පසුගිය සිව් වසර තුළදී රටේ පවුල් ලක්ෂ 4කට ඉඩම් හිමිකම ලැබෙන අලුත් ඉඩම් ඔප්පු හා හිමිකම් බලපත්‍ර ලක්ෂ 4ක් දී ඇතැයි ඉඩම් හා පාර්ලිමේන්තු කටයුතු අමාත්‍යාංශය පවසයි.
ඇමැති ගයන්ත කරුණාතිලක මහතාගේ උපදේශකත්වය හා මෙහෙයවීම යටතේ ඉඩම් කොමසාරිස් ජනරාල් දෙපාර්තමේන්තුව හා ඉඩම් ප්‍රතිසංස්කරණ කොමිසම යන ආයතන මඟින් මේ වැඩපිළිවෙළ සම්බන්ධීකරණය කරනු ලබන අතර, පාරම්පරිකව වගා කළ, එහෙත් මෙතෙක් කලක් නිසි ඉඩම් මැනීමක් නැතිව හිමිකම ඔප්පු කළ නොහැකිව සිටි පවුල් රැසකට මේ යටතේ ඉඩම් හිමිකම ලැබී තිබේ. ඉදිරි මාස 6 ඇතුළත තවත් ඉඩම් ඔප්පු හා දීමනා පත් 75,000ක් පමණ දීමට අපේක්ෂිතය.
