කල දවස

මේෂ 
යහපත් සතියකි

සඳු ගමන් කරන්නේ 6, 7, 8, 9 යන භාවයන් හරහාය. රැකියා, ව්‍යාපාරවලින් ලාභ ප්‍රයෝජන ඉපයිය හැකි අතර ආර්ථිකය ශක්තිමත් බවක් උසුලයි. යහපත් සිහිබුද්ධියෙන් යුතුව ගෘහ ජීවිතයේ කටයුතු කරගෙන පුණ්‍ය සිතුවිලි සහිතව ජීවිතය සාරවත් කර ගනියි. පොදු වැඩවලට සහභාගිත්ව ඇති කරන යහපත් සතියකි. කනගාටුදායක පුවත් අසන්නට ලැබිය හැකිය. බදාදා අපල අවම කර ගැනීමට ඉවසීම, මෛත්‍රිය පැතිරවීම යන කරුණුම ප්‍රමාණවත් වේ.

සුබ අංක – 6, 8 / සුබ වර්ණ – රතු, නිල් / සුබ දවස – අඟහරුවාදා

වෘෂභ
දරුවන්ගේ යහපත

සඳු ගමන් කරන්නේ 5, 6, 7, 8 යන භාවයන් හරහාය. දරුවන්ගේ අධ්‍යාපනය, විවාහය, රැකියා ආදී කටයුතුවලට සුබ ඵල ගෙනෙන වාතාවරණයක් ඇති කරයි. පොදු වැඩ නිසා කටයුතු බහුල විවේකය අඩු දින කිහිපයකි. සිත් රිදීම් ඇතිවන අවස්ථා අන්‍යයන් සමග ගැටීමේදී මතු කෙරෙන බැවින් බුද්ධිමත්ව සිතන්න. අපල අවම වීමට සෞඛ්‍ය පිළිවෙත් අනුගමනය කරන්න.

සුබ අංකය – 6 / සුබ වර්ණ – කොළ, සුදු / සුබ දවස් – සෙනසුරාදා, බදාදා

මිථුන
පවුලේ සමගිය

සඳු ගමන් ගන්නේ 4, 5, 6, 7 යන භාවයන් හරහාය. ගෘහ ජීවිතය සැහැල්ලුවෙන් ගෙවා දමන්නට නොහැකිසේ වැඩ කටයුතු වැඩිවේ. එහෙත් ඒවායින් ලාභ ප්‍රයෝජන මතු කරන බැවින් අලස ගති මග හරවා ගන්න. දරුවන් පිළිබඳව සතුටුදායක බවක් ඇති කරයි. මා පියදූදරු බැදීම් වර්ධනය වෙමින් පවුලේ සමගිය දක්නට ලැබෙයි. අපල අවම වීමට ආගමික නැඹුරුව තුළින් හැකිවේ.

සුබ අංක – 3, 5 / සුබ වර්ණ – කොළ, කහ / සුබ දවස් – බදාදා, සිකුරාදා

කටක
ගෘහ ජීවිතය තුළ සමගිය

සඳු ගමන් ගන්නේ 3, 4, 5, 6 යන භාවයන් හරහාය. සහෝදර මා පිය, දූ දරු බැදීම් වර්ධනය වන සතුරු කරදර අඩු සුබ සතියකි. ලැබීම් සහිතය. පදිංචි ස්ථානයේ දියුණුව සහජ හැකියාවන් තුළින් ඉපයීම් කර ගැනීමට ඉඩකඩ සැලසේ. ආර්ථිකය ශක්තිමත් වේ. අපල අවම වීමට පත්තිනි දේවියට පින් දෙන්න.

සුබ අංක – 2, 7 / සුබ වර්ණ – කහ, සුදු / සුබ දවස් – අඟහරුවාදා, බ්‍රහස්පතින්දා

සිංහ
අතමිට මිල මුදල් ගැවසේ

සඳු ගමන් ගන්නේ 2, 3, 4, 5 යන භාවයන් හරහාය. අතමිට මිල මුදල් ගැවසෙන වාසනාවන්ත සතියකි. තම දක්ෂතාවන් තුළින් ඉපයීම් වර්ධනය කරගෙන අන්‍යයන්ට ද උදව් උපකාර කරමින් සිතෙහි සතුටින් කල් යවයි. දරුවන්ගේ අධ්‍යාපනික කටයුතුවලට වැඩි හරියක් වෙහෙසෙන්නට සිදුවේ. අපල අවම වීමට කාරුණික වන්න.

සුබ අංක – 1, 4 / සුබ වර්ණය – තැඹිලි / සුබ දවස් – ඉරිදා, අඟහරුවාදා

කන්‍යා
දක්ෂතාවන්ට ඉඩකඩ

සඳු ගමන් කරන්නේ ලග්නය දෙවැන්න, තුන්වැන්න, සිවුවැන්න හරහාය. පොදු සමාජ සුබසාධක මෙන්ම පුණ්‍ය කටයුතුවලට ද සහභාගිත්වයක් ඇති කරන සතියකි. තම වචනයට අන්‍යයන් ගරු කරයි. දක්ෂතාවන්ට මුල් තැනක් හිමි කර දෙයි. ඇවිදිලි වැඩිවේ. මව්පස ඥාතීන්ගේ උදව් ලැබේ. අපල අවම වීමට භාවනාවක යෙදෙන්න.

සුබ අංක – 5, 7 / සුබ වර්ණ – කොළ, කහ / සුබ දින – බදාදා, බ්‍රහස්පතින්දා.

