ඇල්පිටිය මැතිවරණය අවසන් ය. 'ඇල්පිටිය දිනලා පෙන්නන්න'
පොහොට්ටුව එජාපයට අභියෝග කළේ එහෙම ය. හැබැයි ආණ්ඩුව ඒ අභියෝගය කනකට ගත්තේ නැත. ඒ වෙනුවට ආණ්ඩුව ගාලුමුවදොර එක ම මිනිස් ගංගාවකින් පිරෙවුවේ ය. ආණ්ඩුවට උවමනාව තිබ්බේ අතහැර තිබූ පුංචි ඡන්දයක් නොව, ජනාධිපතිවරණය ය.
මීට කලින් රටපුරා තිබූ පුංචි ඡන්දය අත උඩින් දිනපු පොහොට්ටුව මේ කරන අභියෝගය පුදුමෙකට හේතුවක් නොවේ. හැබැයි ඉතිහාසය දන්නවා නම් පොහොට්ටුව එහෙම අභියෝගයක් කරන්නේ නැත. එකක් හැමදාම ඇල්පිටිය ආණ්ඩුවට අවාසි ය. කොච්චර අවාසි ද කීවොත්, මහින්ද හම්බන්තොට දිනනවාට වඩා පහසුවෙන් ඇල්පිටිය දිනා තිබේ.මේ උදාහරණයයි. ඇල්පිටිය (පූර්ව මැතිවරණ ප්රතිඵල සංඛ්යාලේඛන)
මහ මැතිවරණය
1965බෙන්තර-ඇල්පිටිය ආසනය
එජාප 22085
ශ්රීලනිප 21084
මහ මැතිවරණය 1970
බෙන්තර-ඇල්පිටිය ආසනය
එජාප 22709
ශ්රීලනිප 29801
මහ මැතිවරණය
1989බෙන්තර-ඇල්පිටිය ආසනය
එජාප 18482 (46.12%)
ශ්රීලනිප 15849 (41.26%)
සමස්ථ දිවයිනේ ජය - එජාප
මහ මැතිවරණය 1994
බෙන්තර-ඇල්පිටිය ආසනය
එජාප 22059 (40.5%)
පොඑපෙ 31222 (57.3%)
සමස්ථ දිවයිනේ ජය - පොඑපෙ
මහ මැතිවරණය 2000
බෙන්තර-ඇල්පිටිය ආසනය
එජාප 22811 (38.92%)
පොඑපෙ 30213 (51.55%)
සමස්ථ දිවයිනේ ජය - පොඑපෙ
මහ මැතිවරණය 2001
බෙන්තර-ඇල්පිටිය ආසනය
එජාප 25054 (41.71%)
පොඑපෙ 26732 (44.5%)
සමස්ථ දිවයිනේ ජය - එජාප
පළාත් පාලන මැතිවරණය 2002
ඇල්පිටිය ප්රාදේශීය සභාව
එජාප 15513 (48.27%)
පොඑපෙ 12811 (39.86%)
සමස්ථ දිවයිනේ ජය - එජාප
මහ මැතිවරණය 2004
බෙන්තර-ඇල්පිටිය ආසනය
එජාප 22243 (37.23%)
එජනිස 34840 (58.31%)
සමස්ථ දිවයිනේ ජය - එජනිස
ජනාධිපතිවරණය 2005
බෙන්තර-ඇල්පිටිය ආසනය
මහින්ද රාජපක්ෂ 38779 (59.17%)
රනිල් වික්රමසිංහ 25767 (39.31%)
සමස්ථ දිවයිනේ ජය - මහින්ද රාජපක්ෂ
පළාත් පාලන මැතිවරණය 2006
ඇල්පිටිය ප්රාදේශීය සභාව
එජාප 10308 (36.43%)
ජාසංපෙ 12954 (45.79%)
සමස්ථ දිවයිනේ ජය - එජනිස (ජාසංපෙ)
මහ මැතිවරණය 2010
බෙන්තර-ඇල්පිටිය ආසනය
එජාප 12592 (25.93%)
එජනිස 32926 (67.8%)
සමස්ථ දිවයිනේ ජය - එජනිස
පළාත් පාලන මැතිවරණය 2011
ඇල්පිටිය ප්රාදේශීය සභාව
එජාප 10427 (30.59%)
එජනිස 19954 (58.54%)
සමස්ථ දිවයිනේ ජය - එජනිස
ජනාධිපතිවරණය 2015
බෙන්තර-ඇල්පිටිය ආසනය
මහින්ද රාජපක්ෂ 42015 (59.08%)
මෛත්රීපාල සිරිසේන 28287 (39.78%)
සමස්ථ දිවයිනේ ජය - මෛත්රීපාල සිරිසේන
මහ මැතිවරණය 2015
බෙන්තර-ඇල්පිටිය ආසනය
එජාප 26559 (40.83%)
එජනිස 34275 (52.70%)
සමස්ථ දිවයිනේ ජය - එජාප
එහෙම බැලුවම ඇල්පිටිය මහින්දලාගෙ බලකොටුවකි .
