ඉන්දියානු සාගරයේ වැදගත්කම සහ කාර්යභාරය දැක්වූ IOSRC සමුළුව

ඉන්දියන් සාගරය විවිධ සම්පත්වලින් පොහොසත් වන බැවින් එය‍ අද්විතීය වටිනාකමක් ලැබී ඇති සාගර කලාපයක් බවට පත්ව ඇති අතර එය ගෝලීය වෙළදාමේ දී වඩාත්ම තරගකාරී සමුද්‍ර මාර්ගවලින් එකක් බවට පත්ව ඇත. මෙම තීරණාත්මක මුහුදු ගමන් මාර්ගය භාවිත කිරීම සඳහා දිනෙන් දින ඉල්ලුම වැඩිවන නිසා මුහුදු ගමනාගමනය අවහිර වෙමින් පවතී. එබැවින් ගෝලීය මුහුදු මාර්ග හරහා සිදු වන වෙළෙඳාම බාධාවකින් තොරව පවත්වා ගැනීමට හැකි සෑම උත්සාහයක්ම ගත යුතුය. IOSRC හෙවත් ඉන්දියානු සාගර මූලෝපායික පර්යේෂණ මධ්‍යස්ථානය සහ Women in Logistics and Transport (WiLAT) ආයතනයේ සහයෝගීතාවයෙන්, ඉන්දියානු සාගර සමුද්‍ර කලාපයේ, ක්‍රමානුකූලව විකාශනය වෙමින් පවතින මෙම අභියෝග සහ අවස්ථා ආමන්ත්‍රණය කිරීම සඳහා සාමූහික උපදේශන කථිකාවක් ආරම්භ කර ඇත. එබැවින් පසුගියදා පැවති සමුළුවක දී සමුද්‍රීය තිරසාරභාවය, ආරක්ෂාව, සාගර සංරක්ෂණය සහ සමුද්‍රීය නීතිය යන ක්ෂේත්‍ර පිළිබඳව සාකච්ඡා කරන ලදී. මෙම සමුඵව සදහා ජාත්‍යන්තර සමුද්‍රීය සංවිධානයේ ප්‍රධානී ආචාර්ය Fredrik Haag ප්‍රධාන කථිකයා ලෙස සහභාගී වූ අතර වරාය, නාවික හා ගුවන් සේවා අමාත්‍ය නිමල් සිරිපාල ද සිල්වා විසින් දේශනයක් පවත්වන ලදී. සමුද්‍රීය නීතිය පිළිබඳ විශේෂඥ වෛද්‍ය ඩෑන් මලික් ගුණසේකර ද ගෝලීය සමුද්‍ර ගමන් මාර්ගයන් හි ජාත්‍යන්තර ගිවිසුම් සහ බැඳීම්, ත්‍රස්තවාදයේ හා මුහුදු කොල්ලකෑමේ නැගී එන අභියෝග පිළිබඳව දේශනයක් පවත්වන ලදී. සම්මන්ත්‍රණයේ සභාපතිනිය ලෙස භාණ්ඩ ප්‍රවාහන අංශයේ ප්‍රධාන මෙහෙයුම් නිලධාරී, ව්‍යාපාර සංවර්ධන, සමුද්‍රීය, භාණ්ඩ ප්‍රවාහන හා සැපයුම් අංශයේ සහකාර උප සභාපතිනි ධෂ්මා කරුණාරත්න කටයුතු කරන ලදී.