ශ්රී ලංකා නිදහස් පක්ෂය දියවෙලා කියලා අද දේශපාලන වේදිකාවල කතාබහ වෙනවා. ඇත්තක්ද?
අපේ රටේ දේශපාලන ඉතිහාසයේ ශ්රී ලංකා නිදහස් පක්ෂය කියන පක්ෂය තරම් නායකයින් බිහි කළ වෙන පක්ෂයක් නැහැ. ඇත්තට ම නායකයින් බිහි කළේ ශක්තිමත් අය. ඔවුන් මේ රටට වැඩ කළා. මේ රට සංවර්ධනය කරන්න, ආරක්ෂා කරන්න දිවිහිමියෙන් කටයුතු කළා. කයිවාරු ගහන පන්පෝරි ගහන අද දේශපාලනඥයන් බොහොමයක් මේ ගැන දන්නෙවත් නැහැ. චන්ද්රිකා මහත්මිය, මහින්ද රාජපක්ෂ මහතා වර්තමානයේ මෛත්රිපාල මහතා මේ තිදෙනා ම මේ රටට විශාල සේවයක් සිදු කර ඇති අය. ඒ අය ශ්රීලනිප නායකයෝ. ඒ අය පසුගිය වසර 14 පුරා රටට නායකත්වය දුන්නා. එක්සත් ජාතික පක්ෂයට අද ඔවුන්ට ඔවුන්ගේ පක්ෂයෙන් අපේක්ෂකයෙක් සොයා ගන්න බැරි වෙලා. අවසන් ජනාධිපතිවරණ දෙකට ම ඔවුන් ඉදිරිපත් කළේ පොදු අපේක්ෂකයන්.
දේශපාලනය කියන්නේ දෝලනය වන එකක්. ඒක ඊළඟ මොහොතේ කුමක් වෙයිද කියන එක අපට කියන්න බැහැ.
කවුරු මොනවා කිව්වත් ශ්රී ලංකා නිදහස් පක්ෂය කිසිසේත් දියවෙලා සේදිලා නැහැ. අවසන් මැතිවරණයේදි අපිට ලක්ෂ 17ක ඡන්ද පදනමක් තිබුණා. අද පොහොට්ටුව බිහිවෙලා තිබෙන්නෙත් ශ්රී ලංකා නිදහස් පක්ෂය ඔස්සේ ජනතාව හඳුනාගත් දේශපාලනඥයන්ගෙන්. මා එය නොබියව ප්රකාශ කරන්න කැමතියි.
පොදුජන පෙරමුණ සහ ශ්රී ලංකා නිදහස් පක්ෂය අතර එකඟතාව හරියට බාලගිරි දෝෂය වගෙයි කියලා චෝදනා එල්ල වෙනවා. කවදාද මේක එකතු වෙන්නේ?
ඇත්තටම පක්ෂ දෙකක් හැටියට අප එකතුවෙලා ඉවරයි. එකිනෙකා අතර සාකච්ඡා ආරම්භ කරමින් දිනෙන් දින ඒවා වර්ධනය වෙනවා. දෙපාර්ශ්වය ම ගෙන එන යෝජනා මෙන් ම ප්රතිපත්ති සම්බන්ධව දෙපාර්ශ්වයෙන් ම විවේචන මෙන් ම එකඟතා ඇති වෙනවා. මේ නිසා අප දීර්ඝ වශයෙන් සාකච්ඡා කරගෙන යනවා. අනික දේශපාලනය තුළ ස්ථාවරයකට පැමිණීම දිනකින් දෙකකින් කරන්න පුළුවන් දේවල් නොවෙයි. සමහරවිට වසර ගණන් ගත වන අවස්ථා අප දැක තිබෙනවා. පුද්ගලයන් පිළිබඳව හිතල නොවෙයි අප තීන්දු තීරණ ගන්නේ. ප්රතිපත්තිමය වශයෙන්. මේ රටට යහපත් ගැළපෙන මෙන් ම වැඩදායි ප්රතිපත්තිවලට ඕනෑම අවස්ථාවක අපි සහයෝගය ලබා දෙනවා. පක්ෂයක් හැටියට මෙන් ම පෞද්ගලිකවත් අපි ඒක කරන්න පැකිලෙන්නේ නැහැ.
ඉදිරි මාස කිහිපය ඇතුළත මේ සියල්ල සිදුවේවි කියලා කියන්න පුළුවන්. විශේෂයෙන් ම යහපත් ආකාරයට මේවා සිදුවෙනවා කියන එක තමයි මගේ මතය. අනික ජනාධිපතිවරණයට තවකල් තිබෙනවා. ඒ වන විට පවතින බොහෝ ගැටලු නිරාකරණය වී හොඳ දේශපාලන ගමනක් යාමට හැකි වනු ඇතැයි විශ්වාස කළ හැකියි.
