කටු පඳුරු මිස, උස්ව වැඩුණු ගහකොළ නැති මේ ශුෂ්ක භූමිය දාහයෙන් දවාලයි.
බැලූ බැලූ අත වියළි ගහකොළ පමණි. දුඹුරු පැහැ දුහුවිලි පමණි. එවැනි කඨෝර පරිසරයක කොළ පැහැයෙන් දිදුලන අඹ යායකි.
වියළි හුළඟ හා මුසුව හඹා එන අඹ මල් සුවඳ මේ තුරු ගොමු යටදී, දාහය නිවාලන මහා ආස්වාදයකි. ඒ එතෙකින් නොනැවතුණු, කිලෝවකට වැඩි ගෙඩි, ගස් පුරා ඵල දරමින් අපේ රටට ඩොලර් රැගෙන එන මහා සම්පතකි.
මේ, TJC නව අඹ ප්‍රභේදය මෙරට වගා කරන දැවැන්තම ව්‍යාපෘතියයි. බුත්තල, වන්දම නම් අතිදුෂ්කර ප්‍රදේශයේ අක්කර 500 ක් පුරා නැඟී හිඳින මේ අඹගස් පේළි, ‘නෙල්නා’ සමාගමේ තවත් සාර්ථක ව්‍යාපෘතියක ප්‍රතිඵලයයි. එනම්, ඔවුන්ගේ දැවැන්තම කෘෂි ව්‍යාපෘතියයි.
නෙල්නා සභාපති, එඩී ගුණපාල නානායක්කාර මහතාගේ සංකල්පයකට අනුව සහ ඔහුගේ දියණිය, අධ්‍යක්ෂිකා පුණ්‍යා නානායක්කාර මෙනෙවියගේ කැපවීම මත ඇරැඹුණු මේ TJC නෙල්නා අඹ වගාව, අද මුළු වන්දම ප්‍රදේශයටම ආර්ථික ප්‍රතිලාභ රැසක් ගෙන එන, රැකියා උත්පාදනය කරන දැවැන්ත ව්‍යාපෘතියක් බවට පත්ව තිබේ.
ලෝකයේ ප්‍රමිතියෙන් උසස් හොඳම අඹ වර්ග 10 අතරේ සිටින, අපේ රටේ වගා කෙරෙන TJC, ටොම් එල්ලාවල සහ ජුවාන් කාලෝස් යන මහත්වරු විසින් මෙරටදී වර්ධනය කරන ලද අඹ ප්‍රභේදයකි. එහි අගය වටහා ගත් නානායක්කාර මහතා, මෙම දැවැන්ත වගා ව්‍යාපෘතියට අත ගැසුවේ, මේ ශුෂ්ක බිම කොළ පැහැයෙන් දිදුලන පරිසරයක් බවට පත් කරමිනි.
ඒ අනුව, 2008 වසරේ දී ඇඹිලිපිටියේ අක්කර 150 කින් නෙල්නා TJC පළමු ව්‍යාපෘතිය ඇරැඹිණි. අක්කර 500 ක බුත්තල මෙම ව්‍යාපෘතිය ආරම්භ වූයේ ඉන් අනතුරුව 2018 වසරේදීය.
 |
| සභාපති, ගුණපාල නානායක්කාර (වමේ) සහ සාමාන්‍යාධිකාරි කපිල රාජපක්ෂ මහත්වරු. |
“අපේ මේ අඹ වතුවල වැඩ කරන බහුතරය මේ අවට ගම්වල කාන්තාවෝ. පැළ සිටුවීමේ පටන් ගස් නඩත්තු කිරීම, අඹ ඵල ආරක්ෂා කිරීම, නෙළීම ආදී සියලු කටයුතු සිදුවන්නේ ඔවුන් අතින්. එසේ රැක බලා ගන්නා මේ අඹ, සිංගප්පූරුව, ජර්මනිය, ඕමානය, ඩුබායි, මැලේසියාව, රුසියාව, ස්විට්සර්ලන්තය, ස්වීඩනය, ඇමෙරිකාව සහ නෝ‍ර්වේ ඇතුළු මැද පෙරදිග රටවල් ගණනාවකටම යැවෙන්නේ ඔවුන් අතින් සැකසීමෙන්.
