ශ්රී ලංකාවේ සමාජ - දේශපාලන ක්ෂේත්රවල නායකකාරකාදීන් එළැඹෙන හත්වන විධායක ජනාධිපතිවරණ සටන සඳහා කඳවුරු බඳිද්දී මෛත්රීපාල සිරිසේන ජනාධිපතිවරයා මෙරටේ දහස් ගණන් ගොවි ජනතාව සවිබල ගැන්වීම සඳහා දැවැන්ත සටනක් ඇරඹීමට පොළොන්නරුව වැලිකන්ද ප්රදේශයට ගියේය. ඒ වූ කලී ශ්රී ලංකාවේ මහා පරිමාණ හරිත ආයෝජන ව්යාපෘතියක සමාරම්භය සනිටුහන් කළ නිමේෂයකි. එමඟින් රටට ලැබෙන සෘජු විදේශ ආයෝජනය ඇමෙරිකානු ඩොලර් මිලියන 40කි. මෛත්රී ජනාධිපතිවරයාගේම සංකල්පයක් අනුව ආරම්භ කරන ලද ග්රාමශක්ති ජනතා ව්යාපාරය සමඟ ඒකාබද්ධ වී මේ දැවැන්ත ආයෝජනය සිදු කරනු ලබන්නේ ස්ටාර්ච් ඉන්ඩස්ට්රීස් පෞද්ගලික සමාගම විසිනි. ඒ සමාගමේ සභාපති ඇන්ඩ්රියාස් වයික් මහතාට අවශ්ය වූයේ ජනාධිපතිවරයාගේ සුරතින් ම ඒ ව්යාපෘතියට හා කර්මාන්තශාලාවට මුල්ගල තබා ගැනීමට ය. මේ යෝධ ව්යාපෘතියේ නියමුවන් අයත් වන්නේ නෝර්වේ හා ස්වීඩන් යන රටවල ව්යාපාරික සමාගම්වලට වීම ද විශේෂත්වයකි. ඒ කාර්ය සඳහා මහවැලි අධිකාරියට අයත් හෙක්ටයාර් 500ක පමණ, භූමිභාගයක් වෙන් කර දීමට ද අපේක්ෂා කෙරේ.
වැලිකන්ද සිංහපුර ප්රදේශයේ ආරම්භ වන මේ මහා පරිමාණ හරිත ආයෝජන කෘෂි ආර්ථිකය ඒ ප්රදේශයේ සාමාන්ය ජනතාව විසින් හඳුන්වන ලද්දේ මඤ්ඤොක්කා පිටරට පටවන කර්මාන්තයක් ලෙස ය. එසේම බියකින් හා සැකයකින් තොරව මඤ්ඤොක්කා වගා කළ හැකි බවට ඔවුන් සිතෙහි විශ්වාසයක් ද ගොඩ නැඟී තිබුණු බව අපට පැහැදිලි විය. සාමාන්යයෙන් මේ රටේ කෘෂි නිෂ්පාදන සඳහා නිශ්චිත අගයක් නැතහොත් මිලක් නැති බව ද රහසක් නොවේ.
