තරුණ-තරුණියන්ට රට පිළිබඳ තීන්දු-තීරණ ගත හැකි දැනුම පදනම් කරගත් ආර්ථිකයක් සහ පෞරුෂයක් සහිත නවීන ශ්රී ලංකාවක් එක්සත් ජාතික පක්ෂය ප්රමුඛ සන්ධානය මඟින් ඉදිරියේදී බිහි වනු ඇති බව නිවාස සහ ඉදිකිරීම් හා සංස්කෘතික කටයුතු පිළිබඳ අමාත්ය සජිත් ප්රේමදාස මහතා ප්රකාශ කළේය.
ඔහු මේ ලෙස පැවසූයේ පසුගිය සිකුරාදා (23) මාතර සනත් ජයසූරිය ක්රීඩාංගණයේ පැවති ජන රැලියක් අමතමිනි.
රැස්ව සිටි පිරිස අමතමින් ඒ මහතා මෙසේද කියා සිටියේය: “අපට ඕනෑ කරන්නේ ආර්ථික වර්ධනයේ ප්රතිලාභ නගරයේ මෙන්ම ගමේ ජීවත් වන ජනතාවගේ පසුම්බියටත් වැටෙන ආර්ථිකයක්; ලෝකයේ දියුණු වෙමින් පවතින රටවල් සමඟ තරග කළ හැකි දැනුම් හැකියාවන් සහිත ආර්ථිකයක්. ඒ සඳහා දත්ත මත පදනම් වූ ආර්ථිකයක් බිහි කළ යුතුයි. ඒ සඳහා ගමේ ශක්තියද ලබාගත යුතුයි. නීතිය, යුක්තිය නිසි ලෙස ක්රියාත්මක වන රටක් අප බිහි කළ යුතුයි. මේ සඳහා සියලු පාර්ශ්ව ඒකරාශී කරගැනීමේ ශක්තිය එක්සත් ජාතික පක්ෂය සතුයි."
ඊළඟ ජනාධිපතිවරණයේදී, වසර 25කට පසු එක්සත් ජාතික පක්ෂයේ ජනාධිපතිවරයකු පත් කරන බවත්, ඒ සඳහා මේ වන විට මුළු පක්ෂයම පෙළගැසෙමින් සිටින බවත් මෙහිදී අදහස් දැක්වූ මුදල් අමාත්ය මංගල සමරවීර මහතා පැවසීය. ඉදිරි දින කිහිපය තුළ එක්සත් ජාතික පක්ෂයේ නායක අග්රමාත්ය රනිල් වික්රමසිංහ මහතාගේ යෝජනාවෙන් සහ නියෝජ්ය නායක කරූ ජයසූරිය මහතාගේ ස්ථිරත්වයෙන් එක්සත් ජාතික පක්ෂයේ ජනාධිපති අපේක්ෂකයා ලෙස සජිත් ප්රේමදාස මහතා ජනාධිපති අපේක්ෂකයා ලෙස තෝරා ගන්නා බවද ඇමැතිවරයා මෙහිදී කීවේය. වසර 30කට පසු මාතරදී තමා දුටු වැඩිම ජන සහභාගිත්වයක් සහිත දේශපාලන රැලිය මෙය බව සඳහන් කළ මංගල සමරවීර මහතා; රාජපක්ෂ පවුලේ වහල්වාදි පාලනය අවසන් කළ හැකි එකම නායකයා සජිත් ප්රේමදාස මහතා බව තමා විශ්වාස කරන බවද, මුදල් අමාත්යවරයා ලෙස තමා කිසිදු වංචාවක් දූෂණයක් නැති, උපරිම වශයෙන් වැඩ කරන සජිත් ප්රෙමදාස මහතාගේ අමාත්යංශයට කිසිදු බියක් සැකක් නැතිව මුදල් වෙන් කරන බවද ප්රකාශ කළේය.
මේ රැලියේදී හරීන් ප්රනාන්දු, බුද්ධික පතිරණ යන අමාත්යවරුන් ඇතුළු ජනතා නියෝජිතයෝ රැසක් අදහස් දැක්වූහ.