අද පවතින තරගකාරි ධනේශ්වර සමාජයේ බොහෝ දෙනෙක් සිහින තුළ ඇලී ගැලී සිටිති. එකී සිහින යථාර්ථයක් බවට පත් කර ගැනීමට වෙර දරති. ඒ අතරවාරයේදී සොඳුරු සිහින 14 ක් උරුම කර ගත් සංවිධානයක් ගැන අපට අසන්නට ලැබුණේ අහම්බෙනි. මෙම සංවිධානය නම් කර තිබෙන්නේ. “සොඳුරු සිහිනයක උරුමය” යනුවෙනි. වෛද්‍යවරුන්, ඉංජිනේරුවරුන්, නීතිඥයන් වැනි වෘත්තිකයන්ගෙන් 2018 ජුලි 14 වැනි දින අනුරාධපුර රුවන්මැලි මහ සෑරදුන් අබියසදී “සොඳුරු සිහිනයක උරුමය” ආරම්භ කළේ සාමාජිකයන් පස් දෙනෙකුගෙනි. එහෙත් වසරක් ගත වන විට සාමාජික පිරිස 50 ක් වී සිටිති.
“අපේ රට අංශ කීපයකින් ම පරිහානිය කරා ළඟා වන බවත් අපට පෙනෙනවා. ගුණධර්ම අතින් පිරිහිලා. දරුවන්ගේ වර්ධන වේගය පිරිහිලා. ආර්ථික වශයෙන් පිරිහිලා. අපේ රට මේ තරම් පල්ලෙහාට වැටුණේ විවෘත ආර්ථිකයෙන් පසුව බව අපට සමාජය නිරීක්ෂණය කරන විට පැහැදිලි වෙනවා. එය ආපසු හැරෙයි කියලා හිතුවාට එහෙම වුණේ නැහැ. බොහෝ දෙනෙක් දේශපාලනඥයන්ට බැණ බැණ ඉන්නවා පමණයි. එතනින් එහාට කරන්නේ මොනවද කියා හිතන්නේ නැහැ. අපි හිතනවා මේ රටේ පුරවැසියන් හැටියට රට ගොඩ ගන්න අපිට යම් කිසි වගකීමක් තිබෙනවා. කිසිවක් දැක්කෙ නැහැ වගේ අහක බලාගෙන ඉඳලා හෝ විවේචනය කර කර ඉඳලා වැඩක් නැහැ. ඇතැමුන් රට හැරලා යද්දී අපි කල්පනා කළේ රට අත්හැර දාලා යන්නේ නැතිව රටේ පුරවැසියන් හැටියට යම් මෙහෙවරක් කරන්න. ඒ අධිෂ්ඨානයෙන් තමයි අපි සොඳුරු සිහිනයක උරුමය සංවිධානය පටන්ගත්තේ.” සිය සංවිධානය බිහි කිරීමට හේතුව පැහැදිලි කළේ වෛද්‍ය දර්ශන ප්‍රේමරත්නය. ඔහු සොඳුරු සිහිනයක උරුමයෙහි, ජාතික සංවිධායක ලෙස කටයුතු කරයි.
 |
| වෛද්‍ය දර්ශන ප්‍රේමරත්න |
වර්තමාන සමාජයේ පවතින අර්බුදවලට විසඳුම් සෙවීම සඳහා ඔවුන් විසින් කරුණු 14ක් ඉදිරිපත් කර ඇත. සොඳුරු සිහින ලෙස හැඳින්වෙන්නේ මෙම කරුණු 14යි. ඒවා නම්
1) පින්වත් දරු සම්පතක් ලැබීම සෑම දෙමවුපියකුගේම සුන්දර සිහිනයකි. ඒ සුන්දර සිහිනය සිහිනයකින් අවසන් නොවී යථාර්ථයක් බවට පත් කිරීමට උපකාර කිරීම.
2) දරු සුරතල් බැලීමට ආශාවෙන් සිටින යුවතිපතීන්ට ඒ සඳහා මඟ පෙන්වීම.
3) අපේ උරුමයත් අභිමානයත් අපට අහිමි කිරීම පිණිස මිසදිටු බලවේගවලින් උපන් “පුංචි පවුල රත්තරන්” සංකල්පය පරදවමින් “වැඩුණු පවුල ඉස්තරම්” සංකල්පයෙන් බොහෝ සුජාත දරුවන් බිහි කළ මවුපියන් සහිත වැඩුණු පවුල් සඳහා ආධාර උපකාර ලබා දී ඔවුන්ට භෞතික සම්පත්වලින් මෙන් ම ගුණධර්මවලින් පොහොසත් කිරීම.
4) උපන් දරු සිඟිත්තන්ට රැකවරණය ලබා දීමට අපහසු නම්, ඒ සඳහා උපකාර කිරීම.
