ජනාධිපති ධුර අපේක්ෂකයා වශයෙන් පොදුජන පෙරමුණ ගෝඨාභය රාජපක්ෂ මහතාව නම් කිරීමත් සමඟම උතුරේ දේශපාලනය තුළ විවිධ මතවාද පැතිරෙන්නට පටන්ගෙන තිබේ.
උතුරේ එකම දේශපාලන බලවතා යැයි ඔවුන් විසින්ම කියාගන්නා දෙමළ ජාතික සන්ධානය තුළද එකිනෙකට පරස්පර වූ කතා මේ සතියේදී පැතිර යන්නට විය.
දෙමළ ජාතික සන්ධානයේ ප්රධාන පෙළේ නායකයන් කියා සිටින්නේ ජනාධිපතිවරණය සඳහා ඉදිරිපත් වන සියලුම පක්ෂවල අපේක්ෂකයන් නම් කොට අවසන් වන තුරු තම පක්ෂය සහාය දක්වන්නේ කාහට දැයි ඔවුන් තීරණය නොකරන බවයි.
අවශ්ය වුවහොත් සහ එම අපේක්ෂකයන්ගෙන් ආරාධනා ලබුණහොත් ඔවුන් සමඟ සාකච්ඡා කොට දෙමළ ජාතික සන්ධානය ස්ථිර තීරණයකට එළඹෙන බවද පක්ෂයේ නායකයෝ කියා සිටිති.
මේ තීරණයේදී අනිවාර්යෙන්ම උතුරු නැඟෙනහිර දෙමළ අර්බුදයට ඒ ඒ අයගෙන් ලැබෙන ප්රතිචාර වඩාත් සැලකිල්ලට ගන්නා බවත් ඉන් වඩාත්ම වාසිදායක හා විශ්වාසවන්ත අපේක්ෂකයාට සහාය දෙන බවත් දෙමළ ජාතික සන්ධානය අවධාරණය කොට සිටියි.
දැනට පැහැදිලි වශයෙන්ම ජනාධිපති ධුර අපේක්ෂකයෙකු වශයෙන් ප්රකාශයට පත් කොට සිටින්නේ ගෝඨාභය රාජපක්ෂය. ඔහුගේ නම නිර්දේශ වීමත් සමඟම දෙමළ ජාතික සන්ධානයේ හවුල්කාර පක්ෂයක් වන ප්ලොට් සංවිධානයේ නායක ධර්මලිංගම් සිද්ධාර්ථන් ප්රකාශ කොට තිබුණේ ගෝඨාභය රාජපක්ෂට ඡන්ද වැඩි සංඛ්යාවක් ලබාගත හැකි බවයි. ගෝඨාභය රාජපක්ෂට ජනාධිපතිවරයා වීමට ඇති හැකියාව වැඩි බවද ප්ලොට් නායකයා ප්රකාශ කොට තිබිණි.
සිද්ධාර්ථන්ගේ ඒ ප්රකාශයත් සමඟින් දෙමළ ජාතික සන්ධානයේ ජ්යෙෂ්ඨයෝ ඔහුට දොස් පවරන්නට පටන් ගෙන තිබේ.
ඊට හේතුව වශයෙන් පක්ෂ නායකයන් ප්රකාශ කොට ඇත්තේ එක් අපේක්ෂකයෙකු පමණක් ප්රකාශයට පත් කොට සිටියදී ඔහු ගැන අනාවැකි කීම පක්ෂයට විශාල හානියක් බවයි. සිද්ධාර්ථන් මෙහිදී නිහඬව සිටිද්දී දෙමළ ජාතික සන්ධානයේ ප්රකාශක එම්.ඒ.සුමන්තිරන් මන්ත්රීවරයා ගෝඨාභය රාජපක්ෂ දැඩි ලෙස විවේචනටයට ලක් කොට තිබිණි.
සිංහල බෞද්ධ ජාතිවාදී මෙන්ම යුද හමුදා නිලධාරියෙකු වන ගෝඨාභය රාජපක්ෂ ජනාධිපතිවරණ අපේක්ෂකයා වශයෙන් ඉදිරිපත් වී සිටින නිසා ඉදිරියේදී දෙමළ ජාතික සන්ධානය කොටියන් ලෙස හංවඩු ගැසීම අනිවාර්යෙන්ම සිදු වන බව ඔහු සඳහන් කොට තිබේ.
ඒ නිසා දෙමළ ජනතාව සඳහා කවර ආකාරයක හෝ විසැඳුමක් ලබාගැනීමට ඔහුගෙන් හෝ රාජපක්ෂ පවුලේ කිසිදු අයෙකුගෙන් හැකි නොවන බවද සුමන්තිරන්ගේ අදහසයි.
