බන්ධනාගාර පුහුණු පාසලේ ප්‍රධාන ජේලර් රුවන් තිහාර ජයරත්න ඝාතනයේ උණුසුම පහව යන්නට මත්තෙන් ඇල්පිටියේදී මගී බස් රථයක ඉකුත් 06 වැනිදා පත්තු වුණු පාතාලයේ වෙඩිල්ල දකුණේ පාතාලය නැවත හිස ඔසවමින් ඇති බවට කදිම සාක්ෂියකි. එදා ඒ පත්තු වූ වෙඩිල්ලෙන් මරුමුවට පත්වන්නේ ඌරගහස්මන්හංදියේ වල්ඉඟුරු කැටියේ පදිංචිව සිටි රංජිත් ජයවර්ධන නමැත්තෙකි. අලුත්ගම සිට ඇල්පිටිය බලා ධාවනය වෙමින් තිබුණු මගී බස් රථයේ නැගී ඔහු ගමන් කරමින් සිටියේ ඇල්පිටිය අධිකරණයේ විභාග වන නඩුවකට පෙනී සිටින්නටය. ඒ ඉඩම් නඩුවකි. එදා ඔහු සමග බස් රථයේ සිය බිරියත්, මවත්, සහෝදරියත් ගමන් කරමින් සිටියේය. අටකෝට්ටේ පාලම ආසන්නයේදී ඔහුට වෙඩි පිට වෙඩි තබා මරා දමන්නේ ඒ අයගේ ඇස් පනාපිටදීමය.
ඝාතකයා කවුරුන්දැයි තවමත් පැහැදිලිවම හඳුනාගෙන නැතත් ඝාතනය සිදු වන්නේ සංවිධානාත්මකව බව නම් පැහැදිලිය. වෙඩික්කරු බස් රථයට ගොඩ වන්නේ එහි රංජිත් ජයවර්ධන සිටින බව හොඳාකාරවම දැනගෙනය. ඝාතකයා කල්යල් බලා සිය ඉලක්කය මි.මී. 9 වර්ගයේ ගිනි අවියකින් ලබාගන්නේ පළපුරුදු වෙඩික්කරුවෙකුගේ ලක්ෂණ පෙන්නුම් කරමිනි. වෙඩි කිහිපයම එල්ල කරන්නේ රංජිත්ගේ හිස මතටය. ඒත් එක්කම රංජිත්ගේ බිරිය, නැගණිය සහ මව ඇතුළු බස් රථයේ සිටි මගීන් කලබල වී භීතියෙන් කෑමොර දුන්නද වෙඩික්කරු එය එතරම් තැකීමක් කළේ නැත. බස් රථය නතර කරන තුරුම කලබලයකින් තොරව ඒ තුළම රැඳී සිටියේය. ඔහු පලා යන්නේ බස් රථය පිටුපසින් හඹා පැමිණි යතුරුපැදියක නැගීය.
මේ වෙඩික්කරුවා කවුරුන්දැයි මෙතෙක් හඳුනා නොගත්තද ඒ ඝාතනය පිටුපස ලියැවී ඇත්තේ ඝාතන වැලක කථාවකි. එය 2015 සිංහල අවුරුදු සමය දක්වා දිව යන්නකි. ඌරගස්මන්හංදියේ මාලවල ගම්මානයේ එවකට සිටි කැපී පෙනෙන චරිතයක් වූයේ බොස් සරත්ය. වැලි ගොඩදැමීමේ ව්‍යාපාරයේ නිරතව සිටි බොස් සරත්ට පොලීසියේ මෙන්ම දේශපාලනයේද හයිහත්තිය තිබුණේ නොඅඩුවය. ගමේගොඩේ පොදුවැඩවලදී මුල්තැන ගත්තේද ඔහුය. ඒ නිසාම ඔහු වටා කොල්ලොකුරුට්ටෝ රෑනක්ම රැඳී සිටියහ. ඒ අය අතර බොස් සරත්ගේ ළඟින්ම සිටියේ ඉන්දික මහේෂ්ය. බ්ලොක් ගල් නිෂ්පාදන වැඩපොළක් පවත්වාගෙන ගිය ඉන්දික ගමේ සිටි හයිරංකාරයෙකි. ඉන්දික ඒ තැනට වැටෙන්නේ ඕනෑවටත් වඩා සුදුසුකම් ඇතිව උප පොලිස් පරීක්ෂකවරයකු ලෙස පොලිස් සේවයට එක් වන්නට ගොස් දේශපාලන හයිය නැතිවූ තැන විසි වූ බැවිනි. ගම්වැසියන් පවසන ආකාරයට ඉන්දිකගේ නහරයක් වැඩි වන්නේ බොස් සරත් සමග ඔහු එක්වීමත් සමගය. ඔහු තමා සමග එකට පාසල් ගිය මිතුරන්ට පවා සිය හයිය පෙන්නන්න ගත්තේය. එහි ප්‍රතිඵලය වන්නේ ගමේ තරුණයන් කණ්ඩායම් දෙකට බෙදීමය. එහෙත් මේ බෙදිල්ල ඝාතන වැලක ආරම්භයක් වනු ඇතැයි ගම්වැසියන් සිහිනෙකින්වත් සිතුවේ නැත.
