ජනාධිපතිවරණයෙන් උණුසුම් වන දේශපාලන පිටියේ පසුගිය සතියේද අපගේ සිහියට ගත යුතු සිදු වීම් කිහිපයක්ම විය. යළි යළි සිතා බැලිය යුතු විශේෂිත සිදු වීම් කිහිපයක් මෙසේ ඔබේ අවධානයට යොමු කරමු.
ජනාධිපතිවරණයේ දී ශ්‍රි ලංකා නිදහස් පක්ෂයේ මහලේකම් ඇතුළු ප්‍රධානීහු මධ්‍යම කාරක සභාවේ අනුමැතියද සහිතව පොදුජන පෙරමුණේ සහාය පිණිස එක් වුහ. දයාසිරි ජයසේකර, එස්.බී දිසානායක, දුමින්ද දිසානායක මහින්ද අමරවීර, නිමල් සිරිපාල ද සිල්වා වැනි නායකයෝ පොහොට්ටු වේදිකාවට ගොඩ වූහ. ඔවුන්ට හූ හඬ වැදුණත් යළි පොහොට්ටු වේදිකාවෙන් බැස්සේ නැත. මේ අතරේ පසුගිය කාලය තුළ රැඩිකල් ගමනක් ගිය කුමාර වෙල්ගම මන්ත්‍රීවරයා දිගින් දිගටම කියා සිටියේ ශ්‍රි ලංකා නිදහස් පක්ෂය පොහොට්ටුව සමඟ දිය කළ නොහැකි බව පවසමිනි. ඔහු කල් මරමින් සිටියේ විදේශ ගතව සිටි චන්ද්‍රිකා බණ්ඩාරනායක කුමරතුංග හිටපු ජනපතිවරිය පැමිණෙන තෙක්ය.
ඒ දෙපළගේ මූලිකත්වයෙන් අපි ශ්‍රි ලංකා නමින් වූ සංවිධානය පසුගියදා සුගතදාස ක්‍රිඩාංගණයට පැමිණියේ ශ්‍රි ලංකා නිදහස් පක්ෂය පොහොට්ටුවෙන් බේරාගැනීම වෙනුවෙනි. කවුරුත් වික්ෂිප්ත වූයේ ශ්‍රී ලංකා නිදහස් පාක්ෂිකයන් අට දහසකට ආසන්න ප්‍රමාණයක් මේ රැස්වීමට පැමිණීමය. එය ශ්‍රි ලංකා නිදහස් පාක්ෂිකයන්ට ලැබුණු දිරිගැන්වීමක් වු අතර එයින් ලද දේශපාලන පණිවිඩය වූයේ ශ්‍රි ලංකා නිදහස් පක්ෂයේ සාමාජිකත්වයෙන් බහුතරයක් පොදු ජන පෙරමුණ අපේක්ෂකයාට සහය නොදක්වන බවය. එයින් කලබලයට පත්වූ ශ්‍රි ලංකා නිදහස් පක්ෂයෙන් පොදුජන පෙරමුණට සම්බන්ධ වුණු පිරිස මෙන්ම එම පෙරමුණේ නායකයන්ද දැන් උත්සාහ ගනිමින් සිටින්නේ මේ රැල්ල අනෙක් පැත්තට හැරවීමේ මඟ සෙවීමටය.
“හිරු“ පැත්තක් ගත්තැයි විරෝධයක්
හිරු මාධ්‍ය නාලිකාව සම්බන්ධයෙන් පසුගිය දිනවල දැඩි විවේචනයක් එල්ල වූයේ රජයේ පාර්ශ්වයෙනි. එයට හේතු වූයේ හිරු මාධ්‍ය නාලිකාව පක්ෂපාතී ලෙස තම ප්‍රවෘත්ති විකාශයන්හිදි කටයුතු කරන ආකාරය නිසාය. ඒ නිසා එම නාලිකාව විසින් සංවිධානය කරනු ලබන කිසිදු දේශපාලන වැඩසටහනකට සහභාගී නොවන බව එක්සත් ජාතික පක්ෂයේ මහ ලේකම් අකිල විරාජ් කාරියවසම් මහතා මාධ්‍ය නිවේදනයක් නිකුත් කරමින් ප්‍රකාශ කළේ එවැනි පක්ෂපාතී අසමතුලිත වාර්තාකරණ පසුබිමක් තුළ එක්සත් ජාතික පක්ෂයේ කිසිදු පුද්ගලයකු තම පක්ෂය නියෝජනය කරමින් හිරු ටිවී හෝ ඊට සම්බන්ධ වෙනත් කිසිදු නාලිකාවක ට සහභාගී නොවන බවය.