වරක් කොළඹ නගර සභාව දිනාගන්න මහින්දලා පුදුම ගේමක් ගැසූහ. වාසු නගරාධිපති කමට ගෙනත් කොළපාට කොළඹ ඉවර කරන්න මහින්ද තුරුම්පු ඇද්දේය. ඒත් පරාදය. ඔය විදිහට නොවුණත් ඔයිට තරමක් කිට්ටු දේවල් රැසක් ඉතිහාසයේ සිදුවෙලා තිබේ.
කදිම උදාහරණය 'රත්නපුරෙන්' ගත හැකිය.
1988 කියන්නේ ලංකාවේ දේශපාලනය අන්ධකාර වූ සමයකි. උතුර දකුණ දෙකම ගිනි අරගෙන තිබිණි. 1987 එවකට ජනාධිපති ජේ. ආර් ජයවර්ධන සහ ඉන්දියානු අගමැති රජිව් ගාන්ධි අතර ඇති වූ ඉන්දු-ලංකා ගිවිසුම මුළු රටම ව්යාකූල කර තිබිණි. ජනතා විමුක්ති පෙරමුණ දකුණ ගිනියම් කොට තිබිණි.
තිලීපන් නැමති තරුණයා 1987 සැප්තැම්බර් 15 වනදා යාපනය නල්ලුර් කන්දසාමි කෝවිල අසල මාරාන්තික උපවාසයක් ආරම්භ කළේය.
උපවාසය නැවැත්වීමට නම් වහාම ඉන්දු ලංකා ගිවිසුම හකුළා ගත යුතු බව ඔහු රජයට බල කළේය. එහෙත් ආණ්ඩුව එහෙම නොකළේය.
1987 සැප්තැම්බර් 20 වනදා තිලීපන් අවසාන වතාවට ජාතිය අමතා කතා කළේය.
“සහෝදරවරුනි තවත් ටික දිනකින් මා මියෙනු ඇත..එහෙත් නුඹලාගේ අයිතිය වෙනුවෙන් සටන් කරන දහස් ගණනක විමුක්ති කාමීන්ගේ උපත මාගේ මරණය සමඟම සිදුවනු ඇත….”
1987 සැප්තැම්බර් 26 වනදා පුරා දින 12ක් ආහාර සහ ජලය නොමැතිව සිටීම හේතුවෙන් තිලීපන් සදහටම නෙත් පියාගත්තේය. එල්.ටී.ටී.ඊය සන්නද්ධ අරගලය තීර කළේ ඊට පස්සේය.
1988 පෙබරවාරි 03 පළාත් සභා සංස්ථාපනය කරන ආණ්ඩුව කොටස් 4ට මැතිවරණය තිබ්බේය. උතුරු මැද, ඌව, සබරගමුව සහ වයඹ පළාත් සභා ඡන්ද 1988 අප්රේල් 28 ද මධ්යම සහ බස්නාහිර පළාත් සභා ඡන්ද ජුනි 02 ද දකුණු පළාතේ ඡන්දය ජුනි 09 ද නැගෙනහිර පළාතේ ඡන්දය නොවැම්බර් 19 ද පැවැත්විණි. ඡන්ද දිනයන්හි ජවිපෙ ඇඳිරි නීතිය පනවා රට පුරා ප්රචණ්ඩත්ව වැපිරීය. පළාත් සභා අපේක්ෂකයන් සහ ඡන්ද දායකයන් කිහිප දෙනෙක් ද ඝාතනය විය. ඡන්දය වැටීමේ අනුපාතය වූයේ සියයට 49.7 ක් වූ අතර හම්බන්තොට දිස්ත්රික්කයේ එම අනුපාතය සියයට 7.97 ක් විය. මාතර එය සියයට 20 කි.
