5 ශ්‍රේණියේ ශිෂ්‍යත්ව විභාගයේ කඩයිම් ලකුණු ආසන්නයටම පැමිණි දූ දරුවන් 735 දෙනකුට ජපන් ආධාර සහිත ශිෂ්‍යත්ව ප්‍රදානය කිරීම අද (10) කොළඹ බණ්ඩාරනායක සම්මන්ත්‍රණ ශාලාවේදී සිදු කෙරේ. මේ ලිපිය ඒ නිමිත්තෙනි.
5 ශ්‍රේණියේ ශිෂ්‍යත්ව විභාගය අපේ රටේ දරුවන්ගේ කඩඉම් විභාගයක් වන්නා සේම තවත් දරු පිරිසකට එය අධ්‍යාපනය එපා කරවන්නකි. ශිෂ්‍යත්වය සමත් වන දරු දැරියන් ගැන බොහෝ දෙනා උදම් අනති. විවිධ සංගම්, සංවිධාන මෙන්ම රජයෙන්ද ඔවුන්ට ආධාර ලබා දීම් සිදු කෙරේ. තවත් සිසුන් මෙන්ම ඔවුන්ගේ මවුපියන්ද ශිෂ්‍යත්වය ගැන එතරම් සැලකිල්ලක් නොදක්වති. එම නිසා ඔවුන්ට ඒ ගැන දුක් වන්නට සිදු නොවේ. ඒ අතර කොළඹ සුපිරි පාසල් දරු දැරියෝද වෙති.
එහෙත් මේ විභාගය නිසා දැඩි සේ දුක් වන්නේත් සමාජයේ ඇස නොගැසෙන්නේත් විභාගය සමත් වන්නට අවශ්‍ය ලකුණු මට්ටමට ලකුණක් හෝ දෙකක් අඩුවෙන් ලබා ගත් දරු දැරියන්ය.
ඔවුහු බොහෝ සේ දුක්වෙති. කිසිවෙක් ඔවුන් ගැන සොයා නොබලති.
ඒ කිසිවකුගේ ඇස නොගැසුණු මේ දරු දැරියන්ගේ අධ්‍යාපනය නංවා ලන්නට මේ වන විට ශිෂ්‍යත්ව ක්‍රමයක් අරඹා ඇත. ඒ මෙරට අසරණ දූ දරුවන් වෙනුවෙන්ම ක්‍රියාත්මක කිරීම සඳහා ජපානයේ වැඩ වාසය කළ සෙයියු කිරියාමා මහ නාහිමියන්ගේ මූලිකත්වයෙන් මෙරට ආරම්භ කරන ලද අගොන්ශු පදනම විසිනි.
 |
| සෝමසිරි අද්දර පතිරණගේ |
1993 වසරේදී ඒ හිමියන්ගේ මූලිකත්වයෙන් ආරම්භ කරන ලද අගොන්ශු මිත්‍රත්ව පදනම විසින් 5 ශ්‍රේණියේ ශිෂ්‍යත්ව විභාගයේ කඩයිම් ලකුණු ආසන්නයටම පැමිණි දූ දරුවන් 735 දෙනකුට ශිෂ්‍යත්ව ප්‍රදානය කිරීම අද (10) කොළඹ බණ්ඩානායක සම්මන්ත්‍රණ ශාලාවේදී සිදු කෙරෙන්නේ 27 වැනි වතාවටය. එම නිසා අපි ඒ ගැන එහි අධ්‍යක්ෂ ජනරාල් සෝමසිරි අද්දර පතිරණගේ මහතා හමු වී කරුණු විමසීමු.
‘‘ 5 ශ්‍රේණියේ කඩඉම් ලකුණු ආසන්නයටම පැමිණි මේ දරුවන් වෙනුවෙන් ශිෂ්‍යත්ව ක්‍රමයක් ආරම්භ කෙළේ 1993 වසරේදී. ඒ සඳහා මුල් වුණේ 1986 වසරේදී ජපානයේ අගොන්ශු විහාරයේ හිටපු මහ නායක සෙයියු කිරියාමා මහ නා හිමියන්ගේ මෙරටට වැඩම කිරීමයි. උන් වහන්සේගේ එම ගමනේදී භාෂා පරිවර්තක ලෙස කටයුතු කෙළේ මමයි. එහිදී උන් වහන්සේ සමඟ මෙරටට වැඩම කළ 140ක් පමණ වූ පිරිසේ මම භාෂා පරිවර්තක ලෙසින් ලබා දුන් සහාය නිසා උන් වහන්සේ මට ජපානයට පැමිණෙන ලෙස ආරාධනා කළා. ඒ අනුව මම අවස්ථා කිහිපයකදී ජපානයට ගොස් උන් වහන්සේ හමුවී මෙරට දරු දැරියන් ගැන සාකච්ඡා කළා. එහි ප්‍රතිඵලයක් ලෙස උන් වහන්සේ මට පෞද්ගලිකව මුදල් ලබා දෙන්නට කටයුතු කළත් මම ඒ සඳහා කැමැති වුණේ නැහැ. ඒ වෙනුවෙන් මම පැවසුවේ හැකිනම් දරුවන් වෙනුවෙන් යම් වැඩ සටහනක් එහෙමත් නැත්නම් ශිෂ්‍යත්ව ක්‍රමයක් ආරම්භ කරන ලෙසයි. එමෙන්ම එහි විගණන කටයුතු ජපානය විසින් කළ යුතු බවත් මම පැවසුවා. මුලින් අකමැති වුවත් එම විගණන කටයුතු සිදු කරන්නට ඔවුන් එකඟ වුණා.
