පසුගිය වසරේ දෙසැම්බර් මස නත්තලට දින දහයකට පමණ පෙර ගාල්ලේ ව්‍යාපාරිකයෙකුගේ බිරියගේ ජංගම දුරකතනට වට්ස්ඇප් ඇමතුමක් ලැබුණි. දුරකතන ඇමතුම දුන් පුද්ගලයා කතා කළේ ඉංග්‍රීසි බසිනි. ගාල්ලේ කාන්තාව ද උගත් කතකි. එමෙන්ම ඇයට ද ඉංග්‍රීසි බසින් කතා කළ හැකිය. එබැවින් මෙම කාන්තාවද දුරකතන ඇමතුමට ඉංග්‍රීසියෙන් පිළිතුරු දුන්නාය. අවසානයේ දුරකතන ඇමතුම දුන් පුද්ගලයා හා මෙම කාන්තාව අතර මිතුදමක් ඇති විය. එමෙන්ම මෙම පුද්ගලයා එංගලන්ත ජාතික පීටර් නමැති අයෙකු බවද දුරකතන ඇමතුම අවසානයේ ඇයට දැනගන්නට ලැබිණි. මුහුණුපොත ඔස්සේ හෝ සමාජ මාධ්‍ය ජාලයක් මඟින් තමාගේ දුරකතන අංකය මෙම විදේශිකයා ලබාගන්නට ඇතැයි ගාල්ලේ කාන්තාව කල්පනා කළාය.
මේ අතර නත්තල් උත්සවයට දින තුන හතරකට පෙර එම විදේශිකයාගෙන් ගාල්ලේ කාන්තාවට නැවතත් දුරකතන ඇමතුමක් ලැබුණි. “මිසිස් රාජකරුණා නත්තලට මම පොඩි තෑග්ගක් එවනවා. හෙට අනිද්දා ඒක ගෙදරටම ලැබේවි. මට මිසිස් රාජකරුණාගේ ලිපිනය දෙන්න. මිස්ටර් පීටර්ට බොහොම ස්තුතියි” කියා මුව නොසෑහෙන ලෙස ස්තුති කළ රාජකරුණා මහත්මිය තමාගේ ලිපිනය ද නුදුටු මිතුරාට ලබා දුන්නාය.
ඊට දින දෙකකට පසුව රාජකරුණා මහත්මියට තවත් දුරකතන ඇමතුමක් ලැබුණි.
“මැඩම් මේ කතා කරන්නේ කුරියර් සර්විස් ආයතනයෙන්. මැඩම්ගෙ නමට පාර්සලයක් පිටරටින් එවා තියනව. ඒ තෑගි පාර්සලය මැඩම්ගෙ ගෙදරට ගේන්න රුපියල් පනස්දාහක් අපේ කුරියර් සර්විස් එකේ ගිණුමට බැර කරන්න.” එසේ කියූ දුරකතන ඇමතුම්කරු ඔවුන්ගේ කුරියර් ආයතනයේ ගිණුම් අංකය ද රාජකරුණා මහත්මියට ලබා දුන්නේය. එවිට රාජකරුණා මහත්මිය එම ගිණුමට රුපියල් පනස් දහසක් බැර කළාය. එම මුදල බැර කිරීමෙන් පසුව කුරියර් ආයතනයෙන් ඇයට තවත් දුරකතන ඇමතුමක් ලැබුණි. “වෙරි සොරි මැඩම්, තෑග්ග ගෙදරට එවන්න තව රුපියල් එක්ලක්ෂ අසූතුන් දහසක් ඕන. කරුණාකරල අදම ඒ මුදල අපේ ගිණුමට බැර කරන්න“ යැයි කුරියර් ආයතනයෙන් රාජකරුණා මහත්මියට දැනුම් දෙන ලදි.” පීටර් කිව්වෙ තෑග්ගක් එවනවා කියලා නමුත් රුපියල් පනස් දහසක් දැම්මා. ඒක මදිය කියල තව එක්ලක්ෂ අසූතුන්දාහක් ඉල්ලනවා. මේක රැවටිල්ලක් මම හොරෙකුට අහුවෙලා. මට මේ තෑග්ග නැතිවුණාට කමක් නෑ” යනුවෙන් කල්පනා කළ රාජකරුණ මහත්මිය “නැහැ මට ඒ පාර්සලය එපා ආපසු යවන්න” කියා කුරියර් ආයතනයට කීවාය.