රටම අකර්මන්ය වී තිබිණි. ආණ්ඩුව මිනිස්සුන්ට තිත්ත වී තිබිණි. කොටින්ම කීවොත් 'ජේ ආර් මරමු' කියා පෝස්ටර් පවා අලවන තැනට රට වැටී තිබිණි. ශ්රීලනිපයේ සිරිමාවෝ සිටියේ අත උඩින් දිනන මැතිවරණයක් බලාපොරොත්තුවෙන් ය. ජේ. ආර් ජනපති සටනට එන බවට ඉගි දෙනවිට මැතිනිලා කල් ඇතිවම ජයපැන් සාද දැමූහ. එදා ජවිපේ හිටියේ ප්රචණ්ඩ ඉවුරේය. ජන බලය නැතත් එදා ප්රචණ්ඩ බලය ඔවුන්ට තිබිණි. අද පොහොට්ටුව ශක්තියක් පෙන්වන්නේ යම් සේද එදා ජවිපේ ප්රචණ්ඩ ශක්තිය පෙන්වමින් සිටියේය. මිනිස්සු ඡන්දේ දෙන්න යන්න හිතුවේවත් නැත.
'මැතිනි ජේ ආර්ට දෙන්නේ දොඹෙන් යන්න. මෙදා තමයි අත රජ කරන්නේ'
ශ්රීලංකාකාරයෝ සියලු වාසි අරගෙන වහසි බස් දෙඩූහ.
පළාත් සභා වර්ජනයකොට ජනතා විරෝධයේ 'වාසි පැත්ත' අරගෙන සිටි ශ්රීලනිපය පරද්දන එක හීනයක් බව ආණ්ඩුවේම සමහරු කීය. ඔය අතර ගාමිණී වරක් ජේ ආර් සමඟ ගොස් ප්රකට හිමිනමක් හමු විය.
'ඔබතුමා ආවොත් ජනාධිපතිවරණය පරදිනවා' උන්වහන්සේ කීය.
'මේ බලන්න ගාමිණී, හාමුදුරුවෝ කියන කතා. මීට අවුරුදු 4ට කලින් සීයට පනස් දෙක පන්නලා දිනපු මම අවුරුදු 4ට පස්සේ පරදිනවලු'
කියා ජේආර් ගාමිණීට කීය. ගාමිණී නිහඬ ව සිටියේය.
'රැල්ල කොහෙටද?'කියා හොයන්න ජේ.ආර්ට නියම අවස්ථාවක් උදා වුණේ ඔය අතර ය.
ඒ රත්නපුර අතුරු මැතිවරණයයි. මැතිවරණය පැවැත්වූයේ 1988 ජූලි මස 14 වැනි දින ය. රට ම බලාගෙන සිටියේ වෙන්නේ මොනවද කියලා ය.
'මේක පැරදුණොත් රැල්ල හරවන එක සක්කරයටවත් කරන්න බෑ'
ඡන්දේ කට උඩ තියාගෙන ආණ්ඩුවේ ඇමතිවරු කීය. ජනාධිපතිවරණය පේන මානෙක තියාගෙන මේ අතුරු මැතිවරණය පැරදුණොත් සියල්ල ඉවර බව ආණ්ඩුවම දැනගෙන සිටියේය. 88 නොවැම්බර් හෝ දෙසැම්බර් ජනාධිපතිවරණය එන බවත් හා හූව හැමතැනම විය. එදා ශ්රීලනිපයට නැතිවෙන්න දෙයක් තිබ්බේ නැත.හැබැයි ආණ්ඩුවට රැකගන්න දේ තිබුණේ ය.
