කෑගල්ලේ පැවැති ශ්‍රී ලංකා පොදුජන පෙරමුණේ දේශපාලන රැස්වීමකට සහභාගිවී සිය මව සමග නිවසට යමින් සිටි විසි හය හැවිරිදි ආබාධිත තරුණියක් පසුගිය 7 වැනිසා රාත්‍රියේ පැහැරගෙනගොස් දුෂණය කළ පොදුජන පෙරමුණු ආධාරකරුවෙකු හෙම්මාතගම පොලීසිය අත්අඩංගුවට ගෙන තිබේ. ඇය එසේ පැහැරගෙන ගොස් අතවර කර ඇත්තේ කෑගල්ලේ දේශපාලන රැස්වීමට සහභාගිවීමට හෙම්මාතගම සිට ගිය එකම කණ්ඩායමක සිටි තරුණයෙක් විසින්ම බව පොලීසියපවසයි. පොලිස් පරීක්ෂණවලදී අනාවරණය වී ඇත්තේ රැළියට සහභාගි වී ආපසු නිවෙස් බලා ගමන් කරමින් සිටි පිරිස රැගත් බස් රථය හෙම්මාතගම, අල්පිටිය, බලවත්ගම කැලෑබද ස්ථානයකදී නතර කර ආබාධිත තරුණිය බස් රථයෙන් පිටතට රැගෙන ගොස් දූෂණය කර ඇති බවය. ඇයව බස් රථයෙන් බස්සවාගෙන ඇත්තේ විවාහ වන බව සදහන් කරමින් බවද විමර්ශන වලින් අනාවරණය වී ඇත. ඇය එම රැස්වීමට සහභාගිවීමට ගොස් ඇත්තේ මව සමගිනි. ඇයද මානසික ආබාධයකින් පෙලෙන තැනැත්තියක් බව අනාවරණය වී ඇතැයි පොලිස් මාධ්‍ය ප්‍රකාශක ජ්‍යෙෂ්ඨ පොලිස් අධිකාරී රුවන් ගුණසේකර පැවසීය. දියණිය නොමැතිව ඇගේ මව නිවසට පැමිණිම හේතුවෙන් කලබල වන දියණියගේ පියා ඒ ගැන 119 පොලිස් හදිසි ඇමතුම් අංශයටත් හෙම්මාතගම පොලිස් ස්ථානයටත් පෙරේදා රාත්‍රී 10.30 ට පමණ පැමිණිළිකර ඇතැයිද රුවන් ගුණසේකර මහතා පැවැසීය.
මේ සම්බන්ධයෙන් හෙම්මාතගම පොලිසිය ක්‍රියා කළ ආකාරය පිළිබඳව ගැටලුකාරී තත්ත්වයක් පවතින බැවින් එහි සේවයේ සිටි පොලිස් නිලධාරීන් තිදෙනකු ඊයේ සවස වහා ක්‍රියාත්මක වන පරිදි වැඩ තහනමකට ලක් කළ බවද පොලිස් මාධ්‍ය ප්‍රකාශකවරයා පැවසීය.