ඉදිරි ජනාධිපතිවරණයේදි ශ්රී ලංකා නිදහස් පක්ෂය හැටියට ඔබලා පොදුජන පෙරමුණට ද එක්සත් ජාතික පක්ෂයට ද සහය දක්වන්නේ?
ඇත්තටම අපි රටට යහපත් ප්රතිපත්තියක් සුභදායි වැඩපිළිවෙළක් ඉදිරිපත් කරන ඕනෑම පක්ෂයකට සහය ලබා දෙන්න සූදානම්. නමුත් මේ වන විට පොදු ජන පෙරමුණ සමඟ මේ සම්බන්ධව කටයුතු කරගෙන යනවා. පොදුජන පෙරමුණ ඉදිරිපත් කරන ප්රතිපත්ති අපට ගැලපෙන ඒවා කියලා අපි හිතනවා.
ඒ නිසා ඒ සම්බන්ධව අප එම පක්ෂය සමඟ ස්ථාවරවීමේ වැඩි ඉඩකඩක් තිබෙනවා.
ශ්රී ලංකා නිදහස් පක්ෂයේ ප්රබල දේශපාලනඥයන් කිහිපදෙනකුම ප්රසිද්ධ වේදිකාවේ ප්රකාශ කර සිටිනවා මෛත්රීපාල ජනාධිපතිවරයාම නැවත ඉදිරිපත් කරනවා ඉදිරි ජනාධිපතිවරණය සඳහා අපේක්ෂකයා ලෙස කියා. ඇයි මේ එකම පක්ෂයේ පිරිස මත දෙකක් දරන්නේ?
එක එක අයට තම පෞද්ගලික මත තිබෙන්න පුළුවන්. ඒවා පක්ෂයේ මත නොවෙයි. අනික ඕනෑම අවස්ථාවක අවශ්ය වුවහොත් අපට ජනාධිපති අපේක්ෂකයෙකු ඉදිරිපත් කරන්න පුළුවන්. අනික ශ්රී ලංකා නිදහස් පක්ෂය ඒ සඳහා සුදුසු පක්ෂයක්. ජනාධිපතිවරුන් බිහි කළ පක්ෂයක්.
* අනික අප අනෙක් පක්ෂවලට කිවයුතු මතක් කළ යුතු කරුණක් තිබෙනවා. ශ්රී ලංකා නිදහස් පක්ෂය නියෝජනය කරන ප්රාදේශීය සභා මන්ත්රීවරු දහසකට වඩා සිටිනවා. ප්රාදේශීය මෙන් ම පළාත් සභා ඇතුළු තවත් දේශපාලන ක්ෂේත්රයේ නොයෙක් තරාතිරම්වල නියෝජිතයන් සිටින පක්ෂයක් අපි.
ඔබලා කුමන දේ කිව්වත් පොදුජන පෙරමුණ මේ වනවිට ඔවුන්ගේ ජනාධිපති අපේක්ෂකයා නම් කරලා ඉවරයි. ඔබලා ඔහුට සහයෝගය දෙනවාද? නැද්ද?
ඇත්තටම අපි ශ්රී ලංකා නිදහස් පක්ෂයේ අනන්යතාව රකිමින් අපගේ පක්ෂය ඉදිරිපත් කරන ප්රතිපත්තිවලට මුල් තැන දෙමින් පොහොට්ටුවට සහය දෙනවාද නැද්ද යන්න පිළිබඳව මේ දිනවල සාකච්ඡා කරනවා. ඉදිරිපත් කර ඇති අපේක්ෂකයා නොවෙයි අපට වැදගත් වන්නේ ප්රතිපත්තියයි. අපි කිසිසේත් දැනට එ.ජා.ප ය සමඟ එකතු වෙන්න නම් අදහසක් නැහැ.
ඔබලා ඇමැතිකම් අතහැරලා ආණ්ඩුවෙන් ඉවත්වීම නිසා නැවත වතාවක් මෛත්රී ජනාධිපතිවරයාට බලයට එන්න තිබූ අවස්ථාවක් මග හරවා ගත්තා නොවෙයි කියලා හිතන්නේ නැද්ද?