ඝාතන වැලක ආරම්භය
එදා 2015 අප්‍රේල් 16 වැනිදාය. අලුත් අවුරුදු උදාව සමරමින් ගමේ අලුත් අවුරුදු උත්සවය පැවැත්වෙන්නේ එදාය. මුළු ගමම එදා රැස්ව සිටියේ නුගුඩුමුල්ල අවුරුදු උත්සව භුමියටය. එහි සිටි තරුණයකු විසින් දල්වා විසි කරන ලද රතිඤ්ඤයක් පුපුරා යන්නේ ඉන්දික මහේෂ්ගේ දෙපා මුල වැටීය. එදා ඒ රතිඤ්ඤාව දැල්වූ තරුණයා සමන් සුරේෂ්ය. ඔහු නියෝජනය කළේ ඉන්දිකට එරෙහි පාර්ශ්වයයි. ඒ බව දැන සිටි ඉන්දික සිතන්නේ රතිඤ්ඤා කරල තම දෙපාමුලට විසිකරන්නට ඇත්තේ හිතාමතාම බවකි. ඒත් එක්කම ඉන්දික සහ සුරේෂ් අතර ඇතිවන ඇනකොටාගැනීම් වැඩි කල් නොගොස් පත්වන්නේ නයි-මුගටි වෛරයක් බවටය. මේ වෛරය පුපුරා යන්නේ 2015 නොවැම්බර් 3 දාය. ඒ සුරේෂ්ගේ බාල සහෝදරයා සහ ඔහුගේ මිතුරකු එක තැන මරාදමමිනි.
සිය සහෝදරයාගේ ඝාතනය සුරේෂ්ගේ හදවත තදින්ම දැනුණේය. ඉන්දිකගෙන් පළි ගන්නට සිතුවත් බොස් සරත් හරහා ඇති හයිය නිසා ඉන්දිකට අතක්වත් තියන්නට බැරි බව හොඳාකාරවම සුරේෂ් දැන සිටියේය. ඒ නිසාම ඔහු කිට්ටු වන්නේ කොස්ගොඩ සුජීගේ කල්ලියටය. ඒ සංචාරක මග පෙන්වන්නකු වූ සිය ඥාති සහෝදරයකු වන චමිල දීපාල් හරහාය. කොස්ගොඩ සුජීගේ කල්ලිය සමග චමිල දීපාල්ට සම්බන්ධකම් ඇත්තේ සුජීගේ කල්ලියේ ප්‍රබලයකු වන මයිකල් සමග ඇති ඥාති සම්බන්ධය නිසාය. මයිකල්ට ඌරගහේ බොහෝ අය සමග ඥාති සම්බන්ධකම් පැවැතුණි. සුජීගේ අවි ආයුධ මෙන්ම වෙඩික්කරුවන්ට ආරක්ෂාව දුන්නේද මයිකල්ය. සුජීගේ අභිරහස් වෙඩික්කරුවකු වූ එල්ටීටීඊයේ හිටපු සාමාජිකයකුද වූ බුම්මා නොහොත් කෙනඩි නමැත්තාව සඟවාගෙන සිටියේද මයිකල්ය. සුජීගේ නියෝගවලට අනුව බුම්මා යොදාගෙන මයිකල් විසින් කළ ඝාතන මෙහෙයවීම් ගණන බොහෝය. නඩු කටයුත්තකට පෙනී සිටීමට පැමිණි පාතාලයේ ප්‍රබලයකු වන පියරත්න සමග දෙදෙනකුට බලපිටිය අධිකරණය ඉදිරිපිටදී 2016 වසරේ පෙබරවාරි 16 දා වෙඩි තබා මරාදැමීමද ඒ අතර වේ.
