නිත්‍ය තැන්පතු පහසුකම් අනුපාතිකය සහ නිත්‍ය ණය පහසුකම් අනුපාතිකය සියයට 1කින් පහත හෙළීමට ඉකුත් බ්‍රහස්පතින්දා දින රැස්වූ ශ්‍රී ලංකා මහ බැංකුවේ මුදල් ප්‍රතිපත්ති මණ්ඩලය තීරණය කර තිබේ.
ඒ අනුව නිත්‍ය තැන්පතු පහසුකම් අනුපාතිකය 10% සිට 9% දක්වාත් නිත්‍ය ණය පහසුකම් අනුපාතිකය 11% සිට 10% දක්වාත් අඩු වනු ඇත.
මේ වසරේ මැයි මස අවසානයේ නිත්‍ය තැන්පතු පහසුකම් අනුපාතිකය 15.50% සිට ජුනි මස අවසානයේ 13%ට ද ජූලි මස අවසානයේ 11% දක්වා අඩු කෙරුණු අතර නිත්‍ය ණය පහසුකම් අනුපාතිකය ඉකුත් මැයි මස අවසානයේ 16.50%ක් ද ජුනි මස අවසානයේ 14%ක් ජූලි මස අවසානයේ 12%ක් සහ ඔක්තෝබර් මස අවසානයේ 11%ක් ලෙස මහ බැංකුවේ මුදල් ප්‍රතිපත්ති මණ්ඩලය මඟින් අවම කර තිබිණි.
මෑතකාලීනව උද්ධමන ඉලක්කය 5%ක මට්ටමට ළඟා කර ගැනීමේ හා පවත්වාගෙන යාමේ අරමුණින් දේශීය හා ගෝලීය ආර්ථිකයේ වත්මන් සහ අපේක්ෂිත ප්‍රවණතා සලකා බැලීමෙන් පසු ශ්‍රී ලංකා මහ බැංකුවේ මුදල් ප්‍රතිපත්ති මණ්ඩලය මෙකී තීරණයට එළැඹ තිබේ.
ඉකුත් ජුනි මස සිට ක්‍රියාත්මක කරන ලද මුදල් ප්‍රතිපත්ති ලිහිල් කිරීමේ ක්‍රියාමාර්ගවලට අනුකූලව සමස්ත වෙළෙඳපොළ ණය පොලී අනුපාතිකය වේගයෙන් අඩු වනු ඇතැයි මුදල් ප්‍රතිපත්ති මණ්ඩලය අපේක්ෂා කරයි.
අමිල මලවිසූරිය