5) දරුවන් ගබ්සා නොකරනු පිණිස දුර්ලභ මිනිසත් බවේ අරුත පැහැදිලි කරමින්, මනුෂ්‍ය ඝාතන නම් වූ භයානක පාපයේ ආදීනව කියා දෙමින් දරුවකු කුස පිළිසිඳ ගත් මොහොතේ පටන් ඒ දරුවා මෙලොව එළිය දකින තුරු ම පණ මෙන් රැක ගන්නා ආකාරය කියා දීම.
6) අතීතයේ අපේ මුතුන් මිත්තන් තුළ තිබූ කායික ශක්තියත් මානසික පෞරුෂයත් අනාගත පරපුරට දායාද කරමින් මානව වර්ගයාට ආදරය කරන ගුණ නැණින් යුතු සත් ගුණවත් දරුවකු සමාජගත කරවීම.
7) චමත්කාරජනක නිර්මල යොවුන් වියේ සිටින අයගේ ආදරය සුන්දර වරදක් නොවන්නට සැබෑ පිවිතුරු ආදරයේ පහස විඳවන්නට නොව විඳින්නට උත්තරීතර ආදරයේ නිවැරදි මග හසර පෙන්වා දීම.
8) පෞරුෂත්වය බෙලහීන කරන, ආත්ම විශ්වාසය විනාශ කර දමන, සිහිනුවණ අහිමි කරන, දුරාචාරයට දොරටුව විවර කරන, මත් රකුසාගෙන් සොඳුරු යොවුන් විය බේරාගෙන සිහිනුවණින් යුතු බුද්ධිමත් පුරවැසියන් රටට දායාද කිරීම.
9) නවීන තාක්ෂණය හමුවේ සමස්ත ලෝකයම විශ්ව ගම්මානයක් බවට පත් වී ඇති මෙවන් යුගයක ගුණ දහමින් පිරිහුණු රටක් හැටියට නොව මානව ගුණ දහම් මත පිහිටි සුභාවිත තාක්ෂණයක් හරහා නව ලොවට පිය මනින්නට නිවැරදි මඟ පෙන්වා දීම.
10) මානව වර්ගයාට අවංකව සේවය කරන ඔබටත් ඔබෙන් සේවය ලබන පිරිසටත් සතුට ප්‍රබෝධය ලබා දෙන යහපත් වෘත්තිකයන් බිහි කිරීමට අතහිත දීම.
11) හෙළ ගොවියා සතුව තිබූ විශේෂ ශිල්පීය ඥානය වත්මන් ගොවි පරපුරට දායාද කරමින්, පරිසර හිතකාමී, මානව දයාවෙන් පිරුණු වස විසෙන් තොර හෙළ ගොවිතැන යළිත් ධාර්මික රැකියාවක් ලෙස මවුබිමේ ස්ථාපිත කිරීම.
12) සොබා දහමට ආදරය කරන, සොබා සෞන්දර්ය ආරක්ෂා කරන, පරිසරයට සංවේදී පරිසර හිතකාමි මිනිසුන්ගෙන් පිරුණු දේශයක් බිහි කිරීම.
13) විදේශීය ව්‍යාපාර සහ බහුජාතික සමාගම්වලට ගැති නොවී ඔවුන්ට දේශීය ව්‍යාපාර ගොදුරු කර ගැනීමට ඉඩ නොදී, දේශීය භෞතික සම්පත් සහ මානව සම්පත් මනාව කළමනාකරණය කරමින් ජාතික හා ජාත්‍යන්තර වශයෙන් ශ්‍රී ලාංකේය ව්‍යාපාර ඉහළට ඔසවා තැබීම.
14) මෙම සොඳුරු සිහින යථාර්ථයක් බවට පත් කිරීමට දරන අවංක වෑයම අබියස ලැබෙන කීර්ති ප්‍රශංසා හමුවේ උදම් නොවී නින්දා අපහාස සහ ගැරහිලි අපවාද හමුවේ නොසැලී, නොගැ‍ටී සොඳුරු සිහිනයක උරුමය දායාද කිරීම.
සොඳුරු සිහින යථාර්ථයක් බවට පත් කර ගැනීමේ අරමුණින් ගර්භණි මවුවරුන්ට ආධාර දීමත් දරුවන් වැඩි පවුල් ඇගයීමට ලක් කිරීමටත් ඔවුන් විසින් සැලසුම් කර තිබෙන්නේ පළමු අදියර වශයෙනි. ඒ සඳහා ඔවුන් තෝරා ගෙන තිබෙන්නේ ත්‍රිකුණාමලයේ සේරුවිල ප්‍රදේශයයි.
