ඉස්ලාම් අන්තවාදීන්ගේ ම්ලේච්ඡත්වය ලොවටම පෙන්වූ ම්ලේච්ඡ පාස්කු ප්රහාරය ඉඟි-බිඟි මුලින්ම පිළිබිඹු වූයේ මාවනැල්ලෙනි. ඒ මාවනැල්ලේ බුදු පිළිමවලට හානි සිදුකිරීමත් සමඟ මේ අන්තවාදීන් ගැන ආරක්ෂක අංශවලට තොරතුරු අනාවරණය වීම හේතුවෙනි. පුත්තලම, වනාතවිල්ලුව, ලැක්ටෝවත්ෙත් මේ අන්තවාදින් විසින් පවත්වාගෙන ගිය පුපුරණ ද්රව්ය ගබඩා සංකීර්ණය ගැන හෙළිකරගැනීමට මනා සහයෝගයක් දුන්නෙ මාවනැල්ල දනාගම වෙසෙන 38 හැවිරිදි රාෂික් මොහොමඩ් තස්ලිම්ය. අවසානයේ අන්තවාදීන්ට එරෙහිව නැඟි සිටි තස්ලිම්ට වූයේ ම්ලේච්ඡ අන්තවාදීන්ගෙන් මරාන්තික වෙඩි ප්රහාරයකට ලක්වීමටයි. දනාගම නිවෙසේ නිදා සිටියදී පසුගිය මාර්තු 09 වැනිදා පාන්දර යාමයේ එල්ල වූ එම වෙඩි ප්රහාරයෙන් තස්ලිම් අදටත් සිටින්නේ ආබාධිත තත්ත්වයෙනි.
සති ගණනාවක් සිහි කල්පනාවක් නොමැතිව රෝහල් සයනයක වැතිර සිටි තස්ලිම්ට අදටත් දෙපයින් නැඟී සිටීමේ හැකියාවක් නොමැත. ඒ හිසට එල්ලවූ වෙඩි ප්රහාරයෙන් තස්ලිම්ගේ ශරීරයේ වම් පැත්ත අප්රාණිකව තිබෙන හෙයිනි. ඔහුට පෙර සේ දෙපයින් නැඟී සිටින්නට හැකියාව ලැබෙන්නෙ කවදාද යන්න නිශ්චිතව වෛද්යවරුන්ට පවා පැවැසිය නොහැකි වී ඇත. ජාති, කුල, ආගම් බේදයකින් තොරව සාමය, සහජීවනය වෙනුවෙන් කැප වූ මාවනැල්ල ප්රාදේශීය දේශපාලනඥයකු ලෙස කටයුතු කළ තස්ලිම් රෝද පුටුවකට බර දී මුල්වරට පුවත්පතක් හා සම්මුඛ සාකච්ඡාවකට එක්වන්නේ සිළුමිණ සමඟිනි. ඒ පාස්කු ඉරුදින ප්රහාරය පිළිබඳවත්, ඊට පාදක වූ කාරණා ගැනත් බොහෝ දෙනෙක් නොදත් තොරතුරු අනාවරණය කරන්නටය.
මාරාන්තික වෙඩි ප්රහාරයකට ලක්වූ තස්ලිම්, දැන් කොහොම ද?
තුවාල නම් හොඳයි... ඒත් වම් පැත්තම පණ නෑ. ඒක නිසා ඇවිදින්න බෑ. දොස්තර මහත්වරු නම් කියන්නෙ ඇවිදින්න හැකියාව ලැබෙන්න කලක් යාවි කියලයි.
මුලින් හිටිය තත්ත්වය කෙබඳු ද?
සිහිය නැතිවම සති ගණනාවක් ඉඳලා. මං ඒ ගැන මොකුත්ම දන්නෙ නෑ. පස්සෙ කතා කරන්න බැරිව හිටියා.
පසුගියදා වෙඩි තැබු පිරිස ඔබ හඳුනාගත්තාද?