“මැඩම් මේ තෑගි පාර්සලේ තියෙන්නෙ කළු සල්ලි. වටිනාකම වැඩියි. පොලිසිය දැනගත්තොත් මැඩම්ව අත්අඩංගුවට ගනීවි” කියා කුරියර් ආයතනය රාජකරුණා මහත්මිය බිය ගැන්වීය.
රාජකරුණා මහත්මිය එසේ බිය ගැන්වූ කුරියර් ආයතනය ඇයට ගිණුම් අංක අටක් දුන්නේය. එපමණක් නොව කුරියර් සමාගම ඇය බියට පත් කරමින් ගිණුම් අංකවලට මුදල් බැර කරන ලෙස විටින් විට තර්ජනය කර මුදල් ලබා ගත්තේය. පසුගිය වසරේ දෙසැම්බර් 23 වන දින සිට මේ වසරේ පෙබරවාරි 9 වන දින දක්වා ගතවූ කාලය තුළ මේ අන්දමට ඇය බියකර රුපියල් තිස්නව ලක්ෂ පනස් හයදහසක මුදලක් බැංකු ගිණුම් අටකට බැර කරවාගෙන තිබුණි. ඇය සතුව තිබූ මුදල් එසේ බැරකර පසුව නිවසේ තිබූ රන් ආභරණ උකස් කර මුදල් ලබාදී තමා හසුවී ඇති උගුලෙන් බේරීමට ඇය උත්සාහ කළාය. එහෙත් මේ තරම් විශාල මුදලක් වංචාකරුවකුට ලබා දුන් නමුත් ඇය මේ මුදල් බැර කරන ලද්දේ තම සැමියාට හොර රහසේය. පසුව තවදුරටත් මේ වංචාව සැඟවිය නොහැකි බව කල්පනා කළ රාජකරුණා මහත්මිය මේ සියලු තොරතුරු තම සැමියාට හෙළි කළාය. එවිට රාජකරුණා මහත්මියගේ සැමියා ගාල්ල දිස්ත්‍රික් විශේෂ අපරාධ විමර්ශන අංශයට මේ පිළිබඳ පැමිණිලි කළේය.
එහිදී ගාල්ල කොට්ඨාස භාර ජ්‍යෙෂ්ඨ පොලිස් අධිකාරි සතිස් ගමගේ ගේ උපදෙස් මත ගාල්ල මූලස්ථාන පොලිස් පරීක්ෂක එස්.එස්. ජයවීරගේ මෙහෙයවීමෙන් විශේෂ අපරාධ විමර්ශන ඒකකයේ ස්ථානාධිපති ප්‍රධාන පොලිස් පරීක්ෂක පුලස්ති සොයිසා ඇතුළු කණ්ඩායමක් මේ පිළිබඳ විමර්ශන ආරම්භ කළහ.