'අතුරු මැතිවරණය දිනන්නම ඕන'
ජේආර්ගේ අභියෝගය ඒක ය. ඒ නිසාම ඔහු සියලු බලය අතුරු මැතිවරණයට යෙදුවේය. පක්ෂ දෙකේම ප්රබලයෝ රත්නපුරයෙහි 'ලැගුම්ගෙන' මැතිවරණ සටනට එක් විය. අනුර බණ්ඩාරනායක පවා එහි නවාතැන්ගෙන සිටියේය. නන්ද එල්ලාවලලාත්, පුංචිනිලමේලාත් දෙපාර්ශ්වයේ වූහ. ආණ්ඩුවේ නියෝගය 'දිනන' එක ය. ජේ ආර් කෙලින්ම රත්නපුරට බැස්සේය. රත්නපුරය දිනවා පෙන්වන බවට ඔහු සහතික විය.
අලුයම වනවිට ප්රතිඵල සූදානම් විය. නන්ද එල්ලාවල ඡන්ද 31, 854 හා සුසන්ත පුංචිනිලමේ 27, 069 ක්ද, අනික් අපේක්ෂකයන් අටදෙනෙකු ඡන්ද 748 ක්ද ලබා තිබුණි. ජැඩි ඡන්ද තුන්දහස් ගාණකින් ශ්රීලනිපය දිනුවේය.
“සහෝදරවරුනි, අද දින අප පක්ෂය විශාල ජයග්රහණයක් ලැබුවා. මේ ජයග්රහණය නවතින්නේ ආණ්ඩුව ගෙදර යවලා ඒකේ පළමු මුර වෙඩිල්ල තමයි අද තිබ්බේ..”
අනුර බණ්ඩාරනායක ප්රීතියෙන් කීවේය.
'දැන් ඉතිං ආණ්ඩුව ගෙදර යවන එක ටොයිස් වැඩක්'
හැමෝම කීය.
මැතිනි ඇතුළු ශ්රීලනිපය 'අතුරු මැතිවරණ ජයෙන් උදම් වෙත්දී ජේ.ආර් අඩියක් පස්සට ගෙන පක්ෂය සහ ආණ්ඩුව ගැන හිතුවේය.
'අපි අලුත් වෙමු. ප්රේමදාස ඉස්සරහට ගමු'
රන්ජන් විජේරත්න එහෙම කීවේය. ඒ වෙනකොටත් අගමැති ප්රේමදාස තනතුර 'පියන්කමක්' බව කියමින් සිටි අතර ජනාධිපතිවරණයටද සීරුමාරුවට සූදානමින් සිටියේය. පුරවැසි පෙරමුණටද ඔහු පනක් දී තිබිණි. 88 නොවැම්බර් 10 ජනාධිපතිවරණය බවට ප්රකාශ විය.
ජේ ආර් එජාප සමුළුව කැඳෙවුවේය. දශක කිහිපයක් එජාපය රැකගත් මිනිසා, එජාප ඉතිහාසයේ බලගතුම ජයග්රහණය දිනා දුන් මිනිසා, එජාපය වැඩියෙන්ම ශක්තිමත් කළ මිනිසා,එජාපයට ඉතිහාසයේ ප්රථම වරට වෘත්තීය සමිතියක් හැදූ මිනිසා, රටට විවෘත ආර්ථිකය ගෙනා මිනිසා, රටම විප්ලවීය සංවර්ධන වැඩබිමක් කළ මිනිසා තීරණාත්මක සමුළුව කැඳෙවුවේය.
‘මම රජෙක් නොවේ. මට රකින්න පෙළපතක් නැහැ. මට මුදල් හම්බ කරන්න අවශ්ය නැහැ. මට බූදලයක් නැහැ. මේ රටේ මගේ බූදලය තමයි ගොවි ජනතාව. වැව් හදලා, කුඹුරු ඉඩම් දීලා ඔවුන් සංවර්ධනය වී සිටින විට මේ රට ඉබේම සංවර්ධනය වෙනවා'
මහවැලි ව්යාපාරයේ මාදුරුඔය හදලා ඉවර වුණාට පසුව ජේ. ආර්. කීවේ එහෙමය.ඔහු සම්මේලනයේදී එජාප නායකයෙක් මෙතෙක් කළ සංවේදීම කතාව කළේය.