දෙමළ ජාතික සන්ධානයට අවශ්ය වී ඇත්තේ උතුරු නැඟෙනහිර වෙසෙන දෙමළ ජනතාවට ඒකීය රාජ්යයක් යටතේ බලය බෙදා හැරෙන දේශපාලන ව්යුහයක් බව මෙහිදී සඳහන් කළ සුමන්තිරන් මන්ත්රීවරයා මේ තත්ත්වය ඇති කරගැනීමට ශ්රී ලංකා රජය සමඟ අවස්ථා ගණනාවක්ද ඉන්දීය රජය සමඟ අවස්ථා දහ අටක්ද සාකච්ඡා කොට ඇති බවද ප්රකාශ කළේය.
සුමන්තිරන් මන්ත්රීවරයා ගෝඨාභය රාජපක්ෂ පිළිබඳ එසේ අදහස් දක්වද්දී දෙමළ ජාතික සන්ධානය අතහැර දමා ගිය ඊ.පී.ආර්.එල්.එෆ් සංවිධානය නියෝජනය කරන වන්නි දිස්ත්රික්කයේ ශිවසක්ති ආනන්දන් මන්ත්රීවරයාද ගෝඨාභයට එරෙහිව අදහස් පළ කොට තිබේ.
ඔහු පවසන්නේ ගෝඨාභය රාජපක්ෂ වැනි පුද්ගලයෙකු ජනාධිපතිවරයා බවට පත් වූවත් දෙමළ ජනතාවගේ ප්රශ්නවලට කිසිම විසැඳුමක් නොලැබෙන බවයි.
දෙමළ ජනතාවගේ හා මුස්ලිම් ජනතාවගේ ඡන්දයකින් තොරව මේ රටේ කිසිම අයෙකුට ජනාධිපතිවරයා වීමට හැකියාවක් නැති නිසා ගෝඨාභය රාජපක්ෂට කිසි දිනක මේ රටේ ජනාධිපතිවරයා විය නොහැකි බවද ඔහු මෙහිදී සඳහන් කළේය. පසුගිය ආණ්ඩුව යටතේ රටේ පැවති තත්ත්වය සලකා බලන විට සිංහල ජනතාව අතරද ඔහුට එතරම් ප්රසාදයක් ඇතැයි සිතිය නොහැකි බව ශිවශක්ති ආනන්දන් මන්ත්රීවරයා පැවසීය.
එහෙත් ගෝඨාභය ජනාධිපති අපේක්ෂකයා ලෙස තෝරාගැනීමත් සමඟ යාපනය හා කිලිනොචිච්යේ රතිඤ්ඤා පත්තු විය. මෙතෙක් යාපනයේ ඇති නොවූ මේ තත්ත්වය ගැන විමසා සිටි අවස්ථාවේදී දෙමළ ජාතික සන්ධානයේ යාපනය දිස්ත්රික් පාර්ලිමේන්තු මන්ත්රී මාවෙයි සේනාධිරාජා මන්ත්රීවරයා කියා සිටියේ පොහොට්ටුව පක්ෂයේ පක්ෂ කාර්යාලයක් යාපනයේ පිහිටුවා ඇති නිසා එහි සිටි තරුණයන් රතිඤ්ඤා දැල්වූ බවයි.
සුසිල් ප්රේමජයන්ත් මන්ත්රීවරයාද පසුගිය සතියක යාපනයට පැමිණ යාපනයේ තරුණයන් හමුවූ බවත්, පක්ෂයක කාර්යාලයක් පිහිටුවා එහි සිටින ජනතාවට කතා කළ පමණින් මැතිවරණයක් ජයග්රහණය කළ නොහැකි බවත් මාවෙයි සේනාධිරාජා මන්ත්රීවරයා ප්රකාශ කළේය.
උතුරේ මෙන්ම නැඟෙනහිර පළාතේද දෙමළ ජනතාව තවමත් සිටින්නේ දෙමළ ජාතික සන්ධානය සමඟ නිසා කොළඹින් පොම්ප වී උතුරට පැමිණෙන කවර දේශපාලනඥයෙකුට වූවත් දෙමළ ජාතික සන්ධානය නැතිව පැවැත්මක් නැති බව මාවෙයි මන්ත්රීවරයාගේ අදහසයි.
මෙවර දෙමළ ජාතික සන්ධානය ජනාධිපතිවරණයේදී සහාය දක්වන්නේ කාහටද යන්න තීරණය කිරීමට පෙර උතුරු නැඟෙනහිර පළාත්වල සිටින සාමාන්ය දෙමළ ජනතාවගේ අදහසද යම් ප්රමාණයකට විමසා බැලීමට සූදානමින් සිටින බවත් ඒ සඳහා උතුරු නැඟෙනහිර ගම්මට්ටමින් පිහිටුවා ඇති ශාඛා සමිතිවල සොය ලබා ගැනීමට තීරණය කොට ඇති බවත් ඔහු පැවසීය.