ඒ අනුව මෙහි විමර්ශන ආරම්භ කළ පොලිස් කණ්ඩායම මොරටුව ප්‍රදේශයේදී ප්‍රථමයෙන් සැකකරුවකු අත්අඩංගුවට ගනු ලැබීය. එහිදී අනාවරණය වී ඇත්තේ මෙම වංචනික ක්‍රියාවට සම්බන්ධ ප්‍රධාන සැකකරු නයිජීරියන් ජාතිකයෙකු බවය. මොහු විවිධ අපරාධ සම්බන්ධයෙන් බන්ධනාගාරගතව සිටින විට මෙම මුදල් ගනුදෙනුවේ අතරමැදියා ලෙස කටයුතු කර ඇති අත්අඩංගුවට ගත් මොරටුව සැකකරුද බන්ධනාගාරයේදී ඔහු හඳුනාගෙන ඇති බව සැල විය. එවිට නයිජීරියානු ජාතිකයාගේ මෙහෙයවීම මත අතරමැදියා අහුලාගත් හෝ සොරකම් කරන ලද ජාතික හැඳිනුම්පත් ඉදිරිපත් කොට රජයේ සහ වාණිජ බැංකුවල ගිණුම් විවෘත කරවා ඇති බව පොලිසිය හෙළි කර ගත්තේය. අතරමැදියා විසින් ගිණුම් විවෘත කිරීමට යොදාගෙන ඇත්තේ හෙරොයින් පානය කිරීමට ඇබ්බැහිවූ පුද්ගලයින්ය. එවැනි අයෙකුට සොරකම් කරන ලද හෝ අහුලාගත් හැඳුනුම්පතක් ලබාදී ඔහුට බැංකු ගිණුමක් ආරම්භ කරන ලෙස අතරමැදියා උපදෙස් ලබා දෙයි. ඒ සඳහා එම පුද්ගලයාට අතරමැදියා රුපියල් දසදහසක මුදලක් ගෙවා තිබේ. අතරමැදියා දුන් හැඳුනුම්පතක් රැගෙන රජයේ හෝ වාණිජ බැංකු ශාඛාවක් වෙත ගොස් එම හැඳුනුම්පත ඉදිරිපත් කර ඉතිරි කිරීමේ ගිණුමක් ආරම්භ කරයි. එහෙත් ගිණුම ආරම්භ කරන අවස්ථාවේ බැංකු නිලධාරියා විසින් ගිණුම ආරම්භ කරන පුද්ගලයා සහ හැඳුනුම්පතේ ඡායාරූපයේ සිටින්නේ එකම පුද්ගලයාද කියා පරීක්ෂා කර නොමැති බවද පොලිස් විමර්ශනවලදී හෙළි වී ඇත. එවැනි ගිණුම් රැසක් රජයේ සහ වාණිජ බැංකු ශාඛාවල ආරම්භ කර ඇතත් ඒ සියලුම ගිණුම් හිමියන් ඉදිරිපත් කර ඇත්තේ වෙනත් පුද්ගලයන්ගේ හැඳුනුම්පත් බවද හෙළිවී තිබේ. අන් සතු අයකුගේ හැඳුනුම්පතක් ඉදිරිපත් කොට ගිණුම් ආරම්භ කළේ ඇතැම් බැංකු නිලධාරීන්ගේ නොසැලකිලිමත්කම නිසා බවද විමර්ශනවලදී අනාවරණය කරගෙන ඇත. එමෙන්ම ගාල්ලේ රාජකරුණා මහත්මියට ප්‍රථමයෙන්ම දුරකතනයෙන් ඉංග්‍රීසි බසින් කතා කොට ඇය සමඟ මිතුදමක් ගොඩනඟා ගෙන මෙම මුදල් වංචාව කර ඇත්තේ නයිජීරියානු ජාතිකයා විසිනි.
අත්අඩංගුවට ගත් අතරමැදියා සහ නයිජීරියානු ජාතිකයා එක්ව රටපුරා හොර බැංකු ගිණුම් විවෘත කර මේ අන්දමට මහජනයා රවටා මුදල් වංචා කර තිබේ. රජයේ සහ වාණිජ ඇතැම් බැංකු නිලධාරින්ගේ බලවත් නොසැලකිල්ල නිසා මෙම වංචාකරුවන්ට මෙම ජාවාරම කරගෙන යෑමට හැකිවී ඇත. මෙම වංචාවේ අතරමැදියා ලෙස කටයුතු කළ සැකකරු රක්ෂිත බන්ධනාගාරගත කර ඇත. මෙම වංචනික ක්‍රියාවේ ප්‍රධානියා වන නයිජීරියානු ජාතිකයා අත්අඩංගුවට ගැනීමට පොලිසිය පරීක්ෂණ පවත්වයි.
ගාල්ල ජ්‍යෙෂ්ඨ පොලිස් අධිකාරි සතිස් ගමගේගේ උපදෙස් මත ගාල්ල මූලස්ථාන පොලිස් පරීක්ෂක එස්. එස්. ජයවීරගේ මෙහෙයවීමෙන් ගාල්ල විශේෂ අපරාධ විමර්ශන අංශයේ ස්ථානාධිපති ප්‍රධාන පොලිස් පරීක්ෂක පුලස්ති සොයිසාගේ මෙහෙයවීම මත මේ පිළිබඳ පරීක්ෂණ පැවැත්විණි.
එස්. දීයගහගේ - දකුණු පළාත් සංචාරක