 |
| අැගැයීමට ලක්වූ සේරුවිල පවුලක් |
“සේරුවිල ප්‍රදේශය තෝරා ගැනීමට අපිට විශේෂ හේතුවක් තිබුණා. මේ ප්‍රදේශය අවුරුදු 30 ක් තිස්සේ යුද්ධෙන් බැට කෑවා. ඒ අතර වාරයේදී නියඟයෙන් බැට කනවා. ආර්ථික ප්‍රශ්නවලින් දුක් විඳිනවා. අනික මේ ප්‍රදේශයේ අපි සොයන විදිහේ දරුවන් වැඩි පවුල් රාශියක් සිටිනවා. සේරුවිල කියන්නේ බෞද්ධයන්ගේ පූජනීය ස්ථානයක්. ඓතිහාසික වටිනාකමක් තිබෙන භූමියක්. මේ වගේ කරුණු කාරණා රාශියක් නිසා තමයි අපි සේරුවිල තෝරා ගත්තේ.” සේරුවිල තෝරාගැනීමට හේතු පැහැදිලි කරමින් විධායක කමිටු සාමාජික වෛද්‍ය නාමල් ගුණවර්ධන මහතා පැවැසීය.
“සොඳුරු සිහිනයක උරුමය” සංවිධානය පියවර කීපයක් යටතේ සිය පළමු අදියර ක්‍රියාත්මක කිරීමට සැලසුම් කර සිටී. මෙහි පළමු පියවර වන්නේ දරුවන් තිදෙනෙකුට වැඩි පවුල්වල සිටින ගර්භණි මාතාවන්ට දරුවා බිහි වීමට පෙර අවසාන මාස 6 දීත් දරුවා බිහි වූ පසුව මුල් මාස 6 දීත් මාසිකව රු. 10,000.00 බැගින් ආධාර මුදලක් පිරිනැමීමයි. ඒ සඳහා ගැබිනි මවුවරුන් 8 දෙනෙකු තෝරාගෙන තිබේ. ඒ හැර ගැබිනි මවුවරුන් 104 දෙනකුට මාසිකව රු. 5,000.00 ක දිරි දීමනාවක් ලබා දෙන්නේ දරු සම්පත වර්ධනය කිරීම ඇගයීමට ලක් කරනු පිණිසයි. මීට අමතරව දරුවන් 4 දෙනෙකු හෝ ඊට වැඩිපුර සිටින වයස අවු. 40 ට අඩු මාතාවන්ට රු. 10,000.00 බැගින් ප්‍රදානය කිරීමට සැලසුම් කර ඇත. ඒ සඳහා පවුල් 31ක් සුදුසුකම් ලබා සිටිති. දරුවන් 4 දෙනකු හෝ ඊට වැඩි පුර සිටින වයස අවු: 40ට වැඩි මාතාවන්ට රු. 5000.00 බැගින් පිරිනැමීමට සැලසුම් කර තිබේ. ඒ සඳහා මවුවරු 200 දෙනෙක් සුදුසුකම් ලබා සිටිති. මෙහි ඇති විශේෂිත දේ වන්නේ රට ජාතිය වෙනුවෙන් හෝ ශාසනය වෙනුවෙන් දායාද කළ දරුවන් සිටින සහ දරුවන් 6 දෙනකු හෝ ඊට වඩා සිටින පවුල්වලට රු. 25.000.00 ක පරිත්‍යාගයක් සමඟ වර්ෂ අභිමානි ගෞරව සම්මාන පිරිනැමීමට සැලසුම් කර තිබීමයි. “පුදමු සේරුවිල දනා - කළගුණ බැතින්” යනුවෙන් මෙම වැඩසටහන සේරුවිල දී සැප්: 09 දින පැවැත්විණි..
මෙයට අමතරව පෙර පාසලක් ආරම්භ කිරීම සඳහා මුල්ගල තැබීම ද එදින සිදු කෙරේ. කාබනික පොහොර යොදා කෙරෙන ගොවිතැන් කටයුතු ද සේරුවිල ප්‍රදේශයෙන් ආරම්භ කිරීමට කටයුතු යොදා තිබෙන්නේ වස විසෙන් තොර ආහාර නිෂ්පාදනය කර නිරෝගී පරපුරක් රටට දායාද කිරීමේ පරම පවිත්‍ර චේතනාවෙනි.
“අපි සෑම මාසයකම 1වැනි සෙනසුරාදා සවස 4.00 ට රුවන්මැලි සෑය ළඟ පූජාවක් පවත්වනවා. පින්වත් දරුවන් බිහි කිරීමේ ප්‍රාර්ථනාව ඇතිවයි මේ විශේෂ පිංකම මාස් පතා පවත්වන්නේ. දැනට වාර 11 ක් පවත්වා තිබෙනවා. දරුවන් නැති අය වගේම ගැබිනි මවුවරුන්ද මෙම පූජාවට සහභාගි වෙන්නේ පින්වත් දරුවන් ලැබීමේ අපේක්ෂාවෙන්” යනුවෙන් පැවසුවේ නීති උපදේශක නීතිඥ ළහිරු දවකැල්ල ය.
