ග්‍රාමීය ජනතාවගේ ආර්ථිකය නැංවීමේ අරමුණින් නව රැකියා 50,000ක් උත්පාදනය කිරීමට කටයුතු කර ඇතැයි නියෝජ්‍ය කථානායක අජිත් රාජපක්ෂ සිළුමිණට කීය. ඒ යටතේ ගම්මාන 5000ක් සංවර්ධනයටද කටයුතු කෙරෙන අතර දේශපාලන අධිකාරිය, රාජ්‍ය සේවය, පෞද්ගලික අංශයේ සහායෙන් ජනතාවට මේ සේවාව ලබා දීමට කටයුතු කරන බවද ඔහු පෙන්වා දුන්නේය.
ඒ සඳහා සණස සංවර්ධන බැංකුවේ වැඩසටහනක් හරහා මේ කටයුතු සිදු කෙරෙන බවත් ඊට කෘෂිකර්ම හා වැවිලි කර්මාන්ත ඇමැති මහින්ද අමරවීර මහතාගේ සහ එම අමාත්‍යාංශයේ සියලු සහයෝගය ලැබී ඇති බවත් තමාද එම කාර්යයයේ මෙහෙයුම් කටයුතු සිදු කරනු ලබන බවත් නියෝජ්‍ය කථානායකවරයා පෙන්වා දුන්නේය.
කෘෂිකර්මාන්තය, ධීවර, ස්වයං රැකියා, වෘත්තීය පුහුණුව, තාක්ෂණික පුහුණුව, කාර්මික , පශු සම්පත්, නිෂ්පාදන, ඉඩම් ක්ෂේත්‍රය, මානව සම්පත් සංවර්ධනය, විකල්ප බලශක්ති ඇතුළු ස්වයංරැකියා සේවාවන් රැසක් හරහාස මෙසේ ග්‍රාමීය ආර්ථීකය ශක්තිමත් කිරීමට සැලසුම් සකස් කර ඇති බව ද ඔහු පැවසුවේය.
මේ ව්‍යාපෘතියේදී අධීක්ෂණ කටයුතු රාජ්‍ය මට්ටමින්ද සිදු කෙරෙන හෙයින් ජනතාවට නිසි උපදෙස් හා මඟ පෙන්වීම් අවශ්‍ය අවස්ථාවන්හිදී ලැබෙන හෙයින් අදාළ වෘත්තීන්හි ගැටලුවකින් තොරව යෙදිය හැකි බවත් අදාළ පාර්ශ්වයන් සමඟ පාර්ලිමේන්තුවේදීද මේ සම්බන්ධයෙන් සාකච්ඡාවක් පවත්වා ඇති බවද නියෝජ්‍ය කථානායකවරයා වැඩිදුරටත් පෙන්වා දුන්නේය.
තාරක වික්‍රමසේකර