දිනය - පසුගිය අගෝස්තු 29 වැනිදා
වේලාව - අලුයම 3 පමණ
ස්ථානය - නැඟෙනහිර පුල්මුඩේ මුහුදු ප්රදේශය
සැක කටයුතු යාත්රාවක් නැඟෙනහිර වෙරළට පැමිණෙන්න ඉඩ තිබෙන බවට නාවික හමුදාවට තොරතුරක් ලැබිණි. වහා ක්රියාත්මක වූ නාවික හමුදාව විසින් ඒ පිළිබඳ සොයා බැලීමට ඩෝරා යාත්රාවක් යෙදවිණි. මේ නාවික මෙහෙයුම සිදු වන අතර එක් සැක කටයුතු යාත්රාවක් නාවික පිරික්සුම් මඟහැර යන්නට උත්සාහ කරනු දුටු නාවික නිලධාරීහු ඒ යාත්රාවට නවත්වන ලෙස අණ කරන්නට වූහ. එහෙත් ඒ යාත්රාව ඒ අණ නොතකා පලා යන්නට විය. ඩෝරා යාත්රාව එය පසුපස යමින් අවවාදාත්මක වෙඩි ප්රහාර එල්ල කළේය. ඉන් පසු යාත්රාව නතර කරන ලද අතර, එය පිරික්සීමේදී ඔවුන් පළමුව පවසා ඇත්තේ ධීවර කටයුතු පිණිස මුහුදට ගිය බවයි. එහෙත් එහි දැල් හෝ වෙනත් කිසිදු ධීවර ආම්පන්නයක් නොතිබූ බැවින් නාවික නිලධාරීන් එය විශ්වාස කළේ නැත. තවදුරටත් පරීක්ෂා කිරීමේදී නාවික නිලධාරීන්ට එහි තිබූ අධික ඉන්ධන ප්රමාණය ගැනද සැකයක් ඇති විය. එමෙන්ම ඔවුන් සතුව රුපියල් 50,000ක මුදලක්ද විය.
යාත්රාවේ සිවුදෙනකු සිටි අතර ඔවුහු සියලු දෙනාම මුස්ලිම් ජාතිකයෝ වූහ. ඒ කිසිදු අයකු සතුව වලංගු ධීවර බලපත්රයක් හෝ යාත්රාවේ ලියාපදිංචි ලේඛනයක් තිබී නැත. අඩු තරමින් ජාතික හැඳුනුම්පත් පවා නොතිබිණි. ඔවුන්ගෙන් කරුණු විමසීමේදී නිසි තොරතුරු පැහැදිලි කරගැනීමට අසිරු වීම හේතුවෙන් සිවු දෙනාම අත්අඩංගුවට ගෙන යාත්රාවද සමඟ කුච්චවේලි පොලිස් ස්ථානයට ඉදිරිපත් කරන ලද අතර ඔවුන් ඍජුවම වරාය පොලිසියට ඔවුන් යොමු කෙරිණි. මේ සිදුවීම වන අවස්ථාවේදී එක් පුද්ගලයෙකුට තුවාල සිදුව ඇති අතර ඔහුට නාවික හමුදාවෙන් මූලික ප්රතිකාර දී තිබිණි.
කෙසේ වෙතත් පසුව මේ පුද්ගලයන් විසින් නාවික හමුදාව තමාට පහර දුන් බවට චෝදනා කරමින් ත්රිකුණාමලය වරාය පොලීසියෙහි පැමිණිල්ලක් සිදු කර තිබේ. දැනගන්නට ලැබෙන පරිදි ඒ පැමිණිල්ල සිදු කර ඇත්තේ සිදු වීමෙන් දින 10කට පමණ පසු - එනම් මෙමස 8 වැනිදාය. ඒ අනුව වරාය පොලීසිය මේ පැමිණිල්ල විභාගය සම්බන්ධයෙන් නාවික නිලධාරීන්ට ත්රිකුණාමලය පොලීසිය වෙත ඉදිරිපත් වන දැනුම් දී ඇති අතර, එහිදී ඩෝරා යාත්රාවේ සිටි නාවික හමුදා නිලධාරීන් දෙදෙනා සහ සෙබළුන් 10 දෙනාම කටඋත්තර ලබා දීමට වරාය පොලිසිය වෙත පැමිණ ඇත. ඒ පෙරවරු කාලයේය. එහෙත් පස්වරු 3.30 පමණ වන තුරු ඔවුන් රස්තියාදු කරමින් කටඋත්තර ලබා ගැනීම පමා කර තිබේ. පස්වරු 3.30ට පමණ කටඋත්තර ලබා ගෙන ඔවුන් මහේස්ත්රාත්වරයා වෙත යොමු කර ඇති අතර, ඒ අවස්ථාවේ මහේස්ත්රාත්වරයා ඔවුන් 12 දෙනාම ලබන මස 16 තෙක් රක්ෂිත බන්ධනාගාරගත කිරීමට නියෝග කර ඇත. පසුව නාවික හමුදාව විසින් පසුගිය 12 වැනිදා ඉදිරිපත් කරන ලද මෝසමකට අනුව ඔවුන් ඇප මත නිදහස් කරන ලදි.
