දිනය නිශ්චිතවම මතක නැතත්, ඒ 2017 වර්ෂයේ ලෝක ළමා දිනයට පුංචි දරුවන් සුදානම් වෙමින් සිටින සැප්තැම්බර් මාසයේ දිනයකි. ඊට දින කිහිපයකට පෙර අධ්යාපන ඇමැති අකිල විරාජ් කාරියවසම් මහතා හදිසියේ මාධ්ය සාකච්ඡාවක් කැඳවා තිබිණි. ඒ සඳහා සිළුමිණ පුවත්පත වෙනුවෙන් මමද සහභාගි වුණේමි. කාරණාව වූයේ සමස්ත පාසල් දරුවන් වෙනුවෙන් ලබාදීමට සූදානම් වන රක්ෂණාවරණයක් පිළිබඳය. පාසල් දරුවන් වෙනුවෙන් රජය හඳුන්වා දෙන “ සුරක්ෂා“ රක්ෂණාවරණය ගැන අපි එදා ප්රවෘත්ති විශේෂාංග සැකසුවෙමු
ඉන් දින කිහිපයක් ඇවෑමෙන් මේ අපූරු ත්යාගය දරුවන්ට පිරිනැමුවේ 2017 ඔක්තෝම්බර් මස 1 වැනිදා යෙදී තිබුණු ලෝක ළමා දිනයේදීය.
“අම්මේ මෙන්න අපේ සුරක්ෂා කාඩ් එක. මේක අම්මලාට දෙන්න කිව්වා“
ඊට මස කිහිපයකට පසු මාගේ දරු තිදෙනා මා අතට ලබා දුන්නේ කහපාටට හුරු කාඩ් පත්ය. මා ඒවා සුපුරුදු පරිදි බැංකු කාඩ්පත් තැන්පත් කරන ගොනුවේ තැන්පත් කළා මිස ඊට වැඩි යමක් ඒ ගැන සිතුවේ නැත. රැකියා ආයතනයෙන්ද රක්ෂණාවරණ හිමි මට එහි ඇති වටිනාකම වැටහුණේ නැත.
පසුගිය දිනක මාගේ කුඩා දරුවා හදිසියේ අසනීප වූයේ නොසිතු පරිදිය. දරුවාගේ රෝග තත්ත්වය තරමක් දරුණු අතට පත් වූයෙන් වහා දරුවා රෝහල්ගත කරන මෙන් උපදෙස් ලැබිණි. දරුවා වහාම කොළඹ පෞද්ගලික රෝහලකට ඇතුළත් කරන ලදි . වසරේ අවසාන කාල නිසා ආයතනික රක්ෂණ මුදල් ද වියදම් වී හමාරය.
“ ඇයි ඔයාලගේ රක්ෂණ ගැනම හොය හොයා ඉන්නේ. ලංකාවේ හැම දරුවෙකුටම දැන් රුපියල් ලක්ෂ 2ක රක්ෂණයක් තියෙනවනේ. දරුවා ඒ රක්ෂණයෙන් ඇතුළත් කරන්න. දරුවෙක් ඒ රක්ෂණයෙන් ඇතුළත් කරන්නට කිසිම කරදරයක් නැහැ..“ රෝහල අපට පැවැසීය.
මා සතුව දරු තිදෙනාටම රුපියල් ලක්ෂ 6ක රක්ෂණාවරණයක් තිබෙන බව පසක් විය. ඒත් මේ ලෙඩේට ඒ රක්ෂණයෙන් ආවරණයක් තියෙනවාද? අපිට කොටසක් පමණක් ගෙවයිද? ඉතිරි මුදල අතින් ගෙවන්න වෙයිද? .“
මම සුරක්ෂා රක්ෂණාවරණයේ නොදත් තතු රෝහලෙන් විමසීමි.
