“ ක්‍රෑක් ..... ක්‍රෑක් ..... ක්‍රෑක් ..... ක්‍රෑක් ......”
සියක්කාරයන් රැළ වෙතින් පිට වන්නේ එබදු වූ හඬක් පමණි. එසේ වුවත් අවට සිදුවන දේ පිළිබඳව ඔවුන් සියල්ලන්ම පසු වන්නේ හොඳ අවධානයෙනි. ආගන්තුක වූ හඩක් කන වැකුණු ඇසිල්ලේ සියල්ලෝම එක්වනම නිහඬ වෙති. නිරතව සිටි කාර්යය, ආහාර බුදීම මඳකට නවතා යමකට ඇහුම්කම් දී හිඳින හැඩයි. ආගන්තුක හඬ යටපත් ව යළිත් පරිසරය නිහඩ වූ කල ඔවුහු යළිත් සුපුරුදු කාර්යයට ප්‍රවිෂ්ටව හිඳිති.
අවමය තුන් දහසේ සිට උපරිමය විසිදහසක්, තිස් දහසක් වුවද විය හැකි සියක්කාරයෝ සෑම විටෙකදීම විසල් වූ රංචු වශයෙන් ගැවසීමටම ප්‍රිය කරති. තමන් උපන් බිමේ සිට පර්යටන බිම් සොයා මේ අය ඇදී එන්නේද මේ ආකාරයේ විසල් රැළක් ලෙසටයි. ඒ අතරේ තම නිජබිම මතදී කැදලි තනා බිජු දමා පැටවුන් තනා උස් මහත් කර ගත් පැටවුන් වර්ධනය වී වැඩිවියට පත් නොවූ ගැටවරයින් සේ රංචු අතරේ ඒ මේ අත යන්නේ සැමගේ අවධානය දිනා ගනිමින්ය. මේ නවකයින්ගේ මග පෙන්වන්නන් බවට පත් වන්නේ අත්දැකීම් බහුල කුරුල්ලන්ය.
සියක්කාරයන්ගේ නගරය
සියක්කාරයින්ගේ රැළක් යනු පවුල් ඒකක කිහිපයකින්ම සැදුම් ලත් විසල් වු කණ්ඩායමකි. මෙම විශේෂයට අයත් පක්ෂීන්ගේ කැපී පෙනෙන හැසිරීම් රටාවක් වන්නේ උපන්දා සිට ජීවිතයේ අවසානය දක්වාම සියල්ලම එකටම සිදු කිරීම, නැතිනම් අන්නෝන්‍ය සබැදියාව ප්‍රකට කිරීමය. සියක්කාරයින් එකට සිටින කල එවැනි වු ස්ථානයන් හදුන්වන්නේ සියක්කාරයින්ගේ නගරයක් (Flamingo Cities) යන අනුවර්ත නාමයෙනි.
යාපා පටුන නම් වු කටුක දේශගුණික තත්වයන් සහිත කලාපයකට වුවද සොබාදහමේ කාරුණිකත්වය සැමදා හිමි බවට වන ජීවමාන වු සාක්ෂියක් ලෙසින් කලපු ජලජ පරිසර පද්ධති ඇසුරේදී විසල් වු රැළක් සේ විහගුන් එක්ව මවනා චිත්‍රය සැබැවින්ම මනරම්ය. උතුරුකරය විචිත්‍රත්වයෙන් පිරවීමට සමත්කම් පාන්නන් පිළිබඳ පුවත පරිසර ලෝලීන්ට නම් නොරහසකි. එබැවින්දෝ සංචාරක ආකර්ෂණය වැඩි වශයෙන් දිනාගත් පාරිසරික කලාපයක් බවට උතුරුකරය පත් වන්නේ නිසගයෙනි. සංචාරක පක්ෂීන් අපේ රටට පැමිණෙන සමය වන්නේ ඊසාන දිග මෝසම සක්‍රීය වන කාලයයි. ඒසේ පැමිණෙන මේ කුරුලු අමුත්තෝ යළිත් සිය රටවල් බලා පියාසර කිරීම ආරම්භ කරන්නේ වසරේ මැද භාගයේදීය. එසේ වුවත් වර්තමානය වන විටදී කුරුලු ලෝලීන්ගේ පාරාදිසයක් ලෙසට වසරේ මුල - මැද - අග බේදයකින් තොරව උතුරුකරය පත් ව ඇත. කුරුලු ලෝලීන්ගේ සිත් ආකර්ෂණය කර ගත් විහඟ කාණ්ඩයක් ලෙස සියක්කාරයෝ ප්‍රකට වෙති.
විසල් රංචු මැද පෙම් ජවනිකා
විසල් වු රංචුවක් වුවද ඒ අතරෙත් වෙන් වෙන් වශයෙන් ගෙන හුදෙකලාවේ රස විඳිය හැකි සාමාජිකයින්ද සිටිති.
මන්ද යත් ඒ බව සනාථ කරමින් දෝ දෙදෙනෙක් විසල් වු රංචුවෙන් මදකට ඈත් ව හිඳ පෙර පෙම් ජවනිකාවක නිරතව හිඳිති. ස්වකීය දිගු බෙලි සර්පයන් හා සමැව එකිනෙක වෙළා ගනිමින්, වක් හොටවලින් සිප ගනිමින්, එකි නෙකා පසු පස එළවමින් රඟන රැගුමන් නිහඬ කලපු පරිසරයට එක් කර ඇත්තේ අපූර්වත්වයක් නොවන්නේද? ඒ කෙසේ වෙතුදු කෙතරම් පෙර පෙම් අනග රැගුම් රැගුවත් මොවුහු කිසි කලෙකදීවත් තම ජන්ම බිමෙන් පිටතදී - එනම් පර්යටනය සදහා තෝරා ගත් විදේශීය රටක් තුළදී අභිජනනය සිදු නොකරයි.