මේ සිදුවීම පිළිබඳ විශේෂ විමර්ශනාත්මක අවධානයක් යොමු කළ යුතුය.
ධීවර හා නාවික අණ පනත් යටතේ මහ මුහුදේ ආරක්ෂක කටයුතුවල නියැළීමට නාවික හමුදාවට පූර්ණ බලයක් ඇත. ඕනෑම රටක ගොඩබිමේ සිට සැතපුම් 12ක් දක්වා වන ප්රදේශය එරටට අනිවාර්යෙන්ම අයත් වන අතර, නාවික හමුදාවට එහි පරීක්ෂා කිරීම්, අත්අඩංගුවට ගැනීම්, අණ නොතකා යන්නේ නම් වෙඩි තැබීම් සිදු කළ හැකිය.
විශේෂයෙන්ම මුහුදු සීමාවන්හි අනවසරයෙන් යාත්රා කරන සැක කටයුතු යාත්රා කෙරෙහි නාවික හමුදාව නිරතුරුවම අවධානය යොමු කර තිබේ. ඒ අවධානය නිසා පසුගිය දිනවල කේරළ ගංජා ගෙන ආ බෝට්ටු 100කට අධික සංඛ්යාවක් අත්අඩංගුවට ගෙන ඇත. අනවසර ධීවර කටයුතු කළ ඉන්දීය ධීවර යාත්රා රැසක් අත්අඩංගුවට ගෙන ඇත. එසේම තහනම් ආම්පන්න යොදා ධීවර කටයුතුවල නියැළුණු ධීවරයන්ද 100ක් පමණ අත්අඩංගුවට ගෙන ඇත. මීට අමතරව මත්කුඩු ඇතුළු බොහෝ නීතිවිරෝධී දේ අත්අඩංගුවට ගන්නට නාවික හමුදාව සමත් විය. ඒ සියලු දෙනා නීතිමය කටයුතු පිණිස පොලිස් ස්ථාන වෙත බාර දීමට කටයුතු කර තිබේ.
එසේ වුවත් කින්නියා, මූතුර්, කන්දල්කාඩු වැනි ප්රදේශවල මේ වන විට දැව ජාවාරම මෙන්ම වැලි ජාවාරමද සුවසේ සිදු කරන්නට එක් ජන කොට්ඨාසයකට පමණක් හැකිව තිබෙන්නේ ඒ වෙනුවෙන් ඔවුන්ට දේශපාලන හයිය ලැබී ඇති නිසා මෙන්ම සිවිල් නීතියද නිසි පරිදි ක්රියාත්මක නොවන නිසාය.
මුතූර්හි වසර සිය ගණනක් පැරණි චෛත්යයක් ඩෝසර කරදමන ලද්දේ ප්රාදේශීය ලේකම්වරයකුද බලා සිටියදීය. එමෙන්ම මඩකලපුවේ ද බෞද්ධ විහාරස්ථානයක් ඩෝසර් කර මිරිස් වැවීමක් පිළිබඳවද අපට වාර්තා වූයේ මාස කිහිපයකට පෙරදීය. කන්දක්කාඩුවේ මහවැලි ගගේ රක්ෂිත ගංගා අතුවල වැලි කියුබ් 30,000ත් 40,000ත් පමණ මසකට පටවාගෙන යන්නේද මේ දේශපාලන රැකවරණ මැදය. එසේම මඩකලපුවේ එරාවුර්හි පුණ්ණුකුඩාහි ඉඩම් ප්රතිසංස්කරණ කොමිසමට අයත් ඉඩම් බලහත්කාරයෙන් අල්ලාගෙන එහි ඉඩම් නිලධාරි ප්රවීන් රාජ් මහතා වෙඩි තබා ඝාතනයට උත්සාහ කළේද මේ අයුරින් යම් යම් ප්රබලයන්ගේ ආශීර්වාද ඇතිවය. පොලිසියට පැමිණිලි කළද කිසිදු පලක් නොවීය. එරාවුර්හි පොලීසියෙන් කිසිදු පැමිණිල්ලකට විසඳුම් ලැබුණේ නැත. පසුගිය සමයේ කාත්තන්කුඩි පොලිස් ස්ථානාධිපතිවරුන් තේරීම් කාරක සභාවට පැමිණ පිළිතුරු දුන් හැටි රටටම පෙනිණි.
මේ සියල්ලට මුදල් පොදි ඉස්සර වී ඇති බවට බොහෝ දෙනා අතර කතාබහ පැතිර ඇත. බයිසිකලයක්වත් නැතිව එන ඇතැම් පොලිස් ස්ථානාධිපතිවරුන් ගෙදර යන්නේ සුපිරි මෝටර් රථ ලබාගෙන බවද ඔවුහු පවසති. ඒ කතාවල ඇත්ත-නැත්ත කෙසේ වෙතත් සිවිල් නීතිය ක්රියාත්මක නොකිරීම ගැන අපට පැහැදිලිය. එසේ සිවිල් නීතිය ක්රියාත්මක වූවා නම් හිස්වැසුම් නැතිව කල්මුණේ හා අක්කරපත්තුවේ යතුරු පැදි යන්නේ නැත; බෞද්ධ විහාරස්ථාන එළිපිටම ඩෝසර් කර දමන්නේ නැත.