“ දරුවට ලක්ෂ දෙකක රක්ෂණයක් තියෙනවා. ඕනෑම රෝගයකට ඇතුළත් වෙලා කිසිම මුදලක් නොගෙවා නේවාසික ප්රතිකාර ලබාගන්න පුළුවන්. රෝහල් බිල අතින් ගෙවන්න අවශ්ය නැහැ. රුපියල් ලක්ෂ දෙකට වැඩි වුණොත් විතරයි ඉතුරු මුදල අතින් ගෙවන්න වෙන්නේ. ඔයාලා දරුවාඇඩ්මිටි කරලා රක්ෂණ ආයතනයට දැනුම් දෙන්න... “
කොච්චර දෙයක්ද? මා පමණක් නොව බොහෝ මවුපියන් මේ රක්ෂණාවරණයේ සැබෑ තත්ත්වය නොදන්නවාට සැකයක් නෑ. දරුවකු රෝහලකට නේවාසික ප්රතිකාර සඳහා ඇතුළත් කිරීමේදී Allianz රක්ෂණ ආයතනයට අවශ්ය වන්නේ දරුවාගේ පාසල, දරුවාගේ නම, පාසලට ඇතුළත් වීමේ අංකය හා සංගණන අංකය පමණි. දරුවා කාඩ්පත ලබාගෙන නැති විටක පවා කිසිදු විමසීමක් නොකර ඇතුළත් වීමේ හැකියාව ලැබෙයි. වත්මන් රජය ලබා දුන් මේ රක්ෂණාවරණයේ වටිනාකම මුදලින් මිල කළ නොහැකි බව මට පසක් විය.
දරුවා කොළඹ ප්රධාන පෞද්ගලික රෝහලකට ඇතුළත් කෙරුණේ අධ්යපන ඇමැති අකිල විරාජ් කාර්යවසම් මහතා දරුවන්ට ප්රදානය කළ සුරක්ෂා රක්ෂණාවරණයට පින්සිදු වන්නටය. දරුවා පහසුකම් සපිරි රෝහලක නැවැති විශේෂඥ ප්රතිකාර ලබන්නට විය. ලංකාවේ ඉහළම ළමා වෛද්යවරු දරුවා පරීක්ෂා කර ප්රතිකාර කරන්නට වූහ. දරුවාගේ රෝගය වෙනුවෙන් ලබාදුන් ඖෂධ මිල අධිකය. කරලකට 1500කි. රෝග පරීක්ෂණ ගාස්තු වෙනුවෙන් වැය වූයේ ඊට වඩා වැඩි මුදලකි. දින පහක ප්රතිකාර කාලයකින් පසු දරුවා සුව විය. රෝහල් බිල රුපියල් ලක්ෂ එකහාමාරකට ආසන්න විය. කිසිදු විමසීමකින් තොරව සම්පූර්ණ බිල සුරක්ෂාවෙන් ගෙවිණි. මගේ ඉහේ මලක් පිපිණි.
“ ඔයාලා දැන් රක්ෂණ ආයතනයට දැනුම් දෙන්න...“
එක් දරුවෙකු වෙන්වෙන් රුපියල් ලක්ෂ ගණනකට රජය උර දෙයිද? මා සිතුවිල්ල නිවැරදි නොවීය. රෝහල හා රක්ෂණා ආයතනය අතර සියලු ගනුදෙනු සිදු වූයේ ඔන්ලයින් ක්රමයටය. කිසිදු ගනුදෙනුවකට ලියකියවිලි පිරවීමකට මැදිහත් විමක් අවශ්ය නොවිණි. සුළු මොහොතකින් රෝහල් කාමරයට පැමිණි හෙදියක පැවැසූයේ “ ඔයාලට දැන් යන්න පුළුවන්. සියලු බිල්පත් සුරක්ෂා රක්ෂණාවරණයෙන් ගෙවලා තියෙන්නේ. දරුවට මේ අවුරුද්දට ගන්න තවත් මුදල් ඉතුරු වෙලා තියෙනවා. ලබන අවුරුද්දේ නැවතත් ලක්ෂ දෙකක් එකතු වෙනවා. ඒ වගේම දරුවට ගෙදර ගිහින් දෙන්න අවශ්ය හැම බේතකටම රක්ෂණාවරණයෙන් ගෙවලා තියෙන්නේ...“
සිතට දැනුණේ වචනයෙන් කිව නොහැකි සහනයකි. කිසිදා මෙවැන්නක් බලාපොරොත්තු වූයේ නැත. සුරක්ෂා රක්ෂණාවරණය ගැන පුවත්පතට කොතෙකුත් ලිවද මේ වරප්රසාදයේ ඇත්ත ඇති සැටියෙන් අත්වින්ඳේ දැන්ය. පාසල් යන මාගේ දරු තිදෙනා කොතරම් සුරක්ෂිතදැයි මට සිතුණු වාර අනන්තය. දරු තිදෙනෙක් වෙනුවෙන් රුපියල් ලක්ෂ 6ක රක්ෂණාවරණයක් මා සතුව ඇති බව සිතෙන විට මට දැනෙන්නේ පුදුමාකාර අස්වැසිල්ලකි.
