ජනාධිපතිවරණයේ නිහඬ කාලය අවභාවිත කරමින් සහ රටේ අධිකරණ ක්රියාවලිය ප්රයෝගකාරී ලෙස භාවිත කරමින් අවසන් මොහොතේ නව ප්රජාතන්ත්රවාදී පෙරමුණේ ජනාධිපති අපේක්ෂක සජිත් ප්රේමදාස මහතා සම්බන්ධයෙන් සිංහල ජනතාව අතර දුර්මතයක් ඇති කිරීමේ වැඩපිළිවෙළක් ක්රියාත්මක කීරීමේ උත්සාහයක් පැවති බව ප්රජාතන්ත්රවාදී පෙරමුණේ මාධ්ය ප්රකාශක තිස්ස අත්තනායක මහතා පවසයි.
මේ පිළිබඳව මැතිවරණ කොමිසමේ අවධානය යොමු විය යුතු බව පවසන අත්තනායක මහතා නීතිය ඉදිරියේ හෝ යථාර්ථයක් නොවන මෙම කරුණ සම්බන්ධයෙන් මේ මොහොතේ අනිසි ප්රචාරයක් ලබා ගැනීමට යම් අයකු හෝ යම් මාධ්ය ආයතනයක් පෙළඹේ නම් ඔවුන් සම්බන්ධයෙන් නෛතික මෙන්ම දේශපාලනික පියවර ද ගන්නා බවත් ප්රකාශ කරන අත්තනායක මහතා මේ පදනම් විරහිත දීන උත්සාහයන් පරාජය කිරීමට මෙරට සියලුම ප්රජාතන්ත්රවාදී බලවේග එක්වන ලෙසත් ඉල්ලා සිටියේය.
පසුගිය සිකුරාදා මාධය ඇමතූ තිස්ස අත්තනායක මහතා ට අනුව ජනාධිපති මැතිවරණය සඳහා ඡන්දය ප්රකාශ කිරීමට නියමිත දිනයට පෙරාතුව නිසල කාලයක් මැතිවරණ නීතිය මඟින්ම බලාත්මක කොට ඇත්තේ පුරවැසියාට එලඹි සිහියෙන් යුතුව සිය අපේක්ෂකවරණය පිළිබඳව තීරණයක් ගැනීම පහසු කරනු සඳහාය.
නමුත් නොවැම්බර් 14 දා මධ්යම රාත්රියෙන් එලඹුණු එකී නිසල කාලය විවිධ දේශපාලනික ප්රයෝගකාරි ක්රියාකාරිත්වයන් මගින් උල්ලංඝණය කිරීමටත් එම ප්රයෝගකාරී ක්රියාවන් සඳහා මාධ්ය ප්රචාරයන් ලබාගැනීමේ ප්රවණතාවය පසුගිය පැය විසිහතර තුළ උත්සන්නවී ඇත. මෙකී තත්ත්වය පිළිබඳව මැතිවරණ කොමිසමේ අවධානය කඩිනමින් යොමුවිය යුතු බවට අවධාරණය කරන තිස්ස අත්තනායක මහතා
“මේ වනවිට අප වෙත වාර්තාවී ඇති නවතම ප්රයෝගය වී ඇත්තේ රටේ පවතින අධිකරණ ක්රියාවලිය භාවිතා කරමින් ජනාධිපති අපේක්ෂක සජිත් ප්රේමදාස මහතා පිළිබඳව බහුතරයක් වන සිංහල ජනතාව තුළ දුර්මතයක් ඇති කිරිමේ අපේක්ෂාවෙන් නඩුවක් ගොනු කොට එකී නඩු කරය සඳහා අනිසි මෙන්ම අනීතික මාධ්ය ප්රචාරයක් ලබා දීමට කටයුතු කිරීමයි.
සජිත් ප්රේමදාස මහතා සහ දෙමළ ජාතික සංධානය අතර ඇතිකර ගෙන ඇතැයි කියන රහස් ගිවිසුමක් මත ක්රියාකරමින් අනාගතයේ දී උතුරු පළාතේ පදිංචි සිංහලයන් සිය ගම්බිම් වලින් ඉවත් කිරීමට කටයුතු කරනු ඇති බවත් එවැනි ක්රියාවක් වළක්වා ගැනීම සඳහා අධිකරණයේ මැදිහත්වීමක් සඳහා අයැද සිටීම මෙම නඩු නිමිත්ත බවට අප වෙත වාර්තා වී ඇත. අප මෙවැනි කිසිදු රහස් ගිවිසුමක පැවැත්ම ප්රතික්ෂේප කරනු ලබයි.එම නිසා මෙම ප්රලාපය එයට උරුම වන පිළිකුළෙන් යුතුව අපි ප්රතික්ෂේප කොට සිටින්නෙමු.
මෙවැනි පසුබිමක එවැනි නඩුකරයක් පැවරීම පවා හාස්ය දනවන අතර එවැන්නකට පෙලඹීම තුළින් අපගේ දේශපාලනික ප්රතිවාදීන් වැටී ඇති සදාචාරාත්මක අගාධයේ තරම මනා ලෙස තේරුම් ගන්නා ලෙස අප මෙරට පුරවැසියන්ට ආයාචනය කර සිටින්නෙමු.
එසේම එවැනි නඩු නිමිත්තක් මත අධිකරණය ඉදිරියට යන්නේ නම් එනයින්ම අධිකරණ ක්රියාවලිය අපයෝජනයට ලක් කිරීමකි. නිතිය ඉදිරියේ මෙන්ම යථාර්ථය ඉදිරියේ නොමැති කරුණක් මත නඩු පවරමින් ඒ මත අයුතු මාධ්ය ප්රචාරණයක් ගැනීමට යමෙක් පෙලඹේ නම් සහ යම් මාධ්ය ආයතනයක් කටයුතු කරන්නේ නම් එවැනි දීන උත්සාහයකට එරෙහිව නෛතිකව මෙන්ම දේශපාලනිකවද කටයුතු කරමින් එය පරාජය කිරීමට කටයුතු කළ යුතුය.“