– මම මෙහෙම සිංහල කතා කරන්නේ ජාතික රූපවාහිනියෙ මට දුන්නු අභියෝග සහ අවස්ථා නිසයි
– මම ජීවත් වෙන්නේ හැමදාම ශ්‍රී ලාංකිකයෙක් විදිහට, එහෙම නැතුව මම දෙමළ කියන තැන මම නැහැ
නිරංජනී ශම්මුගරාජා කියන්නේ අපේ රටේ බොහෝ දෙනෙක් ආදරය කරන දක්ෂ ජනප්‍රිය තරුවක්. ඇය රිදී තිරය තුළත්, පුංචි තිරය තුළත් සම්මානනීය නිළියක්. එමෙන්ම දක්ෂ නිවේදිකාවක්. පසුගිය රයිගම් සම්මාන උලෙළේ ඇය දමිළ භාෂාවෙන් සහ සිංහල භාෂාවෙන් හොඳම පූරකවරියට ද නිර්දේශ වූවා. ජීවිතේට එන අභියෝග සතුටු සිතින් නොබියව භාර ගන්නා නිරංජනී ශම්මුගරාජා පසුගිය මාර්තු 8 කාන්තා දිනයේදීත් ඉතිහාසයට අලුත් සටහනක් එක් කරන්නට වුවා. එනම් දමිළ නිවේදිකාවක් ඉතිහාසයේ පළමු වතාවට සිංහල ප්‍රවෘත්ති ඉදිරිපත් කිරීම. ඒ අත්දැකීම ගැන නිරංජනී රසඳුනට කිවුවේ මෙලෙසින්.
නිරංජනී මේ සිංහල ප්‍රවෘත්ති කියන අභියෝගය භාර ගත්තේ කොහොමද ?
අපිට ජීවිතේ ජීවත් වීමම අභියෝගයක්. අපේ ජීවිත තව ලස්සන කරන්නෙම අපිට ලැබෙන අභියෝග තුළ. සංජිව කුරගම අයියා ජනවාරි 12 වෙනිදා කතා කරලා ඇහුවා ඔයා කැමැතිද නිව්ස් කියන්න කියලා. මම හිතුවේ දමිළ භාෂාවෙන් වෙන්න ඇති කියලා. මම එහෙම හිතුවේ ස්වර්ණවාහිනී නාළිකාවට දමිළ භාෂා චැනල් තියෙන නිසා. හැබැයි සංජිව අයියා සිංහල ප්‍රවෘත්ති කියලා කියද්දී මට කියවුණේ මම …. ?කියලා විතරයි. “ඔව් නංගි ඔයා තමයි“ කියද්දී මම කිසිම දෙයක් නොසිතා “හරි අයියේ“ කියලා ක්ෂණිකව භාර ගත්තා. අපිට ලැබෙන අභියෝගයකට අපි උත්සාහ නොකර අපිට පරාජය පිළිගන්න බැහැනේ. මම එහෙම හිතන කෙනෙක්. මම කිවුවා ඒ නිසා මම එන්නම් ඇවිත් බලන්නම් කියලා. එතකොට මට සංජිව අයියා කිවුවේ “ඔයා ගිය අවුරුද්දේ දමිළ සහ සිංහල කියන අංශ දෙකෙන්ම හොඳම නිවේදිකාවට නිර්දේශ වෙලා වාර්තා අතරට ආව කෙනෙක්. ඔයාට මේක කරන්න බැරි නැහැ“ කියන මට වඩා මගේ ගැන විශ්වාසය තිබ්බේ ස්වර්ණවාහිනී ප්‍රවෘත්ති අංශයේ ප්‍රධානි සංජිව කුමාරට. මට තිබ්බ සතුට තව කෙනෙක් මා කෙරෙහි තැබූ විශ්වාසය. ඒ විශ්වාසය මතයි මම ගියේ.
නිරංජනීට අවස්ථාව ලැබෙන්නේ මාධ්‍යය ක්ෂේත්‍රයේ ජ්‍යෙෂ්ඨ චරිත තුනක් එක්ක?