ඔව්. පසුගිය 12 වැනිදා මාවනැල්ල උසාවියේදී ඒ අය හඳුනාගත්තා. ඒ දෙන්නා වෙඩි ප්රහාරය එල්ල වීමට සති දෙකකට කලින් මට දුරකථන ඇමැතුමක් දිලා මාවනැල්ල සම්පත් බැංකුව අසලට එන්න කිව්වා. මං එතැනට ගියාම, ඔවුන් මගෙන් ඇහුවා, එළුවෝ ඉන්නව නේද? කොහොමද ගණන්. ඒ වගේම ඒ අයටත් මගේ එළු ගාල වගේ එළු ගාලක් හදාගන්න ඕනෙ කීවා.
ප්රහාරයට ලක්වූ තස්ලිම් |
ඒ කියනකොටම මට හිතුණා... එහෙනම් මේ දෙන්න මගේ ගෙදරට ඇවිත් තියෙනවා කියා. එහෙම කියලා ඒ දෙන්නට ඒ සඳහා උදවු කරන්න කීවා. මං කීවා බඩු අරන් දෙන්න... මං හදලා දෙන්නම් කියා. එච්චරයි. මං ඒ වගේ මිනිස්සුන්ට උදවු කරනවා. ඒක නිසා ඒ දේ ඒ හැටි ගණන් ගත්තෙ නෑ. මට එදා උසාවියේදී ඉතින් ඔවුන් දැක්කම හිතුණේ, මේ අය මගේ ගෙදරට ගිහින් තියෙන්නෙ එළුවෝ බලන්න නෙමේ... මාව බලන්නනේ කියලා. (තස්ලිම් සිනාසෙයි)
ඒ වෙඩි ප්රහාරය එල්ල කළ අය කවුද?
මං දන්නේ නැහැ. ඔවුන් කාත්තන්කුඩියේ පිරිසක් කියලයි කියන්නෙ. ඒ අය මාවනැල්ලෙ බුදු පිළිම කැඩීමේ සිදුවීම්වලට මූලික වූ සාහිද්, සාදික් සහෝදරයන්ගේ කොන්ත්රාත්තුවකට මට වෙඩි තබා ඇති බවටයි හෙළිවන්නෙ.
ඔබට එවැනි වෙඩි ප්රහාරයක් එල්ල කිරීමට හේතු වෙන්නෙ...?
වනාතවිල්ලුවේ අන්තවාදීන්ගේ පුපුරණ ද්රව්ය සොයා ගැනීමේ මෙහෙයුම සඳහා ආරක්ෂක අංශ සමඟ මාත් පසුගිය පෙබරවාරි 21 වැනිදා වනාතවිල්ලු ගියා. මේ අන්තවාදීන්ට ඒ ගැන ආරංචිය ගියා. ඒ නිසායි මට මේ වෙඩි ප්රහාරය එල්ල කරන්න ඇත්තෙ කියා මං හිතන්නෙ. පහළ කඩුගන්නාවේදී පසුගිය දෙසැම්බර් 26 වැනිදා බුදු පිළිම කැඩීමට සම්බන්ධ වූ කෙනෙක් ගම්වාසීන් විසින් කොටුකර ගන්නවා. ඔහුගෙන් හෙළි වෙනවා ඊට සම්බන්ධ වූ අය.
එම පරීක්ෂණ සඳහා කොළඹ අපරාධ පරීක්ෂණ දෙපාර්තමේන්තුවේ මාරසිංහ මහත්මයා මාවනැල්ලට පැමිණියා. ඒ අයට සහාය දෙන්න කියා කබිර් හෂිම් ඇමැතිතුමා මට කිව්වා. බුදු පිළිම කැඩීමේ සිද්ධියට අත්අඩංගුවට ගත් අයගේ දුරකථන විශ්ලේෂණයේදී බොහෝ තොරතුරු සහ බොහෝ දෙනෙක් ගැන හෙළි වුණා. එහිදී පුත්තලමේ නවුෆර් මුෆේස් නමැත්තෙක් ගැන හෙළි වෙනවා.
