දශක කිහිපයකට පසුව ජනතා විමුක්ති පෙරමුණ ජනාධිපති අපේක්ෂකයකු ඉදිරිපත් කර තිබේ. ඒ ජනතා විමුක්ති පෙරමුණ මූලික කරගත් ජාතික ජන බලවේගය හරහාය. ජාතික ජන බලවේගයේ ජනාධිපති අපේක්ෂකයා ලෙස ඉදිරිපත්ව ඇති ජනතා විමුක්ති පෙරමුණේ නායක අනුර කුමාර දිසානායක මහතා අද සිළුමිණ සමඟ දේශපාලන සංවාදයට එක් වේ.
• ඔබ ජනාධිපති අපේක්ෂක ධුරයට තරග කරන මාලිමාවට, නැත්නම් ජාතික ජන බලවේගයට තවත් ජනාධිපති අපේක්ෂකයන් දෙදෙනෙක් එකතුව සහාය දෙන බවට වාර්තා වනවා...
එවැනි එකතු වීමක් සිදු වන්නේ නැහැ, අපි උත්සාහයක් දැරුවා පවත්නා විකල්ප දේශපාලන කඳවුරු එක් තැන් කරන්න නමුත් ජනාධිපතිවරණයේදී එවැන්නක් සිදු වන්නේ නැහැ, ඉදිරියේදී ඒ කියන්නේ ජනාධිපතිවරණයෙන් පසුව අපි උත්සාහයක් දරණවා මේ විකල්ප එක් තැන් කරන්න.
• ඒ කියන්නේ ඒ අය සමඟ සාකච්ඡා කර තිබෙනවාද ඉදිරියේදී යළි එක්වීමක් සම්බන්ධව...
අපි හැමදාම මේ රට වෙනස් කිරීමට උත්සාහ දරණ, රටේ ගමන් මඟ වෙනස් කරමින් ජනතා හිතවාදී රටක් බිහි කරන්න උත්සාහ දරණ ප්රගතිශීලි, වාමාංශික දේශපාලන සංවිධාන හා පුද්ගලයින් සමඟ එක්ව කටයුතු කරන්න සාකච්ඡා කළා. ඉදිරියේදීත් අපි උත්සාහ කරනවා ඒ විකල්ප දේශපාලන කඳවුරු එක් තැන් කරන්න.
• ප්රධාන පක්ෂ දෙකේ අපේක්ෂකයින් බලයට පත් වීම සම්බන්ධව මේ වන විට විවිධ මත සමීක්ෂණ පළ වෙනවා, ජාතික ජන බලවේගය සම්බන්ධව එවන් මත සමීක්ෂණයක් සිදු කර නැත්ද?
මම හිතන්නෙ අපි ලෙහලා බලන්න තියෙන මල්ල ඔබලා බලන්න අවශ්ය නැහැ, එම නිසා මුදල් විනාශ කරමින්, කලු සල්ලි යොදවා විවිධ සමීක්ෂණ ඕනෑ තරම් කරන්න පුළුවන්. නමුත් අපි ඒ අවස්ථාව ජනතාව දැනුවත් කරන්න යොදා ගන්නවා.
• ඔබ පසුගිය දිනක ප්රචාරක රැලියකදී පැවසුවා දුප්පත්කම නැති කිරීමට හැකි බව, කොහොමද දුප්පත්කම නැති කරන්නේ....
විශේෂයෙන්ම අපි හිතනවා ජනතාවට තිබෙන ආර්ථික ප්රභවයන් පළමුව සංවර්ධනය කළ යුතුයි කියා, උදාහරණයක් ලෙස දක්වනවා නම් ධීවර ජනතාව නඟා සිටුවන්න බැහැ ධීවර ක්ෂේත්රය සංවර්ධනය කරන්නේ නැතිව, ඒ ඒ ආර්ථික ප්රභවයන් සංවර්ධනය නොකර දුප්පත්කම නැති කරන්න බැහැ. ඒ නිසා පළමුව අපි ගන්නා ක්රියා මාර්ගය තමයි ඒ ඒ ජනතාවගේ ආර්ථික ප්රභවයන් සංවර්ධනය කිරීම. දෙවැන්න සාම්ප්රදායික ආර්ථික ක්රම වෙනුවට නව තාක්ෂණික ආර්ථික ක්රම හඳුන්වා දීම. උදාහරණයක් ලෙස කෘෂිකාර්මික ජනතාවට, ඒ හා සම්බන්ධ ග්රාමීය ජනතා ආර්ථික අවස්ථා නිර්මාණය කළ යුතු වෙනවා. සුළු හා මධ්ය පරිමාණ ව්යවසායකයන් බවට පරිවර්තනය කළ යුතු වෙනවා. ඔවුන්ගේ දරුවන් ලෝකයේ බිහි වන නව තාක්ෂණය හා එක් කළ යුතු වෙනවා. මෘදුකාංග ඇතුළු තාක්ෂණය කරා ඔවුන් යොමු කළ යුතු වෙනවා. එවන් ක්ෂේත්ර ගණනාවක් කෙරෙහි අවධානය නිසි අයුරින් යොමු කළහොත් දුප්පත්කම දුරැලීම අපහසු නැහැ.
