රට තුළ තිබෙන්නේ කලබැගැනි තත්වයක් කියලා බොහෝ දෙනා කියනවා. ඇයි ඒ?
මම හිතන විදියට නම් එහෙම කලබැගැනියක් නැහැ. එක එක්කෙනා තමන්ගේ දේශපාලන පක්ෂ තුළ ඇති අස්ථාවරභාවය රැක ගැනීමට උත්සහ කරනවා. මේ තුළින් යම් යම් පාර්ශ්වයන් රට අස්ථාවර බව මෙන් ම ප්‍රශ්න තිබෙන බව ඒත්තු කරනවා. මේවා රටේ ප්‍රශ්න විදියට නොවෙයි දැකිය යුත්තේ ඒ ඒ පක්ෂයේ ප්‍රශ්න හැටියටයි.
ශ්‍රී ලංකා නිදහස් පක්ෂයෙන් ජනාධිපති අපේක්ෂයා ලෙස පාර්ලිමේන්තු මන්ත්‍රි කුමාර වෙල්ගම මහතා නම් කරන බවට අද මාධ්‍ය වාර්තාවල සඳහන් වෙනවා. මෙහි සත්‍යතාවයක් තිබෙනවාද?
මගේ පෞද්ගලික තොරතුරුවලිනුත් පක්ෂයේ තොරතුරුවලිනුත් මෙවැනි නම් කිරීමක් පිළිබඳව තොරතුරු නම් කොහෙත්ම නැහැ. අනික පක්ෂය මේ පිළිබඳව සාකච්ඡාවක් සිදු කරලත් නැහැ මෙතෙක්.
හැබැයි ශ්‍රී ලංකා නිදහස් පක්ෂයේ මධ්‍යම කාරක සභාවෙන් යෝජනාවක් කර තිබෙනවා ශ්‍රී ලංකා නිදහස් පක්ෂයෙන් අපේක්ෂකයෙක් ජනාධිපතිවරණයට ඉල්ලන්න කියලා.
ඒ වගේ ම පාර්ලිමේන්තු මන්ත්‍රී කණ්ඩායම ජනාධිපති මෛත්‍රිපාල සිරිසේන මහතාගෙන් ඉල්ලීමක් කර තිබෙනවා නැවත ජනාධිපතිවරණයට ඉල්ලන්න කියලා. මේ ඇරෙන්න පක්ෂය ඇතුළේ වෙනත් යෝජනා පිළිබඳව සාකච්ඡා කර නැහැ.
ශ්‍රී ලංකා නිදහස් පක්ෂය ජනාධිපතිවරණ අපේක්ෂකෙයකු ඉදිරිපත් කරන්න බලාපොරොත්තු වන්නේ නැද්ද?
ඇත්තට ම අප එවැනි තීරණයක මෙතෙක් නැහැ. හැබැයි අවශ්‍ය වුවහොත් ශ්‍රීලනිපයටත් ජනාධිපති අපේක්ෂකයෙකු ඉදිරිපත් කරන්නට හැකියාව තිබෙනවා. ඒ වෙන කිසිවෙකු නොවෙයි වර්තමාන ජනාධිපති මෛත්‍රිපාල සිරිසේන මහතායි. ඔහුට ඒ සඳහා සුදුසුකම් සියල්ල ම තිබෙන බව අපගේ මතයයි.
පොදුජන පෙරමුණ සහ ශ්‍රී ලංකා නිදහස් පක්ෂය අතර සන්ධානගත වීම දිනෙන් දින කල් යනවා. ඇයි එහෙම වෙන්නේ?
මේ සාකච්ඡා කරන්නේ ඇත්තට ම එකට හිටපු පාර්ශ්වයන් දෙකක්. දේශපාලන මත ගැටුම් ඉවත ලා එක රාමුවකට එකතු වීම තමයි සිදු විය යුත්තේ. ගම් මට්ටමින් මතයක් තිබෙනවා. මේ දෙපාර්ශ්වය එකතු වීම තුළ මැතිවරණ පහසුවෙන් ජයග්‍රහණය කළ හැකියි කියලා.
පොහොට්ටුව සාකච්ඡා අවසන් වීමට පෙර ඔවුන්ගේ පක්ෂයෙන් ජනාධිපති අපේක්ෂකයකු නම් කර තිබෙනවා. ඒ ගෝඨාභය රාජපක්ෂ මහතායි. මේ සමඟම සාකච්ඡෘ ආපස්සට ගිය නමුත් බිම් මට්ටමින් අපට ප්‍රකාශ කරනවා. මේ සාකච්ඡා නැවත ආරම්භ කරන්න කියලා. ඒ අනුව ඉදිරියේදි මෙම සාකච්ඡා නැවත ආරම්භ කරලා එහි ඵලදායිතාවය මත අපි තීරණය කරනවා ඉදිරි දේශපාලන ගමන පිළිබඳව.