එනම් සංක්‍රමණික විහගුන් යනු වසරේ එක් කාල සීමාවකදී පමණක් ස්වකීය නිජ බිම් අතැර තවත් රටකට සංක්‍රමණය කර එහිදී ආහාර - පානා දිය බුක්ති විද යළිත් අභිජනන කටයුතු සඳහා තම නිජබිම වෙතට පෙරළා පැමිණෙන කුරුල්ලන් හැදින්වීමටද භාවිතයට ගත හැකි වදනකි.
අභිජනන කටයුතු
සාමාන්‍යයෙන් සෙන්ටී මීටර් 110 ත් 150 ත් අතර වු වර්ධනීය තත්ත්වයක් වැඩුණු සියක්කාර පක්ෂියෙකුට හිමි වේ. සියක්කාර කිරිල්ලියක් වරකට බිත්තර 03-04 ත් අතර ප්‍රමාණයක් දමන අතර ඒ සදහා තම ජන්ම බිමම තෝරා ගනි. තෙත් පසෙහි (මඩ) උස් වු ගොඩැල්ලක් තනා ඒ මත බිජු ලන අතර මා පිය දෙපාර්ශවයම පැටවුන් පෝෂණය සිදු කරති. ලවණ හෝ කිවුල් දිය සහිත නොගැඹුරු කලපු ආශ්‍රිතව ගැවසෙන මේ පක්ෂීන්ට සිංහල ව්‍යවහාරයේ සඳහන් වන පරිදි සියක්කාරයා යන නම භාවිතයට පැමිණ ඇත්තේ ජලයේ බැස සෑම දෙනාම එකාවන්ව දිගු බෙලි වතුර යට ඔබා ගෙන එක පැත්තට ගමන් කරන්නේ සී සෑමේ ක්‍රියාකාරකම් ජනිත කරවමිනි. සුදු පැහැ පසුබිමේ දිව යන රෝස මුසු රතු පැහැ වර්ණයන් සියක්කාරයන්ගේ සිරුරු වෙත ලබා දි ඇත්තේ අපූර්වත්වයකි. අපේ රටට පැමිණෙද්දි සුදු පැහැ සදිසි කුරුල්ලන් පෙරළා තමන්ගේ නිජබිම් වෙත යන්නේ රතු සහ රෝස පැහැයෙන් බබළමිනි. එයට හේතුව වන්නේ මොවුන්ගේ ආහාර පුරුදු වේ.
සියක්කාරයින් ජලයේ හිස ඔබා ගෙන ජලය කලතමින් සොයන්නේ කුඩා මෘද්වංගීන්, කවචයන්, නීලහරිත බැක්ටීරියා වැනි කුඩා ශාක විශේෂයන්ය. එම ආහාර වර්ග ජලයෙන් පෙරා ගැනීම සඳහාම සියක්කාරයින්ගේ හොටද හැඩ ගැසී ඇත. හොටේ උඩු හා යටි හනු දෙකේ දාරවල එකිනෙකට සමාන්තරව පිහිටා ඇති සූස්තර (Lamellae) අගින් නැමි වක් වු හොට තුළට ගන්නා ජලයේ ඇති පෙර සඳහන් කළ ආහාර වර්ග පෙරා බුදීම සඳහා මෙම පිහිටීම වැදගත් වේ.
ගිනි සිළු
මේ සූස්තර මඟින් ජලය ඉවතටත්, ඉතිරි වන ආහාර හොට හරහා මුව තුළටත් රැගෙන යාමට පිහිට වන්නේ දිගු දිවයි. එහි ක්‍රියාකාරීත්වය පිස්ටනයක් බදු වේ. කූණිස්සන්, කවචමය ආහාර ආදියේ අන්තර්ගත කැරටිනොයිඩ් වර්ණක මගින් සියක්කාරයාට දිලෙන සුලු රෝස, රතුවන් පැහැය ලබා දේ. සියක්කාරයා හැදින්වීමට ඉංග්‍රීසි වහරේ එන Flamingo යන්න භාවිතයට පැමිණ ඇත්තේ ස්පාඤඤ Flamenco උරුවයි. ලතින් බසින් Flamma යන්නෙන් අදහස් වන්නේ දැවෙන ගිනි (Flame) සිළුවයි. වර්ණවත් වු සියක්කාරයින්ද එකට එකපෙළට දිස් වන්නේ දැවෙන ගිනි සිළු හා සමවය. උතුරු අර්ධගෝලය තුළ ව්‍යාප්ත සීතල අධික භූමි ඇසුරේ දිවි ගෙවන බොහෝ විහග විශේෂයන්ගේ සංක්‍රමණික ගොදුරු බිම වන්නේ අපේ රටයි කියන පණිවිඩය ශ්‍රී ලාංකික අප සැමටම ආඩම්බරයක් නොවන්නේද? අවැසි වන්නේ මේ ආඩම්බරය සදා කල් සුරක්ෂිත කර ගනු වස් පරිසර හිතකාමීත්වය පෙර දැරිව කටයුතු කිරීමට සිතට ගැනීමයි.
සේයාරූ - රෝහිත ගු ණවර්ධන
