රුසියානු රාජ්‍යයේ පැවැත්මට තර්ජනයක් එල්ල වුවහොත් න්‍යෂ්ටික අවි භාවිත කිරීමට මොස්කව් පාලනය පසුබට නොවන බැව් රුසියානු ජනාධිපති ව්ලැදිමීර් පුටින් අවධාරණය කරයි. නමුත් “එවැනි අවශ්‍යතාවයක් කිසිදාක පැන නොනැගුණේ” යැයි ජනාධිපති ව්ලැදිමීර් පුටින් එරට රාජ්‍ය මාධ්‍ය සමඟ සම්මුඛ සාකච්ඡාවකට එක්වෙමින් කියා සිටියේ ය.
රුසියානු නායකයා මාර්තු 15 වන දින ජනාධිපතිවරණයට පෙර රොසියා 1 සහ ආර්අයිඒ නොවෙස්ටි මාධ්‍ය ආයතන සමඟ සාකව්ඡාවකට එක්වීය. පුටින් මෙවර ජනාධිපතිවරණයේ දී පස්වන ධුර කාලයක් සඳහා ජනවරමක් දිනාගනු ඇතැයි අපේක්ෂා කරන අතර, යුක්රේනයේ ඔහුගේ මහා පරිමාණ යුද්ධය තුන්වන වසර දක්වා ගමන් කරමින් තිබේ.
අමෙරිකා එක්සත් ජනපද හමුදා යුක්රේනයට යෙදවුවහොත් රුසියාව ඔවුන් අනවශ්‍යය මැදිහත්කරුවන් ලෙස සලකන බවට පුටින් අනතුරු ඇඟවීය.
රුසියානු ගිනි අවි නිපැයීම පිළිබඳ නේටෝ ඔත්තු සේවා ඇස්තමේන්තු කර ඇති අන්දමට රුසියාව එක්සත් ජනපදයට හා යුරෝපයට වඩා තුන් ගුණයකට ආසන්න කාලතුවක්කු උණ්ඩ ප්‍රමාණයක් නිෂ්පාදනය කිරීමට නියමිත බැව් පෙනේ. රුසියානු කාලතුවක්කු කර්මාන්තශාලා පැය විසිහතර පුරාවට අවි නිපදවීම් සිදු කරන බැව් නේටෝ නිලධාරියෙක් සීඑන්එන් ප්‍රවෘත්ති සේවාවට ප්‍රකාශ කර ඇත.
මේ අතර, යුක්රේනයට අවි ආම්පන්න සඳහා එක්සත් ජනපද ආධාර අවශ්‍යව ඇති අතර, යුක්රේන ජනාධිපති වොලොඩිමියර් සෙලෙන්ස්කි පවසන්නේ එසේ නොවුණහොත් “මිලියන ගණනක්” මිය යා හැකි බවයි.