ඒ පුද්ගලයා බුදු පිළිම කැඩු දිනවල රාත්රි කාලයේ ඒ ම්ලේච්ඡයන් සමඟ දුරකථන සබඳතා පවත්වලා තිබුණා. පසුව මාරසිංහ මහතා සමඟ මුෆේස්ව සොයා අපි පුත්තලමට ගියා. මුෆේස්ගේ දුරකථනය සී.අයි.ඩී එක පරීක්ෂා කිරීමේදී තමයි වනාතවිල්ලුව, ලැක්ටෝවත්ත ගැන අනාවරණය වෙන්නෙ.
එහි පුපුරණ ද්රව්ය කිලෝ සිය ගාණක් සමඟ බොහෝ විනාශකාරි ද්රව්ය සොයා ගැනීමට හැකිවුණා. එදා වත්තෙ හතර දෙනෙක් හිටියා. ඔවුන් හතරදෙනා කීවේ, ඒ සියලූම පුපුරණ ද්රව්ය සාදික් සහ සාහිද් සහෝදරයන් දෙදෙනාගේ බවටයි. ලැක්ටෝවත්ත බදු අරන් තිබුණේත් සාදික්ගේ නමටයි. මට කිසිම තරහකාරයෙක් මේ පළාතේ නැහැ. මං ජාතීන් අතර සාමය, සංහිඳියාව, සහජීවනය වෙනුවෙන් බොහෝ සේ කැපවුණා. ඉතින් ඔය සිද්ධිය තමයි සාදික්ලාට මට මෙවැනි දෙයක් කරන්න හේතුවෙන්න ඇත්තෙ.
වනාතවිල්ලුවේ යනකොට මෙහෙම දේකට මුහුණ දීමට වේයැයි සිතුණේ නැද්ද?
මං හිතුවේ නෑ... මේ ම්ලේච්ඡයන් මෙවැනි විපතක් කරයි කියා.
වෙඩි ප්රහාරය එල්ල වූ මොහොත මතක් කළොත්...?
තස්ලිම් රෝගී ඇඳේ |
මාර්තු නවවැනිදා පාන්දර වුණේ. ඊට පහුවදා මම මාවනැල්ලෙ හෝටලයක තිබූ භෝජන සංග්රහයකට ගිහින් ආවේ. මං එනකොට පොඩි පුතයි බිරිඳයි ඇඳේ නිදාගෙන හිටියේ. මාත් ගිහින් රෑ දහයහමාරට විතර ඒ ඇඳේම නිදාගත්තා. එතැන් සිට මං කිසිම දෙයක් දන්නෙ නැහැ. මට සිහිය ආවේ සති ගණනාවකට පස්සෙ... එතකොට මං හිටියේ රෝහල් ඇඳක. සිදුවෙලා තිබුණේ මෙහෙම දෙයක්ලු.. අන්තවාදීන් කුස්සියේ දොර කඩාගෙන ගෙට ඇතුළුවෙලා. පස්සෙ කාමරේට ඇවිත් ඇඳ අසලම තිබූ ජනේලය ඇරලා එළියට ගිහින්... එළියෙන් ඇවිත් ජනේලයෙන් වෙඩි තියලා ගිහින් තියෙන බවටයි සැක කරන්නෙ... පාන්දර හතරයි විස්සට වගේ බිරියට ශබ්දයක් ඇහිලා.
බිරිය හිතලා තියෙන්නෙ ෆෝන් චාජරය පුපුරලා කියලා. ඒත් පස්සෙ බිරිඳට වෙඩි බෙහෙත් ගඳක් ඇවිල්ලා. එතකොට තමයි බලලා තියෙන්නෙ. බලනකොට මගේ ඔළුවට වෙඩි වැදිලා. කවුරුත්ම දැකලා නෑ වුණේ මොකක්ද කියලා. උන් වෙඩි තියලා ක්ෂණයෙන්ම බයික් එකක නැඟලා පැනලා ගිහින්.
