ගැහැනියගේ සුන්දරත්වයත් ලාලිත්‍යයත් වර්ණනා කරන කවි, කතාන්දර වෙනුවට දැන් වැඩිපුර ලියැවෙන්නේ ගැහැනුන්ගේ දස්කම් විස්කම් ගැනය. පිරිමි හා උරෙනුර ගැටෙමින් විවිධ ක්ෂේත්‍රවල දස්කම් පාන්නට ලාංකේය දියණිවරු සමත් වී අවසන්ය. බලාපොරොත්තු සහ සිහින හඹා යෑම කොතරම් ආස්වාදනීයද යන්න බොහෝ ගැහැනු දැනටමත් දනිති. අහස සේ විසල් සහ පැහැබර ආත්ම ශක්තියක් ඇති ගැහැනියකට දිනන්නට බැරි කිසිවක් නැත.
” දැනුම් තේරුම් තියෙන වයසේ ඉඳලම මගේ හිතේ තිබ්බේ ගුවන් නියමුවරියක් වීමේ ආශාවයි. ඒ හීනය හැබෑ කරගන්නකම්ම මම ඒ වෙනුවෙන් කැපවුණා.”ඒ හඬ අහස දිනූ ශ්‍රී ලාංකේය දිරිය යුවතියක වන කපිතාන් බිමාලි ජීවන්දරගේය. ඇය මේ වන විට ශ්‍රී ලංකන් ගුවන් සේවයට අයත් පටු බඳ (Narrow body) සහිත ගුවන්යානා නියමුවරියක ලෙස ගුවන සරන්නීය. 
මෙරට ජාතික ගුවන් සේවය වන ශ්‍රී ලංකන් ගුවන් සේවයේ මේ වන විට කාන්තා ගුවන් නියමුවරියන් 21දෙනකු සේවය කරන අතර ඉන් 5දෙනකු කපිතාන්වරියන්ය. විදෙස් රටවල් හා සසැඳීමේදී මෙරට කාන්තා ගුවන් නියමුවරියන්ගේ සංඛ්‍යාත්මක අඩුවක් තිබුණද කළු වලා අතරින් රිදී රේඛා මතුවන්නා සේ දැන් දැන් මේ ක්ෂේත්‍රය පිළිබඳ යුවතියන්ගේ උනන්දුව සහ ඇල්ම වැඩි වෙමින් තිබෙන බවක් දැකගත හැකිය. අපේ කතානායිකාව කපිතාන් බිමාලි ජීවන්දරගේ දිවිසැරිය තුළින් ද පසක් වන්නේ එයයි.
අගනුවර උපන් බිමාලි, බම්බලපිටිය ශුද්ධවූ පවුලේ කන්‍යාරාමයේ කීර්තිමත් ආදි සිසුවියකි. පාසල් වියේදී අධ්‍යාපන කටයුතුවලට මෙන්ම බාහිර ක්‍රියාකාරකම්වලට ද විශේෂ දක්ෂතා දැක්වූ ඇය පාසල වෙනුවෙන් ස්කොෂ් ක්‍රීඩා කළ අතර, ටෙනිස් ක්‍රීඩාවට ද විශේෂ දස්කම් දැක්වූවාය. විවාද සහ කථික අංශයෙන් විද්‍යාලය තුළ දස්කම් පෑ බිමාලි නාට්‍ය, ගායනා ඇතුළු කලා කටයුතුවලද නියැළුණාය. විද්‍යාලයේ ඉංග්‍රීසි ගායනා කණ්ඩායමේ ද සාමාජිකත්වය ද දැරූ තමා දුටු එකම සිහිනය ගුවන් නියමුවරියක වීම බව කපිතාන් බිමාලි ජීවන්දර කීවාය.
