරීන් අතට පත්වීමට පටන් ගන්නේද ඒත් එක්කමය. ලැසී සහ එම බන්ධනාගාර ලොක්කා අතර ඇති සම්බන්ධකම් ගැනද එම පෙත්සම්වල සඳහන් වන්නට වූයේ සාක්ෂි සහිතවය. ඒ ලොක්කාට ගැලවිල්ලක් නැති වන්නටය.
එහිදී ලොක්කා වෙනුවෙන් ඉදිරියට එන්නේ ලැසියාය. වරක් දෙවරක්ම ලැසියාගෙන් ජේලර් රත්නායකට ගර්ජන මෙන්ම තර්ජනද ආවේය. ඒ පෙත්සම් ගැහිල්ල නතර කරන ලෙසටය. ලැසියා ඒ වන විට සිටියේ ගාල්ල බන්ධනාගාරයේය. තමන්ට ලැසියා දුරකතනයෙන් තර් ජනය කරන්නේ කාගේ උවමනාවටදැයි ජේලර් රත්නායක හොඳාකාරවම දැන සිටියේය. අම්බලන්ගොඩ පොලිසියට ඒ ගැන පැමිණිල්ලක් කරන්නේද ඒ නිසාමය. රත්නායකට වෙඩි තබා මරා දමන තුරුම එම පැමිණිල්ලට සිදුවූ දෙයක් සොයා ගන්නට නැත. ඒ එම පැමිණිල්ල පොලිසියේ පොතට පමණක් සීමා වී තිබුණු නිසාය.
ජේලර් ජයරත්නගේ ඝාතනය හා බැඳී ඇති පොඩි ලැසියා පාතාලයේ අතපොත් තබන්නේ පාසල් ශිෂ්යයකුව සිටියදීමය. ඔහුගේ පියා තෙල්වත්තේ වසන්තය. ඔහු රත්ගම සහ හික්කඩුව පැත්තේ නම ගිය මැරයෙකි. ඔහු එස්.ටී.එෆ් නදුන්ගේ ගෝලයෙකි. දකුණේ මෙන්ම කොළඹ පාතාලයේද නම ගිය වැඩකරුවකු වූ නදුන් දැන් සිටින්නේ ඉතාලියේය. මාකදුරේ මධුෂ් සමග කරට කර සිටින පාතාලයෙක් වන කොස්ගොඩ සුජීද පාතාලයට අතපොත් තබන්නේ එස්.ටී.එෆ් නදුන්ගෙනි.
තෙල්වත්තම හොල්ලාගෙන සිටි තෙල්වත්තේ වසන්ත මියැදෙන්නේ අකාලයේය. ඒ පාතාලයේ අභ්යන්තර ගැටුමක ප්රතිඵලයක් ලෙසිණි. වසන්ත වෙඩි කන්නේ තෙල්වත්ත පන්සල අසදීය. වසන්තගේ ඝාතනට ඇඟිල්ල දිගුවන්නේ මනෝජ් මෙන්ඩිස්ටය. එකල හික්කඩුවේ පාතාල චණ්ඩියා වූයේ මනෝජ්ය. පාතාල බල ව්යාප්තියට මනෝජ්ට බාධාවක් වන්නේ එස්.ටී.එෆ්. නඳුන්ය. වසන්තගේ ඉරණම මනෝජ් මෙන්ඩිස්ගේ වෙඩිල්ලෙන් තීරණය වන්නේ නඳුන්ගේ හයිය බිඳින්නටය.
