ශ්‍රී ලංකාවේ ආරක්ෂාව හා ස්වෛරීභාවය තහවුරු කිරීමට අවශ්‍ය පූර්ණ සහාය ලබාදෙන බව අමරිකා එක්සත් ජනපදයේ ජාතික ආරක්ෂක උපදේශක ජේක් සුලෙයිවාන් (Jake Sullivan) මහතා ජනාධිපති කාර්යමණ්ඩල ප්‍රධානි සහ ජාතික ආරක්ෂාව පිළිබඳ ජ්‍යෙෂ්ඨ උපදේශක සාගල රත්නායක මහතාට පොරොන්දු වී ඇත.
ශ්‍රී ලංකාවේ ජාතික ආරක්ෂාව ගැන සහ ජාත්‍යන්තර මූල්‍ය අරමුදලේ කටයුතු ඇතුළු කරුණු කිහිපයක් පිළිබඳව සාගල රත්නායක මහතා සහ ජේක් සුලෙයිවාන් මහතා අතර පැවැති දුරකථන සාකච්ඡාවකදී මෙම පොරොන්දුව ලබාදී තිබේ. ජාත්‍යන්තර මූල්‍ය අරමුදලේ වැඩසටහන යටතේ මුල්‍ය කටයුතුවලට මෙන්ම මූල්‍ය පාලනයට ලංකා රජය ගෙනයන වැඩපිළිවෙළට අවශ්‍ය සහාය ලබාදීමටත් සුලෙයිවාන් මහතා සාගල රත්නායක මහතාට පොරොන්දු වී ඇත. ඉන්දියන් සාගර කලාපයේ ආරක්ෂාව තහවුරු කිරීමට මෙන්ම ශ්‍රී ලංකාවේ ආරක්ෂක කටයුතුවලට අවශ්‍ය උපකරණ සපයාදීම ගැන ද මෙහිදී දෙරට රාජ්‍ය නියෝජිතයන් දෙදෙනා සාකච්ඡා කොට ඇතැයි රජයේ ආරංචිමාර්ග සඳහන් කරයි.
එල්. පී. සුරංග