සිය සහෝදරයා ඝාතනය කළ අයගෙන් පළි ගැනීමට සුරේෂ්, සුජීගෙන් උපකාර පතන විට ඔහු සිටින්නේ බන්ධනාගාරගතවය. ඒ 2011 වසරේදී හික්කඩුවේ පිහිටි අරලිය හෝටලයේදී යසරත්න නමැති කෝටිපති ව්‍යාපාරිකයා ඝාතනය කිරීම ඇතුළු ඝාතන රැසකට සැකපිටය.
යසරත්න ඝාතනය
සුජී, යසරත්න ඝාතනය කරන්නේ තනිවම නොව, සිය ගෝලබාලයන් වූ මයිකල් සහ බොස්සා සමග එක්වය. ඒ 2011 පෙබරවාරි 4 දාය. යසරත්න ඝාතනයට මයිකල් සහ නිලන්ත පොලිස් අත්අඩංගුවට පත් වන විට සුජී සිටින්නේ සිංගප්පූරුවේය. ඒ ව්‍යාජ විදෙස් ගමන් බලපත්‍රයකින් සිංගප්පූරුවට පලා ගොසිනි. වැඩි කල් ඔහුට සිංගප්පූරුවේ රැඳී සිටින්නට ඉඩක් නොවීය. මෙරටට පිටුවහල් කරන්නේ අසාදුගත කරමිනි. එදා ඔහු කටුනායක ගුවන් තොටින් රට තුළට පැන ගන්නේ ආරක්ෂක මුරකපොලුවලට හසුනොවී අමුතුම ආකාරයේ ගේමක් ගසමිනි. අනතුරුව ඔහු පනින්නේ ඉන්දියාවටය. ඉන්දියාවේ සිට ඔහු ගේම් ගැසුවේ මයිකල් හරහාය. වැඩිකල් සුජීට මයිකල් යොදා ගේම් ගසන්න ඉඩක් නොවීය. මයිකල් ත්‍රස්ත විමර්ශන කොට්ඨාසයට කොටු වන්නේ දකුණේ සිදු වුණු අභිරහස් ඝාතන රැසකට සැකපිටය. ප්‍රශ්න කිරීම් හමුවේ ඔහු සුජී ගැන තොරතුරු වැමෑරුවේය. ඉන්දියාවේ සැඟවෙමින් නිදහසේ අපරාධ මෙහෙයවූ සුජී 2012 ඔක්තෝබර 29 දා ඉන්දියාවේදී අත්අඩංගුවට පත්වන්නේ ඒ අනුවය.
බොස් සරත් ඝාතනය
ඒ වන විට ඌරගස්මන්හංදියේ බලය ඇල්ලීමට සුජීට තිබුණු ලොකුම බාධකය වූයේ බොස් සරත්ය. මයිකල් හරහා තමන්ගේ සහාය ඉල්ලූ සමන් සුරේෂ් මගින් සුජී සැලසුම් කරන්නේ එක ගලෙන් කුරුල්ලන් දෙදෙනකුම දඩයම් කිරීමටය. ඒ වන විටත් ඉන්දික සිටින්නේ සුරේෂ්ගේ සහෝදරයාත් මිතුරාත් මරාදැමූවාට සැකපිට පොලිස් අත්අඩංගුවට පත්ව බන්ධනාගාරගතවය. ඉන්දිකගේ බලය බිඳීමට නම් බොස් සරත්ට වැඩක් දිය යුතු බව සුරේෂ්ට ඒත්තු ගන්වන්නට සුජී වගබලාගත්තේය. සිය සහෝදරයාගේ මරණින් වියරුවැටී සිටි සුරේෂ් හරියටම ඒ ඝාතනයෙන් මසක් ඉක්ම යන දින බොස් සරත් මරාදමන්නේ සුජීගේ හයියද ඇතිවය. මාලෙවෙල ප්‍රධාන මාර්ගයේදී වෙඩි තබා බොස් සරත්ව මරාදැමූ සුරේෂ් ඔහුගේ හිස කඳින් වෙන් කර රැගෙන ගොස් තබන්නේ ඉහළ මාලවල රන්තොටුවිල සමුපකාරය ආසන්නයේය.
