සවුදි අරාබි රජය එරට කාන්තාවන්ට පනවා තිබූ නීති අතරින් තවත් කිහිපයක් ලිහිල් කිරීමට පසුගිය දා කටයුතු කළේය. ඒ අනුව දැන් එරට කාන්තාවන්ට පුරුෂයකුගේ අවසරයකින් තොරව විදේශගත වීමේ හැකියාව ඇතුළු තවත් සහන රැසක් ලැබී තිබේ.
මැදපෙරදිග රටවල කාන්තාවන්ට වෙනම නීති පනවා ඇති අතර එමඟින් ඔවුන්ගේ නිදහස සීමා කෙරී තිබේ. ඒ අතරින් සවුදි අරාබිය මුල් තැන සිටින්නේ කාන්තාවන්ට පුරුෂයකුගේ අවසරයකින් තොරව බොහෝ දේ කිරීමට නොහැකි වන ලෙස පනවා ඇති නීති රීති හේතුවෙනි.
පසුගිය වසර වන තෙක් සවුදි අරාබියේ කාන්තාවන්ට රිය පැදවීම තහනම්ව තිබූ නමුත් පසුගිය වසරේදී එම තහනම ඉවත් කෙරිණි. මේ වසරේදී එරට කාන්තාවන්ට එරෙහිව පැනවී තිබූ තවත් නීති රැසක් ඉවත් කෙරී තිබෙන්නේ රාජකීය නීති සංශෝධනයක් ක්රියාත්මක කරමිනි.
ඒ අනුව පසුගිය ජූලි මස අවසානයේ සිට සවුදි කාන්තාවන්ට පුරුෂයකුගේ අවසරයකින් තොරව විදේශ ගමන් බලපත්ර සඳහා අයැදුම් කිරීමේ අවස්ථාව හිමි වේ. මීට පෙර කාන්තාවන්ට විදෙස්ගත වීම සඳහා තම පියා හෝ ස්වාමි පුරුෂයා හෝ වෙනත් ඥාති පුරුෂයකුගේ හෝ අවසරය ලබාගත යුතුව තිබිණි. එහෙත් මෙවර සංශෝධිත නීති අනුව තවදුරටත් එසේ කිරීම අවශ්ය වන්නේ නැත. මීට අමතරව ළදරු උපත් ලියාපදිංචිය, විවාහ සහ දික්කසාද ලියාපදිංචිය සඳහාද කාන්තාවන්ට හැකියාව ලැබේ. රැකියා කිරීමේ වැඩි අවස්ථාද, නිදහසක්ද කාන්තාවන්ට හිමි වන සේ සංශෝධන සිදු කර ඇති බවද වාර්තා වේ.
ඒ සංශෝධන වාර්තා වීමත් සමඟ සවුදි කාන්තාවන් අතරින් බහුතරයක් ඉතා සතුටට පත් වූ බවද අන්තර්ජාලය ඔස්සේ ඔවුන් ඒ සම්බන්ධව අදහස් දක්වා සිටි බවද වාර්තා වේ. එහෙත් ඇතැම් කාන්තාවන් පවසා ඇත්තේ එම සංශෝධිත නීති හේතුවෙන් තමන් ආදරයෙන් හදා වඩා ගත් දියණියන්ට තමන් හැර යෑමට අවස්ථාව සැලසෙනු ඇති බවයි. හැම දා නීති මඟින් සිර වී සිටි සවුදි කාන්තාවන් නිදහස කුමක්දැයි අවබෝධ කර නොගැනීම සම්බන්ධයෙන් පුදුමයට පත් විය යුතු නොවේ.
කෙසේ වුවද මෙවර සිදු කර ඇත සංශෝධන හේතුවෙන් සවුදි කාන්තාවන්ට සම්පූර්ණ නිදහස හෝ පුරුෂයන් සමඟ සම තැන හිමි වී නැති බව සිහිපත් කළ යුතුය. තවමත් සවුදිය තුළ කාන්තාවන්ට විවාහ වීමට නම් ඥාති පුරුෂයකුගේ අවසරය ලබාගත යුතු වේ. බන්ධනාගාරයක හෝ වෙනත් අන්දමක රැඳවියකු නම් එමඟින් නිදහස ලැබීමේදී ද පුරුෂයකුගේ අවසරය අවශ්ය වේ. තවමත් සවුදි කාන්තාවන්ට තම දරුවන්ගේ විවාහ සඳහා අවසර ලබාදීමේ හැකියාවක් නැත.
