ඉකුත් වසරේ ඔක්තෝබර් 26 දා පත් කරනු ලැබූ ව්‍යවස්ථා විරෝධි දින 52 ආණ්ඩුව සමයේදී උඩරට ගොවීන්ගෙන් මිලයට ගත් රු. 8,30,00,000කට අධික වටිනාකමකින් යුතු අර්තාපල් මෙට්‍රික් ටොන් 890ක් පාරිභෝගිකයන් අතට පත් නොකොට වළ දැමීම සම්බන්ධයෙන් විධිමත් පරීක්ෂණයක් සිදු කරන බව ආර්ථික ප්‍රතිසංස්කරණ සහ පොදු සැපයුම් අමාත්‍ය ආචාර්ය හර්ෂ ද සිල්වා මහතා පවසයි.
මේ අර්තාපල් තොගය ශ්‍රී ලංකා පාරිභෝගික සමුපකාර සමිතිය මඟින් ගොවීන්ගෙන් මිල දී ගෙන ඇති අතර, ඒවා නිසි පරිදි ගබඩා නොකිරීම, විධිමත් ලෙස පාරිභෝගිකයන් වෙත යැවීමට අවශ්‍ය කටයුතු නොයෙදීම ඇතුළු හේතු නිසා කල් ඉකුත්ව නරක් වී ඇති අතර, ඉනික්බිති ඒවා වළ දැමීමට කටයුතු කර ඇති බවද අමාත්‍යවරයා කියා සිටී.
දින 52 ආණ්ඩුව එකල උඩරට ගොවීන්ගේ අර්තාපල් නිෂ්පාදන අතිරික්තයක් පවතින බව පවසා වෙළෙඳ සහ වාණිජ කටයුතු අමාත්‍යාංශයේ මුදල් රු. මිලියන 188ක් වැය කොට අර්තාපල් අල මෙට්‍රික් ටොන් 2000ක් පමණ මිල දී ගෙන ඇති අතර, ඒ සඳහා වැය කොට ඇති සම්පූර්ණ මුදල රු. කෝටි 20 ඉක්මවයි. එලෙස මිලයට ගත් අල තොග වෙනුවෙන් ගොවීන් වෙත තමත් රු. කෝටි 7කට ආසන්න හිඟ මුදලක් ගෙවීමට ඇති අතර, මේ කටයුතු හේතුවෙන් ශ්‍රී ලංකා පාරිභෝගික සමුපකාර සම්මේලනයටද රු. කෝටි 10කට වඩා අලාභයක් විඳින්නට සිදුව ඇති බවද වාර්තා වේ. මෙලෙස රජයේ මුදල් අතිවිශාල ප්‍රමාණයක් වැය කොට මිල දී ගෙන, දේශීය වෙළෙඳපොළේ ඉහළ පාරිභෝගික ඉල්ලුමක් ඇති දේශීය අර්තාපල් ටොන් 890ක් මේ අයුරින් ඉවත හෙළීම මහත් අපරාධයක් බවද අමාත්‍යවරයා පෙන්වා දුන්නේය. ජීවන වියදම් පිළිබඳ කමිටුවට මේ අර්බුදය පිළිබඳ වාර්තාවක් ඉදිරිපත් කර ඇති බවද, ඉදිරියේදී මේ සම්බන්ධයෙන් අදාළ නීති පියවර ගැනීමට කටයුතු කරන බවද අමාත්‍යවරයා තවදුරටත් සඳහන් කළේය.