ඇත්තටම මම සතුටු වෙන දෙවැනි කාරණාව ඔය. තනුජා අක්කා, දිනුෂා අක්කා සහ පුර්ණිකා අක්කා කියන්නේ මම පොඩි කාලේ ඉඳන් ආදරේ කරපු චරිත. පුර්ණිකා අක්කා අදටත් මට මතක තියෙන්නේ එයා හිටිය කුමාරිකා ඇඩ් එකෙන්. තනුජා අක්කා කියන්නේ රස රිසි ගී තුළින් අපේ හදවත් දිනාගත් කෙනා. රස රිසි ගී කියන්නේ දෙමළ ජනතාවත් ආදරෙන් වැලඳ ගත්ත වැඩසටහනක්. දිනුෂාට අපි ආදරේ කරන්නේ යෙහෙළිය වැඩසටහන හරහා. ඒ තුන්දෙනාගේම මම ෆෑන්. එයාලා මට මේ ක්ෂේත්‍රයේ ඉන්න ලෙජන්ඩ්ස්ලා. එයාල එක්ක ප්‍රවෘත්ති ඉදිරිපත් කරන්න ලැබීම මට ලැබුණු ගෞරවයක්. මේ තුන්දෙනාම සිංහල. මම දෙමළ. එයාලට වුණත් හිතන්න තිබ්බා ඇයි මේ දෙමළ ළමයාව ගෙනාවේ කියලා. හැබැයි ඒ අක්කලා තුන්දෙනාම තමන්ගේ පුහුණුවට වඩා වැඩි කාලයක් මාව පුහුණු කළා. එයාල කිවුවේ අපි තුන්දෙනා කොහොම හරි කරයි. ඔයා තමයි මෙතන ස්ටාර්. ඒ නිසා ඔයාගේ ස්ටාර් එක අපිට කඩන් වැටෙන්න දෙන්න බැහැ. ඒ නිසා උඹ කියවපන් නංගි කියලා එයාලගේ කාලය මට දුන්නා. ජීවිතේට මම කියවපු නැති වචන මම උච්චාරණය කළා. ඒ මට මේ තුන්දෙනාම දුන්න ශක්තිය. සිංහල ප්‍රවෘත්ති ඉතිහාසය තුළ මම සලකුණක් වෙන්නේ මේ පිරිස නිසා.
ප්‍රවෘත්ති නිවේදනය තුළ ලද අත්දැකීම කොහොමද?
මම රූපවාහිනීයේ හිටියට ප්‍රවෘත්ති මේසය ළඟටවත් යන්නේ නැහැ. එතැන මම දකින්නේ බොහොම ගෞරවාන්විත තැනක් විදිහට. සිවිල් සමාජයේ මිනිසුන්ගේ විශ්වාසය ගන්න පුළුවන් හොඳම තැන ප්‍රවෘත්ති කියන්නේ. මම ප්‍රවෘත්ති අංශයේ පුටුවේ ඉන්දුවම මගේ හදගැස්ම වැඩි වුණා. මේක රටේ ජාතික වගකීමක්. චවිකා අක්කාව ආදරෙන් මතක් කරන්න ඕනේ. ප්‍රවෘත්ති අංශයේ තියෙන ටෙක්නිකල් දේවල් කියලා දුන්නේ ඇය. අනිත් කෙනා තමයි තුෂාරි අක්කා. අපි පොඩි කාලේ ඉඳන් තුෂාරි අක්කගේ හඬ රුව එක්ක නිව්ස් බලපු අය. අද මම මගේ මට්ටමෙන් හොඳ ප්‍රතිචාර ලබනවා නම් එහි ගෞරවය සීයට දාහක් යන්න ඕනේ තුෂාරි අක්කට. එයා තමයි මට සිංහල වචන හරි හැටි උච්චාරණය පුරුදු පුහුණු කළේ. සිංහල කියවීම සහ ප්‍රවෘත්ති අතර තියෙන වෙනස කියලා දුන්නේ එයා. කිසිම භේදයකින් කුහකකමින් තොරව මට කියලා දුන්නේ චවිකා අක්කා සහ තුෂාරි අක්කා. මේ වෙලාවේ අනුර සහ ලක්මාල් අයියාවත් මතක් කරන්න ඕනේ. මේක ආවට ගියාට කරපු වැඩක් නෙවෙයි. අපි මුලින්ම ඩමි ෂූට් කළා. ඒ හැමදේම ඇත්තටම ලයිව් එක වගේ අපි සූට් කළේ. ඒ සමහර වෙලාවන්වල මට වැරදුණා. හැබැයි ලක්මාල් අයියා අනුර අයියා නංගි බය වෙන්න එපා ඔයා ලෑස්තිද ඔයාට පුළුවන් කියන දේ මට කියද්දී මට ලැබුණු ශක්තිය එක්කයි මේ තරම් දුරක් ආවේ.