ලැසී ගාලු ගිය හැටි
ඒ වන විට පාසල් ශිෂ්යයකු ව සිටි ලැසියාට උසස් අධ්යාපනයක් ලැබීමට හැකියාව තිබුණත් පාසල් ගමනට සමුදෙන්නේ පියා මැරූ මනෝජ් මෙන්ඩිස්ගෙන් පළිගන්නටය. එම අරමුණ ඉටුකර ගන්නට පොඩි ලැසී එක්වන්නේ කොස්ගොඩ සුජී සමගිනි. මනෝජ් මෙන්ඩිස් දේශපාලන වශයෙන් ඒ වන විටත් සිටින්නේ බලවත් පුද්ගලයෙක් බවට පත්වය. ඉහළම දේශපාලන ආශිර්වාදය පවා ඔහුට එකල හිමිව තිබුණේය. හික්කඩුව ප්රාදේශීය සභාවේ සභාපතිධුරයටද ඔහු පත්වන්නේ එම දේශපාලන ආශිර්වාදයෙනි. එබැවින් අවස්ථාව එළඹෙන තුරු ලැසියා කාලයක් තිස්සේ ඉවසීමෙන් බලා සිටියේය. නොඉවසිලිකම නිසාම වරක් ඔහුට වැඩ වැරදුණේය. මනෝජ්ට තැබූ වෙඩිල්ලක වදින්නේ ඔහුගේ හැඩරුවට සමාන ගෝලයෙකුටය. එවිට ඔහු සිය ජීවිතාරක්ෂාව පතා පළායන්නේ රටේත් නොසිටය.
වසර දෙකක් තිස්සේ රටින් පිට රැඳී සිටි ඔහු මෙරටට එන්නේ සිය ඉලක්ක සපුරා ගන්නටය. එහෙත් ඔහුට එවර ද ඊට ඉඩක් නොවීය. ගුවන් තොටුපොළේදී ලැසියා කොටුවන්නේ ඔහු එන බව මනෝජ් මෙන්ඩිස්ට කල් තියා ලද ඔත්තුවක් ඒ ඔස්සේ පොලිසියටද ලැබී තිබීම නිසා ය. ලැසී අත්අඩංගුවට පත්වීමත් සමග අභිරහසක්ව තිබූ ඝාතන කිපයක් හා අවි ආයුධ තොගයක් සොයා ගත හැකි විය. එතැන් සිට ඔහුගේ නවාතැන් පොළ බවට පත්වන්නේ ගාල්ල බන්ධනාගාරයයි. වසරකට ආසන්න කාලයක් බන්ධනාගාරගතෙව සිටි ලැසියා ඇප මත එළියට එන්නේ රත්ගම මදුරගේ මත්කුඩු ජාලය සමගද සම්බන්ධකම් ඇතිකර ගනිමිනි. මධුර මත්කුඩු ජාවාරම මෙහෙයවනු ලැබුවේ ඉතාලියේ සිටය. මත්කුඩු ජාවාරමෙන් අතමිට සරුකරගත් ලැසියා බහුදින යාත්රාවකද හිමිකරුවකු බවට පත්වන්නේ වැඩි කල් නොගොසිනි. ලැසියාගේ මත්කුඩු ජාවාරමේ ප්රතිවාදියා බවට පත්වන්නේ මනෝජ් මෙන්ඩිස්ය. ලැසියාට සිය පියා මැරූ පලිය පමණක් නොව, මත්කුඩු ජාවාරමේ ප්රතිවාදියාව හමාර කිරීමටත් අවශ්ය විය. ඊට සුදුසු අවස්ථාව උදා වන්නේ ආණ්ඩු පෙරලියත් සමගිනි. දේශපාලනික වශයෙන් මනෝජ් මෙන්ඩිස්ගේ බලය ගිලිහී යන විට ඒ අවස්ථාවෙන් උපරිම ප්රයෝජනය ගත් පොඩි ලැසියා සිය පියාගේ ඝාතනයට ලෙයට ලෙයින්ම පළි ගත්තේය. ඒ වර්ෂ 2015 වසරේ මාර්තු 23වෙනිදාය. ඒ හික්කඩුවේ හෝටලයක සාදයකට සහභාගිවී සිටි මනෝජ් මෙන්ඩිස්ට වෙඩි තබා ඔහුව මරා දමමිනි.