“ඒ ආශාව වැඩි වුණේ ශ්‍රී ලංකන් ගුවන් සේවයේ ජ්‍යෙෂ්ඨ කපිතාන්වරයෙක් විදිහට සේවය කළ මගේ ලොකු තාත්තා (තාත්තගෙ අයියා) නිසා වෙන්න පුළුවන්. ලොකු තාත්තගෙන් අහන්න ලැබුණු අත්දැකීම් වගේම ඔහුගේ ජීවන රටාව දැක්කම පුංචි කාලේදිම මට ලොකු කැමැත්තක් ඇතිවුණා ගුවන් නියමුවරියක් වෙන්න. ඒත් ඒ කාලේ අපේ ජාතික ගුවන් සේවයේ කාන්තා නියමුවරියන් හිටියෙ නැති නිසා මට ඒ ආශාව මගේ හිත ඇතුළෙම තියාගන්න සිද්ධ වුණා. මම හත වසරේ ඉන්නකොට අපේ පාසලේ ක්‍රීඩා උත්සවයේ ප්‍රධාන ආරාධිත අමුත්තිය විදිහට ආවේ ශ්‍රී ලංකන් ගුවන් සේවයේ ගුවන් නියමුවරියක වන කැප්ටන් අනූෂා සිරිරත්න. එදා තමයි මම දැනගත්තේ දැන් අපේ ගුවන් සේවයේ කාන්තා නියමුවරියන් ඉන්නවා කියලා. ක්‍රීඩා උත්සවයෙන් එදා මම ලබාගත් තරග ජයග්‍රහණ සේරටම වැඩිය මට ලොකුම සතුට ලැබුණේ ඒ ආරංචියෙන්. කැප්ටන් අනූෂා එදා උත්සව සභාවෙදි කරපු කතාවෙන් මට පුදුමාකාර ජීවයක් ලැබුණා. එදා ඉඳලා හැමදාම මම දැක්කේ ගුවන් නියමුවෙක් වෙන හීනයම විතරයි.
බිමාලි ගණිත අංශයෙන් උසස් පෙළ විභාගයට පෙනී සිටින්නේ ද සිය ඉලක්කය සිතේ තබාගෙනය. ඉන් අනතුරුව පෞද්ගලික ගුවන් නියමු පුහුණු පාසලකට ඇතුළත් වන ඇය එයින් පෞද්ගලික ගුවන් නියමු බලපත්‍රයත් (PPL) පසුව වාණිජ ගුවන් නියමු බලපත්‍රය (CPL) සහ ගුවන් මගී ප්‍රවාහන පුහුණුව ද ලබා ගත්තාය. ඒ සුදුසුකම්වලින් සන්නද්ධ වූ ඇය ශ්‍රී ලංකන් ගුවන් සමාගම කැඩේට් ගුවන් නියමුවරියන් පුහුණු කිරීම වෙනුවෙන් පළ කර තිබූ දැන්වීමක් දැක ඊට අයැදුම් කළාය. ඒ අනුව ඇතුළත් වීමේ පරීක්ෂණයකින් පසු 2013 වසරේදී කැඩේට් ගුවන් නියමුවරියක ලෙස ජාතික ගුවන් සේවය ඇතුළත් වන බිමාලි ඒ තුළින් විධිමත් පුහුණුවක් ලැබුවාය.
“ඒක ඉතාම විධිමත් පුහුණුවක්. 2013 අගෝස්තු ආරම්භ කළ පුහුණුව අවසන් වුණේ 2014 මාර්තු මාසයේදී. ඉන්පසු පළමු පියාසර නිලධාරි තනතුරේ වැඩ කරන්න පටන් ගත්තා. මේ වෙද්දි මම කපිතාන් තනතුරට පත් වෙලා අවුරුද්දයි මාසයක් වෙනවා. ”
ජීවිත රැසක වගකීම දරමින් ගුවන්යානයකින් ඉහළ අහසේ පියාසර කළ පළමු අවස්ථාව ගැන කපිතාන් බිමාලි දැනුදු සිහි කරන්නේ ආස්වාදනීය හැඟීමකිනි. 
