– අඩුම තරමින් අඩි 10ක් පළල විය යුතුයි
– ගුරු – සිකුරු 5, 6 කොටස් ගේට්ටුවට ඉතා සුබයි
– ගේට්ටුව තබන්නට පෙර නිවසේ ඉදිරිපස මායිම කොටස් 9කට බෙදාගන්න
නිවසට ගේට්ටුවක් සවි කිරීමෙන් බලාපොරොත්තු වන්නේ අනතුරුවලින් වැළකීම සහ ආරක්ෂාවයි. එහෙත් එය හිතුමතයට සවි කිරීමෙන් බලාපොරොත්තු වන සුබ අරමුණු ගිලිහී ගොස් ඊට වඩා අනපේක්ෂිත කරදර විපත් ඇති විය හැකිය. එයට හේතුව නිවසක හෝ ගොඩනැඟිල්ලක ප්‍රධාන දොර මෙන්ම එහි ගේට්‌ටුවද එම නිවසේ හෝ ගොඩනැඟිල්ලේ වෙසෙන අයගේ මානසිකත්වය කෙරෙහි තදින් බලපෑම් එල්ල කිරීමයි. එම නිසා ගේට්ටුව නිවැරදි ස්ථානයක තැබිය යුතුය. සුබ පාදයක තබන ගේට්ටුවක් අතරින් නිතර ගමන් කිරීම නිසා නිවැසියන් මානසික කම්පනයට පත්වන අතර එබඳු නිවෙස්වලට පැමිණෙන හිතවතුන් පවා අමනාපකම් ඇති කරගෙන ආපසු යන්නේ අසතුටෙනි. එම නිසා නිවසට ගේට්ටුවක් ඉදිකිරීම වාස්තු විද්‍යානුකූලව පරීක්ෂා කර බලා ඉතාම නිවැරදිව සිදු කළ යුතුය.
ගේට්ටුවක් ඉදිකිරීමේදී නිවස පිහිටි ඉඩමේ ඉදිරිපස මායිම කොටස් 09 ට බෙදා ගත යුතුය. එසේ බෙදූ විට එම කොටස් නවය පිළිවෙළින් රවි, චන්ද්‍ර, කුජ, බුධ, ගුරු, සිකුරු, රාහු, කේතු යන නව ග්‍රහයින්ට අයත් වේ. නිවසට ප්‍රධාන ගේට්ටුව හෝ වෙනත් කුඩා ගේට්ටුවක් තැබුචද මෙම ග්‍රහයන්ට අයත් කොටස් සුබදායක අයුරින් භාවිතයට ගත යුතුය. ගේට්ටුවක් අඩුම තරමින් අඩි 10කට වැඩි ප්‍රමාණයක පළලකින් යුක්‌ත විය යුතු නිසා ගේට්‌ටු කණු දෙක සුබ ග්රහයන් දෙදෙනකුට අයත් පාද කොටස් දෙකක පිහිටුවීම සුබදායක වේ. ගුරු සිකුරු ග්රහයන් දෙදෙනාට අයත් 5, 6 කොටස්වල ගේට්ටුව තැබීම ඉතා සුබය.
රවිට අයත් පාදයේ ගේට්ටුව තැබීමෙන් නිවැසියන්ට දුක, ශෝකය, සෞඛ්‍ය ගැටලු, වැඩ කටයුතුවලට බාධා, විරෝධතා ඇති වේ. එහෙත් තම ජන්ම කේන්දරයේ රවි සුබදායකව පිහිටා ඇති අයට රවි පාදය අසුබ නොවේ. සඳුට අයත් පාදයේ ගේට්ටුව හෝ ගේට්‌ටු කණුවක්‌ තැබීම යහපත් සමාජ සබඳතා ගොඩනැඟීමට, ධනය වැඩිවීමට, මානසික සතුට ඇති වීමට හේතු වේ. කුජ ග්‍රහයාට අයත් පාදය හසුවන සේ ගේට්ටුවක් හෝ ගේට්‌ටු කණුවක්‌ තැබීම ඉතා අසුබය. ඉන් බලාපොරොත්තු රහිත කරදර, කීර්තිය නැති වීම, ස්වාභාවික විපත් ආදිය ඇති වේ. බුධට අයත් පාදයේද ගේට්ටුව තැබීමද අසුබය. එවිට අනවශ්‍ය කරදර, අභූත චෝදනා, නරක් වීම ආදිය සිදු විය හැකිය. ගුරු ග්‍රහයාට අයත් පාදයේ ගේට්ටුව හෝ ගේට්‌ටුවේ මුල් කණුව පිහිටුවීම ඉතා සුබදායකය. ඉන් නිවසේ සතුට, සාමය රැඳේ. නිවැසියන් සමාජයේ පිළිගැනීමට ලක් වේ. මානසික සතුට ඇති වේ. සිකුරුට අයත් පාදයේ ගේට්ටුව හෝ ගේට්‌ටු කණුවක්‌ පිහිටුවීමෙන් ඥති සබඳතා වැඩි දියුණු වේ. ධනය හා කීර්තිය හිමි වේ. ශනිට අයත් පාදයේ ගේට්ටුව තැබීම ඉතා අසුබය. ඉන් දුක් පීඩා, මානසික අසහන ඇති වේ. සෞඛ්‍ය පිරිහේ. රාහුට අයත් පාදයේ ගේට්ටුව තැබීමෙන් දුක් දොම්නස්‌ අපල උපද්‍රව ඇතිවන අතර කේතුට අයත් පාදයේ ගේට්ටුව තැබීමෙන්ද නිවසේ පිරීහීම, නිවස පාළු වීම සිදු වේ.
ඉඩමට මාර්ගය වැටී ඇති දිශාවද ගේට්ටුව තැබීමේදී සැලකිල්ලට ගත යුතුය. උතුරට මුහුණලා ඇති ඉඩමක ඊසාන කොටසට වන්නටද, දකුණට මුහුණලා ඇති ඉඩමක ගිනිකොන දිශාවට වන්නටද, නැගෙනහිරට මුහුණලා ඇති ඉඩමක ඊශාන දිශාවට වන්නටද, බටහිරට මුහුණලා ඇති ඉඩමක වයඹ දිශාවට වන්නටද ගේට්ටුව තැබීම සුබදායකය.
නිවසේ ප්‍රධාන දොරට කෙළින්ම එල්ල වන ලෙසද, බිත්ති මුළු, යට ලී, බාල්ක හෝ බරාඳයේ කණුවලට එල්ල වන ලෙසද, ඉඩමේ මර්මස්ථාන රේඛා කැපී යන ලෙසද ගේට්ටුව නොතැබිය යුතුය. ඉන් නිවැසියන්ට දුක් කරදර, මානසික පීඩා, ධන හානි ඇතිවන අතර ග්‍රහ බලය දුර්වල වූ අවස්ථාවල යනඑනමං පවා නැති විය හැකිය.
ප්‍රවීණ ජ්‍යොතිෂවේදී වාස්තු විද්‍යාවේදී විදුහල්පති දැරණියගල කපිල ඉන්ද්‍රික ගුණදාස
