ජනාධිපතිවරණය අවසන්ව ඇත. නව ජනාධිපති ලෙස ශ්‍රී ලංකා පොදු ජන පෙරමුණේ ජනාධිපති ධුර අපේක්ෂක ගෝඨාභය රාජපක්ෂ මහතා දිවුරුම් දී සිය රාජකාරි වැඩ ආරම්භ කර ඇත්තේය. හිටපු අගමැති රනිල් වික්‍රමසිංහ මහතා සිය තනතුරින් ඉවත් වීමෙන් අනතුරුව පසුගියදා නව අගමැතිවරයා ලෙස හිටපු ජනාධිපති මහින්ද රාජපක්ෂ මහතා දිවුරුම් දී රාජකාරි ආරම්භ කළේය.
පසුගියදා පැවති ජනාධිපතිවරණය ඉතිහාසයේ පැවති සුවිශේෂ මැතිවරණයක් වන්නේය. විශේෂයෙන්ම මෙය ජාතික වශයෙන් වැඩි වැදගත්කමක් ලබා දුන් මැතිවරණයක් වන අතර ලංකාවේ ජනාධිපතිවරණයකට වැඩිම අපේක්ෂකයන් පිරිසක් පෙනී සිටි මැතිවරණයක්ද වන්නේය. එසේම පාර්ලිමේන්තු මන්ත්‍රීවරයකු හෝ නොවි විධායක ජනාධිපති තනතුරට පත් පළමු වැන්නා වන්නේද වත්මන් ජනාධිපති ගෝඨාභය රාජපක්ෂ මහතාය.
මෙවර ජනාධිපතිවරණයට අඩි දෙකකටත් වඩා දිගු ඡන්ද පත්‍රිකාවක සිය මනාපය සලකුණු කරන්නට වීම ඡන්ද දායකයන්ට ලැබුණු සුවිශේෂ අත්දැකීකි. මෙවර ජනාධිපතිවරණයට අපේක්ෂකයන් 35 දෙනෙකු ඉදිරිපත් වුවද සත්‍ය වශයෙන්ම තරගය පැවැතියේ ප්‍රධාන අපේක්ෂකයන් දෙදෙනකු අතර විම සුවිශේෂ කරුණකි. ඒ ශ්‍රී ලංකා පොදු ජන පෙරමුණෙන් තරග කළ ගෝඨාභය රාජපක්ෂ මහතා හා නව ප්‍රජාතන්ත්‍රවාදි පෙරමුණෙන් තරග කළ එක්සත් ජාතික පක්ෂයේ නියෝජ්‍ය නායක සජිත් ප්‍රේමදාස මහතා අතරය. මේ ද්වන්ධ සටනට මෙවර ජනතා විමුක්ති පෙරමුණට එක් වන්නට නොහැකි වූයේ ජනතා විමුක්ති පෙරමුණට සිය අපේක්ෂා භංග කරමින් දැඩි පරාජයක්ද හිමි කරමිනි. මැතිවරණ සමයේ ජනතා විමුක්ති පෙරමුණු රැස්වීම්වල කැපී පෙනුණු ජනකාය ඡන්ද ප්‍රතිඵලවලින් දිස් නොවීම බොහෝ දෙනකුගේ මවිතයට පවා හේතුවක් ගෙන දුනි.