ලෝකයේ බොහෝ රටවල පාසල් දරුවන් වෙනුවෙන් පිරිනැමෙන රක්ෂණාවරණ ඇත. නමුත් ඒ සියල්ල ඇත්තේ දරුවාගේ පාසල් කාලය තුළ බව දනිමි. ඒ පාසල් රක්ෂණය දරුවන්ගේ නිවාඩු කාලයට ,පාසල අහවර වු පසු ලැබෙන්නේ නැත. එහෙත් සුරක්ෂා රක්ෂණාවරණයෙන් අපේ දරුවන් දවසේ පැය 24 ම ආවරණයක් ලබන බව අපි නොදන්නෙමු. එසේම වසරේ දින 365 දීම දරුවා වෙනුවෙන් ආරක්ෂිත රැකවරණයක් සැපයෙයි.
පහත සත්ය සිදුවීම් ඔබ වෙත වාර්තා කරන්නේ මා ලද අත්දැකීම වඩාත් ඔබට සනාථ කරන්නටය.
ඇය කුරුණෑගල පෞද්ගලික පාසලක අධ්යාපනය ලබන දරුවෙකි. මේ තොරතුරු අපට ලබා දුන්නේ ඇයගේ මාමා කෙනෙකි. දරුවා මේ වන විටත් දරුවා රෝහල්ගත වී ප්රතිකාර ලබන අතර ඇය ගොදුරු වී ඇත්තේ පිළිකා රෝගයකටය.
“ දරුවා ඉන්දියාවට ගෙනගිහින් ඔපරේෂන් එකක් කරන්න අවශ්ය වුණා. ඒ සඳහා අවශ්ය වන රුපියල් මිලියන 1.8ක් දරුවට දුන්නේ සුරක්ෂා රක්ෂණවරණයෙන්. එය ලබාගන්න අධ්යාපන අමාත්යාංශයේ ඉහළ නිලධාරීන් උදවු වුණා. කිසිම කරදරයක් නැතුව දරුවා ඉන්දියාවට ගෙනිහින් ඔපරේෂන් එක කරන්න මුදල් ලැබුණා“ ඒ දරුවාගේ නම සඳහන් කිරීමට අකමැති වූ පෞද්ගලික පාසලක අධ්යාපනය ලබන දරුවෙකුගේ ඥාතියෙකි.
මේ තවත් එවැනිම සත්ය කතාවකි. මේ දරුවා අධ්යාපනය ලබන්නේ කොළඹ ප්රධාන පාසලකය. එසේම පසුගිය උසස් පෙළ විභාගයට පෙනී සිටින පුතෙකි. දරුවා වෙනුවෙන් සුරක්ෂා රක්ෂණාවරණ ප්රතිලාභ ලබාගත් ආකාරය ගැන කිවේ ඔහුගේ මවය.