“අපි ජනාධිපතිවරණයේදී ගන්නෙත් ඉතාම හොඳ තීරණයක්. ඒ තීරණය ගන්නේ පක්ෂයේවත් එහි සිටින දේශපාලනඥයන්ගේ වාසියටවත් නෙමෙයි, උතුරු නැඟෙනගිර අර්බුදයට විසැඳුමක් සොයාගැනීම කියන කාරණය අංක එකේ තබා ගෙනයි. ’’
ගෝඨාභය රාජපක්ෂගේ නම ප්රකාශ වීමත් සමගම කිලිනොච්චියේ දෙමළ තරුණයන් ප්රීති වූයේ මන්දැයි දෙමළ ජාතික සන්ධානයේ කිලිනොච්චිය දිස්ත්රික් පාර්ලිමේන්තු මන්ත්රී එස්.ශ්රීධරන්ගෙන් විමසීමු. ඔහු කියා සිටියේ නාමල් රාජපක්ෂගේ තරුණයන් පිරිස එසේ ප්රීති වූ බවයි.
''නාමල් රාජපක්ෂ මන්ත්රීවරයා කිලිනොච්චියේ පවුලකට ගෙයක් හදලා දුන්නා. ඒ ගේ හදන කාලේ ඔහුත් එක්ක කිලිනොච්චියේ තරුණයන් පිරිසක් හිතවත් වෙලා ඉන්නවා. ඒ තරුණයන්ට දේශපාලනයක් නැහැ. ඒ අයට කන්නයි බොන්නයි දෙනවා නම් කාට හරි අත්පුඩි ගහනවා . කාට හරි හූ කියනවා. ඒක හැම තැනකටම පොදු දෙයක්. කොහොම වුණත් කිලිනොච්චියේ මුලතිව් ජනතාව මහින්ද රාජාප්ක්ෂගේ කට්ටියට කැමති නෑ. ඒක මහින්ද මහත්තයත් දන්නවා.
මේ ළඟදිත් අපි සාකච්ඡාවකදී තීරණය කළේ අපි පක්ෂයක් විදිහට දෙමළ ජාතික සන්ධානය කටයුතු කරද්දී එකම පුද්ගල චරිතයක් මත විශ්වාසය තබාගෙන කටයුතු නොකරන්නයි. අපි පක්ෂයක් වගේම අපි කටයුතු කරන්නත් ඕනේ පක්ෂයක් එක්කයි කියන මතයේ අපි දැන් ඉන්නවා.
ඒ වගේම සිවාජිලිංගම් හිටපු මන්ත්රීවරයා කියනවා වගේ මීට පස්සේ අපි එක් එක් අයගේ කතා දෙන්නම් කියන ඒවා විශ්වාස කරන්නේ නෑ. හැම දේම ලිඛිත පොරොන්දු මත ලබාගත යුතුයි. මේ ගැනත් අපි සාකච්ඡා කරලයි තියෙන්නේ. මිනිස්සුන්ට වරදින්න පුළුවන් අවස්ථා තියනවා. ඒත් ඒවගේ සීමාවක් තියෙන්න ඕනේ කියන මතයේ දැන් හැම කෙනාම ඉන්නවා.’’
දෙමළ ජාතික සන්ධානයේ පිරිස ජනාධිපතිවරණය පිළිබඳ හා අපේක්ෂකයන් පිළිබඳ අදහස් දක්වද්දී උතුරු පළාත් සභාවේ හිටපු ප්රධාන අමාත්ය සී.වී.විග්නේස්වරන් කියා සිටින්නේ දකුණේ සිංහල බෞද්ධ බලවේගවලට හසු වී සිටින කිසිම දේශපාලනඥයෙකු පිළිබඳ දෙමළ ජනතාව විශ්වාසය තැබිය යුතු නැති බවයි.
එසේ කියමින් ඔහු ඔහුගේ දේශපාලන පක්ෂය වන දෙමළ ජනතා සන්ධානය හෙවත් ටී.එක්.කේ පක්ෂයේ පක්ෂ කාර්යාල උතුරු පළාත් පුරා අලුතෙන් පිහිටුවමින් තවත් දේශපාලන ගමනක් යෑමට උත්සාහ කරයි.
එය ලංකාවේ පොදු දේශපාලනයේ ස්වරූපයය උතුරෙන්ද ප්රකට වෙමින් ඇත.