කිසිවිටකවත් එහෙම වෙන්නේ නැහැ. මොකද අප එකතුවෙලා මේ ගමන යන්න උත්සාහ කළා. නමුත් එක්සත් ජාතික පක්ෂය දිගින් දිගටම අපගේ පොදු ප්රතිපත්ති කැඩුවා. රට විනාශවීම වළක්වන්න තමයි අපි ඔවුන්ගෙන් ඉවත් වුණේ. දේශපාලනයට වඩා රටට ආදරය කරන පිරිසක් ශ්රී ලංකා නිදහස් පක්ෂයේ ඉන්න බව රටේ ජනතාව දැනගත යුතුයි. ඒ වගේ ම දැන ගත්තා කියලා අපට හිතෙනවා. ඒ නිසා ජනතාවට ජනතා බලයට අප ගෞරව කළ යුතුයි.
දිගින් දිගටම මෙරට දේශපාලන බලය ඒ මේ අතට පනින දේශපාලන නායකයින් කිහිපදෙනකු වටා ඇති වී ඔවුන්ට අවශ්ය දේ පමණක් සිදු වෙනවා කියන එක ජනතා මතයක් බවට පත් වෙලා මේ තත්ත්වය වෙනස් කරන්න පුළුවන්ද?
ඇත්තටම ඒක හොඳ ප්රශ්නයක්. මේ රටේ බුද්ධිමත් ජනතාව ඉදිරි මැතිවරණවලදී රිලවුන් වැනි අර පැත්තට මේ පැත්තට පනින දේශපාලනඥයන් පන්නා දමන්නැයි මා ජනතාවගෙන් ඉල්ලා සිටිනවා. ඉකුත් මාස කිහිපය තුළදී ශ්රී ලංකා නිදහස් පක්ෂයේ සිට ඔය ආකාරයටම පැන්න පිරිසක් මේ වන විට මහින්ද රාජපක්ෂ මහතා ප්රමුඛ ශ්රී ලංකා පොදුජන පෙරමුණ විනාශ කරමින් සිටිනවා. ඔවුන් එක්සත් ජාතික පක්ෂයේ අවශ්යතාව ඉටු කරනවා කියන එක මගේ මතයයි. ඒ නිසා ඔවුන්ව පන්නා දමන්න කියලා අපි පක්ෂයක් හැටියට හිටපු ජනාධිපති මහින්ද රාජපක්ෂ මහතාගෙන් ඉල්ලා සිටිනවා.
ප්රධාන දේශපාලන පක්ෂ කිහිපයක්ම නියෝජනය කරමින් පාර්ලිමේන්තුවේ මන්ත්රිවරු 225 සිටියදී ජනාධිපතිවරණය සඳහා පිටතින් පුද්ගලයන් ගෙන ඒම ඉතිහාසය පුරාවටම සිද්ධ වෙනවා. ඇයි මෙහෙම වෙන්නේ?
ඇත්තටම අපේ රටේ දේශපාලනය තුළ බරපතළ අර්බුදයක් තිබෙනවා. ඒක අපට පක්ෂයක් හැටියට පිළිගන්නට සිද්ධ වෙනවා.
ඉකුත් ජනාධිපතිවරණ දෙකේදීම එක්සත් ජාතික පක්ෂයට ජනාධිපති අපේක්ෂකයෙකු හිටියේ නැහැ. ඔවුන් සරත් ෆොන්සේකා මහතා සහ මෛත්රීපාල සිරිසේන මහතා ඉදිරිපත් කළේ ඇත්තටම ඒක ලොකු අර්බුදයක් තමයි. මේක තමයි ශ්රී ලංකාවේ දේශපාලනය තුළ සිදුවෙන අර්බුදකාරි තත්ත්වය මේවා අධ්යයනය කරලා ඉදිරියේදී වෙනස් කිරීමට අප සියලු දෙනා අත්වැල් බැඳ ගත යුතුයි.
මහින්ද රාජපක්ෂ මහතා ශ්රී ලංකා නිදහස් පක්ෂයෙන් ඉවත් වීමෙන් පසු ශ්රී ලංකා නිදහස් පක්ෂය අර්බුදයට ලක් වුණු බවට මතයක් තිබෙනවා.
මහින්ද රාජපක්ෂ මහතා දෙවතාවක්ම ශ්රී ලංකා නිදහස් පක්ෂයෙන් ජනාධිපතිවරණයට ඉදිරිපත් වෙලා ජයග්රහණය කළා. එලෙසම ශ්රී ලංකා නිදහස් පක්ෂයේ අගමැතිවරයකු හැටියට කටයුතු කරා. විපක්ෂ නායකයා හැටියට කටයුතු කළා. දීර්ඝ කාලයක් පක්ෂයේ ප්රබල ක්රියාකාරී නායකයෙක්. ඒ වගේම එතුමා පක්ෂයෙන් ඉවත් වීමත් සමඟ ශ්රී ලංකා නිදහස් පක්ෂය නියෝජනය කරපු ප්රබලයන් පිරිසක් ඔහු සමඟ ගියා. ඒ නිසාම අද ඒ පක්ෂය ප්රබල වෙලා තිබෙනවා. අප යථාර්ථය තේරුම් ගත යුතුයි. මහින්ද රාජපක්ෂ මහතා දශකයකට වැඩි කාලයක් ශ්රී ලංකා නිදහස් පක්ෂයේ ප්රබලයා. ඔහුගේ නික්ම යාම පක්ෂයට ප්රබල ලෙස බලපෑවා කියන එක අපි පිළිගන්න ඕන.