” ඒ පළමු අත්දැකීම ගැන නම් විස්තර කරන්න වචන නැති තරම්. ගුවන් නියමු පුහුණු පාසලේ පුහුණුව ලබන කාලයේදී කෙටි දුරක් තනිවම (Solo) ගුවන්යානා අරගෙන යන්න අපිට අවස්ථාව ලැබෙනවා. එහෙම මුලින්ම ගුවනට යද්දි බියක්, තිගැස්මක් දැනුණත් ඉහළ අහසට ගියාම හරිම නිදහස් හැඟීමක් දැනුණා. ගුවන් නියමුවන් විදිහට පුහුණුව ලබන හැම කෙනකුගේම අන්තිම ඉලක්කය වෙන්නේ ජාතික ගුවන් සේවයට එක්වීමයි. ඒ විදිහට ශ්‍රී ලංකන් ගුවන් සේවයට සම්බන්ධ වෙලා මගී ගුවන් යානයක් පැද වූ මොහොත මට කවදාවත්ම අමතක වෙන්නෙ නැහැ. ඒ හැඟීම විස්තර කරන්න වචන නැහැ. මුලින්ම මම ගියේ ඉන්දියාවේ කොචින්වලටයි. “එතැන් සිට මේ දක්වා හැම ගුවන් ගමනක්ම විශේෂිත බවත් පැවසූ කපිතාන් බිමාලි, නිරන්තර අවධානය, වගකීම් සහිත බව සහ සැලකිලිමත්භාවය සිය වෘත්තීය ජීවිතයේ අංක එක ලෙස සලකන බව ද කීවාය.
” මම ගුවන් නියමුවරියක් වීමට පුහුණුව ලබන කාලයේ ශ්‍රී ලංකන් ගුවන් සේවයේ කාන්තා නියමුවරියන් පස් දෙනෙක් සිටියා. එය මගේ ගමනට පූර්වාදර්ශයක් වුණා. ශ්‍රී ලංකන් ගුවන් සේවයට බඳවා ගැනීම සඳහා පවත්වන විභාගය ඉතාම තරගකාරියි. 200 දෙනෙක් පමණ අයැදුම්කරුවන් අතරින් 8-14ක් වගේ සංඛ්‍යාවක් තමයි තෝරා ගන්නෙ. ඒ අතරින් කාන්තාවන් සංඛ්‍යාව ඉතා අඩුයි. ඒක ගුවන් සමාගමේ ප්‍රශ්නයක් නෙවෙයි. ඒකට හේතුව අපේ සමාජය තුළ තිබෙන ආකල්ප. බොහෝ දෙනා තවමත් හිතන්නෙ ගැහැනු ළමයෙකුට මේ ක්ෂේත්‍රය ගැළපෙන්නෙ නැහැ කියලා. මගේ කණ්ඩායමේ සිටි දොළොස් දෙනාගෙන් කාන්තාවකට හිටියෙ මම පමණයි. නමුත් කොයි වෙලාවකවත් මම හිතුවේ නැහැ කාන්තාවක් වීම අභියෝග ජයගන්න බාධාවක් කියලා. ගැහැනු, පිරිමි කියලා අපට පැවරෙන කාර්යයන්, වගකීම් වෙනස් වෙන්නෙ නැහැ. අප ඊට මුහුණ දෙන ආකාරයයි වැදගත් වන්නේ. ගුවන් නියමුවරියක් වීමේ සිහිනය සැබෑ කර ගන්නවාමයි කියන දැඩි අධිෂ්ඨානය මා තුළ තිබුණා. මම හිතන්නේ මගේ ආත්ම විශ්වාසය, මවුපියන්ගෙන් සහ සැමියාගෙන් ලැබුණු සහයෝගය, මගේ ආකල්ප සහ ජීවන ක්‍රමය ඒ සඳහා මූලික වශයෙන් බලපෑ කරුණු තුනයි.”
ඊට අමතරව වෘත්තීයට අදාළ දැනුම දියුණු කර ගැනීම, කාර්යක්ෂමභාවය ද ඕනෑම සිහිනයක් යථාර්ථයක් බවට පත් කර ගැනීම සඳහා ඉවහල් වන බව ද ඇය පවසන්නීය. මේ දක්වා කපිතාන් බිමාලි ජීවන්දර පැය 6,500ක් පමණ පියාසර කර තිබෙන අතර ඒ අතර වූ අමතක නොවන සිදුවීමක් මෙසේ සිහිපත් කළාය.