පොඩි ලැසී පාතාලයේ චරිතයක් බවට පත්වන්නේ ඒත් එක්කමය. වැඩි කලක් ලැසියා පොලිසියට කට්ටි පනින්නට ගියේ නැත. මනෝජ් මෙන්ඩිස්ගේ සත් දින දාන පිංකම් දවසේම නීතීඥ මණ්ඩලයක් සමග පැමිණ ඔහු කළුතර මහේස්ත්රාත් අධිකරණයට භාර වූයේය. ඔහු කළුතරට යන්නේ ගාල්ලට ගියහොත් මනෝජ් මෙන්ඩිස්ගේ ගෝලබාලයින් තමන්ව මස් කරන බව දැන සිටි බැවිණි.
රිමාන්ඩ් සිරකරුවෙක් ලෙස වසරකට ආසන්න කාලයක් බන්ධනාගාරගත ව සිටි පොඩි ලැසී 2016 වසරේ පෙබරවාරි 16 වෙනිදා එළියට එන්නේ කොන්දේසි 11 ක ඇපයක් මතය. මනෝජ් මෙන්ඩිස්ගේ සගයන් ඇඟිලි ගනිමින් බලා සිටියේ ඒ දවස උදා වන තුරුය. ලැසියා හැරුණු කොට මනෝජ් මෙන්ඩිස්ගේ ඝාතනයට හවුල් වූ කිහිප දෙනෙක්ම ඒ වන විටත් සිටියේ ඔහුගේ ගෝලයින් අතින් පරලොව ගොසිනි. ඇප ලබා ලැසියා එළියට එන තුරු මනෝජ් මෙන්ඩිස්ගේ ගෝලයින් එදා ගාල්ල මහාධිකරණය අවට රැඳී සිටියේ අවි අමෝරා ගෙනය. ඒ ගැන කල් තියාම දැන සිටි ලැසියා ගාල්ලෙන් පනින්නේ ඒ හැමෝටම වසන් වෙමිනි. ඒ ගාලු කොටුවේ පැරණි ජැටියෙන් ධිවර බෝට්ටුවක නැගීය. බොහෝ අය සිතන්නේ ලැසියා එතැනින්ම ඉතාලියට පැන ගියා යැයි කියාය. එහෙත් ඔහු පැන්නේ ඉතාලියට නොව, කොස්ගොඩටය. ඒ කොස්ගොඩ සුජීගේ රැකවරණය පතාය. ඒ වන විට කොස්ගොඩ සුජීද සිටින්නේ සැගවුණු ජීවිතයක් ගත කරමිනි. ඔහු සූදානමින් සිටියේ සිය පෙම්වතිය විවාහ කර ගනිමින් රටින් පළා යන්නටය. එබැවින් සුජියාගේ රැකවරණය පතා පැමිණි ලැසියාට රැකවරණය ලැබෙන්නේ කරන්දෙණියේ හිත හොඳ දොස්තර මැරූ සුදු මල්ලීගෙනි. .
කොස්ගොඩ සුජීගේ කල්ලියේ රැකවරණය එසේ ලැසියාට ලැබෙන විට අනාරක්ෂිත වන්නේ එදා ඔහුට ගාල්ලෙන් කොස්ගොඩට නිරුපද්රිතව පැන ගන්නට බෝට්ටුවක් සූදානම්කර දුන් ධීවර ව්යාපාරිකයාය. සුසන්ත නැමැති ඔහුට ජීවත්වීමේ වාසනාව තිබුණේ සති දෙකක් පමණි. අම්බලන්ගොඩ ධිවර වරායේදී ඔහු ඝාතනය වන්නේ මනෝජ් මෙන්ඩිස්ගේ ගෝලයින්ගේ වෙඩි ප්රහාර හමුවේය.