• විදෙස් ගතව ඉන්න අයත් ගෝඨාභය රාජපක්ෂ මහතාට ඡන්දය දෙන්න ඇවිත් කියල දැන ගන්නට තිබෙනවා, ඒක පොහොට්ටුවට ලොකු ප්රවණතාවක් නේද?
මම ගුවන් තොටුපොළ පැමිණීම් පරීක්ෂාවට භාජනය කළේ නැහැ. නමුත් මම විශ්වාස කරනවා, විදෙස් ගතව ඉන්න අයද, විදේශයේ ඉදල එන අයද දේශීය අයද කියා වෙනසක් නැහැ, අන්තයක් කරා ගමන් ගන්නා මේ කඳවුරු දෙකම පරාජයට පත් කළ යුතුයි කියා, තව දුරටත් මේ විනාශකාරී කඳවුරු දෙක බලයට පත් කිරීමෙන් ජනතාවට හෝ රටට වන සෙතක් නැහැ.
• හදිසියේම ආණ්ඩුව කරළියට ගෙන ආ මිලේනියම් චැලෙන්ඡ් ගැන ඔබ දරණ අදහස...
විශේෂයෙන්ම මේකට ප්රධාන විවේචන දෙකක් තිබෙනවා. එක් පිරිසක් එහි වාසිය ජනතා සෙත ගැන කතා කරනවා. අනෙක් අය කියනවා මේක ඉතාම භයානකයි රට විනාශ වෙනවා කියා, අපි දේශපාලන වාසි තකා ඒ තැන් දෙකේම නැහැ. විශේෂයෙන්ම අපි හිතනවා ඉඩම් නීති සංශෝධනය කිරීමේ යෝජනාව විශාල අර්බුද මතු කරවන්නක් බව. මේ රටේ ඉඩම් අයිතිය රැදී ඇත්තේ සංකීර්ණ ඉඩම් අයිති ක්රමවේද නිසයි. එම නිසා ඉඩම් අයිතිය සම්බන්ධව ගෙන එන සංශෝධන වලට අපි කිසිසේත්ම එකඟ වන්නේ නැහැ.
• හදිස්සියේම මැතිවරණයක් අස්සේ ආණ්ඩුව මේ යෝජනාව ගෙනාවා, එය දකින්නේ කුමනාකාරයෙන්ද? ඡන්ද ගුණ්ඩුවක්ද?
ඒක ඇත්තටම අහන්න ඕන ගෙනාපු අයගෙන්, මං හිතන්නෙ ඒ හරහා ලැබෙන මුදල් පෙන්නලා ආණ්ඩුව උත්සාහ කරන්න ඇති ග්රාමීය ජනතාවගේ ඡන්දය ගන්න, ඒ වගේම අනෙක් පක්ෂයේ අය උත්සාහ කරනවා ඒ හරහා බිල්ලෙක් මවාපාලා ඒ අයගේ ඡන්ද වැඩි කර ගන්න.
• දෙමළ ජාතික සන්ධානය සජිත් ප්රේමදාස මහතාට සහාය දෙන බව පැවසුවා, තවත් දෙමළ දේශපාලන පක්ෂ රැසක් දැන් දැන් එකතු වුණා, ඔහුට වාසි වැඩියි වගේ පේන්නෙ නැත්ද?
ඒ පක්ෂ එකතු වීම විශේෂයක්වත් අලුත් දෙයක්වත් නෙමෙයි, ඒ සියලුම දෙනා එකම කදවුරක අය. දේශපාලනයේ අලුත් බවක් අපි නම් දකින්නේ නැහැ,
• නමුත් ඔවුන් කලින් කොන්දේසි 13ක් ඉදිරිපත් කළා. ඒක අතුළාගෙනද නැත්නම් ඒවා වෙනත් මාර්ගවලින් ලබා ගැනීමේ ක්රියාවලියක් මෙහි පිටුපස තිබෙනවා කියා ඔබ සිතනවාද?