“ගුවන් නියමුවරියක් විදිහට පුහුණුව ලබන කාලයේ දවසක් බැංග්ලෝරය දක්වා ගිය ගුවන් ගමනකදි ගුවන්යානයේ බඳේ කුරුල්ලෙක් වැදිලා සුළු හානියක් වුණා. නමුත් ඒක හදාගෙන නැවත අපිට ලංකාවට එන්න ලැබුණේ දින දෙකකින් පමණ. එවැනි දෙයක් ගැන පෙර සූදානමක් ඇතිව ගියේ නැති නිසා නිල ඇඳුම හැර අමතර ඇඳුමක්වත් ගෙන ගොස් තිබුණේ නැහැ. ගුවන්යානයේ අලුත්වැඩියා කටයුතු සිදුවෙන අතරේ ඇඳුම් මිලදී ගන්නත් සිදු වුණා. ඒක අමතක නොවන අත්දැකීමක් වගේම එවැනි අවස්ථාවලට මුහුණ දෙන්න හොඳ අත්දැකීමකුත් වුණා”
ජාතික ගුවන් සේවයේ ගුවන් නියමුවන් ලෙස ඔවුහු සුරක්ෂිත ගුවන් ගමනක වගකීම දරනවා පමණක් නොව ශ්‍රී ලාංකේය අභිමානය ද ලොවට රැගෙන යන්නෝය. ඒ පිළිබඳ මගීන්ගෙන් ලැබෙන ප්‍රතිචාර ගැන ද අපි කපිතාන් බිමාලි ජීවන්දරගෙන් විමසුවෙමු.
“ගොඩක් හොඳ ප්‍රතිචාර ලැබෙනවා. ගුවන්යානය ගෙන යන්නේ කාන්තා ගුවන් නියමුවරියන් කියලා දැනගත්තාම ඇතැම් මගීන් ඒ මොහොතෙම ඔවුන්ගේ සතුට, පුදුමය පළ කරනවා වගේම අප දිරිමත් කරන ප්‍රතිචාර දක්වනවා. ඊටත් වඩා අප ශ්‍රී ලාංකික ගුවන් නියමුවරියන් ගැන බොහෝ විදේශිකයන් සතුට පළ කරනවා. ඒ වෙලාවට අපටත් රට ගැන ආඩම්බරයක්, අභිමානයක් දැනෙනවා. කපිතාන් බිමාලි ජීවන්දරගේ පියා මහින්ද ජීවන්දර විශ්‍රාමික යුද හමුදා අධිකාරිලත් නිලධාරියෙකි. මව පද්මා ජීවන්දර මේ වන විට අගනුවර ප්‍රකට පෞද්ගලික විදුහලක විදුහල්පතිනිය ලෙස කටයුතු කළ අතර, වසර 35කට අධික පළපුරුද්දක් ඇති ගුරුවරියකි. බිමාලිගේ එකම වැඩිමහල් සහෝදරිය තාමරසී ජීවන්දර විද්‍යාඥවරියක ලෙස ඔස්ට්‍රේලියාවේ ජීවත් වන්නීය. වෘත්තියෙන් ගුවන්යානා ඉංජිනේරුවරයකු වන පසන් උදලාගම කපිතාන් බිමාලිගේ සැමියාය. මේ වන විට 34 වැනි වියේ පසුවන කපිතාන් බිමාලි සිය වෘත්තීය ජීවිතයට මවුපියන්ගෙන් සහ සැමියාගෙන් ලැබෙන සහයෝගය සෙනෙහසින් සිහිපත් කළාය.
“විවාහයට පෙර මවුපියන්ගෙන් ලැබුණා වගේම විශාල සහයෝගයක් දැන් සැමියාගෙන් ලැබෙනවා. විශේෂයෙන් මගේ වෘත්තිය ගැන ඔහුට තියෙන දැනුම, අවබෝධය ඉතා ඉහළයි. ඒ නිසාම මගේ රැකියාවේ ස්වාභාවය, මගේ මානසික තත්ත්වය පවත්වාගෙන යා යුත්තේ කෙසේද කියන දේ ගැන ඔහු තුළ හොඳ අවබෝධයක් තිබීම විශාල පහසුවක්. ඒ නිසා රැකියාවත් පෞද්ගලික ජීවිතයත් සමබරව සතුටින් පවත්වාගෙන යන්න මට අවස්ථාව ලැබිලා තියෙනවා. ඒ වගේම මම ඉතා හොඳින් කාලය කළමනාකරණය කරගන්නවා. ඒ නිසා මට පෞද්ගලික කටයුතු, පවුලේ කටයුතු සහ වෙනත් අවස්ථා සඳහා සහභාගි වෙන්න කාලය තියෙනවා. ”
ගුවන් ගමනක් වැනි වගකීම් බහුල සංකීර්ණ වෘත්තියක නියැළීමේදී යම්කිසි ආතතියකට, පීඩනයකට මුහුණ දීමට සිදුවීම සාමාන්‍ය තත්ත්වයකි. එවැනි අවස්ථා පිළිබඳ කපිතාන් බිමාලි ජීවන්දර මෙසේ කීවාය.
