නුවර පළාතෙන් බිහි වූ ප්රථම බටහිර වෛද්යවරයකු වූ ටිකිරි බණ්ඩා කොබ්බෑකඩුව, සංඝමිත්තා දූල්ලෑව කුමාරිහාමි දම්පතීන්ට දාව 1916 අගෝස්තු 27 දින දෙල්දෙණියේදී 'හෙක්ටර් සෙනරත් රාජකරුණා බණ්ඩාර කොබ්බෑකඩුව' මෙලොව එළිය දුටුවේය. ත්රිත්ව විද්යාලයෙන් මූලික අධ්යාපනය ලබා, කොළඹ විශ්වවිද්යාලයෙන් හා නීති විද්යාලයෙන් ඉහළ අධ්යාපනය සපුරා, නීතිඥ වෘත්තියෙහි යෙදෙන කාලයේ දිළිඳු ගොවීන්ගේ ඉඩම් නඩුවලට නොමිලේ පෙනී සිටීමෙන් හේ තුරුණු වියේදීම තම මානව දයාව ප්රදර්ශනය කළේය.
1952දී මහනුවර නගර සභාවේ අම්පිටිය අසුනට ස්වාධීන අපේක්ෂකයකු ලෙස ඉදිරිපත් වූ හෙක්ටර් එහිදී තියුණු තරගයකින් ජයග්රහණය කර දේශපාලන ක්ෂේත්රයට අත්පොත් තැබුවේය. 1956 මහමැතිවරණයේදී මහනුවර අසුනට තරග කරන ලෙස බණ්ඩාරනායක මහතා කළ ඉල්ලීම භාර නොගෙන, එවකට හේවාහැට ආදායම් පාලක ලෙස කටයුතු කළ පියසේන තෙන්නකෝන් මහතා එයට වඩාත් සුදුසුබව පැවසූ හෙක්ටර් ඒ අවස්ථාව ඔහුට දී ඔහුගේ ජය වෙනුවෙන් ක්රියා කළේය. පසුව 1960 සහ 1965 මහමැතිවරණවලට ඉදිරිපත්ව සුළු ඡන්ද සංඛ්යාවලින් පරාජයට පත් කොබ්බෑකඩුව මහතා 1961දී රාජ්ය සේවා කොමිෂන් සභාවේ සාමාජිකයකු ලෙස කටයුතු කළ අතර 1963දී රාජ්ය සේවා කොමිෂන් සභාවේ සභාපති ධුරයට පත් වූයේය.
1970දී යටිනුවර ආසනය ජයග්රහණය කළ හෙක්ටර් කොබ්බෑකඩුව මහතා සමගි පෙරමුණු රජයේ කෘෂිකර්ම හා ඉඩම් ඇමැති ධුරයට පත් වූයේය. මෙහිදී ඔහු තම ඉඩම් පවා ජනතා සන්තක වන පරිදි දැඩි උත්සාහයෙන් යුතුව ඉඩම් ප්රතිසංස්කරණ පනත සම්මත කරගත්තේය. මෙමඟින් අක්කර දසලක්ෂයටත් අධික ඉඩම් ප්රමාණයක් රජයට පවරාගැනුණු අතර, එයින් අක්කර ලක්ෂ 7ක් පමණ බිම් අඟලක් නැති අහිංසක ජනතාවට බෙදා දී දිළිඳු බව තුරන් කරන අතරේම, දේශීය කෘෂි නිපැයුම ඉහළට ඔසවා තබනු ලැබීය. පවරාගැනුණු සෙසු ඉඩම් උඩරට වතු සංවර්ධන මණ්ඩලය, රාජ්ය වැවිලි සංස්ථාව, ජනතා වතු සංවර්ධන මණ්ඩලය, ජනාවාස කොමිෂන් සභාව වැනි ආයතනවලට පවරා, දේශීය කෘෂිභෝග නිෂ්පාදනය ඉහළ නැංවීමෙන් විදේශවලට ඇදීගිය මහා ධනස්කන්දය මෙරටට ඉතිරි කරගනු ලැබිණි. මේ ක්රියාදාමයෙන් උතුරේ මෙන්ම දකුණේද ගොවියාට ලැබුණේ ඉමහත් සහනයකි.
රටටත්, ජාතියටත් මෙබඳු සේවාවක් කළත් කොබ්බෑකඩුව මහතාට 1977 මහමැතිවරණයේදී තම අසුනද අහිමි විය. කෙසේ වෙතත් 1982 ජනාධිපතිවරණයට ශ්රීලනිපයෙන් ඉදිරිපත් කෙරුණේද කොබ්බෑකඩුව මහතාය. එහිදී යාපනය දිස්ත්රික්කයෙන් 50%කට අධික ඡන්ද සංඛ්යාවක් දිනාගත්තත් දකුණේ ජනතාව වෙතින් යළිත් ඔහුට අත්වූයේ පරාජයකි. ඒ තිබියේවා: ඡන්ද පොළට යන විට ඔහුගේ ඡන්දයද අන් කවරකු විසින් හෝ ප්රකාශ කර තිබිණි!
රටට කොපමණ සේවාවක් කළ දේශප්රේමියකු වුවද හෙක්ටර් කොබ්බෑකඩුව මැතිතුමාට තම ජීවිතයේ අවසන් භාගය ගත කිරීමට සිදු වූයේ සිතේ සැනැසිල්ලෙන් නම් නොවේ. 82 ජනපතිවරණයෙන් පසු විවිධ චෝදනා යටතේ අවස්ථා කිහිපයකදීම ප්රශ්න කිරීම්වලට මුහුණ දීමට සිදු වූ හෙයින් චිත්ත පීඩාවෙන් යුතුව කල් ගෙවූ හෙතෙම 1983 සැප්තැම්බර් 18 දින සදහටම දෙනෙත් පියාගත්තේය. ඔහු විසින් මෙරට කෘෂිකර්මාන්තයට කරන ලද අනුපම මෙහෙවර සමරනු වස් 1995දී ගොවි කටයුතු පර්යේෂණ හා පුහුණු ආයතනය 'හෙක්ටර් කොබ්බෑකඩුව ගොවි කටයුතු පර්යේෂණ හා පුහුණු ආයතනය' ලෙස නම් කරනු ලැබිණි.
එතුමන්ගේ වියෝවෙන් 36 වසක් සපිරීම නිමිත්තෙන් යටිනුවර කොබ්බෑකඩුව ගුණ සමරු කමිටුවේ අනුශාසක මොරගොල්ලේ ජිනරතන හිමිගේ අනුශාසකත්වයෙන්, නීතිඥ ඩී. කරුණාරත්න, මධ්යම පළාත් සභා මන්ත්රී ඒ.පී. සිරිසේන මහත්වරුන්ගේ මූලිකත්වයෙන්, මහාචාර්ය රෝහණ ලක්ෂ්මන් පියදාස මහතාගේ සහභාගිත්වයෙන් ඌරාපොළ ශ්රී අභයරාජ පිරිවෙන් විහාරස්ථානයේදී 14 (සෙනසුරාදා) සවස 2.00ට ගුණසමරු උත්සවයක් හා සවස 6.00ට යටිනුවර මැදපළාත වි.සේ.ස. සමිති සංගම් ශාලාවේදී පිරිත් දේශනාවක් පවත්වා, 15 (ඉරිදා) දහවල් සංඝගත දක්ෂිණාවක් සිදු කිරීමට කටයුතු යොදා තිබේ.
පී.කේ. විමලරත්න