තමන්ගේ ප්රශ්න අරඹයා යම් ආන්තික විසඳුමක් ගන්න හැමදාම මේ පක්ෂ ක්රියා කළා, අපි බලමු මොකද වෙන්නේ කියලා,
• ගෝඨාභය රාජපක්ෂ මහතා වටා විශාල ජනතාවක් එකතු වන බව පේන්නෙ නැත්ද?
ඇත්තෙන්ම ඒ දේශපාලන කඳවුරෙන් ජනාධිපතිවරණයට ඉදිරිපත් වන දුර්වලම අපේක්ෂකයා ගෝඨාභය රාජපක්ෂ මහතායි, එම කඳවුරේ වරක් චන්ද්රිකා බණ්ඩාරනායක මහත්මිය ඉදිරිපත් වුණා, පසුව මහින්ද රාජපක්ෂ මහතා ඉදිරිපත් වුණා, ඒ දෙදෙනා එක්ක සංසන්දනය කරන විට ඉදිරිපත් වූ දුර්වලම අපේක්ෂකයා ලෙස ගෝඨාභය රාජපක්ෂ පෙන්වා දෙන්න පුළුවන්. එම නිසා ඔහුට සමස්ත ජනාධිපති මැතිවරණ ක්රියාවලියම කරන්නට සිදුව ඇත්තේ මහින්ද රාජපක්ෂ නැමැති කිහිලිකරුවේ ආධාරයෙන්. ඒ නිසා සමස්ත ඡන්ද ව්යාපාරය තුළම ඔහු පෙන්නුම් කර තිබෙනවා තනිවම ප්රශ්නවලට විසඳුම් සොයන්න බැරි බව, තනිවම රටක් පාලනය කරන්න බැහැ කියන බව. ඒ නිසා රට ගැන, ජනතාව ගැන අවබෝධයක් නැති අපේක්ෂකයෙක් ලෙස ඔහු පෙන්වා දෙන්න පුළුවන්.
• සජිත් ප්රේමදාස හා ගෝඨාභය රාජපක්ෂ යන මේ දෙදෙනාගෙන් ඔබ හිතන්නේ වඩාත් ජනතාවට ළං වී ඇති පුද්ගලයා කවුරුන් කියාද?
අපෝ ,අපිට නම් දෙන්නම එකයි.
• සමාජ මාධ්ය හරහා ප්රධාන පක්ෂ දෙකම තම ප්රචාරක කටයුතු කළත් ජාතික ජන බලවේගයේ එවන් ප්රචාරණයක් පෙනෙන්නට නැහැනෙ.
මා හිතනවා සමාජ මාධ්ය ප්රචාරක ජාලයත් මූල්යමය හැකියාවන් මත රඳා පවතින බව. කෙසේ වෙතත් විකල්ප මාධ්යයක් ලෙස සමාජ මාධ්යය අපි උපරිමයෙන් භාවිත කර තිබෙනවා. ඒ වගේම ඒ ව්යායාමයත් අප ප්රශස්ත මට්ටමක සිටිනවා කියා අපට හැඟෙනවා.
• අපි ඇත්ත කතා කළොත් සජිත් ප්රේමදාස මහතා හෝ ගෝඨාභය රාජපක්ෂ මහතා හෝ දෙන්නගෙන් එක් කෙනෙක් නේද බලයට එන්නේ...
අපි කලබල විය යුතු නැහැ විනිශ්චයකට යන්න. ලෝකයේ බොහෝ දේශපාලන පෙරලි සිදුව තිබෙනවා. එම නිසා අපි එවැනි පූර්ව නිගමන වලට නොයා යුතුයි කියා මම හිතනවා.
• ඇයි ජනතාව මේ ප්රධාන පක්ෂ දෙක වටාම කැරකෙන්නේ...
සාම්ප්රදායික විදිහට ජනතාව පෙළ ගැස්මක් තිබෙනවා. නමුත් අලුතින් හිතන ජනතාව, විශේෂයෙන් තරුණ පරම්පරාව විශාල වෙනසක් කරා ගමන් කරනවා. ජනතාවත් වෙනදාටත් වඩා පෙරට එන බවක් අපට පේනවා.
• ඔබ පක්ෂයට බලය හිමි වූ කාලයේ පවා ජනතාව රදා පවත්වා ගන්න බැරි වුණේ ඇයි?