ගෝඨාභය රාජපක්ෂ මහතා සමඟ ඔබලා ඉදිරියේදී සාකච්ඡා කරන්න බලාපොරොත්තු වන ප්රධාන කරුණු මොනවාද?
අප සකස් කර ගත්ත රට ඉදිරියට ගෙන යන ප්රතිපත්තිවලට එකඟතාවයන් පිළිබඳ සාකච්ඡා කරනවා.අපි යෝජනා කරනවා මේ මැතිවරණ ක්රමය වෙනස් කළ යුතුයි කියලා. මනාප ඡන්ද ක්රමය වෙනස් විය යුතුයි. මන්ත්රීවරු විකිණෙන වෙළඳ පොළක් වැනි වටිනාකමක් නොමැති වන පක්ෂ මාරු කරන මාරු වන අයට තීන්දුවක් ගන්න බැරි දැනට පවතින ක්රමවේදයන් වෙනස් කළ යුතුයි කියන යෝජනාව අප සිදු කරනවා. පවුල් පසුබිමින් පමණක් පාර්ලිමේන්තුවට එන්න තියන තත්ත්වය වෙනස් කළ යුතුයි.
මැතිවරණයකදී ඡන්දවලින් පරාජයට පත්වී ජාතික ලැයිස්තුවෙන් නැවත පාර්ලිමේන්තුවට පැමිණෙන මන්ත්රීවරුන් පිළිබඳව සාකච්ඡා කරන්නේ නැද්ද?
ඇත්තටම මෙය ඉතා කනගාටුදායක තත්ත්වය ඉදිරියේදී මේ තත්ත්වය සම්පූර්ණයෙන්ම වෙනස් වේවි කියලා අප සිතනවා. අප ඒ පිළිබඳව නව රජයකදී ක්රියා කරනවා.
ශ්රී ලංකා නිදහස් පක්ෂය හැටියට ඔබගේ පක්ෂය වඩාත් කැමැත්තක් දක්වන්නේ ජනාධිපතිවරණය, පළාත් සභා මැතිවරණය යන මැතිවරණ දෙකෙන් කුමක් ප්රථමයෙන් පවත්වනවාටද?
ඇත්තට ම මේ දෙක ම එක සැරයට පවත්වන්න හැකි නම් රුපියල් කෝටි ගණනක් ඉතිරි කර ගත හැකියි. මේ මුදල් ජනතාවගේ මුදල්.
මැතිවරණ කල් දැමීම ප්රජාතන්ත්රවාදයට පයින් ගැසීමක් හැටියට පෙන්වා දිය හැකියි. මේ නිසා ජනාධිපතිවරණය නියමිත දිනයට පැවැත්වීමට පියවර ගත යුතුයි. පළාත් සභාව ජනාධිපතිවරණයට පෙර පැවැත්වීමේ හැකියාව පිළිබඳව ජනාධිපති මෛත්රිපාල සිරිසේන මහතා අධිකරණයෙන් විමසා තිබෙනවා. ඒ නීතිමය පියවර ගැන නිසි ආකාරයට දැන ගත්තාම මම හිතන්නේ ඉතා ඉක්මනින් පළාත් සභා මැතිවරණය පැවැත්විය හැකියි.
ශ්රී ලංකා නිදහස් පක්ෂයේ 68 වැනි පක්ෂ සම්මේලනය සැප්තැම්බර් 03 වැනිදා කොළඹ සුගතදාස ගෘහස්ත ක්රීඩාංගණයේදී පවත්වන බව ප්රකාශ කර තිබෙනවා. මෙහිදී විශේෂ යමක් සිදු වෙනවාද?
ශ්රී ලංකා නිදහස් පක්ෂය හැටියට වැදගත් තීන්දු තීරණ රැසක් මෙදින ප්රකාශයට පත් කිරීමට පක්ෂය බලාපොරොත්තු වෙනවා. මෙදිනට ඉතා සීමිත පිරිසක් පමණක් අප කැඳවීමට බලාපොරොත්තු වන්නේ. අප ගෙන ඇති තීන්දු තීරණ එදාට ප්රකාශ කරන එක හොඳයි කියලා මා හිතනවා.