අද දවස

මේෂ
ව්‍යාපාර දියුණුව

සඳු ගමන් කරන්නේ 3, 4, 5 යන භාවයන් හරහාය. සහජ දක්ෂතා තුළින් ධෛර්යයෙන් මේ සතියේ කරගෙන යන වෙළෙඳ ව්‍යාපාරවලින් ලාභ ප්‍රයෝජන ගෙන දෙයි. සහෝදර උපකාර ලැබෙන සහ පවුලේ අයගේ බැඳීම් වර්ධනය කෙරෙන බවක් පෙන්වයි. දරුවන්ගේ දක්ෂතා නිසා සතුටට පත්විය හැකියි. ඔවුන්ගේ අධ්‍යාපනික ප්‍රගතිය ගෙන දෙයි. අපල අවම වීමට මෛත්‍රීසහගතව කටයුතු කරන්න.

සුබ අංක – 7, 9, සුබ වර්ණ – රතු, නිල්, සුබ දවස – අඟහරුවාදා

වෘෂභ
අතමිට සරුවේ

සඳු ගමන් කරන්නේ 2, 3, 4 යන භාවයන් හරහාය. මිල මුදල් අතමිට ගැවසෙන ගෘහ ජීවිතය ගැටලු නොමැතිව පවත්වාගත හැකි සතියකි. ආර්ථිකය ශක්තිමත් වේ. පදිංචි ස්ථානයේ දියුණුව පිණිස යම් කර්තව්‍යයක් ආරම්භ කිරීමට පුළුවන. ස්වයං රැකියා ආදියෙන් වැඩි ලාභ ප්‍රයෝජන අත්වේ. පුණ්‍ය කටයුතු සඳහා ද දායකත්වයක් සිදු කෙරෙයි. අපල අවම වීමට කරඳ පැළයකට සත්කාර කරන්න.

සුබ අංක – 3, 6, සුබ වර්ණ – රෝස, ක්‍රීම්, සුබ දවස – සිකුරාදා

මිථුන
ආර්ථිකය ශක්තිමත්

සඳු ගමන් කරන්නේ ලග්නය 2, 3 යන භාවයන් හරහාය. මඟහැරී තිබූ වැඩ කටයුතු නැවත ආරම්භ කිරීමට මෙන්ම ආර්ථික තත්ත්වය යහපත් කර ගැනීමට උනන්දු වෙයි. කරන කියන කටයුතුවලින් ලාභ ප්‍රයෝජන අත්වෙයි. පුණ්‍ය සිතුවිලි ගෙන දෙයි. ඒ සඳහා නිතර උනන්දු වෙයි. සුබ සතියකි.

සුබ අංකය – 3, 5, සුබ වර්ණය – කොළ, සුබ දවස – සිකුරාදා

කටක
මිශ්‍රපල ගෙනදෙයි

සඳු ගමන් ගන්නේ 12 ලග්නය හා දෙවැන්න හරහාය. මුල් දින වියහියදම් වැඩිවේ. ඉන්පසු ගෙවෙන දිනවලදී සුබපල ගෙනදෙයි. පොදු සාමාජය වැඩ මෙන්ම තමන්ගේ ගෙදරදොර කටයුතු ද ගැටලු ‍නොමැතිව කරගෙන යයි. අපල අනතුරු අසනීප තත්ත්වයන් ඇතිවීමේ ප්‍රවණතාවක් ඇති බැවින් කල්පනාකාරීව කටයුතුවල යෙදෙන්න. දරුවන්ගේ අධ්‍යාපනික පසුබිම සතුටුදායකය.

අපල අවම වීමට භාවනාවක යෙදෙන්න.

සුබ අංක – 2, 7, සුබ වර්ණ – සුදු, ක්‍රීම්, සුබ දවස – සඳුදා

සිංහ
ලැබීම් සහිතය

සඳු ගමන් ගන්නේ 11, 12, ලග්නය යන භාවයන් හරහාය. ආරම්භය සතුටුදායකය. ලැබීම් සහිතය. දුර බැහැර ගමන් යෙදේ. කා අතරත් සුහදතාවයෙන් කල්ගත කරන ඔබගේ සිතුවිලි සාමකාමී වෙයි. දරුවන්ගේ අධ්‍යාපනය සම්බන්ධයෙන් සතුටුදායක විය හැකියි. යහපත් මිතුරන් ඇසුරට ලැබේ. ව්‍යාපාර ආදියෙන් ලාභ ලබයි. පැරණි ණය මුදලක් හිමිවීමට පුළුවන.

අපල අවම වීමට ඉවසීමෙන් කටයුතු කරන්න.

සුබ අංක – 1, 4, සුබ වර්ණය – රතු, සුබ දවස – අඟහරුවාදා

කන්‍යා
බාහිර කටයුතු වැඩිවේ

සඳු ගමන් කරන්නේ 10, 11, 12 යන භාවයන් හරහාය. රැකියාව වෙනුවෙන් ඇවිදිලි වැඩිවේ. එහෙත් ලැබීම් සහිතය. වියදම් පාලනය කර ගැනීම ද වැදගත්ය. ගෙදරදොර කටයුතු පිළිබඳ වැඩි අවධානයක් ඇතිවිය හැකියි. විදෙස් ගමන් පිළිබඳ ලිපි ලේඛන, සුබ පණිවුඩ ලැබෙන්නට හැකි මේ සතියේ ඔබට බාහිර කරදර අධික වේ.