ලැසියාගේ එක්වීමත් සමග සුජීගේ හයිය තවත් ඉහළ ගියේය. ඒ නිසාම සුජී හා ලැසියා නිහඬ කරන්නට දකුණේ ප්රසිද්ධ ව්යාපාරිකයෙක් සූදානම් වන්නේ පොලිස් ලොක්කෙකුට ලක්ෂ 50 ක කොන්ත්රාත්තුවක් දෙමිණි. ඒ සුජීගේ ගෝලයින් අතින් එම ව්යාපාරිකයාගේ පවුලේ සාමාජිකයින් කිහිප දෙනකුම ඝාතනය වී තිබුණු බැවිණි. එහෙත් එම පොලිස් ලොක්කාට පෙර ඉස්සර වෙන්නේ සුජීය. ඊට මුල්වන්නේ 2016 පෙබරවාරි 29 වෙනිදා මහරගම පැත්තේ උත්සව ශාලාවක සුජීගේ විවාහය සිදුවන අවස්ථාවේදී ඔහුව මරා දමන්නට පාතාලයේ කණ්ඩායමක් එම ව්යාපාරිකයා විසින් එවා තිබීමය. එම ව්යාපාරිකයාගේ ඝාතනයත් සමග සුජී සිය බිරිඳ සමග රටින් පැන ඩුබායි බලා යන්නේ ව්යාජ විදෙස් ගමන් බලපත්රයකිනි. ඒත් සමග ලැසියා අම්බලන්ගොඩින් අතුරුදන් වන්නේ බලංගොඩින් මතුවෙමිනි. ගංජා සහ මත්කුඩු ජාවාරමේ ජයටම නිරතවූ ඔහු ඒ අතර කොන්ත්රාත් ඝාතනද මෙහෙයැවූයේය. අම්බලන්ගොඩ ඉඩම්තොටදී 2016 වසරේ දෙසැම්බර් 05 වෙනිදා රාත්රියේදී ව්යාපාරික අඹු සැමි යුවලක් සහ ඔවුන්ගේ සිව් හැවරිදි දරුවාට වෙඩි තබා ඝාතනය කිරීම ලැසියා අතින් සිදුවුණු මිලච්ඡතම ඝාතනයකි. කොන්ත්රාත්තුවකට අනුව එදා ඔහු එම පවුලම ඝාතනය කරන්නේ බලංගොඩ සිට පැමිණය.
නැවතත් ඔහු ඝාතනයකට අර අදින්නේ ප්රතිවාදියෙක් වූ තනි ඇටයාටය. ඔහුට ඉව අල්ලමින් ලැසියා බලංගොඩ සිට සුඛෝභෝගී ජිප් රථයකින් මීටියාගොඩට 2017 වසරේ පෙබරවාරි 28 වෙනිදා එන්නේ සිය සගයා වූ තෙල්වත්තේ උදාරත් සමගිනි. තනි ඇටයාට ජීවත්වීමේ වාසනාව තවදුරටත් උදාකර දෙමින් එවකට අම්බලන්ගොඩ පොලිස් ස්ථානාධිපතිවරයාව සිටි ප්රධාන පොලිස් පරීක්ෂක මහින්ද විල්ලොවආරච්චි ලැසියාව කොටුකර ගන්නේ ඔහුට ලද ඔත්තුවකට අනුවය. තනි ඇටයාට කොකා ගස්සන්නට රැගෙන ආ ටී 56 ක් සහ මයික්රෝ වර්ගයේ පිස්තෝලයක්ද සුඛෝපභෝගී ජිප් රථයේ සඟවා තිබියදී මහින්ද විල්ලොවආරච්චි ඇතුළු කණ්ඩායම විසින් සොයා ගත්තේය. ලැසියා අදටත් ගාල්ල බන්ධනාගාරයේ සිටින්නේ එදා එසේ පොලිසියට හසුවීමෙන් පසුවය.