බොස් සරත්ගේ ඝාතනයත් සමග බන්ධනාගාරගතව සිටි ඉන්දිකටද මරණ බිය දැනෙන්න ගත්තේය. මෙහිදී ඔහු හේත්තු වන්නේ සුජීගේ ප්‍රතිවාදියා වූ මාකඳුරේ මධුෂ්ටය. ඒ බන්ධනාගාරගතව සිටි මධුෂ්ගේ ගෝලයකු වන කොස්ගොඩ රණා මාර්ගයෙනි.
ඉන්දික බන්ධනාගාරයෙන් එළියට එන්නේ මධුෂ්ගේ ගෝලබාලයන් රැසක් සමග ඉතා කිට්ටු සම්බන්ධකම් ගොඩනගාගෙනය. ඒ අතර කොස්ගොඩ තාරකද සිටියේය. පසුගිය වසරේ ජූලි 22 දා සිදුවුණු මාතර නිලේකා ජුවලරි කොල්ලයටද ඉන්දික සම්බනධ වූ අතර, ඒ කොල්ලය සැලසුම් කරන්නේ තාරකය. ඉන්දික එසේ දකුණේ ප්‍රබල පාතාල අපරාධකරුවන් සමග එක්ව මිනිස් ඝාතන ඇතුළු අපරාධවල නිරත වෙමින් බලය ගොඩනගාගනිමින් සිටියදී සුජීගේ අඩිපාරේ යමින් සුරේෂ්ද සිටියේ බලවත් වෙමිනි. සුරේෂ් මාන බලමින් සිටියේ ඉන්දිකට වැඩක් දෙන්නටය. ඉන්දික මාන බැලුවේ සුරේෂ්ට වැඩක් දෙන්නටය. ඉස්සර වන්නේ ඉන්දිකය. ඒ පසුගිය වසරේ නොවැම්බර් 30 දාය. එදා මහා වැසි දිනයකි. සුරේෂ්ගේ පවුලේ උදවිය සවස 6-7 වන විට අසල නිවෙසකට ගොස් සිටියහ. සිය ඥාති සහෝදරයා වූ චමිල දීපාල් සමග සුරේෂ් රැඳී සිටියේ නිවෙස ඉදිරිපිට ඇති කුරුඳු වාඩියේය. මහා වැසි මැද වාඩියට කඩාවදින්නේ ඉන්දිකය. ඒ තනිවම නොව, ගෝලබාලයන් කිහිප දෙනකු සමගිනි. සුරේෂ්ටත් චමිලටත් කිසිවක් සිතාගන්නවත් ඉඩ නොතබමින් වෙඩි වර්ෂාවක්ම ඔවුන් වෙත මුදා හැරිණි.
මේ ද්විත්ව ඝාතනයෙන් පසු පොලීසියෙන් බේරීමට ඉන්දික පලා යන්නේ වව්නියාවටය. මාස කිහිපයක් වව්නියාවේ රැඳී සිටි ඔහු එතැනින් ඉන්දියාවට පැන්නේය. වැඩි කාලයක් ඔහු ඉන්දියාවේද රැඳී සිටියේ නැත. මාකඳුරේ මධුෂ්ගේ ආශීර්වාදයෙන් ඔහු ඩුබායි රටට පැන්නේය. දැන් ඔහු සිටින්නේ ඩුබායිවලය. ඉන්දික එසේ රටිනුත් පලාගොස් සැඟවී සිටින විට සුරේෂ් සහ චමිලගේ ඝාතනයට හවුල් වූවන්ට මරණ වරෙන්තුව නිකුත් කරන්නේ මයිකල්ය. ඒ වන විට මයිකල් සිටින්නේද ඩුබායිහිය. ඒ කොස්ගොඩ සුජී සමගිනි. සුජීගේ අනුදැනුම මත මයිකල් හොර පාරෙන් පසුගිය දිනවල මෙරටට පැමිණ ඇති බවට වූ විවිධ දූසමාන තොරතුරුද නැතුවාම නොවේ. එහි ඇත්ත නැත්ත මෙතෙක් තහවුරු වී නැතත් ඇල්පිටියේ මගී බස් රථය තුළ සිදුවූ ඝාතනයට නම කියැවෙන්නේ මයිකල්ගේය.