දේශපාලනය ඊ ගසක් මෙන් ඉදිරියට යාමක් නැහැ. නිරන්තරයෙන් ඉහළ පහළ යනවා. අපේ දේශපාලන ජයග්රහණවලදී මෙන්ම පසුබෑම්වලදී පවා අපි ඒ සියල්ල මත ඉදිරි දේශපාලන ගමන් මග සකස් කර ගන්නවා. එම පසුබෑම් අභිභවා යාමටයි අපි කටයුතු කරන්නේ. අපි විශ්වාස කරනවා එම පසුබෑම් දුරලමින් අපි වේගයෙන් ඉදිරියට ගමන් කරන බවක්.
• නමුත් ජනතාව දුරස් වී ඇත්තේ ප්රතිපත්ති ගැටලුවක් කියා ඔබ හිතන්නේ නැත්ද?
කිසිසේත්ම නැහැ, අනෙක් සෑම දේශපාලන ව්යාපාරයකටම වඩා ජනතාවට හිතකර ජනතාවට සමීප, ඒ වගේම මේ රට ගොඩ ගන්න පුළුවන් ප්රතිපත්ති මාලාවක් ඉදිරිපත් කළේ අපි. ඒ නිසා ජනතාව අපගේ ප්රතිපත්ති කිසිසේත්ම ප්රතික්ෂේප කර නැහැ.
• නමුත් ජාතික ජන බලවේගයේ ක්රියාකාරීව කටයුතු කළ වෛද්යවරයෙක් ඉල්ලා අස් වුණා? ඔහු ප්රසිද්ධියේම ජාතික ජන බලවේගය විවේචනය කළා.....
ඔහු අපේ පක්ෂයේ හිටපු මන්ත්රීවරයෙක් ඔහු පක්ෂයට ලිපියක් බාර දී තිබෙනවා පෞද්ගලික හේතු මත ඉල්ලා අස් වනවා කියා.
• නමුත් ඔහු පැවසුවේ මේ බලවේගය ගැන කලකිරී ඉවත් වුණු බවක්.....
ඔව් එසේ වෙන්න පුළුවන්, කලකිරීමත් පෞද්ගලික හේතුවක්නෙ.
• ජනාධිපතිවරණය ජය ගන්න බැරි වුණොත් ඊ ළග දේශපාලන අරමුණ කුමක්ද?
අපේ අපේක්ෂාව ජනාධිපතිවරණය ජයග්රහණය කිරීමයි. ඒ නිසා අපි මේ අවස්ථාවේ බාහිර කරුණු ගැන සොයා බලන්නේ නැහැ. අපි මේ අවස්ථාවේ අරමුණ කරා යන ගමන මුදුන් පත් කර ගැනීමට අවශ්ය ක්රියා මාර්ග ගනිමින් ඉන්නවා.
• ජන බලවේගයේ රටේ සංවර්ධනය සම්බන්ධයෙන් හා ණය ප්රතිපත්තිය කුමක්ද
අපි හොදින් ඉදිරිපත් කරන තිබෙනවා ජාතික ණය කළමනාකරන සැලස්මක් ක්රියාත්මක කළ යුතු බවට, ඒ වගේම දුප්පත් රටක් බවට පෙරළා ඇති මේ රට පොහොසත් රටක් බවට පත් කරන ක්රමවේද අපි ඉදිරිපත් කර තිබෙනවා. ඒ නිසා මං හිතනවා ණය අර්බුදයෙන් ගොඩ ඒමත් අපේ රට දුප්පත්භාවයෙන් ගොඩ ඒමත් යන දෙකම නිසි පරිදි ක්රියාත්මක කිරීමට ඇති තිරසාර පැවැත්මත් ඉදිරිපත් කර තිබෙන එකම දේශපාලන ව්යාපාරය ජාතික ජනබලවේගය කියා. ඒ හරහා ණය අර්බුදයෙන් ගොඩ එන්නත් පුළුවන්. ඒ වගේම සංවර්ධනය කරා යන්නත් පුළුවන්.
• අධ්යාපනය මුදලට විකිණෙනවා කියා ඔබම කියනවා, මොකක්ද ඔබගේ අධ්යාපන ප්රතිපත්තිය...