“අපිට වෙන රක්ෂණාවරණ තිබුණා. ඒත් දරුවා අවුරුදු 18 සම්පූර්ණ නිසා ඒවා ලබාගන්න බැහැ. දරුවාට අසනීප වෙන විට සුරක්ෂා රක්ෂණාවරණය තිබුණේ ලියාපදිංචි වන අවදියේ. ඒ නිසා අපි හිතුවා දරුවාට රක්ෂණාවරණය ගන්න නොලැබෙයි කියලා. ඒත් මේ වසරේ මැයි මාසයේ දරුවා අසනීප වී පෞද්ගලික රෝහලකට ඇතුළු කළා. ලියාපදිංචි මට්ටමේ තිබුණත් දරුවාට ගිය රුපියල් ලක්ෂ දෙක කිසිම අඩුවක් නැතුව ගෙව්වා. අපිට රක්ෂණා ආයනයට කතා කර කර මහන්සි වෙන්න සිදුවුණේ නැහැ. මේක අපිට පුදුම සහනයක් වුණා....“ ඇය පැවසුවාය.
මේ මව බුද්ධිකාය. සිය දියණිය අධ්යාපනය ලබන්නේ කොලඹ බාලිකා විදුහලක වන අතර ඇය පිළිකාවක් නිසා පිඩා විඳියි.
“ මගේ දුවගේ පිළිකාවට අවශ්ය ප්රතිකාර වෙනුවෙන් රක්ෂණවලට හරියට රස්තියාදු වුණා. පස්සේ අපිට සුරක්ෂා රක්ෂණාවරණයෙන් ප්රතිලාභ ගන්න පුළුවන් කියා ආරංචි වුණා. දරුවගේ පරීක්ෂණවලට රෝහල්වලට ගෙවූ සියලු මුදල් අපිට සුරක්ෂාවෙන් ලැබුණා. ඒ මුදල රුපියල් ලක්ෂ 2ක්. සති දෙකක් ඇතුළත ගෙවූ සියලු මුදලම අපේ ගිණුමට ලැබුණා. “
මේ ප්රතිලාභ හිමි වන්නේ නගරයේ දරුවන්ට පමණක් නොවේ . ගම්බද පාසල් දරුවන්ටද අද නගරයේ සුපිරි පසහුකම් ඇති රෝහලකට ඇතුළු වී නොමිලයේ ප්රතිකාර ලැබිය හැකිය. ලංකාව පුරා විසිරි ඇති පෞද්ගලික රෝහල් 60කට කිසිදු ගෙවීමකින් තොරව ඇතුළත් වි කිසිදු ගෙවීමක් නොගෙවා ප්රතිකාර ලබා පිටවිය හැකි බව ඔබ නොදන්නේද?
“අපි දියතලාවේ. පුතා ලබන වසරේ උසස් පෙළ කරනවා. බෝල ගහන්න ගිහින් පුතාගේ කැකුල කැඩුණා. දරුවා කළුබෝවිල, මහරගම අපේක්ෂා රෝහල්වල නතර කළා. ඒ සඳහා වියදම් වු සියලු මුදල රුපියල් ලක්ෂ 2ක් සුරක්ෂාවෙන් අපිට ලැබුණා. මුදල් ලබා ගන්න කිසිම කරදරයක් වුණේ නැහැ. රජයේ රෝහල්වල නතර වුණාට දවසට රුපියල් 3000 ගණනේ ලැබුණා. තාමත් දරුවා ප්රතිකාර ගන්නවා. ඒ මුදලුත් ඉදිරියේදි අපිට ලැබෙයි කියා සිතනවා....“ එසේ පැවැසූයේ සුරක්ෂා රක්ෂණාවරණයෙන් ප්රතිලාභ ලබා ගත් දරුවෙකුගේ පියෙකුය.