ඉතින් මේ අඹ ව්‍යාපෘතිය නිසා, දුෂ්කර ගමක ආර්ථිකය හැදී තිබෙනවා. කාන්තාරයක් වගේ රස්නෙ පරිසරයකට අලුත් ගස් 75,000 ක් ලැබී තිබෙනවා. අපි ආදායමක් උපයනවා තමයි, හැබැයි ඒ ගහක් කොළයක් වවලා පරිසරයට උදව් කරමින්.
වතුර තමයි අපිට තිබෙන ලොකුම ගැටලුව. මේ ගස් මේ තැනට ලොකු කරන්න විශාල ජල ප්‍රමාණයක් ඕනෙ. රුපියල් මිලියන 150 ක් වැය කරල වැවක් හදන්න උත්සාහ ගත්තත් තවම එයට අවසර ලැබී නැහැ. රජයෙන් අපට ඒ උදව්ව ලැබෙනවා නම් මේ ශුෂ්ක පළාතට වැවක් ලැබෙනවා. අඹ ගස් ටිකට අඩු නැතිව වතුරත් ලැබෙනවා.
අනෙක, අපේ රටේ මහපොළොවේ රසය හොඳින් උරාගත් මේ අඹ තව තවත් ලොව ප්‍රචලිත කරන්න අපිට හැකියාව තිබෙනවා. කෙනෙක් අක්කර ½ ක මේ අඹ හිටෙව්වොත් එය, රු. 50000කට ආසන්න මාසික ආදායමක්. අපේ දිගුකාලීන සැලැස්ම තමයි, බිලියන 7 ක වාර්ෂික අපනයන ආදායමක් ඉපැයීම. අඹගස් ලක්ෂයක් දක්වා මේ ව්‍යාපෘතිය පුළුල් කිරීම, අපේ ඊළඟ ඉලක්කය.
ඒ වගේ ම, ජම්බෝ වර්ගයේ විශේෂිත දූරියන් ගස් 10000 ක ව්‍යාපෘතියටත් අපි ළඟදීම අත ගහනවා. එය, ලෝක වෙළෙඳපොළේ හොඳ ඉල්ලුමක් තිබෙන දූරියන් විශේෂයක්. නමුත් අපට තිබෙන ගැටලු තමයි ඉඩම් සොයාගැනීම, අවශ්‍ය ජලය නැතිකම. අමාරුවෙන් වගාකර ඵල නෙළා ගත්තත් ලෝක වෙළෙඳපොළ දක්වා යන ගමනේදී අදාළ රාජ්‍ය ආයතන මඟින් සහය නොලැබීම. රජයේ නීතිමය ක්‍රියා පටිපාටිවලදී මීට වඩා සහායක් ව්‍යවසායකයන්ට අවශ්‍යයි.” සභාපතිවරයා පවසන්නේ සිය ප්‍රාෙයා්ගික ගැටලු පිළිබඳ.
සභාපති නානායක්කාර මහතා සේම, සමාගමේ සාමාන්‍යාධිකාරි කපිල රාජපක්ෂ මහතා ද මේ දුෂ්කර කටයුත්තේ කොටස්කරුවෙකි.
“ඇත්තටම මේවා කාගෙවත් අවධානයක් නොලැබෙන, ඉතාමත් අමාරුවෙන් කරගෙන යන සැඟවුණු ව්‍යාපෘති. මේ තොරතුරු සමාජයට යා යුතුයි. තේ, රබර්, පොල්වලින් විතරක් නෙවෙයි දැන් අඹවලිනුත් රටට හොඳ ආදායමක් ගේන්න පුළුවන්. ඒ වගේම තව තවත් රැකියා උත්පාදනය කරන්න පුළුවන්. අවශ්‍ය වන්නේ මෙවැනි දුෂ්කර කාර්යයන්ට අත ගසා තිබෙන ව්‍යවසායකයන් වෙනුවෙන් නිසි රාජ්‍ය ප්‍රතිපත්ති සැකසීම පමණයි.”
මෙවැනි ව්‍යවසායකයන් දිරිගන්වන්නේ නම්, කිසිවකුගේත් ඇස නොගැටුණු කටුක ගම්මානවල දිවි ගෙවෙන මිනිසුන්ගේ ආර්ථිකය, ඔවුන් හරහා තව තවත් ගොඩනැගෙනු ඇත. විශාල වශයෙන් අපනයන ආදායම් රටට ගලා එනු ඇත. අති දුෂ්කර වියළි කලාපයේ මෙවැනි පළාත්, කොළ පැහැ අඹ රුක් ගොමුවලින් බබළනු ඇත.
ඡායාරූප - මංජුල පෙරේ‍රා