ඒ සිදුවීමෙන් දින දෙකකට පසුව ප්‍රජාතන්ත්‍රවාදය උදෙසා මාධ්‍යවේදියෝ සංවිධානයද පසුගිය කාලය තුළ එක් එක් විද්‍යුත් මාධ්‍ය ආයතනවල මැතිවරණය ආශ්‍රිත පුවත් වාර්තාකරණය සම්බන්ධයෙන් සකස් කරන ලද වාර්තාවක් පසුගිය බ්‍රහස්පතින්දා විදුලි සංදේශ නියාමන කොමිසම වෙත වාර්තාවක් බාර දුන් අතර එහිදී එම මාධ්‍ය සංවිධානය පෙන්වා දුන්නේ මේ සම්බන්ධයෙන් වහා මැදිහත් වන ලෙසය. එහිදී මැතිවරණ කොමිසම සහ ජනමාධ්‍ය ලේකම්වරයාගේ මැදිහත් වීමෙන් එම මාධ්‍ය පක්ෂපාති වාර්තාකරණය සම්බන්ධයෙන් යම් පියවරක් ගැනීමට සාකච්ඡා කෙරුණද එය සිකුරාදා රාත්‍රිය වන තුරුත් ක්‍රියාත්මක වුයේ නැත.
මැතිවරණ පිටියේ අමනකම් තුනක්
පොදු ජන පෙරමුණේ ප්‍රචාරණ ව්‍යාපාරයට ප්‍රචණ්ඩත්වයෙන් තොරව ගෙන යෑමට එහි නායකයන් විශාල පරිශ්‍රමයක් දැරු බව ප්‍රකට කරුණකි. එහි නියමුවකු වන බැසිල් රාජපක්ෂ මහතා ඒ සම්බන්ධයෙන් ඕනෑවටත් වඩා උනන්දු වුවෙකි. එසේ වුවද එම පක්ෂයේ කීර්තිය වනසන සිදුවීම් තුනක් වාර්තා විය. එයට මුල පිරුවේ පාර්ලිමේන්තු මන්ත්‍රී එස්.බී දිසානායක මහතාගේ මන්ත්‍රී ආරක්ෂකයන් කළ වෙඩි තැබීමකි. ගිනිගත්හේන පොල්පිටිය ප්‍රදේශයේදී සිදුවූ එම සිදුවීමට බලපෑවේ මන්ත්‍රීවරයාගේ ආරක්ෂකයන් ගමන් ගත් රිය එම ප්‍රදේශයේ තරුණයන් පිරිසක් ගමන් ගත් වාහනයක ගැටීමය.
සුළු අනතුර සම්බන්ධයෙන් වූ බහින්බස් වීම එස්.බී දිසානායක මහතාගේද මැදිහත් වීමෙන් සමථයකට පත් විය. එසේ තිබියදීත් ඔහුගේ ආරක්ෂකයන්, එම තරුණයන් ගමන් ගත් වාහනයට වෙඩි තබා ඇති බව පොලිසිය පවසයි. ඒ නිසා තරුණයන් දෙදෙනකු රෝහල් ගත කළ අතර ඒ සිදු වීම හමුවේ පොදු ජන පෙරමුණට මේ සම්බන්ධයෙන් ප්‍රසිද්ධියේ සමාව ගැනීමට සිදු විය. කෙසේ වුද මේ සිදු වීම වී දින දෙකක් යන්නට මත්තෙන් පසුගිය බ්‍රහස්පතින්දා කෑගල්ලේ හෙම්මාතගම ප්‍රදේශයේ මානසික ආබාධ සහිත තරුණියක පොදු ජන පෙරමුණ රැලියකට සහභාගී වී යන අතරතුරදී දුෂණයට ලක් වී ඇත. මෙම සිදුවීම සම්බන්ධයෙන් එම පෙරමුණේ ආධාරකරුවකු වන 23 හැවිරිදි තරුණයෙක් අත්අඩංගුවට ගනු ලැබීය.
