2024 ජාතික ව්‍යාපාර විශිෂ්ටතා සම්මාන උලෙළේ දී ඔරිට් ඇපරල්ස් ලංකා සමාගම ව්‍යාපාර විශිෂ්ටත්ව සම්මාන 6ක් දිනා ගත්තේය. මෙම ජයග්‍රහණ අතර, ආයතනික සමාජ වගකීම් සඳහා සමස්ත සම්මානය, රෙදි පිළි සහ ඇඟලුම් ක්ෂේත්‍රයේ සමස්ත නිෂ්පාදනය සඳහා අනුශූරතාව, ආයතනික පාලනය සහ උපායමාර්ගවල විශිෂ්ටත්වය සඳහා අනුශූරතාව, සමස්ත මහා පරිමාණ කාණ්ඩය සඳහා කුසලතා සම්මානය, මානව සම්පත් ධාරිතා ගොඩනැඟීමේ විශිෂ්ටත්වය සඳහා කුසලතා සම්මානය සහ කාර්ය සාධන කළමනාකරණයේ විශිෂ්ටත්වය සඳහා කුසලතා සම්මානය ද වේ.
මේ පිළිබඳ ඔරිට් ඇපරල් ලංකා සමාගමේ ප්‍රධාන විධායක නිලධාරී අජිත් විජේසිංහ මහතා මෙසේ පැවසීය. ” අප ලද මෙම ගෞරවනීය සම්මාන හයෙන් පෙන්නුම් කරන්නේ අපගේ කණ්ඩායමේ විශිෂ්ටත්වය මෙන්ම සැබෑ දක්ෂතාවය ළඟා කර ගැනීම කෙරෙහි අපගේ අවධානය යොමු කිරීමයි. ‘එක් ඉලක්කයක් හඹා යමින් එක් කණ්ඩායමක්’ ලෙස අප ක්‍රියා කළ නිසා බොහෝ කුණාටුවලට මුහුණ දෙමින් එකට ශක්තිමත්ව නැඟී සිටි බව කියා සිටින්නේ ඉමහත් සතුටිනි…”
