කොළඹ නගරයේ බැලූ බැලූ අත සංවර්ධනයන් සිදුවන බව පෙනේ. කොළඹ පාරක් නොකපන දිනයක් නැති තරම්ය. මඟී ජනතාව නිතරම ගැවසෙන පාරක් වුවද මහ දවාලේ පාර කැණීම් කරන අයට ජනතාවගේ අපහසුතා වගේ වගක් නැති සේය. පාසල් අවට දරුවන් ගැවසෙන් ස්ථාන වල පමණක් නොව රැකී රක්ෂා සඳහා ජනාකීර්ණ මාර්ග වලද පාර කැණීම් පටන් ගන්නේ තදබදය අධික කාල වලය. මේ නිසාවෙන් සිදුවන හිරිහැර ගැන කාටවත් වගේ වගක් නැත. මෙසේ ඉවක් බවක් නැතිව පාර කැණීමේ දුෂ්කරතා තවත් උග්‍ර වන්නේ වැස්සක් පතිත වූවහොත්ය. අද සුළු වැස්සකට පවා කොළඹ නගරයේ මාර්ග ජලයෙන් යටවිමට ගත වන්නේ ඉතා කෙටි කාලයකි. එහෙත් කණගාටුවක මහත වන්නේ මේ සියල්ල බලධාරීන්ට නොපෙනිමය. පසුගිය සතියේ කෙටි වේලාවක් තුළ පතිත වූ අධික වර්ෂාවෙන් කොළඹ නාලන්දා විදුහල් භූමිය ජලයෙන් යටවූයේ දරුවන්ට පාසලටවත් යාමට නොහැකි වන පරීදීය.
උසස් පෙළ උත්තර පත්‍ර පරීක්ෂාවෙන් අනතුරුව කොළඹ නාලන්දා විදුහල ආරම්භ වූයේ පසුගිය සඳුදාය. එහෙත් පාසලේ තෙවැනි වාර ආරම්භයේදිම දරුවන්ට පාසල කරා යන්නට සිදුවූයේ දණහිසක් පමණ වූ ජලයෙන් බැස යමිණි. කොළඹ නගරයේ ජනප්‍රිය පාසලක සිදුවූ මේ දර්ශනය දැක ජනතාව ඔලුවට අතගසා ගත්තේ මේ සංවර්ධනයේ සලකුණුදැයි දේශපාලඥයින්ට බැන වඳිමිනි. පසුගිය කාලයේ මේ පාසල් මාවත ජල සම්පාදනයෙන් හෝ මාර්ග සංවර්ධන අධිකාරියෙන් කැණීම කටයුතු කළේ ඉවක් බවක් නැතිවය. දරුවන්ට විවිධ අපහසතා ඇති කරමින් කළ මේ මාර්ග සංවර්ධනයේ අවසානයම දුක්ඛදායක විය. නාලන්දා විදුහල වැනි කොළඹ නගරයේ ජනප්‍රිය ජාතික පාසලක් වන මේ පාසලට අද දරුවන් පිවිසෙන්නේ මඩ ගොහුරු වලින් පිරි අපිරිසුදු පාරකිනි.
පාසලකට නිසි වටිනාකමක් එන්නට නම් ඒ අවට මාර්ගද නිසි පරිදි සංවර්ධනය විය යුතු බව අපි පිළි ගනිමු. එසේම කුඩා දරුවන් නිතර ගැවසෙන මෙවැනි පාරවල් නිසි අවධානයට යොමු කළ යුත්තේ අනතුරක් විමට පෙරය. මේ පිළිබඳව දෙමවුපියන් වශයෙන් අපි දැඩි කණගාටුව පල කරන්නෙමු. මේ පිළිබඳ වරක් දෙවරක් නොව සිය වාරයක් බලධාරී අවධානයට යොමු කරන්නට අපි කැමැත්තෙමු.
කොළඹ නාලන්දා විදුහලේ දෙමවුපියන්