මේ සියලු කරුණු මෙන්ම 29දා සිදු වූ සිද්ධිය හා ගළපාගන්නා කල අපට පෙනී යන විශේෂ කරුණක්ද ඇත. ඒ 29දා පරීක්ෂාවේදී නාවික හමුදාව පහර දුන්නේ නම් දින 10ක් පමණ පසු වී ඒ සම්බන්ධයෙන් පැමිණිලි කරන්නේ මන්ද? එදිනම හෝ, අවම වශයෙන් ඔවුන් රෝහල්ගත වූයේ නම් දිනක් හෝ දෙකක් ඇතුළත ඒ ගැන පැමිණිලි කිරීමත්, විභාග කිරීමත් කරන්නට තිබිණි.
කවුරුන් විසින් හෝ චුදිතයන් පොලඹවා තිබීමත්, පොලීසිය නීතිය කුමන හෝ කරුණක් මත නවා දැමීමත් මෙහිදී සිදුව ඇති බවක් අනුමාන කළ හැකිය. උදෑසන ගෙන්වූ නාවික නිලධාරීන් පස්වරු 3.30 වන තුරු පොලීසියේ රඳවාගත්තේ ඇයිද යන්නද ගැටලුවකි. පොලීසිය 'බී' වාර්තාවක් ඉදිරිපත් කරමින් නාවික හමුදා පිරිස රිමාන්ඩ් කරන ලෙස ඉල්ලා ඇති බවටද අපට වාර්තා වේ. එනිසා මෙය යම්කිසි පිරිසක් විසින් පොලීසියේ නීතියද යම් හේතුවකින් තමන්ට අවශ්ය පරිදි සකස් කරගෙන ඇති බවක් පෙනේ.
මෙහිදී අප තවත් කරුණක් දෙස ඇස යොමු කළ යුතුය. එනම්: අත්අඩංගුවට ගත් සිව්දෙනා සම්බන්ධව පොලීසිය ගත් තීරණය කුමක්ද යන්න බවයි. ඔවුන්ට විරුද්ධව චෝදනා ගොනු කළේද, ඒ චෝදනා මොනවාද යන්න මෙහිලා සොයා බැලිය යුතුය. ඔවුන් ඉන්ධන රැගෙන ගියේ කුමන හේතුවක් මතද යන්න හා රුපියල් 50,000ක් මුහුදට රැගෙන ගියේ කුමක් පිණිසද යන්න මෙහිලා විමසා බැලිය යුතුය. ඒ කිසිවත් අධිකරණයට ගිය බවක් දැනට නම් දැනගන්න නැත.
මේ සම්බන්ධයෙන් පොලිස් මාධ්ය ප්රකාශක පොලිස් අධිකාරී රුවන් ගුණසේකර මහතාගෙන් විමසුවෙමු. පොලිස් මාධ්ය ප්රකාශක කාර්යාලයෙන් පවසා සිටියේ වරාය පොලීසියට බාර දුන් සැකකරුවන් පසුව පහර දුන් බව පැවසූ නිසා ඒ පැමිණිල්ලට අනුව පොලීසිය විසින් ක්රියා කර ඇති බවකි. මුහුදේදී අත්අඩංගුවට ගෙන පොලීසියට බාර දුන් සැකකරුවන් ඇප මත මුදා හැර ඇති බවද පොලිස් මාධ්ය ප්රකාශක කාර්යාලය ප්රකාශ පවසා සිටියේය. කෝකිලායි සිට මුහුදු රස්සාවට යන ධීවරයෝ රැසකි. ඒ මුවාවෙන් මත් කුඩු ගෙන්වන්නෝද සිටිති. මෙදින තමන් ලත් ඔත්තුවකට අනුව නාවික හමුදාව කටයුතු කර ඇති බව නාවික හමුදාව පවසයි.
2015 වසරේ අප්රේල් 20 දින ධීවර හා ජලජ සම්පත් දෙපාර්තමේන්තුවේ අධ්යක්ෂ ජනරාල් ක්රිස්ටි ලාල් ප්රනාන්දු මහතාගේ අස්සනින් යුතුව නාවික හමුදාපතිට ලිපියක් යොමු කරන්නේ මුහුදේ සිදු කළ යුතු ධීවර පරීක්ෂා පිළිබඳ සිහි ගන්වමිනි. එසේම 2015.03.26 අතිවිශේෂ ගැසට් නිවේදනය මඟින්ද ඒ බව යළිත් සිහිපත් කර තිබේ.
මේ කරුණු කෙසේ වුවත් නීතිය සැමට සාධාරණ විය යුතුය. කිසිවකුට තවෙකකුට පහර දීමට බලයක් නීතියෙන් නැත. එමෙන්ම පොලීසියේ නීතියද දොළපිදේනි අනුව නැවිය යුතු නොවේ.