ලැසී ගෙදර මාරු කිරීම
ගාල්ල බන්ධනාගාරය ලැසීට දැන් ඔහුගේ නිවස බඳුය. ලොක්කාගේ ආශිර්වාදය නිසාම ඇප ලැබුණත් ලැසියා බන්ධනාගාරයෙන් එළියට යන්නේ නැත. ඒ ඔහුට හැම පැත්තෙන්ම ගිනි අවි එල්ලවී ඇති බැවිනි. ලැසියා හැම අපරාධයකම නිරතව සිටින්නේ බන්ධනාගරයේ සිටය. ඒ සඳහා ඔහුට නිදහසේ ජංගම දුරකතන පරිහරණය කිරීමට ගාල්ල බන්ධනාගාරය තුළ ඇති පහසුකම් තිබේ. හෙළිවෙමින් ඇති ආකාරයට අනුව ජේලර් ජයරත්නව ඝාතනය කරන්නට ලැසියා සැළසුම් කරන්නේ ගාල්ල බන්ධනාගාරයේ සිටය. ඊට ලොක්කා හසු නොවන්නට වග බලාගන්නේ සියල්ල සැලසුම් කිරීමෙන් පසු ලැසියා මැගසින් බන්ධනාගරයට මාරුවක් ලබා ගනිමිනි. ඒ තමාට ගාල්ල බන්ධනාගාරය තුළ ජීවිත අවධානමක් ඇතැයි කියමිනි. එම මාරුව පිටුපස සිටින්නේද බන්ධනාගාර ලොක්කෙකි. ඔහු සිටින්නේ කොළඹය. ඒ අනුව ලැසියා ගාල්ලේ සිට මැගසින් බන්ධනාගාරයට එන්නේ ජේලර් ජයරත්න ඝාතනයට දින කිහිපයකට පෙරය.
මැගසින් බන්ධනාගාරයේ ඔහුගේ නවාතැන බවට පත්වන්නේ දීර්ඝකාලයක් තිස්සේ මත්කුඩු ජාවාරමකට බන්ධනාගාර ගතව සිටින රත්මලානේ බේකරියා රැඳී සිටින වාට්ටුවය. බේකරියා සිටියේ එම වාට්ටුව හොල්ලාගෙනය. ලැසියාද දකුණේ වැඩ්ඩෙක් බැවින් බේකරියාගෙන් ලැසියාට ලැබුණේ ගෞරවනීය පිළිගැනීමකි. ඒ නිසාම බේකරියා ඇතුළේ පරිහරණය කළ ජංගම දුරකතනයෙන් ඇමතුම් ගන්නට ලැසියාට බාධාවක් නොවීය. ලැසියා එම දුරකතනවලින් ඇමතුම් කිහිපයක්ම ගත්තේය. ඇතැම් විට එම ඇමතුම් ගන්නට ඇත්තේ ජේලර් ජයරත්න ඝාතනය කරන්නට යොදවා සිටි වෙඩික්කරුවාට විය හැකිය. නැතිනම් බන්ධනාගාර ලොක්කාට වන්නට පුළුවන. ඒ කාට හෝ ඔහු ඇමතුම් ගත්තේය.
සැලසුම් ප්රකාරව ජේලර් ජයරත්න ඝාතනය වන්නේ 03 වෙනිදාය. ඊට පසු දින ලැසියා රඳවා සිටි වාට්ටුවේ ලොකු සාදයකි. එම සාදය බේකරියාගේ උපන්දිනය වෙනුවෙනි. මත්ද්රව්යවලින් අඩුවක් නොමැතිව පැවැත්වූ එම සාදයට ලැසියාද සම්මාදන් වී තිබි ඇති බව සඳහන්ය. සාදය අවසානයේදී බන්ධානාගර බුද්ධි අංශ නිලධාරීන් මෙහෙයුමක් දියත් කරන්නේ ඉහළ නිලධාරියකුගේ නියෝගයකින් රැඳවියන් සතුව ඇති ජංගම දුරකතන සොයාය. ලැසියා ඇමතුම් ගත් බේකරියාගේ දුරකතන කිහිපයක්ද එම මෙහෙයුමේදි හමුවී තිබුණේය. එම ජංගම දුරකතන සියල්ලක්ම දැන් ඇත්තේ බන්ධනාගාර ලොක්කෙකුගේ මේස ලාච්චුවේය.
ජේලර් ජයරත්නගේ ඝාතකයන් පසු පස හඹායන පොලිස් විමර්ශකයන්ට එම ජංගම දුරකතන තරම් විද්යාත්මක සාක්ෂියක් තවත් නැති තරම්ය.