මෙවර ජනාධිපතිවරණයට 1,59,92 096ක ලියාපදිංචි ඡන්ද දායකයන් පිරිසක් ඇතුළත් වුවද, එයින් ප්‍රකාශ වී තිබුණේ 1,33,87,951ක ඡන්ද ප්‍රමානයකි. එයිනුත් වලංගු ඡන්ද ප්‍රමාණය වූයේ ඡන්ද 1,32,52,449ක් වන අතර, එයින් 1,35,452ක ඡන්ද ප්‍රතික්ෂේප වී තිබිම විශේෂ කරුණකි. මෙවර ජනාධිපතිවරණයේදී වැඩිම ඡන්ද ප්‍රමාණයක් හිමි කරගැනීමට වත්මන් ජනාධිපති ගෝඨාභය රාජපක්ෂ මහතාට හැකි වූ අතර, ඒ ප්‍රමාණය ඡන්ද 69,24,225කි. ප්‍රතිශතයක් ලෙස එය 52.25%කි. දෙවැනිවට වැඩිම මනාප ප්‍රමාණයක් සජිත් ප්‍රේමදාස මහතා ලබාගත් අතර එම ප්‍රමාණය 55,64,239කි. ඒ ප්‍රමාණය 41.99%කි. අනුර කුමාර දිසානායක මහතා මෙවර ජනාධිපතිවරණයෙන් ලබාගෙන ඇත්තේ ඡන්ද 3,45,402කි. එය 3.16%ක ප්‍රතිශතයකි. මේ අනුව ජනාධිපති අපේක්ෂකයින් 35 දෙනොගෙන් 33 දෙනකුටම සිය ඇප මුදල් නොලැබී ගොස් ඇත්තේය. ඒ අතරට ජනතා විමුක්ති පෙරමුණු අපේක්ෂකයාද ඇතුළත් වන්නේ ඔහුට වත් 5%ක ඡන්ද ප්‍රතිශතයක් ලබාගැනීමට නොහැකි වීම හේතුවෙනි.
පසුගිය ජනාධිපතිවරණයෙන් ගෝඨාභය රාජපක්ෂ මහතා දිස්ත්‍රික්ක 22න් දිස්ත්‍රික්ක 16කින් විශිෂ්ට ජයත් අත් කරගෙන ඇත. ඒ කොළඹ, ගම්පහ, කළුතර, මහනුවර, මාතලේ, ගාල්ල, මාතර, හම්බන්තොට, රත්නපුර, කෑගල්ල, මොනරාගල, බදුල්ල, අනුරාධපුර, පොලොන්නරුව, කුරුණෑගල හා පුත්තලමයි. මේ අතර සජිත් ප්‍රෙමදාස මහතාට සිට ඡන්ද ප්‍රමාණය වැඩි කරගත හැකි වූයේ උතුරු, නැගෙනහිර පළාත්වලිනි. ඒ උතුරු පළාතේ යාපනය හා වන්නි දිස්ත්‍රික්ක දෙකෙන්ද, නැගෙනහිර පළාතේ ත්‍රිකුණාමලය, මඩකලපුව හා දිගාමඩුල්ල යන් දිස්ත්‍රික්ක තුනෙන් හා මධ්‍යම පළාතේ නුවරඑළිය යන දිස්ත්‍රික්කයෙනි. මේ අතර හංසයාට සමාන සලකුණක් නිසාදෝ ජනාධිපති අපේක්ෂකයන් වන ආරියවංශ දිසානායකට හා එස් අමරසිංහ යන අයටද විශාල ඡන්ද ප්‍රමාණයක් ලැබී ඇති අතර දෙමළ ජාතිකයකු වූ සිවාජිලිංගම්ට ලැබී ඇත්තේ එයටත් අඩු ඡන්ද ප්‍රමාණයකි!
මෙවර පැවති ජනාධිපතිවරණයේදි ගෝඨාභය රාජපක්ෂ මහතා වැඩි ඡන්ද ප්‍රමාණයක් ඉදිරියෙන් සිටීම කැපී පෙනුණු සිදුවීමකි. ගෝඨාභය රාජපක්ෂ මහතා වැඩි ඡන්ද ප්‍රමාණයක් ලබාගෙන ඇත්තේ ගම්පහ දිස්ත්‍රික්කයෙනි. එය ඓතිහාසික ජයග්‍රහණයක් වන අතර, ඒ දිස්ත්‍රික්කයෙන් වැඩි ඡන්ද 3,61 199ක් ලබාගැනීමට හැකි විය. එසේම ගෝඨාභය රාජපක්ෂ මහතාට වැඩි ඡන්ද ප්‍රතිශතයක් හිමි කර දී ඇත්තේ මාතර දිස්ත්‍රික්කයෙන් වන අතර, එය 67.25%කි. මේ අනුව ජනාධිපති ගෝඨාභය රාජපක්ෂ මහතා වැඩි ඡන්ද 13,60,000ක් ලබා ගෙන ශ්‍රී ලංකාවේ 8 වැනි ජනාධිපතිවරණයෙන් 7 වැනි විධායක ජනාධිපතිවරයා ලෙස තේරී පත් විය. එදා එක්සත් ජාතික පක්ෂයට වැඩි වාසිදායක දිස්ත්‍රික්ක වූ මහනුවර, කොළඹ, බදුල්ල හා පුත්තලම යන දිස්ත්‍රික්කවල ජයග්‍රහණය මෙදා ගෝඨාභය රාජපක්ෂ මහතාට හිමි වීම විශේෂත්වයකි.