පළමුවෙන් මේ රටේ දරුවන්ට මේ ව්යසනකාරී පීඩනයෙන් මුදවාගෙන ළමා කාලයක් දිය යුතු වෙනවා. අධ්යාපන දොරටුවෙන් ඇතුළු වන හැම දරුවෙක්ම උපාධියක් සහිතව හෝ ඩිප්ලෝමාවක් සහිතව අධ්යාපන දොරටුවෙන් එළියට ගැනීමේ ක්රමවේදයක් නිර්මාණය කළ යුතු වෙනවා. ඒ වගේම දරුවන්ගේ මවුපියන්ට මුදල් තිබෙනවාද නැද්ද යන සාධකය අධ්යාපනය ලබා දීමට බාධාවක් නොවිය යුතු තත්ත්වයට අධ්යාපනය පත් කළ යුතු වෙනවා.
• නමුත් අද පාසල් අධ්යාපනය මෙන්ම ටියුෂන් අධ්යාපනයටත් මුල් තැන දෙන පිළිවෙතක් තිබෙන්නේ, ඔබ දේශපාලන ව්යාපාරය යටතේ ටියුෂන් අධ්යාපනයට ගන්නා පියවර කුමක්ද? අවම වශයෙන් ප්රමිතියක් හෝ ලබා දෙනවාද?
නිසි අධ්යාපනයක් ලබා දෙන පාසල් පද්ධතියක් සකස් කරන්නේ නම් ටියුෂන් අවශ්යතාවක් පැන නඟින්නේ නැහැ. ඒ නිසා ටියුෂන් පංති තහනම් කිරීම හෝ ඒවා ප්රවර්ධනය කිරීම හෝ නොව රාජ්ය අධ්යාපනය නිසි පරිදි දරුවන්ට ලබා දීමයි අපේ අරමුණ වන්නේ. එසේ කටයුතු කිරීමට හැකියාව ලැබුණොත් තව දුරටත් පෞද්ගලික පංති පවත්වාගෙන යාමේ අවශ්යතාවයක් නැති වේවි.
• මොකක්ද ප්රවාහන ප්රතිපත්තිය.. දිනෙන් දින වැඩිවන රථ වාහන තදබදය මාකද කරන්නේ..
මේ රටේ පොදු ප්රවාහන පද්ධතිය දියුණු කළ යුතුයි. අද පොදු ප්රවාහනය භාවිත කරන්නේ 52% පමණ පිරිසක් පමණයි. ඒ කියන්නේ ප්රවාහනය භාවිත කරන අයගෙන් භාගයකට ආසන්න පිරිසක් පෞද්ගලික ප්රවාහනයට හුරු වෙලා. අප ඒ තත්ත්වය වෙනස් කළ යුතුයි. පොදු ප්රවාහනයේ භාවිතය 80%ක් දක්වා ඉහළ නැංවිය යුතු වනවා. ඒ සඳහා ප්රායෝගිකව ක්රියාත්මක කළ හැකි පොදු ප්රවාහන සැලැස්මක් අපි ඉදිරිපත් කර තිබෙනවා. ඒ හරහා ප්රවාහනය ජනතාවට හිතකර සේවාවක් වන්නා සේම අධික වාහන තදබදයත් නවතිනවා.
• අධික බදු බර ඉවත් කරන ප්රායෝගික ක්රමයක් තියෙනවද?
අනිවාර්යෙන්ම, මේ ආර්ථිකය පළල් කිරීමෙන් පමණයි බදු බර ඉවත් කළ හැක්කේ අපේ රටේ ආදායම් බදු ලිපි ගොනු 270000ක් තියෙනවා. සමස්ත බදු බර ඒ ආදායම් ලිපි ගොනු හරහා සොයා ගන්නට උත්සාහ ගන්නේ. ඒ ආදායම් බදු ලිපි ගොනු සංඛ්යාව තවත් 100000කින් වැඩි කළ හැකියි. සුළු හා මධ්ය පරිමාණ ව්යාපාර ජනතා හිතවාදීව මෙන් ආර්ථිකයට වැඩි දායකත්වයක් ලබා ගත හැකි ලෙසින් වර්ධනය කළ යුතුයි. ඒ හරහා සකස් කරනු ලබන නව ක්රමවේදයක් මත පමණයි ජනතාව පිට පටවා ඇති මේ බදු බර ඉවත් කළ හැක්කේ.
• මෙවර ජනාධිපතිවරණයේදී ඔබට ඡන්දය ලබා දීම හැර ජනතාවගෙන් ඉල්ලන ඉල්ලීම කුමක්ද?
අවස්ථා ගණනාවකදී ඔබ රටේ පාලකයින් වෙනස් කළා. නමුත් අවුරුදු 71ක්ම මේ රටේ වෙනසක් ජනතා දැනුණේ නැහැ. එම නිසා පාලකයින් වෙනස් කිරීමට නොගොස් ඔබ වෙනස් වන්න.