අප්රේල් 21 වැනිදා එල්ලවූ ප්රහාරය ගැන සිහිපත් කළොත්...?
මට හිතෙන්නෙ ඒ ප්රහාරය වළක්වාගන්න තිබුණා. වනාතවිල්ලුවේදී එදා අල්ලගත්තු හතර දෙනා කී මාවනැල්ලෙ සාහිද් සහ සාදික් යන අන්තවාදි සහෝදරයන් දෙදෙනා ගැන ආරක්ෂක අංශ දැඩි සෝදිසියකින් සිට ඔවුන් අවශ්ය මොහොතේ අත්අඩංගුවට ගත්තානම් මෙවැනි ප්රහාරයක් වළක්වාගන්න තිබුණා කියායි මං හිතන්නෙ. එදා ආරක්ෂක අංශ නාමල් කුමාරගේ ප්රභූ ඝාතන හෙළිදරව්වටයි වැඩි බරක් දුන්නෙ. ඒ නිසායි මේ බුදු පිළිම කැඩීම හරහා එළියට ආ අන්තවාදීන් ගැන අනාවරණය කරගැනීමට නොහැකි වූයේ.
පාස්කු ප්රහාරයේ ප්රධාන වගකිවයුත්තා වන සහරාන් ගැන ඔබට තිබුණු හෝඩුවාවන් මොනවා ද?
ඔහු ගැන මට කිසිම දෙයක් අනාවරණය වෙලා තිබුණේ නැහැ.
මාවනැල්ලේම සිටි සාදික්ලා සමඟ ඔබට තිබූ සබඳතාවය කොහොම ද?
ඇත්තටම මට ඔවුන් සමඟ කිසිම සබඳතාවක් තිබුණේ නැහැ. අපි ඔක්කොම මාවනැල්ලෙ වුණාට ඔවුන් අපේම ගමේ අය නොවේ. ඒත් ඔය පිරිස් මුලින් ජමාතේ ඉස්ලාමි සංවිධානයේ ඉන්නා කලේ හොඳින් හිටියා. පසුවයි ඔය අන්තවාදි මතය කාන්දු වෙලා තියෙන්නෙ. එම අන්තවාදී මත දැරීමත් සමඟ ඔය සහෝදරයන් දෙදෙනා එම සංවිධානයෙන් ඉවත් කරනවා. ඔවුන්ට අන්තවාදී මතය කාන්දු වූයේ මුදල් බලපෑම මතයි.
ඔබ මාවනැල්ලෙ දැඩි සමාජශීලී පුද්ගලයෙකු ලෙසයි ප්රකටව සිටින්නෙ...
ඔව්... මං බොහෝ සමාජශීලී වැඩ කටයුතුවලට මූලිකත්වය ගෙන කටයුතු කළා. බුදු පිළිම කඩපු වෙලාවෙ අපි සෑහෙන කම්පා වුණා. අරණායක නාය ගිය මොහොතේ මම, අපේ මුස්ලිම් අය බොහෝ දෙනෙක් සමඟ ඒ ප්රෙද්ශයට ගොස් සති ගණනාවක් නතරව සිට ඒ අසරණ මිනිසුන්ට උදවු කළා. අරණායක පන්සලේ ලොකු හාමුදුරුවෝ මාව බලන්න රෝහලටත් ආවා.
මට ඒ හැටි වත්කමක් තියෙන පුද්ගලයෙක් නෙවෙයි... ඒත් මට හැකි පමණින් ගමේ පාරවල්, බෝක්කු, ක්රීඩා පිටි වැනි පොදු වැඩවලට උපරීම දායකත්වය දුන්නා.
දැන් ඔබේ ආරක්ෂාව කොහොමද...?