නැවත වරක් උන් වහන්සේ 1992 වසරේ මෙරටට වැඩම කළා. ඒ අවස්ථාවේ උන් වහන්සේට මල්වතු මහා විහාරයෙන් කීර්ති ශ්‍රී සාමදූත නායක පදවිය පිරිනැමුවා. ඒ උන් වහන්සේ ලෝකයේ සාමය උදෙසා කටයුතු කරමින් සිටි නිසයි. ඒ වන විට මෙරට පැවැති බෙදුම්වාදී යුද්ධය සම්බන්ධයෙන් උන් වහන්සේ සාමය අගයමින් කටයුතු කළා. ලංකාවට පමණක් නෙමෙයි උන් වහන්සේ ප්‍රංශය, ජර්මනිය වැනි රටවලට පවා වැඩම කර එම රටවල සාමය උදා කිරීමට අවශ්‍ය පියවර ගත්තා.
උන් වහන්සේගේ 1992 වසරේ මෙරට සංචාරයත් සමඟ ශ්‍රී ලංකා අගොන්ශු මිත්‍රත්ව පදනම ආරම්භ කළා. එහි විගණන කටයුතු මගේ ඇරියුමින් ජපානය විසින්ම සිදු කළා.
ශිෂ්‍යත්වය සමත්වීමට ආසන්න ලකුණු ගත් දරුදැරියන් අපි සොයා ගත්තේ දන්නා අඳුනන අය හරහා, නමුත් එය සාර්ථක ක්‍රමයක් නොවන බව අපි තේරුම් ගත්තා. එම නිසා අධ්‍යක්ෂ මණ්ඩලයක් පත් කරගෙන අපි එහි කටයුතු කළා. ඒ අනුව ප්‍රාදේශීය ලේකම් කාර්යාල මට්ටමින් එම තේරීම් සිදු කරන්නට අප කටයුතු කළා. ඒ හරහායි අද වන විට ශිෂ්‍යත්වලාභී සිසු දරු දැරියන් තේරීම් සිදු කරන්නේ. ඒ පැහැදිලි නිශ්චිත ක්‍රමවේදයකට අනුවයි. හඳුනා ගත් සිසු දරු දැරියන් ශිෂ්‍යත්ව ලබාදීමට තරම් අඩු අදායම් ලාභීන්දැයි සොයා බැලීම පිණිස දිස්ත්‍රික් සම්බන්ධිකාරකවරුන් අප පත් කර තිබෙනවා. ඒ අනුව සොයා බලා සුදුස්සන්ට පමණක් ශිෂ්‍යත්ව ලබා දීමට කටයුතු කරනවා. ‘‘
ඇත්තෙන්ම කුඩා දරු දැරියන්ගේ ඒ වාසනාව උදෙසා ලබා දෙන මේ ශිෂ්‍යත්ව ක්‍රමය එම සිසුන්ගේ අධ්‍යාපනයට ලබා දෙන මහඟු වූ රුකුලක්ව ඇත. ආරම්භයේදී එක් වසරක් සඳහා පමණක් මේ ශිෂ්‍යත්ව ලබා දුන්නද එම සිසුවා හෝ සිසුවිය අධ්‍යාපනික වැඩ කටයුතු නිසි පරිදි කර ගෙන යන්නේ නම් විශ්වවිද්‍යාල අධ්‍යාපනය දක්වාම ශිෂ්‍යත්වය ලබා දීමට කටයුතු කෙරේ. එසේ අධ්‍යාපනය ලැබූ අඩු ආදායම්ලාභී සිසු දරුවන් 8 දෙනකු මේ වන විට වෛද්‍යවරුන් බවට පත්ව ඇත.