එහෙත් ලැබූ නිදහස වුවද මහ මෙරක් සේ දැකීමට තරම් නිදහස අගයන සවුදි කාන්තාවන්ද සිටින බව පැවසිය යුතුය. ඇතැම් දෙනා පවසන්නේ සවුදි රජ ඇතුළු පාලකයන් එවන් තීන්දු සඳහා පෙලඹී ඇත්තේ සවුදියේ සැලකිය යුතු මට්ටමේ සිටින කාන්තාවන් කිහිප දෙනෙක්ම නිදහස පතා පලා යෑමට කටයුතු කිරීම හේතුවෙන් බවයි.
එවැනි කාන්තාවන් කිහිප දෙනකුම හොර රහසේ බටහිර රටවලට පලා ගොස් ඇති අතර තවත් තරුණියන් කිහිප දෙනකුම පලා යෑම් බටහිර මාධ්ය සහ අන්තර්ජාලය ඔස්සේ වාර්තා විය. එමඟින් වන අපකීර්තිය වළක්වාගැනීම අරමුණු කරගනිමින් එම නීති සංශෝධන සිදු කළ බව වැඩි දෙනාගේ මතය වුවද සැබෑව නම් එයට වඩා වැඩි අරමුණක් සවුදි රජය සතු වීමය.
සවුදියේ ඔවුන්ට හිමි බින් සල්මාන් කුමරු සවුදියේ ඉදිරි අනාගතය සලකමින් බොහෝ නව තීන්දු තීරණ ගෙන ඇති අතර සවුදියේ අනාගතය ඔහු වන බැවින් සහ ඔහුගේ ඉදිරි දැක්ම රටට වැඩදායී ලෙස පිළිගෙන ඇති බැවින් ඔහුගේ තීන්දු සඳහා සවුදි රජුගෙන්ද ලැබී ඇත්තේ නොමද අනුග්රහයකි. සල්මාන් කුමරුගේ තක්සේරුවට අනුව සවුදියේ සල්ලි උල්පත හිඳී යමින් තිබේ. ඛනිජ තෙල් මත මුළු ලෝකයම රැඳී සිටිමින් සවුදියට සල්ලි ගලා ඒමට සැලසූ කාලයක් තිබුණද දැන් මේ වන විට ලෝකය වෙනත් බලශක්ති කෙරෙහි අවධානය යොමු කරමින් සිටී. ඒ අනුව අනාගතය එතරම් සුබදායී නොවන බවට වන සල්මාන්ගේ තක්සේරුව නිවැරැදිය. ඔහු 2030 ඉලක්ක කරගනිමින් සවුදිය ප්රතිසංස්කරණය කරමින් සිටින්නේ ඒ අනුවය.
එම ප්රතිසංස්කරණ අතර කාන්තාවන් වැඩි වශයෙන් ශ්රම බළකායට දායක කරගැනීමද ඉදිරියෙන්ම පවතින අරමුණක් වේ. කාන්තාවන්ට වැඩි අධ්යාපන අවස්ථා සැලසීමෙන් සහ රටේ ඉදිරි සමාජ කටයුතු සඳහා ඔවුන්ගේ දායකත්වය ලබාගැනීමෙන් රටේ ශ්රමබළකාය වැඩි කරගැනීම මෙන්ම ඉදිරියේදී සවුදියේ ප්රධාන මූල්ය උත්පාදන ක්රමවේදය ලෙස දැනට අනුමාන කර ඇත්තේ සංචාරක කර්මාන්තය සඳහා ඔවුන්ගේ දායකත්වය ලබාගැනීමද සල්මාන් කුමරුගේ වැඩපිළිවෙළේ අන්තර්ගත වී තිබේ.
දැනට සවුදි කාන්තාවන්ගේ ශ්රමබළකාය සඳහා වන දායකත්වය සියයට 20කි. අවම වශයෙන් එය සියයට 30ක් දක්වා වර්ධනය කර ගැනීම සල්මාන් කුමරුගේ වැඩපිළිවෙළට ඇතුළත්ව තිබේ.