එදිනම දිඹුලාගල ප්‍රාදේශීය සභාවේ හිටපු සභාපති ජගත් සමරවික්‍රම පොලිස් අත්අඩංගුවට පත් වන්නේ පොදු ජන පෙරමුණ රැලියකට සහභාගී වීම සම්බන්ධයෙන් විරෝධය පළ කළ සූරියදේව රජමහා විහාරයේ විහාරාධිපති කිඹුල්වානේ සීලානන්ද හිමියන්ට පහර දීම සම්බන්ධයෙනි. ඒ සියල්ල ඔවුන්ගේ නිතිගරුක සමාජයක් සම්බන්ධයෙන් වූ මැතිවරණ ප්‍රචාරණයට බලවත් පහරක් එල්ල කළේය.
එදිනම උපවාසය අත්හැරීමට උන්වහන්සේ කටයුතු කළහ. ඒ උපවාසය අත්හැරීමද ඇතැමකු 2 නොරිස්සූ බව සැලවිය.
පොහොර සහනයට ජනපති විරෝධය
මේ දිනවල නිහඬ ප්‍රතිපත්තියක පසු වන ජනාධිපති මෛත්‍රීපාල සිරිසේන මහතා පසුගියදා යළිත් කාගේත් අවධානයට ලක් වූයේ ඔහු පොහොර සහනාධාරය සම්බන්ධයෙන් තම මතය දැක්වීම නිසාය. ජනාධිපතිවරයා ප්‍රධාන අපේක්ෂකයන් දෙදෙනාම නොමිලේ පොහාර ලබා දීමේ මැතිවරණ පොරොන්දු ලබා දීම විවේචනය කළේය. එයට ඔහු එකඟ නොවන බව ප්‍රකාශ කළේ අධික පොහොර භාවිතය ගොවි ජනතාව අතර වකුගඩු ආබාධ බහුල වීම කෙරෙහි සහ පාරිසරික අසමතුලිත බව ඇති කිරීමට හේතු වන බව පැවසීමෙනි. මේ මතය ඇතැම් ගෙවි ජනතාව පවා පිළිගන්නා කරුණක් බවට පත්ව ඇති හෙයින් ඉදිරියේදී මේ සම්බන්ධයෙන් පත් වන ජනාධිපතිවරයාට යළිත් සිතන්නට සිදු වනු ඇත.
මෙරට සයවැනි විධායක ජනාධිපතිවරයා ලෙස පත් වූ මෛත්‍රීපාල සිරිසේන මහතා තම නිල කාලයේ අවසන් සතියට එලඹෙන අතර ලබන අඟහරුවාදා ඔහු තම අවසන් කැබිනට් රැස්වීමට සහභාගී වනු ඇති බව දේශපාලන ආරංචි මාර්ග ඉඟි කරයි. එදිනට පසුව විශේෂිත කැබිනට් රැස්වීමක් නොපැවැත්වුණහොත් බොහෝ විට එය මෛත්‍රීපාල සිරිසේන ජනාධිපතිවරයාගේ අවසන් කැබිනට් රැස්වීම වනු ඇත. මේ අතර ජනාධිපතිවරයාගේ කාර්ය මණ්ඩලය ලබන බ්‍රහස්පතින්දා කැඳවා ඇති අතර එදින තම කාර්ය මණ්ඩලය වෙනුවෙන් විශේෂ සංග්‍රහයක්ද සංවිධානය කර ඇති බව වාර්තා වෙයි. බොහෝ විට එය ජනාධිපතිවරයා සංකේතාත්මක තම කාර්ය මණ්ඩලයට සමුදීමක් වනු ඇතැයිද එම දේශපාලන ආරංචි මාර්ග සඳහන් කරයි.
කාශ්‍යප හිමියන්ගේ “මිලේනියම් සිටි“ විරෝධය
මිලේනියම් චැලේන්ජ් කෝපරේෂන් ගිවිසුමට විරෝධය දක්වමින් උඩුදුම්බර කාශ්‍යප හිමියන් නිදහස් චතුරශ්‍රයේ මාරාන්තික උපවාසයක් ආරම්භ කිරීම දේශපාලන ලෝකයේ ආන්දෝලනයක් ඇති කළ සිද්ධියක් වූයේ එහි තිබූ එක් පුවරුවක ‘මිලේනියම් සිටි‘ ගිවිසුම යනුවෙන් සඳහන් වීමය. මිලේනියම් සිටි යනු අතුරුගිරියේ පිහිටි නිවාස සංකීර්ණයක් වන අතර එයින්ම මෙය අනවබෝධයෙන් යුතුව කළ වැඩක් බවට කතාබහ පැතිරිණි. සුපේශීල ශික්ෂාකාමී හිමි නමක ලෙස කීර්තියක් දිනාගත් කාශ්‍යප හිමියන් මෙතෙක් කිසිදු දේශපාලනික කටයුත්තකට මැදිහත් නොවූ අතර යම් දේශපාලන බලවේගයක් උන්වහන්සේ නොමඟ යැවුවාද යන්නද කතා බහට ලක් විය. කෙසේ වුවද සජිත් ප්‍රේමදාස මහතාටද ඒ ගැන ආරංචිය ලැබිණි.