අපේ මඤ්ඤොක්කාවලට අන්තර්ජාතික වෙළෙඳපොළක්
මේ රටේ සමස්ත ආර්ථික සංවර්ධනය ම විදේශ ආයෝජන මත සිදු කළ යුතු යැයි කල්පනා කරන දේශපාලනඥයන් මෙන්ම ආර්ථික විශේෂඥයෝ ද සුලබව සිටිති. වේදිකා ඔස්සේත්, වෙනත් සංවාද මණ්ඩපවලත් එබඳු අලංකාර කතාවල ද අඩුවක් නැත. එහෙත් ඒවා බොහෝ විට වචනවලින් ඔබ්බට නොගිය බව ද රහසක් නොවේ. මෛත්රී ජනාධිපතිවරයා ඒ ආර්ථික න්යාය ගැන අලංකාර බස් දොඩන්නකු නොව මේ මහපොළොවේ පැළ කළ හැකි ග්රාමීය ආර්ථිකය කෙරෙහි වැඩි විශ්වාසයක් තබා සිටින නායකයෙකි. මේ අභිනව ව්යාපෘතියෙන් ගොවීන් විසිදහසකට නො අඩු සංඛ්යාවකට ආරම්භයේදීම සෙත සැලසෙනු ඇත. සැබැවින් ම අපේ මඤ්ඤොක්කාවලට මෙබඳු වටිනාකමක් ඉතිහාසයේ කිසිදිනක ලැබී නොමැති බව ද අපි දනිමු. හාපුරා කියා ආරම්භ වන මේ හරිත ආයෝජනය මෙරටේ කෘෂි ආර්ථිකයේ විස්මිත ආරම්භයක් වනු නිසැකය.
මඤ්ඤොක්කා නියම විද්යානුකූල ක්රමයකට වගා කිරීමටත්, ඒ අස්වනු ඵලදායී නිෂ්පාදන ක්රියාදාම සඳහා යොදා ගැනීමටත් මේ ව්යාපෘතිය ඉවහල් වනු ඇත. අතිශය නවීන යන්ත්ර සූත්ර සහිත නිෂ්පාදනාගාරයක් ඉදිකර ගොවීන් විසින් නිපදවනු ලබන අස්වනු සියල්ල ම මිලට ගැනීම මේ ව්යාපෘතියේ අරමුණ වී තිබේ. රට පුරා විසිරී සිටින ගොවීන්ට තම ශ්රමය සඳහා ඉහළ මිලක් ප්රථම වරට ලබා ගැනීමට මේ ව්යාපෘතිය නිසා හැකි වනු ඇත.
මඤ්ඤොක්කා නිෂ්පාදන ව්යාපෘතිය සඳහා තෝරා ගත් වැලිකන්ද ප්රදේශයේ පස නැතහොත් පොළොව ඒ සඳහා අතිශයින් ම සුදුසු බව ද තහවුරු වී තිබේ. මොන අතින් බැලුවත් මේ ව්යාපෘතිය වැලිකන්ද ප්රදේශයේ ජනතාවට පමණක් නොව රජරට ගොවි ජනජීවිතයට ම අලුත් බලාපොරොත්තු රැසක් එක් කරන බව නම් සුපැහැදිලි ය.
පසුගියදා මේ ප්රදේශයේ සංචාරයක නිරත වූ අපට ඒ බලාපොරොත්තු සහගත ගොවීන්ගේ මුහුණු දැකගත හැකි විය. සොබාදහම තමන්ට දායාද කළ මේ සරු භූමිය සමඟ තම ඉරණම බැඳී පවතින බව ඔව්හු අප සමඟ කීහ. සැබැවින් ම මේ රටට නිදහස ලැබී ගෙවී ගිය දසක හතකට වැඩි කාලයක් මුළුල්ලේ ම අපේ ආර්ථිකය සවිබලගැන්වීම සඳහා නිසි සැලසුම් නොවීම මොනතරම් අඩුවක්ද? ආර්ථික සංවර්ධනය ගැන ඇසෙන උදාන වැකි හා වාර්තාවලට එක්ව තිබෙන සංඛ්යාලේඛන මොනතරම් ව්යාජදැයි අමුතුවෙන් කිවයුතු නැත. ඒ බොහෝ දෙනෙක් සංවර්ධනය යනුවෙන් කල්පනා කරන්නේ අහස සිඹින ගොඩනැගිලි, අධිවේගී මාර්ග, තාක්ෂණය හා විද්යාත්මක ක්රමවේද නිසි දැක්මක් නොමැතිව පරිහරණයට ගැනීම ආදියයි. මානව ශිෂ්ටාචාරයේ ගමන් මඟ හා රටක ජාතික අවශ්යතා දෙස විදුහුරුව විමසා අවශ්ය සංවර්ධනයක් සඳහා යොමුවීම ඒ බොහෝ දෙනෙකුගේ අභිප්රාය ද නොවේ. දේශපාලනික ව කුණු වී ගිය ඇතැම් නායකයන්ට කිසි දිනක මේ මහපොළොව හා අපේ ජාතික ආර්ථිකය ගැන වැටහීමක් ද නැත. දේශීයත්වය, ජාතිකත්වය යන්න පවා ඔවුන් බොහෝ දෙනකුට දේශපාලන මෙවලම් පමණි. අධිරාජ්ය විරෝධය බලය සඳහා භාවිත කරනු ලබන අවියකි.