සුබ අංක – 2, 3, සුබ වර්ණය – කොළ, සුබ දවස් – බදාදා, සිකුරාදා

තුලා
පුණ්‍ය සිතුවිලි සහිතයි

සඳු ගමන් කරන්නේ 9, 10, 11 යන භාවයන් හරහාය. ඔබ විහාරස්ථානයේ වැඩකටයුතුවලට අන්‍යයන්ගේ දාන මාන කටයුතුවලට යොමු කරවන සතියකි. රැකියා, ව්‍යාපාරවලින් ලාභ ප්‍රයෝජන ගෙන දෙයි. අලුත් හිත මිතුරන් ඇසුරට ලැබේ. සතුරන් මිතුරු වේ. සහෝදර බැඳීම් වර්ධනය වේ.

අපල අවම වීමට රෝගීන්ට අසරණ අයට පිහිටක් වන්න.

සුබ අංක – 3, 6, සුබ වර්ණ – සුදු, ලානිල්, සුබ දවස – සෙනසුරාදා

වෘශ්චික
අධ්‍යාපනික දියුණුව

සඳු ගමන් කරන්නේ 8, 9, 10 යන භාවයන් හරහාය. ආරම්භයේ කනගාටුදායක පුවතක් අසන්නට ලැබෙයි. ඉන්පසු දින කිහිපය යහපත්ය. රැකියා, ව්‍යාපාර ආදියෙන් ලාභ ප්‍රයෝජන අත්වෙයි. පුණ්‍ය කටයුතු සිදු කරයි. ගෘහ ජීවිතය ගැටලු නොමැතිව පවත්වාගෙන යයි. දරුවන්ගේ අධ්‍යාපනික දියුණුව පෙන්වයි. අපල තත්ත්වයන් ද පෙන්නුම් කරන බැවින් කරන කියන කටයුතු ප්‍රවේශමෙන් සිදු කරන්න. අපල අවම වීමට අක්ෂි රෝගීන්ට උපකාර කරන්න.

සුබ අංක – 1, 2, සුබ වර්ණය – රතු, සුබ දවස – බ්‍රහස්පතින්දා

ධනු
මිශ්‍රපල සහිතයි

සඳු ගමන් කරන්නේ 7, 8, 9 යන භාවයන් හරහාය. එදිනෙදා කරගෙන යන ව්‍යාපාරවලින් සාමාන්‍ය අන්දමේ ලාභ ලබයි. වියදම් වැඩිවේ. සාමාජීය පොදු කටයුතුවලට සහභාගිත්වය ඇති අතර නවක හිතවතුන් මුණගැසේ. ගෘහ ජීවිතය සතුටින් පවත්වාගෙන ගියත් චිත්ත පීඩා ගෙනදෙන අවස්ථා ඇති කරයි. පුණ්‍ය කටයුතු සඳහා සතියේ අවසාන දිනවල යොමු වීමක් දක්නට ලැබෙයි.

අපල අවම වීමට දහම් කරුණු අසන්න.

සුබ අංකය – 6, 8, සුබ වර්ණය – කහ, සුබ දවස – ඉරිදා

මකර
ඥාති හිතවතුන් පැමිණේ

සඳු ගමන් කරන්නේ 6, 7, 8 යන භාවයන් හරහාය. කරන කියන කටයුතු උද්‍යෝගිමත්ව සිදු කරයි. සතුරු කරදර අවම වේ. එහෙත් කනගාටුදායක කරුණු අසන්නට සිදුවේ. නිවසෙහි පිරිසිදුකම පිළියෙල කිරීම්වලට වැඩි කාලයක් ගත කරයි. ඥාති හිතවතුන්ගේ පැමිණීම් සිදුවේ. ඒ අයගෙන් උදවු උපකාර ලැබේ. අපල අවම වීමට රතන සූත්‍රය කියන්න.

සුබ අංක – 8, 9, සුබ වර්ණය – නිල්, සුබ දවස – සෙනසුරාදා

කුම්භ
දරුවන්ගේ කටයුතු යහපත්

සඳු ගමන් කරන්නේ 5, 6, 7 යන භාවයන් හරහාය. අධ්‍යාපනය ලබන දරුවන්ගේ අධ්‍යාපනික ප්‍රගතිය පෙන්වන අතර ඔවුන්ගේ සියලු යහපත් බලාපොරොත්තු වලට සුබපල හිමිවේ. පොදු වැඩ කටයුතු, විහාරස්ථානවල කටයුතු, සුබසාධන කටයුතුවලට සහභාගිත්වය ඇතිවෙයි. කා සමඟත් සුහදතාවය පවත්වයි. අසනීප අපල ගති පෙන්වන බැවින් සෞඛ්‍ය තත්වය පිළිබඳවත් සැලකිලිමත් විය යුතු අතර කරන කියන කටයුතුවලදී ප්‍රවේශම් වන්න

සුබ අංක – 3, 8, සුබ වර්ණ – නිල්, සුබ දවස – සිකුරාදා

මීන
විදෙස් රැකියා සපල වේ

සඳු ගමන් කරන්නේ 4, 5, 6 යන භාවයන් හරහාය. ගෘහ ජීවිතය රැකියා, ව්‍යාපාර කටයුතු ගැටලු නොමැතිව පවත්වාගෙන ගියත් පවුලේ හෝ වෙනත් අයෙකුගේ අසනීප හා අපල වෙනුවෙන් කාලය වැය කරන්නට සිදුවේ. දරුවන්ගේ කටයුතුවලට ද වැඩි කාලයක් කැප කරයි. සතුරු කරදර අඩු වී යයි. මවු පාර්ශ­්වයෙන් උදවු උපකාර හිමිවේ. දුර ගමන් යෙදේ. විදෙස් ගමන්, විදෙස් රැකියා සපලවීමේ ඉඩකඩ ඇත. අපල අවම වීමට ස්වාමීන් වහන්සේලාට ගිලන්පස පූජා කරන්න.

සුබ අංක – 3, 9, සුබ වර්ණය – කහ, සුබ දවස – බ්‍රහස්පතින්දා