වී මිලදී ගැනීම සඳහා ජනාධිපති රනිල් වික්‍රමසිංහ මහතා විසින් වී අලෙවි මණ්ඩලයට රුපියල් කෝටි 50ක මුදලක් ලබා දීමට එකඟ වූ බව කෘෂිකර්ම හා වැවිලි කර්මාන්ත ඇමැති මහින්ද අමරවීර සිළුමිණට පැවසීය.
වී මිලදී ගැනීමේ අවශ්‍යතාව සම්බන්ධයෙන් තමා කළ ඉල්ලීමට සාවධානව සවන් දුන් ජනාධිපතිවරයා මෙම මූල්‍ය ප්‍රතිපාදන වහාම ලබා දීමට පොරොන්දු වූ බව ද ඇමැතිවරයා සඳහන් කළේය.
මහ කන්නයේ වී මිලදී ගැනීමට රුපියල් බිලියන 02ක් ලබා දෙන ලෙස තමා කළ ඉල්ලීමට මුදල් අමාත්‍යාංශයේ නිලධාරීන්ගෙන් කිසිදු ධනාත්මක ප්‍රතිචාරයක් නොලැබුණ ද ගොවි භාරකාර අරමුදලෙන් ලබාගත් රුපියල් මිලියන 250න් මේ වන විට වී අලෙවි මණ්ඩලය විසින් වී මිලදී ගැනීමේ කටයුතු ආරම්භ කර ඇති අතර, ඉකුත් 15 වැනිදා සිට සෑම දිස්ත්‍රික්කයකම අඩුම තරමින් වී ගබඩා දෙකක්වත් වී මිලදී ගැනීම සඳහා විවෘතව තැබීමට නියමිත බව ද ඔහු පැවසීය.
ජනාධිපතිවරයා විසින් වී මිලදී ගැනීම සඳහා ලබා දීමට පොරොන්දු වූ රුපියල් කෝටි 50ක මුදල ලැබීමත් සමඟ වී මිලදී ගැනීමේ කටයුතු වඩාත් කාර්යක්ෂමව සිදු කිරීමට හැකිවනු ඇති බවට ද කෘෂිකර්ම හා වැවිලි කර්මාන්ත ඇමැති මහින්ද අමරවීර විශ්වාසය පළ කළේය.
සුරේකා නිල්මිණි ඉලංකෝන්