ඝාතකයා දැන් සුජීගේ තුරුලේ
බන්ධනාගාර පුහුණු පාසලේ ප්‍රධාන ජේලර් රුවන් තිහාර ජයරත්නගේ ඝාතකයා දැන් සිටින්නේ කොස්ගොඩ සුජීගේ තුරුලේය. ජේලර් ඝාතනයෙන් දින දෙකක් ඉක්ම යන විට ඔහු කටුනායක ගුවන්තොටින් ඩුබායි බලා පලා ගියේය. කොහුවලදී අවන්හල් හිමිකරුවකුට වෙඩි තබා ඝාතනය කළ ජම්බුගස්මුල්ලේ බබීද ඒ ඝාතනයෙන් පැය 24ක් ඉක්ම යන්නට මත්තෙන් පනින්නේ ඩුබායිවලටය. ඔහු පිළිගන්නේද කොස්ගොඩ සුජීය.
දැනගන්න ඇති ආකාරයට මෑතකදී ආන්දෝලනයට තුඩුදුන් මේ මිනිස් ඝාතන දෙකටම සුජීගේ ඍජු සම්බන්ධකම් ඇති බවක් නොපෙනේ. ඝාතන දෙකම සිදු වන්නේ සුජීගේ ගෝලයන්ගේ හිතුවක්කාරකම් නිසාය. ජේලර් රුවන් තිහාර ඝාතනය කරන්නට බන්ධනාගාරයේම දූෂිතයකුගේ අවශ්‍යතාවකට පොඩි ලැසීත්, කරන්දෙණියේ සුද්දාත් එක්ව සැලසුම්කරන බව දැනගත් මොහොතේම සුජී ඔවුන්ට අවවාදකර ඇතැයි කියැවෙන්නේ ඒ වැඩේ නොකරන ලෙසය.
එදා ඔවුන් සැලසුම්සහගතව සිය ගෝලබාලයන් යොදා ජේලර් රුවන්ට වෙඩි තබා ඝාතනය කරන්නේ සුජීගේ අණට පිටුපාමිනි. ඒ සුජීගේ නම විකුණමිනි. ජේලර් ඝාතනයට ඔවුන් යොදාගන්නේද රත්ගම පදිංචිව සිටි සුජීගේ කුලී ඝාතකයෙකි. බුද්ධි අංශ සඳහන් කරන ආකාරයට සුජී ඒ ඝාතකයා තමා වෙත ගෙන්වාගන්නේ ඒ නිසාය.
ජේලර් රුවන් ඝාතනය කරන්නේ ලැසීගේත් සුද්දාගෙත් වුවමනාවකට නොවන බව විමර්ශනවලින් මේ වන විටත් පැහැදිලිවම හෙළි වී හමාරය. ලැසී සහ සුද්දා ඒ සඳහා මෙහෙයවා ඇතැයි විමර්ශනවලින් පෙනී ගොස් ඇත්තේ ඔහු සමග වෛරයෙන් සිටි බන්ධනාගාරයේම අයකුගේ වුවමනාවකටය. ඒ පුද්ගලයා කවුරුන්දැයි විමර්ශකයන් දන්නාමුත් ඔහුව නීතිය හමුවට ගෙන ඒමට ලෙහෙසි පහසු නැත. ඒ ඔහුට එරෙහිව ඇති සාක්ෂි තවමත් ඇත්තේ අල්පයක් වන බැවිනි.