දැන් දිගටම සිංහල ප්‍රවෘත්ති කියනවද?
අපි හතර දෙනා මාරුවෙන් මාරුවට සති අන්තයේ සෙනසුරාදා සහ ඉරිදා දිනයන්හි Live@8 තුළින් එනවා. මම මේ දේ කරන්නේ මම වෙනුවෙන් විතරක් නෙවෙයි. මගේ දමිළ සමාජය වෙනුවෙන්. අපිට එකතු වෙන්න පුළුවන් හොඳම තැනක් තමයි මේ වගේ පොදු දේවල්. කලාව සහ මාධ්‍යය තුළින් මිනිසුන්ගේ මනසට සතුටක් ගෙන දීම තුළින් මම මේ කරන්නේ මේ රට ඇතුළේ මිනිසුන් තුළ ජාති භේද ප්‍රශ්න නැහැ කියන එක දමිල සමාජයට සහ සිංහල සමාජයට පෙන්වන එක. අපේ රටේ මිනිසුන්ගේ හිත් හරිම ලස්සනයි. ඒක විකෘති කරන පිරිසට මේක හොඳ කනේ පහරක්. එනිසා මේක මගෙන් නතර වෙන්න බැහැ. තව මම වගේ අය බිහිවෙන්න ඕනේ. මම කැමැතියි කවදා හෝ සිංහල කෙනෙක් දමිළ ප්‍රවෘත්ති කියවන්න ඕනේ. ඒක මගේ හීනයක්. මම ජීවත් වෙන්නේ හැමදාම ශ්‍රී ලාංකිකයෙක් විදිහට. එහෙම නැතුව දෙමළ කියන තැන මම නැහැ.
ඔය දේවල්වලට අමතරව මේ දිනවල රඟපෑමේ කටයුතු කොහොමද?
ස්වර්ණවාහිනී නාළිකාවේ ප්‍රවෘත්ති නිවේදිකාවක් වුණාට මම අදටත් ජාතික රූපවහිනියේ වැඩ කරනවා. ජාතික රූපවාහිනියට මෙතැනදී විශේෂ ස්තුතියක් දෙන්න ඕනේ දමිළ නිවේදිකාව සිංහල නිවේදන කටයුතු කරන්න ඉස්සෙල්ලම අවස්ථාව දුන්නේ ජාතික රූපවාහිනියෙන්. මට මගේ මුල් පුරුක කවදාවත් අමතක කරන්න බැහැ. මම සිංහල මෙහෙම කතා කරන්නේ ජාතික රූපවාහිනියෙ මට දුන්නු අභියෝග සහ අවස්ථා නිසයි. ඒ මගේ මහ ගෙදර. එතැනින් මට මේ අවස්ථාවට අවසර දුන්නා. එයාලා සතුටු වුණා එයාලගෙන් හැදුණු කෙනෙක් තව තැනකට ගිහින් බැබළෙනවා දැක්කම. ඒ එක්කම ළඟදි ශ්‍රී ලාංකික දමිළ චිත්‍රපටයක් රූපගත කරලා ඉවර කළා. Enthan pon vanname. ඒක අධ්‍යක්ෂණය කළේ දිවිරාජ්. අප්‍රේල් සහ මැයි මාසේ තව අලුත් චිත්‍රපට දෙකක වැඩ පටන් ගන්න තියෙනවා. අප්‍රේල් මාසයේ අලුත් අවුරුද්දට ඩුබායිවල පැවැත්වෙන අලුත් අවුරුදු සැමරීමකට යන්න ඉන්නවා. ඔය දේවල් කරන ගමන් ඉන්නේ.
