ණයවලින් පමණක් ගොඩ එන්න බැහැ

ජාත්‍යන්තර මූල්‍ය අරමුදලේ දෙවැනි ණය වාරිකය ඇතුළු වෙනත් මූල්‍යාධාර හිමිවුවද රට තුළ ඇති අර්බුදය විසඳෙන බවක් පෙනෙන්නට නැති අතර, එය තවදුරටත් උග්‍ර වෙමින් තිබෙන බව ශ්‍රී ලංකා කොමියුනිස්ට් පක්ෂයේ ප්‍රධාන ලේකම් විශේෂඥ වෛද්‍ය ජී. වීරසිංහ සිළුමිණට කියා සිටියේය. ඒ අනුව භාණ්ඩ හා සේවා මිල විශාල වශයෙන් ඉහළ යෑම, දරිද්‍රතාව ඉහළ යෑම, උගත් පුද්ගලයන් රට හැර යෑම සහ අපරාධ රැල්ල වැඩි වීම ආදී අර්බුද වැඩිවෙමින් පවතින බවත් මැදපෙරදිග යුද ගැටුම්වල බලපෑම හේතුවෙන් තෙල් මිල ඉහළ යෑම, විදේශ ප්‍රේෂණ ප්‍රශ්න ආදිය මතුවිය හැකි බව ද හෙතෙම අවධාරණය කළේය. මෙම අර්බුදයෙන් ගොඩ ඒමට නම් රටේ නිෂ්පාදන ආර්ථිකය දියුණු කිරීම සඳහා රජය මැදිහත් වී ක්‍රියාකළ යුතු වුවත් රට අභ්‍යන්තරයේ නිෂ්පාදන වැඩි කිරීම සඳහා රජය විසින් ඵලදායී ක්‍රියාමාර්ග ගන්නා බවක් පෙනෙන්නට නැති බවත් කොමියුනිස්ට් පක්ෂ ලේකම්වරයා වැඩිදුරටත් පැවසීය.