“එවැනි ආතතියකට, පීඩනයකට මුහුණ දෙන අවස්ථා මගහරවා ගැනීමට මම නිතරම උත්සාහ කරනවා. ගුවන් ගමනක් අවසන් වුණාට පසු නිවෙසට යනතෙක් මම මනස සන්සුන් වන සංගීතයකට සවන් දෙනවා. ඒ වගේම විවේක වෙලාවට මම පොත් කියනවා. ගීත රස විඳිනවා. සැමියා එක්ක කොළඹින් පිට සංචාරය කිරීමත් මගේ විනෝදාංශයක්. ඒ වගේම මම ශාරීරික සුවතා සඳහාත් කාලයක් වැය කරනවා. එය කාන්තාවක් විදිහට නීරෝගී සිරුරක් පවත්වාගෙන යෑම සඳහා වගේම කායික මානසික සුවතාව සඳහාත් විශේෂයෙන් වැදගත් වෙනවා. ” 
ආත්ම විශ්වාසයෙන්, නැණ නුවණින් මෙන්ම රුවින් ද පොහොසත් කපිතාන් බිමාලි ජීවන්දර, කාන්තාවක සතු විය යුතු අපූර්වතම ශක්තිය ගැන මෙසේ පැවසුවාය.
“එකම අරමුණක් වෙනුවෙන් කැපවීම සහ ආත්ම ශක්තිය තමයි මගේ සාර්ථකත්වයට උදවු වුණේ. ඒ වගේම මවුපියන් මගේ අරමුණු තේරුම් අරගෙන උදව් කළේ නැත්නම් මම මෙතැන නැහැ. පාසලෙන් ලැබුණු වටිනාකම් ද මට ලොකු ශක්තියක් වුණා. උසස් පෙළ පන්ති භාරව සිටි බෙනික්නා ද සිල්වා ගුරුතුමිය මගේ ගුවන් නියමු සිහිනය ගැන හොඳින්ම දැන සිටියා. උසස් පෙළට විෂයන් තෝරගනිද්දි ඇය මට කිව්වේ මගේ ඒ අරමුණ කරා ළඟාවෙන්න උදව් වෙන විෂයන් හදාරන්න කියලයි. ඒ වගේම කාන්තා ගුවන් නියමුවරියක් වීමේ අවස්ථාව ලබාදුන් ශ්‍රී ලංකන් ගුවන් සමාගමට විශේෂයෙන් ස්තුතිවන්ත වෙනවා. ඒ වගේම මගේ පුහුණුකරුවන් සියලු දෙනාටත්, ජ්‍යෙෂ්ඨ කාන්තා කපිතාන්වරියන්ටත් කාර්ය මණ්ඩලයේ සියලු දෙනාටත් මගේ ස්තුතිය පුදකරනවා. අවසාන වශයෙන් මේ ක්ෂේත්‍රයට යොමු වීමට කැමති තරුණියන්ට කියන්නේ මෙය ඉතාම හොඳ ක්ෂේත්‍රයක්. එදාට වැඩිය මේ සඳහා යොමු වීමට ආයතන අද අපේ රටේ තියෙනවා. පිළිගත් එවැනි ආයතනයක් තුළින් විධිමත් පුහුණුවක් ලබා මේ ක්ෂේත්‍රයට යොමු වන්න. බය වෙන්න එපා, තමන්ගේ සිහින සැබෑ කරගන්න නම් ඒ වෙනුවෙන්ම කැප වෙන්න.”
ඡායාරූප- ශාන් රූපස්සර
සුරේකා නිල්මිණි ඉලංකෝන්