විදේශීය මැතිවරණ නිරීක්ෂකයන් රැසක් සහභාගි වූ මේ මැතිවරණයේදී ඔවුන්ගේ වැඩි අවධානයක් යොමුව පැවැතියේ මෙම ජනාධිපතිවරණ ක්‍රියාවලිය පැවැත්වෙන පෙර හා පසු තත්ත්වයන් නිරීක්ෂණයටය. එහිදී සිය නිරීක්ෂණ පෙන්වා දෙමින් ඔවුහු පවසා ඇත්තේ මෙම ජනාධිපතිවරණය නිදහස් හා සාධාරණ මැතිවරණයක් වී ඇති බවයි. විශේෂයෙන්ම ඡන්දය ප්‍රකාශ කිරීම 83% ඉක්මවා තිබීම අතිසුවිශේෂි සිදුවීමක් වනවා සේම නව පාලනයක්, නව වෙනසක් කෙරේ මෙවර ජනතාවගේ අපේක්ෂා පිළිබිඹු වන්නකි. විශේෂයෙන් මෙවර විදෙස්ගත ශ්‍රී ලාංකික ශ්‍රමිකයන් සිය ඡන්දය භාවිතා කිරීම සඳහා ඒ දින කිහිපයේ මෙරටට ඇදී ඒමෙන්ම පිළිබිඹු වන්නේ මෙවර ඡන්දයට ඔවුන් දී ඇති වටිනාකමයි.
මේ පිළිබඳ අදහස් දක්වන වියතුන් ප්‍රකාශ කරන්නේ මෑත කාලය වන විට ශ්‍රී ලංකාවේ ජනතාව තමන්ටත් නව නායකයකු අපේක්ෂා කළ බවකි. ඒ සිහිනය වෙනුවෙන් ඔවුහු සිය වටිනා ඡන්දය භාවිතා කළහ. රටේ වැඩි පිරිසක් ගෝඨාභය රාජපක්ෂ චරිතය හඳුනාගත්තේ දේශපාලනඥයකුට වඩා හොඳ කළමනාකරුවකු වශයෙනි. විශේෂයෙන් උතුරු නැගෙනහිර යුද්ධයට නායකත්වය දීම මෙන්ම කොළඹ හා තදාසන්න ප්‍රදේශවල නගර නිර්මාණය බොහෝ දෙනකුගේ සිත් බැඳගත් මතකයන්ය. එසේම නව ජනාධිපති ගෝඨාභය රාජපක්ෂ මහතාගේ ජයග්‍රහණයෙන් මනාව පිළිබිඹු වන්නේ සනීපාරක්ෂාවට වඩා ජාතික ආරක්ෂාව ජනතාවට කොතරම් වැදගත්ද යන්නය. උතුරු නැගෙනහිර සුළු ජාතික පදනමින් නව ප්‍රජාතන්ත්‍රවදී පෙරමුණත්, දකුණේ සිංහල පදනමින් ශ්‍රී ලංකා පොදු ජන පෙරමුණත් අරමුණු කරගෙන මෙවර ඡන්ද දායකයන් සිය ඡන්දය යම් වෙනස් මුහුණුවරකින් භාවිත කර ඇති බව පෙනෙන්නට තිබිණි. විශේෂයෙන් අප්‍රේල් මාසයේ ලංකාවට එල්ල වූ දරුණු බෝම්බ ප්‍රහාර මාලාව මෙවර ඡන්දවල තීරණාත්මක වෙනස්කම් සිදු කරන්නට බලපෑවේයැයි බොහෝ දෙනකුගේ මතය වී තිබිණි. විශේෂයෙන් ජා-ඇළ හා කටාන යන ඡන්ද බල ප්‍රදේශවල වෙනස්ම ආකාරයේ විශිෂ්ට ජයක් ලබන්නට ගෝඨාභය රාජපක්ෂ මහතාට හැකි වීම බොහෝ දේ කියා පන්නකි.