තුලා
කර්මාන්තවලින් මිල මුදල් අතට

සඳු ගමන් ගන්නේ 12, 1, 2, 3 යන භාවයන් හරහාය. ආරම්භය ගැටලු කාරී විය හැකිය. නිෂ්ඵල ගමන් නිශ්ඵල වියදම් යෙදීමට ඉඩ ඇති බැවින් කල්පනාකාරී වන්න. ඉතිරි දිනවලදී යහපත් ලෙස කටයුතු සැලසේ. මිල මුදල් උපයාගත හැකි කර්මාන්තවල යෙදී තම දක්ෂතාවන්ගෙන් පල ප්‍රයෝජන ලබයි. ඇසුරු කරන අය අතර ප්‍රසාදය දිනයි. අපල අවම වීමට කුසගින්නේ සිටින අයකුට ආහාර වේලක් දෙන්න.

සුබ අංක – 4, 7 / සුබ වර්ණ – සුදු, තැඹිලි / සුබ දවස් – සෙනසුරාදා, සඳුදා.

වෘශ්චික
ලැබීම් සහිතය

සඳු ගමන් කරන්නේ 11, 12 ලග්නය දෙවැන්න හරහාය. ලාභ ප්‍රයෝජන ලැබිය හැකි සතියකි. පොදු සාමාජීය වැඩවලට සහභාගිත්වය ලබා දෙන්නට අවස්ථාව සැලසේ. දරුවන්ගේ අධ්‍යාපනය හා සියලු යහපත් බලාපොරොත්තුවලට ඉඩකඩ සැලසෙන පල ප්‍රයෝජන සහිත දින කිහිපයකි. අපල අවම වීමට ආවේගශීලී බව අඩු කරගැනීම වැදගත්වේ.

සුබ අංක – 2, 7 / සුබ වර්ණ – රතු, තැඹිලි / සුබ දවස් – අඟහරුවාදා, ඉරිදා

ධනු
සුබ සතියකි

සඳු ගමන් කරන්නේ 10, 11, 12 ලග්නය සහ භාවයන් මතිනි. රැකියා ව්‍යාපාරවලින් ලාභ ප්‍රයෝජන ඉපයීමට හැකි ඇවිදිලි වැඩි සතියකි. ගෘහ ජීවිතයේ බොහෝමයක් සැලසුම් ක්‍රියාත්මක කරන්නට උත්සාහ කරන අතර ඒවා පලදායි ද වෙයි. ධෛර්ය්‍ය සම්පන්න වේ. දරුවන්ගේ අධ්‍යාපනික කටයුතුවල ප්‍රගතියක් ඇති කරයි. අපල අවම වීමට උපේක්ෂා සහගතව කටයුතු කරන්න.

සුබ අංක – 7, 9 / සුබ වර්ණ – සුදු, ක්‍රීම්, තැඹිලි / සුබ දවස් – බදාදා, සිකුරාදා.

මකර
පුණ්‍ය සිතුවිලි පල දරයි

සඳු ගමන් කරන්නේ 9, 10, 11, 12 යන භාවයන් මතිනි. පුණ්‍ය සිතුවිලි සහිතව ආරම්භ වන සතියේ ඔබේ යහපත් අරමුණු බොහොමයක් සපල කරගත හැකියි. රැකියා ව්‍යාපාරවලින් ලාභ ප්‍රයෝජන හිමිවෙයි. සමහරවිට සිත් රිදීම්, කළකිරීම් ඇත්වේ. ඒවායින් ඇතිවන පීඩාව වළකා ගැනීමට ධර්ම දේශනා අසන්න. සියලු අපල දුරුවේ.

සුබ අංක – 3, 5 / සුබ වර්ණ – කොළ, තැඹිලි / සුබ දවස් – සිකුරාදා, බදාදා

කුම්භ
පුණ්‍ය කටයුතු සහ පොදු වැඩ

සඳු ගමන් ගන්නේ 8, 9, 10, 11 යන භාවයන් හරහාය. ආරම්භයේ කනගාටුදායක පුවතක් කන වැකෙන්නට ඉඩ ඇති අතර ඉන් පසු දින කිහිපය යහපත්ය. පුණ්‍ය කටයුතු, පොදු වැඩ, අසරණයින්ට පිහිට වීම වැනි කරුණුවලට සහභාගි වේ. කලකිරීම් සිත් රිදීම් ඇති වුවත් ඒවාට මුහුණදීමේ ශක්තිය ඔබ සතුවේ. ඉවසීම, මෛත්‍රිය, කරුණාව වඩන්න.

සුබ අංක – 3, 7 / සුබ වර්ණ – නිල්, සුදු / සුබ දවස් – සිකුරාදා, අඟහරුවාදා.

මීන
මිශ්‍රපල ගෙන දෙයි

සඳු ගමන් කරන්නේ 7, 8, 9, 10 යන භාවයන් මතිනි.

ව්‍යාපාර කටයුතුවල දියුණුවක් දක්නට ලැබෙන අතර ගෘහ ජීවිතය තුළ විවිධ බාධා යෙදීමට ඉඩ ඇත. චිත්ත ශක්තිය වඩවා එම බාධා මග හරවා ගන්න. රැකියා සඳහා බොහෝ ඇවිදිලි යෙදෙයි. පුණ්‍ය කටයුතුවලට සහභාගිත්වය ඇති කරයි. අපල අවම වීමට බෝධීන් වහන්සේට සත්කාර කරන්න.

සුබ අංකයන් – 4, 9 / සුබ වර්ණ – කහ, තැඹිලි / සුබ දවස් – බ්‍රහස්පතින්දා , ඉරිදා.