ඒ තමන්ගේ පක්ෂයේ මීලඟ ජනාධිපති අපේක්ෂකයා සහ පක්ෂ නායකයා ජනතාවට හඳුන්වා දෙන්නට ය. වේදිකාවේ ගාමිණී දිසානායක, ලලිත් ඇතුළත්මුදලි වගේම තවත් විශේෂ අමුත්තෙක් සිටියේය .ඔහු රණසිංහ ප්රේමදාස ය. දහස් ගානක ජනතාව මැද ජේ ආර් අපූරු කතාව කළේය.
“ මේ එක්සත් ජාතික පක්ෂය තමයි අවුරුදු ගණනාවක් රට පාලනය කළ පක්ෂය..රටට නිදහස ගෙනාව පක්ෂය..මහජන පක්ෂයක් හැටියට,දුප්පත්ම මහජනයා වෙනුවෙන් අතදෙන රණසිංහ ප්රේමදාස මහත්මයාට නායකත්වය පවරනවා...අපි මහජනයාට හඳුන්වලා දෙනවා...මෙන්න තමුන්නාන්සේලාගේ මනුෂ්යෙයක්..එතුමා එන්නේ උන්නැහේගේ ප්රතිපත්ති උඩ, උන්නැහේගේ ක්රියාව උඩ..උන්නැහේගේ මහජනතාවට තියෙන ආදරය උඩ..මේ රට අවුරුදු රාශියක් පාලනය කරපු දේශපාලන පක්ෂයේ එකම නියෝජිතයා හැටියට යි.‘
දහස් ගානක් කඳුළු පුරවාගෙන කන් බිහිරිකරවන අත්පොළසන් නාදයක් සහ උද්දාමයක් පළ කළහ.
එජාපය අවදි විය. ප්රබෝධයෙන් මුසපත් විය. ආණ්ඩුවේ පතාකයන් වූ ගාමිණී, ලලිත් දෙදෙනාම මැතිවරණ සටන කරට ගත් හ. ප්රේමදාස යකඩ කටින් මිනිස්සු නැති රැළි ඇමතූහ. ගෙවල්වල දොරවල් වසාගෙන ජනතාව ඒ කතා ඇසූහ. ඡන්දය දමන ප්රථම 12 දෙනා මරාදමන බවට ජවිපෙ නියෝග කළේය.
අන්තිමට ප්රේමදාස රටේ දෙවෙනි විධායක ජනාධිපති විය.
ඇල්පිටිය මැතිවරණය දිනා එයින් ජනාධිපතිවරණය දිනන බවට පුරසාරම් දොඩන අයට කියන්න තියෙන්නේ රත්නපුර අතුරු මැතිවරණය හිතේ තියාගන්න කියන එකය. ඒ වගේම හැමදේටම උදාහරණ ගන්නා ඉන්දියාවේ සිදුවීමකුත් මේ මෙහොතේ මතක් කළ යුතුය.
2019 මැතිවරණය ආසන්න වනවිට මෝඩි ගැන තිබුණේ අමුතු චිත්රයකි. 2014 ජයගත් මෝඩි ක්ෂණිකව ජනප්රිය වූයේ නැත. ඔහු ගත් ජනප්රිය නොවන තීන්දු නිසා ඉන්දියානුවන් බොහෝ පීඩාවට පත්වූහ. වරක් ඔහු මුදල් නෝට්ටු තහනමක් ගෙන ආවේය. මුළු ඉන්දියානුවෝම ඔහුට දෙමාපියන් සිහිකර බැණ වැදුණු අතර 2015 පැවැති බිහාර් ප්රාන්ත මැතිවරණයේ මෝඩි පරාජය විය. ආසන 243කින් සමන්විත බිහාර් ප්රාන්ත සභාවේ බහුතර බලය දිනා ගැනීමට එහි විපක්ෂ සන්ධානය සමත් විය. ඔවුන් ආසන සංඛ්යාව 157ක් ගනිද්දී මෝඩිගේ භාරතීය ජනතා පක්ෂය දිනාගත්තේ ආසන 77කි. හැබැයි ගිය මැතිවරණයේදී මෝඩි වාර්තා තියා දිනුවේ පවුලේ පක්ෂය වූ කොංග්රසය හෝදා දමමිනි.
මානාභරණ