"මේ ගැන මගේ ස්ථාවරය හාමුදුරුවන්ට දැනුම් දෙන්න. ඒකට අවශ්‍ය වැඩ යොදන්න“ ප්‍රේමදාස මහතා තිස්සට දැනුම් දුන්නේය.
අගමැති රනිල් වික්‍රමසිංහ මහතාටද ට දුරකථන ඇමතුමක් දුන් සජිත් ප්‍රේමදාස මහතා මිලේනියම් චැලේන්ජ් කෝපරේෂන් ගිවිසුම මැතිවරණය අවසන් වන තුරු අස්සන් නොකරන ලෙස ඉල්ලීය. එයට අගමැතිවරයාගෙන්ද ලැබුණේ සුබවාදී ප්‍රතිචාරයකි.
තිස්ස අත්තනායක ඇතුළු පිරිසක් මේ ලිපිය සකස් කොට හිමියන්ට බාර දුන්නේය. මේ අතර අගමැති රනිල් වික්‍රමසිංහ මහතාද අග්‍රාමාත්‍ය ලේකම් සමන් ඒකනායක අත ලිපියක් එවා තිබූ අතර පොදු ජන පෙරමුණු අපේක්ෂක ගෝඨාභය රාජපක්ෂ මහතාද කාශ්‍යප හිමියන් වෙත ලිපියක් එවා තිබිණි.
අගමැති සමන්තුරේදී කී කතාව
අග්‍රමාත්‍ය රනිල් වික්‍රමසිංහ මහතා පසුගිය සතියේම කාර්ය බහුල කාලසටහනකට අවතීර්ණ වී සිටියේ සජිත් ප්‍රේමදාස මහතාගේ ජයග්‍රහණය වෙනුවෙනි. එහිදි ඔහු නැඟෙනහිර ප්‍රදේශයේ කළ සංචාරය සහ එහිදී කී කතා දේශපාලනය තුළ යම් කතා බහක් අැති කළේය.
ඔහු එහිදී කීවේ පාස්කු ප්‍රහාරය සිදු වූ අවස්ථාවේ ආණ්ඩු පක්ෂයේ මුස්ලිම් අමාත්‍යවරුන්ට දොස් පැවරූ රාජපක්‍ෂවරුන් ප්‍රධාන පොදුජන පෙරමුණ, අයි.එස්.අයි.එස්. නායකයා ඝාතනයට ලක් වීම ගැන මුනිවත රකින බවය.
ආණ්ඩුවේ මුස්ලිම් අමාත්‍යවරුන්ට දොස් නැඟීමට පසුබට නොවන ඔවුන් අයි.එස්.අයි.එස්. සංවිධානයට හෝ එහි නායකත්වයට හෝ දොස් පැවරීමට බිය වන්නේ ඇයිදැයි වික්‍රමසිංහ මහතා වැඩිදුරටත් ප්‍රශ්න කළේය.
අම්පාර, සමන්තුරේ, අබ්දුල් මජීඩ් ශාලාවේ පැවැති යොවුන් හමුවක් අමතමින් වික්‍රමසිංහ මහතා තවදුරටත් පැවසූයේ සජිත් ප්‍රේමදාස මහතා ඇතුළු කණ්ඩායම ශ්‍රී ලාංකේය අනන්‍යතාව පෙරදැරි කර ගෙන රටම එකතු කිරීමට උත්සාහ දරන අතර රාජපක්ෂ කණ්ඩායම ජාතිවාදය හා අන්තවාදය පෙරදැරි කරගෙන රටම බෙදා වෙන් කර දේශපාලන බලය ලබාගැනීමට තැත් දරන බවය.