ගාන්ධි දර්ශනයෙන් ලද ආභාසය
ඉන්දියාවේ මහත්මා ගාන්ධිතුමාගේ සමාජ දේශපාලන ආර්ථික හා සංස්කෘතික දැක්ම පදනම් වූයේ ඉන්දියානු ජනතා ආධ්යාත්මය මත ය. ජනතාවගේ දුක්ගැනවිලි මනාව හඳුනාගත් ගාන්ධිගේ අරගල ඉතිහාසයට එදා භාරතයේ සියලු ජන කොටස් එක්වූයේ එතුමන් තුළ වූ උදාර පිළිවෙත් නිසා ය. එහි පදනම දේශීයත්වයයි. ඉන්දියානුවන් ඉන්දීය නිෂ්පාදනය අගය කළ යුතුය යන පුළුල් දැක්ම ගාන්ධිගේ දැඩි පිළිවෙත් තුළ ගැබ් විය. මෛත්රී ජනාධිපතිවරයා ද ඒ ගාන්ධි දර්ශනයෙන් ආභාසය ලද දේශපාලන දර්ශනයක් රටට හඳුන්වා දෙයි. රෝග පීඩාවට ගොදුරු වූ ජනයා ඉන් මුදා ගැනීම, ජල හිඟයට විසඳුම් ලබාදීම ජාතික සමගිය, මත් විරෝධය මහත්මා ගාන්ධිතුමන්ගේ පිළිවෙත් අතර කැපී පෙනුණි. මෛත්රී ජනාධිපතිවරයාගේ සමාජ දේශපාලන දැක්ම තුළ ද එබඳු සාධනීය ලක්ෂණ ගැබ්ව තිබේ. රජරට ජනතාවගේ වකුගඩු රෝගයට ඔසු සෙවීම මෛත්රී ජනපතිගේ දේශපාලන සැලැස්මේ ප්රබල අංගයක් විය. මහවැලිය සමඟ සනාතන ව බැඳුණු රජරට ජන ජීවිතයට මහවැලියේ ප්රතිලාභ ලබාදීමට ඔහු දැඩි ව කැපවිය. මොරගහකන්ද කළුගඟ ජලාශ යෝජනා ක්රමය ඒ වාරි සිහිනයේ අග්රඵලයක් ලෙස ජාතියට හිමිවී තිබේ.
මෛත්රී ජනාධිපතිවරයාගේ ග්රාමශක්ති ජනතා ව්යාපාරය මෙන්ම දුගී බව තුරන් කිරීමේ සියලු ධනාත්මක සැලසුම් ගමත්, ගැමි ජීවිතය පිළිබඳ සැබෑ වැටහීමත් තුළින් නිර්මාණය වූ දේවල් ය. කොළඹ කේන්ද්රීය ප්රභූ දේශපාලනය කාර්මික නවෝදයක් හා මහාපරිමාණයේ කම්හල් ගැන විවිධ අදහස් පළ කරද්දී මෛත්රී සිතුවේ ග්රාමීය ආර්ථිකය නැංවීම ගැන ය. ඔහුගේ ජනතාවාදී අදහස් හා දේශපාලන දැක්ම කොතරම් ප්රායෝගිකදැයි සිතෙන්නේ ඒ වර්ගයේ නිසරු කතන්දර කාරයන්ගේ ආර්ථික විහිලු ඇසෙන විට ය. මෛත්රී ජනාධිපතිවරයා අද කැපවී සිටින්නේ ඒ සිහින ආර්ථික මැවීම් වෙනුවට මහපොළොවට ගැළපෙන සාධනීය ග්රාමීය ආර්ථිකයට නවීනත්වයක් ලබාදීමට බව පෙනේ.