ඇය ගාල්ලේ කනිටු විදුහලක විදුහල්පතිනියයි. ග්රාමීය පාසලක විදුහල්පතිනිය වන ඇයගේ දරුවාද මේ රක්ෂණාවරණයෙන් ප්රතිලාභ හිමි කරගෙන ඇත. “ අනෙකුත් රක්ෂණ සමාගම්වලට වඩා වේගයෙන් මේ රක්ෂණ සමාගම මුදල් ගෙවීම් කරනවා. ඒ අයට ඡායාපිටපත් ලබා දුන්නත් ප්රමාණවත්. අපේ පාසලේ දරුවන් දෙන්නෙකුට හොඳ රෝහලක නැවතිලා ප්රතිකාර ලබාගන්න සුරක්ෂාවෙන් සෘජු ගෙවීම් කළා. මේක දරුවන්ට විශාල සහනයක්. මගේ දුවගේ ශල්යකර්මයක් කළා. දරුවාගේ ඒ ශල්යකර්මයට රුපියල් ලක්ෂ දෙකකට වඩා මුදලක් ලැබුණා. ගමේ දරුවන් මේ රක්ෂණාවරණයෙන් විශාල ප්රතිලාභ ලබාගන්නවා. එත් ගොඩාක් දෙනෙකු මේ පිළිබඳ දැනුම්වත් වෙලා නැහැ....“ ඇය පවසන්නීය.
එය සත්යකි. බොහෝ දෙනෙකු අධ්යාපන ඇමැතිවරයා දරුවන්ට ලබාදුන් මේ වරප්රසාදයට හිමි ප්රතිලාභ ගැන දන්නේ නැත. ඒ නිසා තවමත් දරුවන්ගේ අසනීපයකදී කනකර උකස් කර හෝ වියදම් කරති.
“ සුරක්ෂා සිසු රක්ෂණාවරණයෙන් මේ වන විට සිසුන් 40,000කට රුපියල් මිලියන 1,600ක් ඉක්මවා ප්රතිලාභ ලබා දී තියෙනවා. මවුපිය අහිමි වීමක දී සිසු දරුවන්ගේ අධ්යාපනය අඩාළ වීමට ඉඩ නොතැබීමටත්, අසාධ්ය රෝග, හදිසි අනතුරු අවස්ථා මෙන් ම දරුවන්ගේ සෞඛ්යා ආරක්ෂාව වෙනුවෙන් තීන්දු තීරණ ගැනීමට සිදු වන ඕනෑම අවස්ථාවක දී ඒ සඳහා ශක්තිමත් ව මුහුණදීමටත් සුරක්ෂා සිසු රක්ෂණාවරණයෙන් ලැබෙන්නේ සුවිසල් පිටුබලයක්.
මේ වසරේ සිට සුරක්ෂා රක්ෂණාවරණයේ ප්රතිලාභ වැඩි කිරීමට පියවර ගත්තා. රජයේ රෝහල්ගත වන දිනකට ගෙවන මුදල රුපියල් 1,000 සිට රුපියල් 3,000 තෙක් වැඩි කිරීම, බාහිර ප්රතිකාර යටතේ ශ්රව්ය-දෘශ්ය උපකරණ, ඇස් කන්නාඩි වැනි උපකරණ ලබා ගැනීමේ හැකියාව, විශේෂඥ වෛද්ය සේවා ගාස්තු ලබාගැනීමට හැකියාව, මුදල් ගෙවීමකින් තොර ව රෝහල්ගත වීමේ හැකියාව, රෝහල්ගත වීමට පෙර දින 7ක් සහ රෝහලෙන් පිට වූ පසු දින 14ක් බෙහෙත් ලබාගැනීමේ හැකියාව ද ලබාදීම ඒ අතර ප්රධානයි.