මේ වන විට අගොන්ශු පදනම විසින් වාර්ෂිකව ලබා දී ඇති ශිෂ්‍යත්ව සංඛ්‍යාව 15110කි. මේ වසරේ ලබා දෙන ශිෂ්‍යත්ව 735ද සමඟින් එම සංඛ්‍යාව 15845ක් දක්වා ඉහළ යනු ඇත.
 |
| පසුගිය වසරේ දැරියකට තිළිණ ප්‍රදානය කළ අවස්ථාව |
සියලු දරු දැරියන්ට වසරක කාලයකට අවශ්‍ය වන අභ්‍යාස පොත් පත් සියල්ලම සියලු පාසල් උපකරණ පාසල් බෑග් සපත්තු ජෝඩු දෙකක් හා නිල ඇදුම් 3ක්ද මලලසේකර ශබ්ද කෝෂයක්ද හිමි වන අතර පවුලටම සරිලන වියළි සලාක මල්ලක් මාසයක කාලයක් සඳහා සැපයෙනු ඇත. එය සාමාන්‍ය අයකුට ඔසවාගත හැකි නොවන පාර්සලයකි.
මේ උදාරතර කාර්යය සිදු කිරීමට දායකත්වය ලබා දුන් කිරියාමා හිමියන් වසර දෙකට පෙරදී අපවත් වූ නමුත් උන් වහන්සේගේ දායකත්වය මත සිදු කරගෙන ආ මේ අධ්‍යාපන සත්කාරය දිගින් දිගටම සිදු කරගෙන යන්නට කටයුතු කර ඇත.
කිරියාමා හිමියන්ගේ අදහසක් පරිදි මේ සියලු ශිෂ්‍යත්ව ලබා දෙන්නේ සිංහල බෞද්ධ දරුවන්ට පමණක් වන අතර මීට පෙර බදුල්ල, පින්නවල, අම්පාර වැනි දුර බැහැර ප්‍රදේශවලද ශිෂ්‍යත්ව ප්‍රධාන උත්සවය පැවැත්වූ අතර මෙවර කොළඹදී එය පැවැත්වේ. ඒ සඳහා මවුපියන් දෙදෙනාම සමඟ පැමිණීමට හා ආපසු යාමට අවශ්‍ය සියලු ප්‍රවාහන කටයුතු සැපයීමටද කටයුතු යොදා ඇත.
මෙවර ශිෂ්‍යත්ව ප්‍රදානෝත්සවයේ ප්‍රධාන ආරාධිතයා ලෙස සහභාගි වන්නේ කොළඹ අගරදගුරු අති උත්තම මැල්කම් කාදිනල් රංජිත් හිමිපාණෝය. එසේම සියම් මහ නිකායේ ශ්‍රී රෝහණ පාර්ශ්වයේ අනුනායක ඕමාරේ කස්සප අනු නාහිමියෝද ඒ සඳහා එක් වෙති.
ජපානය නියෝජනය කරමින් එම උත්සවයට සහභාගි වන්නේ අගොන්ශු නිකායේ ජ්‍යෙෂ්ඨ අනුනායක තොයිකෂු නකායි නා හිමි පුමුඛ දූත පිරිසකි.
ශිෂ්‍යත්ව ලබා දුන් පසුව එම දරු දැරියන් අධ්‍යාපනයට නැඹුරු කරවීමත් ඒ සඳහා දිරි ගැන්වීමත් පදනම හරහා සිදු කෙරේ. එපමණක් නොව සරසවි අධ්‍යාපනය නිමා වන තුරුම ඔවුන්ගේ අධ්‍යාපන අවශ්‍යතා සොයා බලන පදනම විසින් මේ වන විට ශිෂ්‍යත්වලාභී සිසු දරුවන්ට අමතරව වෛද්‍ය විද්‍යාව හදාරණ සිසු දරු දැරියන් 37 දෙනකුට ඒ සඳහා අවශ්‍ය මිල අධික පත පොත රැසක් ද ලබා දී ඇත.
මේ සත්කාරයට අමතරව වෘත්තීය පුහුණු අධිකාරියේ මෙහෙයවීම මත මොරවක පවත්වාගෙන යනු ලබන වෘත්තීය පුහුණු මධ්‍යස්ථානයට අවශ්‍ය සියලු ආම්පන්න ලබා දෙන්නේද අගොන්ශු මිත්‍රත්ව පදනම මඟින් වීමද මෙහිලා පැවසිය යුතුය. එය මාතර දිස්ත්‍රික්කයේ ඇති හොඳම ගොඩනැඟිලිවලින් එකක් බවටද පත්ව ඇත.
මේ වන විට දරු දැරියන් දස දහස් ගණනකගේ නෙත පාදන්නට ඇස යොමුකළ ජපානයේ කිරියාමා හිමියන්ටත් ඒ වෙනුවෙන් මෙරට සියලු සම්බන්ධීකරණ කටයුතු මෙහෙයවමින් තම කාලය ශ්‍රමය කැපකරන සෝමසිරි අද්දර පතිරණගේ මහතාටත් සියලු දරු දැරියන්ගේ කෘතඥතාව හිමි විය යුතු පමණක් නොව රජයේ වෙනත් වගකිව යුතු ආයතනද එවන් දරුවන් ගැන අවධානය යොමු කළ යුතුය.
සේයාරූ - සමන් ශ්‍රී වෙදගේ