රජරට ජනජීවිතය ප්රබෝධවත් කිරීමට
පොළොන්නරුව යනු 11වන සියවස සමග ඇරඹෙන අලුත් යුගයක සාඩම්බර භූමියයි. අනුරාධපුරය අපේ පූජා බිම ලෙස ගෞරවයට පාත්ර වෙද්දී පොළොන්නරුව ඓතිහාසික සංස්කෘතික භූමියක් ලෙස සංචාරක ආකර්ෂණයට පාත්ර විය. විජයබාහු, පරාක්රමබාහු වැනි වීරයන්ගෙන් පිබිදුණු පොළොන්නරුව අද මෛත්රී ජනාධිපතිවරයාගේ දැක්ම හා සැලසුම් ඔස්සේ ඉදිරියට යන නව පුරවරයක් ලෙස නැඟී සිටියි. කිසිවකින් කම්පා නොවූ පරාක්රමබාහු නිරිඳුන් සේ මෛත්රී ජනාධිපතිවරයා ද දේශපාලන කුණාටුවලින් නොසෙල්වී තම ආදරණීය පුරවරය වන පොළොන්නරුවට සංවර්ධනය රැගෙන ඒමට කැපවී සිටියි. පොළොන්නරුවේ සංචාරය කරන කවරකුගේ වුව ද නෙත ගැටෙන ඓතිහාසික උරුමයන්ට අතිරේකව මනාව නිමවූ අභිනව නගරයක් අද ඉදිවී තිබේ. මංමාවත්, ගොඩනැගිලි සංකීර්ණ, නවීන පහසුකම්වලින් සපිරි රෝහල් පමණක් නොව තාක්ෂණ හා අධ්යාපන ආයතන, පාසල් වලින් ද අද පොළොන්නරුව සමන්විත ව තිබේ. එයට සමගාමීව කෘෂිකාර්මික හා වාරිමාර්ග අංශවල අභිවර්ධනයක් සහිත පුලතිසිපුරයක් නිර්මාණය කිරීම මෛත්රී ජනාධිපතිවරයාගේ අභිලාෂය වී තිබේ. පරාක්රම සමුද්රය, මින්නේරිය, ගිරිතලේ හා කවුඩුල්ල වැනි ජලාශ උපරිම අයුරින් රජරට ජනජීවිතය ප්රබෝධමත් කිරීමට යොදා ගත් එදා රජදරුවන් ගිය මඟ යන නූතන රාජ්ය නායකයා වන්නේ ද මෛත්රී ජනාධිපතිවරයා ය.