රජයේ හෝ පෞද්ගලික රෝහලක නේවාසික ප්රතිකාර සඳහා රුපියල් 200,000ක් ද, බාහිර ප්රතිකාර සඳහා රු.20,000 ක් ද, අසාධ්ය රෝග ප්රතිකාර සඳහා රුපියල් 200,000ක සිට අවශ්යතාව අනුව ඒ සඳහා වැය වන මුළු මුදල ගෙවනවා. පූර්ණ අකර්මණ්යතාවක දී රු. 200,000ක් ද, අර්ධ අකර්මණ්යතාවක දී රු.150,000 සිට රු. 200,000 ක් දක්වා ද, මවුපිය වියෝවක දී එක් අයකුට රු. 200,000 බැඟින් දෙදෙනාට ම ආවරණය ද, (පවුලේ සියලු දරුවන් සඳහා වෙන් වෙන් ව) ශිෂ්ය වියෝවක දී රු. 150,000 ක මුදලක් ද ප්රතිලාභ ලෙස පිරිනැමෙනවා. කිසිම කෙනෙක් නොකරපු මෙය රජයෙන් දරුවන්ට දුන් විශාල ප්රතිලාභයක්“ ඒ අධ්යාපන අමාත්ය අකිල විරාජ් කාරියවසම් මහතාය.
සුරක්ෂා ප්රතිලාභ ලබාගැනීමේ දී යම් ප්රමාදයක් හෝ වෙනත් ගැටලුවක් මතු වේ නම්, අධ්යාපන අමාත්යාංශයේ පාසල් සෞඛ්ය හා පෝෂණ ශාඛාවේ 0112369369, 0113641555,0112784872 යන දුරකතන අංකවලට අමතා ඒ සම්බන්ධ ව දැනුම් දෙන ලෙස ද අමාත්යවරයා කියයි.
“අපිත් සමඟ සම්බන්ධ වුණු රෝහල් 60ක නේවාසික ප්රතිකාරවලදී සෘජු ගෙවීම් කරන්නේ. ඉහත රෝහල්වලට ඇතුළත් වී ප්රතිකාර ලබාගෙන ගෙවීමක් නොකර පිට වී යා හැකියි. ඊට අමතරව එම රෝහල්වලට ඇතුළත් වී ගෙවූ බිල්පත් මුදල් සති දෙකක් ඇතුළත ආපසු ලබා ගත හැකියි. විශේෂඥ වෛද්ය ප්රතිකාර ගත්තොත් ඒවාත් ගෙවීම් කරනවා. විශේෂඥ වෛද්යවරුන් සඳහා කරන චැනල් ගෙවීම් අනිවාර්යයෙන් නැවත ගෙවනවා. මේ සඳහා බිල්පත හා ඒ සඳහා වූ අයැදුම් පත්රය පුරවා ළඟම පිහිටි Allianz රක්ෂණ ආයතනයට හෝ අධ්යාපන අමාතයාංශයට ගෙනැවිත් බාර දිය යුතු යි. ඒ සමඟම භාරකරුගේ හෝ මවුපියන්ගේ බැංකු පොතේ මුල් පිටුවේ ඡායා පිටපතක් ඇමිණිය යුතු වන්නේ අදාල මුදල් බැර කරන්න. මේ රක්ෂණ හිමිකම අධ්යාපන අමාත්යාංශයේ සංගණන අංකයක් හිමි පෞද්ගලික, ජාත්යන්තර, විශේෂ පාසල් වලට වගේම පිරිවෙන් වලටත් ලබා ගත හැකියි. “ ඒ අධ්යාපන අධ්යක්ෂ ( සෞඛ්ය හා පෝෂණ ශාඛාව) රේණුකා පීරිස් මහත්මියයි.
දැන් දරුවන්ගේ සෞඛ්යය ගැන මවුපියන්ට කවර බරක්ද? දරුවන්ගේ වගකීම වත්මන් රජය දෝතට ගෙන හමාරය. කිසිදු කලක නොඇසූ අසනීප දැන් දරුවන්ට වැලඳෙයි. සුළු අසනීපයකට වුවද විශාල වැයක් දරන්නට සිදු වෙයි. එවන් මොහොතක ‘සුරක්ෂාව‘ අම්මලාට මහත් හයියකි. අස්වැසිල්ලකි. ?