කොහොම වුණත් දෙපාර්ශ්වයේ ම ගෞරවය රැක ගන්න විදියට දෙපාර්ශ්වයේ ම බිම් මට්ටමේ දේශපාලන සහයෝගය රැකෙන විදියට ජයග්‍රහණයක් ලබාගත හැකි අයුරින් මෙම සාකච්ඡා අවසන් කරන්නට හැකි වනු ඇතැයි අප බලාපොරොත්තු වෙනවා.
පොදුජන පෙරමුණ විසින් ඔවුන්ගේ ජනාධිපති අපේක්ෂයා ලෙස හිටපු ආරක්ෂක ලේකම් ගෝඨාභය රාජපක්ෂ මහතා නම් කර තිබෙනවා. ඔහු ජයග්‍රහණය කරයි කියලා ඔබ හිතනවාද?
ඇත්තට ම ඒ තීරණය හරිද වැරදිද කියලා අපට කියන්න බැහැ. පොදුජන පෙරමුණ ඔවුන්ගේ අපේක්ෂකයා නම් කර තිබෙනවා.
අපිට කියන්න පුළුවන් පක්ෂ දෙක එකතු වෙනවාද නැද්ද යන්න පිළිබඳව විතරයි. පක්ෂ දෙක එකතු වුණාම ඉදිරිපත් කරන නායකයා සුදුසු ද ඔවුන්ගේ ප්‍රතිපත්ති කවරේද යන්න පිළිබඳවත් අපි සැලකිලිමත් වෙනවා.
අප සන්ධානගත වෙලා රටට යහපත් හොඳ වැඩක් කිරීමටයි කටයුතු කළ යුත්තේ. කලින් ආණ්ඩුව සියයට අනූවක් හොඳ වැඩ කළා. සියයට දහයක් නරක වැඩ කරන්නට ඇති. අන්න ඒ නරක වැඩ නිසා ජනතාව ඒ ආණ්ඩුව ගෙදර ඇරියා.
වර්තමාන ආණ්ඩුවට තිබෙන චෝදනාව සියයට දහයක් ෙහාඳයි සියයට අනූවක් වැරදියි කියලා ජනතාව කියනවා. ජනතාව හිතන්නේ ඒ විදියට. ඒ නිසා අප රටට ඵලදායි වැඩක් සිදු කරන සන්ධානයකට අප එකතු වී ඒවා ක්‍රියාත්මක කළ යුතුයි.
සජිත් ප්‍රේමදාස ඇමතිවරයා අගමැතිවරයා හැටියට පත්කරන බවට සමාජ මාධ්‍ය ඇතුළු මාධ්‍ය කිහිපයක ප්‍රචාරය වෙනවා. මෙහෙම කළ හැකිද? මෙය සත්‍යයක්ද?
වර්තමාන අගමැති රනිල් වික්‍රමසිංහ මහතාට බහුතර කැමැත්ත තිබෙන බව පවසා වර්තමාන රජය එක්සත් ජාතික පෙරමුණ විසින් පිහිටුවා ගනු ලැබුවා.
මේ වන විට එම පක්ෂය තුළ අභ්‍යන්තර අර්බුදය ඇතිවෙලා තිබෙනවා. එය මේ වන විට දැඩි ලෙස වර්ධනය වී තිබෙනවා.
මේ නිසා එක්සත් ජාතික පක්ෂයේ මන්ත්‍රී කණ්ඩායම ජනාධිපතිවරයාගෙන් ඉල්ලුවහොත් වෙනත් අයෙකු අගමැතිවරයකු ලෙස පත් කරන ලෙසට ජනාධිපතිවරයාට නව අගමැතිවරයකු පත් කිරීමට සිදු වෙනවා. එය සජිත් ද වෙනත් අයෙකු ද යන්න කියන්නට බැහැ. ජනාධිපතිවරයාට මේ ගැන ක්‍රියා කිරීමට සිදුවන්නේ ආණ්ඩුවක් ගෙන යාමට අගමැතිවරයකු අවශ්‍ය නිසයි. මෙය එක්සත් ජාතික පක්ෂයේ අර්බුදය නිසා නොවෙයි රට ඉදිරියට ගෙන යාමට ජනාධිපතිවරයාට අගමැතිවරයකු ප්‍රමුඛ රජයක් අවශ්‍ය වන නිසායි.
ජනාධිපතිවරණය සඳහා ජනතා විමුක්ති පෙරමුණ මේ වන විට අපේක්ෂකයෙකු නම් කර තිබෙනවා. ඒ පක්ෂයේ නායක අනුර කුමාර දිසානයක මහතා. ඔබ හිතනවාද මොහු ජනාධිපතිවරණය ජයග්‍රහණය කරාවි කියා?
ජනතා විමුක්ති පෙරමුණ අපේක්ෂකයකු නම් කර ඉතා හොඳ රැලියක් පැවැත්වුවා. එය ඉතා ශක්තිමත් ජනරැලියක් ලෙසත් පෙන්වා දිය හැකියි. ඒ වගේම මෙවර ජනාධිපතිවරණයට තවත් අපේක්ෂකයන් කිහිපදෙනෙකු ම ඉදිරිපත් වෙනවා. මේක හොඳ තත්ත්වයක්. හොඳ ප්‍රණතාවක්.