සමාජ, ආර්ථික ගැටලු හඳුනාගනිමින්
මෛත්රී ජනපතිඳුන්ගේ සුරතින් මුල්ගල තැබුණු වැලිකන්ද සිංහපුර හරිත ව්යාපෘතිය සඳහා තෝරා ගත් භූමි ප්රදේශය රතු දුඹුරු හා දියර පස්වලින් සමන්විත සරු පොළොවකි. එය මඤ්ඤොක්කා වැනි වගාවකට අතිශය යෝග්ය පසකින් සමන්විත බව ඒ පිළිබඳව කරන ලද මූලික විමර්ශනවලදීත් අනාවරණය වී තිබේ. දේශගුණය අතින් ද වියළි කලාපීය දේශගුණික ලක්ෂණ මෙහි දැකගත හැකිය. එහෙත් ශ්රී ලංකාවේ අනෙක් වියළි ප්රදේශවලට වඩා සුවිශේෂ ලක්ෂණ පොළොන්නරුව දිස්ත්රික්කයට හිමි වී තිබේ. උතුරු මැද පළාතට අයත් මෙම සාරභූමිය පරිපාලන දිස්ත්රික්ක පහකට මායිම්ව පිහිටා තිබේ. එසේම එය ශ්රී ලංකාවේ පස්වන විශාලතම දිස්ත්රික්කය ද වේ. භූ විද්යාත්මක ව පර්යේෂණවලට අනුව පොළොන්නරුව උස්බිම් ප්රදේශයකි. එහි බහුලව තිබෙන රතු දුඹුරු පස හා අඩු හියුමස් සහිත මැටි පස කෘෂිකර්මාන්තය සඳහා අතිශය යෝග්ය වේ. පොළොන්නරුවේ අනෙක් සම්පත වියළි බව මුසු වූ සදාහරිත වනාන්තර පෙළ ය. මේවා ගංගාශ්රිත පරිසරයෙන් පෝෂණය ලබයි. පරිසර සංවේදී කලාප ගණනාවක්ම මෙහි පිහිටා තිබේ. ඒ ගංගාශ්රිත පරිසර ගව, මී, වල් ඌරු, අලි වැනි සතුන්ට මෙන්ම විවිධ පක්ෂීන්ට ද යෝග්ය වූවකි.
මහාපරාක්රමබාහු රජ දවස මේ ප්රදේශයේ ඉමහත් සංවර්ධනයක් සිදු වූ බව ඉතිහාසය සඳහන් කරයි. එහිලා, මූලික වූයේද කෘෂිකර්මාන්තයයි. ග්රාමීය සමාජ රටාවකින් යුතු මෙම ප්රදේශයට ඒ අතීත සංවර්ධනය යළි කැඳවීම මෛත්රී ජනාධිපතිවරයාට අවශ්යව ඇත. පොළොන්නරුවේ ශ්රම බළකායෙන් උපරිම ඵල නෙළා ගත හැක්කේ ද එයට උචිත කෘෂි ව්යාපෘතීන්ගෙනි. පොළොන්නරුව දිස්ත්රික්කයට අදාළ සමාජ, ආර්ථික ගැටලු හඳුනාගනිමින් ඒ ප්රදේශවල ජීවත්වන ජනතාවට උසස් ජීවන තත්ත්වයක් ලබාදීම මෛත්රී ජනාධිපතිවරයාගේ දැක්ම වී තිබේ. පුබුදමු පොළොන්නරුව ව්යාපෘතිය මේ ප්රදේශයට දැවැන්ත සංවර්ධන ප්රගතියක් අත්පත්කර දී තිබේ.
ශ්රී ලංකාවේ පළමු මහා පරිමාණ හරිත ආයෝජනයත් සමඟ ඇතිවන සමාජ ආර්ථික ප්රතිලාභ පොළොන්නරුව ජන ජීවිත ඉමහත් පෙරළියකට ලක් කරනු ඇතැයි ද නිසැකව ම සඳහන් කළ හැකි ය. ග්රාමශක්ති ජනතා ව්යාපාරය හා ස්ටාර්ච් ඉන්ඩස්ට්රීස් සමාගම් එක්ව ඒ අලුත් බලාපොරොත්තු වැලිකන්ද ගොවියන්ට පමණක් නොව පොළොන්නරුව ඇතුළු උතුරු මැද ප්රදේශයට ම ලබා දී තිබේ. මෛත්රී ජනාධිපතිවරයා මේ මොහොතේ ශ්රී ලාංකික දේශපාලන සංග්රාම භූමියෙන් තාවකාලිකව විතැන්ව නිර්පාක්ෂික ප්රතිපදාවක නිමග්නව ඔවුන් විසින් දියත් කරන ලද ග්රාමීය සංවර්ධන ව්යාපෘති පිළිබඳ පසුවිපරමක ද නිරතව සිටියි.