මං වෙනුවෙන් හොඳ ආරක්ෂාවක් ලබාදී තිබෙනවා. එසේම මං මේ මොහොතේ කිව යුතු දෙයක් තිබෙනවා, මගේ ආරක්ෂාවට සිටි පොලිසියේ, බන්දුල රාලහාමි නිසායි මට මෙතරම් ඉක්මනින් කතා කිරීමට හැකියාව ලැබුණේ. ඔහු, මං වෙනුවෙන් රාජකාරියට අමතරව කැපවෙලා කථන හැකියාව පුහුණු කිරීමට බොහෝ සේ කැපවුණා. මගේ ආරක්ෂාව හොඳ තත්ත්වයේ තිබුණත්,
මගේ බිරිය සහ දරුවන් තිදෙනා ජීවත්වන මට වෙඩි ප්රහාරය එල්ල කළ නිවස නම් ඉතාම අනාරක්ෂිත ස්ථානයකයි පිහිටලා තියෙන්නෙ. එම නිසා මගේ එකම ඉල්ලීම මගේ බිරියටයි, දරුවන් තිදෙනටයි, ආරක්ෂිතව ජීවත්වීමට නිවෙසක් ලබාදෙන ලෙසයි. ඒ වගේම මට දෙපයින් නැගී සිටීම සඳහා පුළුවන් සෑම දෙනාම උදවු කරන ලෙසටද ඉල්ලා සිටිනවා.
අද මට වෙලා තියෙන දේ... හෙට තව කෙනෙකුට වෙන්න ඉඩ තියෙනවා. එම නිසා මං කියන්නෙ ජාති, ආගම් කුල බේදයකින් තොරව හැමෝම එකා වගේ ජීවත්වෙමු කියායි. මට මේ වගේ දෙයක් වුණේ රට වෙනුවෙන් කැපවුණ නිසායි. එහෙම නැතිව මට කවමදාවත් තරහකාරයෙක් හිටියේ නෑ. මං කියන්නෙ මිනිස්සු රට ගැන හිතලා වැඩ කරන්න. එතකොට ගැටුම් ඉබේම නැතිවෙලා යයි...
තස්ලිම් ජීවත් වූ නිෙවස |
අවසානයට මොකක්ද ඔබට කියන්න තියෙන්නෙ?
මුස්ලිම් අන්තවාදයට එරෙහිව ඉදිරියටත් මගෙන් විය යුතු කාර්යභාරය නොපැකිළිව ඉටු කරනවා.
මම ආරක්ෂක අංශ සමඟ ජාති, ආගම්, පක්ෂ, පාට බේදයකින් තොරව සමස්ත රටවැසියා වෙනුවෙන් සේවය කිරීමට ගියේ. අන්තවාදීන්ගෙන් වෙඩි ප්රහාරයකට ලක්වුණ මං ගැන සොයා බලන්නෙ කබිර් හෂිම් ඇමැතිතුමා පමණයි. හැබැයි මං වෙනුවෙන් වෛද්යවරුන්, හෙදියන් ඇතුළු රෝහල් කාර්ය මණ්ඩලය කරන කැපකිරීමනම් අපමණයි.
කුඩා දරුවන් තිදෙනෙකුගේ පියෙක් වන තස්ලිම් රෝද පුටුවකට වැටීම නිසා ඔහුගේ බිරිය සහ දරුවන්ට මේ වන විට දුෂ්කරතාවන් රැසකටම මුහුණදීමට සිදුව ඇත. එම නිසා සමස්ත රටේ යහපත වෙනුවෙන් කැපවූ තස්ලිම් වැනි අයෙක් ගැන ජාති බේදයකින් තොරව සොයා බැලීම සැමගේ යුතුකමකි. ඒ සඳහා මාවනැල්ල, හැටන් නැෂනල් බැංකුවේ 089020204155 දරන ගිණුම් අංකයෙන් තස්ලිම්ට සවියක් වීමට හැක.
ඡායාරූප - රෝහණ ජයරත්න
(අරණායක සමූහ)